“23–29 septiembre. Galatas: “Chexb’eeq rub’el xwankil li Musiq’ej” ” Kim, Taaqehin—Choq’ re li Tzoleb’aal reheb’ li Kok’al: Li Ak’ Chaq’rab’ 2019 (2019)
“23–29 septiembre. Galatas,” Kim, Taaqehin—Choq’ re li Tzoleb’aal reheb’ li Kok’al: 2019
23–29 septiembre
Galatas
“Chexb’eeq rub’el xwankil li Musiq’ej’
Naq nakawil ru li hu Galatas, k’a’ru li musiq’ahom nakak’ul chirix li k’a’ru tento te’xtzol li kok’al sa’ laa tzoleb’aal?
Xtz’iib’ankil li nakak’oxla
Xkanab’ankileb’ chi wotzok
K’e junjunq k’asal reheb’ li kok’al re xyiib’ankil jun xjalam-uuch k’a’aq re ru xe’xtzol sa’ k’oxlak chirix li evangelio sa’ rochocheb’ malaj sa’ li iglees. Xokeb’ li jalam-uuch ut kanab’eb’ li kok’al chixyalb’al xq’ehinkil li k’a’ru naraj naxye li junjunq chi jalam-uuch.
Xk’utb’al li tzol’leb’
Kok’al toj ka’ch’ineb’ xyu’am
Li Santil Musiq’ej nikinixtenq’a chireek’ankil li rahok, sahil ch’oolejil, ut tuqtuukilal.
Eb’ li kok’al toj ka’ch’ineb’ xyu’am naru neke’xk’e reetal li naruuchi li Musiq’ej. A’an tixkawresiheb’ chixsik’b’al lix b’eresihom li Santil Musiq’ej chiru chixjunil lix yu’ameb’.
Kok’ k’anjel naru chi b’aanumank
-
K’uteb’ jalan jalanq ru ki’il q’een (malaj xjalam-uucheb’ a’an), ut kanab’eb’ li kok’al chixch’olob’ankil chan ru xsahil li junjunq. Ch’olob’ naq jo’eb’ li ru ki’il q’een jalan jalanqeb’ xsahil, naru naqeek’a li Santil Musiq’ej chi jalan jalanq ru, jo’ li rahok ut tuqtuukilal. Kanab’eb’ chixch’olob’ankil chan ru naq neke’reeka’ li Santil Musiq’ej.
Eb’ li kok’al chiru chixjunil lix chihab’eb’ naru neke’reek’a li naruuchi li Musiq’ej.
-
Il ru Galatas 5:22–23 rik’ineb’ li kok’al ut ch’olob’eb’ li aatin li ink’a’ neke’xnaw ru. Kanab’eb’ li junjunq chi kok’al chixsik’b’al ru jun reheb’ li naruuchi li Musiq’ej li nayeeman sa’eb’ li raqal a’an ut chi aatinak chirix junaq hoonal b’ar wi’ naq a’an xreek’a li ruuchinihom li Musiq’ej a’an. Kanab’eb’ li kok’al chixyiib’ankileb’ sa’ kok’ jalam-uuch lix numsihomeb’.
Li Jesukristo naraj naq tintenq’aheb’ li wankeb’ raajelil.
Li na’leb’ wan sa’ Galatas 6:2 a’an chanchan lix k’utum laj Alma natawman sa’ Mosiah 18:8 choq’ reheb’ li kristiaan li ak kub’eek re xha’eb’. Oksi li hoonal a’an re xtenq’ankileb’ li kok’al chixkawresinkileb’ rib’ choq’ reheb’ li sumwank re li kub’iha’.
Kok’ k’anjel naru chi b’aanumank
-
K’ut jun xjalam-uuch jun li ch’ina al li yoo chi kub’eek xha’ (jo’ li Libro de obras de arte del Evangelio, ajl 104). Patz’ reheb’ li kok’al k’a’ru yoo chixb’aanunkil li ch’ina xqa’al. Ch’olob’ naq rik’in li kub’iha’, naqab’aanu li sumwank malaj yeechi’ink. Il ru Galatas 6:2 malaj Mosiah 18:8 re xtenq’ankileb’ li kok’al chixtzolb’al jun reheb’ li k’a’aq re ru naqayeechi’i xb’aanunkil: chixk’amb’al qiiq chiqib’il qib’. Kanab’eb’ li kok’al chixyiib’ankileb’ sa’ jalam-uuch chan ru naru neke’xtenq’a li wankeb’ riiq.
-
Il ru choq’ reheb’ li kok’al li ch’ol aatin a’in Galatas 6:2: “Chetenq’a eerib’ cherib’il eerib’ chixk’amb’al lee riiq.” Re xk’utb’al li naraj naxye a’an, k’e re jun ch’ina al k’a’ruhaq jwal aal re naq taariiqa. Chirix a’an b’oq jun ch’ina al re naq tixtenq’a li jun chik chiriiqankil li k’a’aq re ru a’an. Ch’olob’ chiruheb’ li kok’al naq naab’al li k’a’aq re ru chanchaneb’ li iiq, jo’ li wank chi yaj malaj reek’ankil rahil ch’oolej malaj wank qajunes. K’a’ raj ru naru naqab’aanu re xtenq’ankil junaq li kristiaan wan riiq kama’an?
Li naqab’aanu, chaab’il malaj ink’a’ chaab’il, wan k’a’ru naxk’am chaq.
Aajel ru naq eb’ li kok’al te’xtaw ru naq li k’a’ru naqasik’ ru wan k’a’ru naxk’am chaq. Re xk’utb’esinkil li yaal a’an, naru nakawoksi Galatas 6:7–9.
Kok’ k’anjel naru chi b’aanumank
-
K’ut jun li iyaj ut jun li ru pim. Il ru Galatas 6:7–9 choq’ reheb’ li kok’al. Kanab’eb’ chixk’utb’al naq chanchan ta wi’ yookeb’ chirawb’al jun iyaj naq te’rab’i li aatin “awk.” Kanab’eb’ chixk’utb’al naq chanchan ta wi’ yookeb’ chixq’olb’al ru jun li che’ naq te’rab’i li aatin “q’olok.”
-
K’ut chiruheb’ li kok’al jalan jalanq ru che’ ut tenq’aheb’ chixtawb’aleb’ li riyajil li junjunq. K’eheb’ li iyaj sa’ jun li ch’ina sek’ ut kanab’eb’ li kok’al chixk’eeb’aleb’ xhoonal re xsik’b’al ru jun ut xyeeb’al k’a’ru li che’ taayo’laaq rik’in wi neke’raw. Tenq’aheb’ chirilb’al naq a’ yaal li iyaj na’awman a’an li ru taqaq’ol, a’ yaal li naqasik’ ru a’an li taachalq qe ut li osob’tesihom li taqak’ul.
-
K’e jun li juch’ sa’ li ch’och’ rik’in latzleb’. K’e jun lix naq’ uhej sa xch’ool sa’ xxuk li juch’ ut jun ra xch’ool sa’ li xxuk jun chik. Kanab’ jun li ch’ina al chi xaqliik sa’ xb’een li juch’ ut kanab’eb’ xkomoneb’ li kok’al chixyeeb’al k’a’ru nak’amok sa’ li sahil ch’oolej malaj sa’ li rahil ch’oolej (maare aajel ru naq laa’at ajwi’ taaye junjunq li eetalil). Rik’in li junjunq li sik’ok-u, ye re li ch’ina al wan sa’ xb’een li juch’ naq tixk’e jun yokb’ sa’ b’ar wi’ wan li sa xch’ool malaj li wan wi’ li ra xch’ool. B’aanu li ch’ina k’anjel a’an naab’al sut ut kanab’eb’ xkomoneb’ li kok’al chixk’eeb’al xhoonaleb’ re wan sa’ xb’een li juch’.
Xk’utb’al li tzol’leb’
Kok’al ak ninqeb’
Li Jesukristo nokorach’ab’.
Junjunqeb’ li kristiaan neke’xk’oxla naq lix evangelio li Jesukristo naxram li rach’ab’ankileb’. K’oxlan chirix chan ru taatenq’aheb’ li kok’al chirilb’al naq tz’aqal nokorach’ab’ chiru li maak ut li kamk.
Kok’ k’anjel naru chi b’aanumank
-
Kanab’eb’ li kok’al chirilb’al ru Galatas 5:1. Chan ru koorach’ab’ li Jesukristo re naq tooruuq chi q’ajk rik’in li qaChoxahil Yuwa’? K’uteb’ xjalam-uuch li Jesus naq yoo chaq chixk’ulb’al rahilal sa’ Getsemani ut xjalam-uuch lix waklijik chi yo’yo re xtenq’ankileb’ li kok’al chixtawb’al ru chan ru koorach’ab’ chiru li maak ut li kamk (chi’ilmanq Libro de obras de arte del Evangelio, ajl 56, 59).
-
B’ichahomaq sa’ komonil ut numsihomaq li raatinul jun li b’ich na’aatinak chirix li Kolonel, jo’ “Ninnaw naq yo’yo inKolonel” (Eb’ li b’ich, ajl 77). Kanab’eb’ li kok’al chixtawb’aleb’ aatin sa’ li b’ich li neke’xch’olob’ chan ru naq li Jesukristo naru nokorach’ab’ chiru li loq’b’il moosil sa’ musiq’ej.
Wi “ninb’eek sa’ li Musiq’ej” naru ninyal xsahil li “naruuchin li Musiq’ej.”
Chan ru taatenq’aheb’ li kok’al chixk’eeb’al reetal naq te’reek’a li Santil Musiq’ej?
Kok’ k’anjel naru chi b’aanumank
-
K’e reheb’ li junjunq chi kok’al jun ch’ina hu setb’il jo’ jun ru ki’il q’een ut kanab’eb’ chixtawb’al jun “li naruuchin li Musiq’ej” tz’iib’anb’il sa’ Galatas 5:22–23. Kanab’eb’ chixtz’iib’ankil jun reheb’ li naruuchi li Musiq’ej chiru jun li ch’ina hu ut jun li aatin li naxka’pak’ali ru a’an junpak’al chik. (Tenq’aheb’ chixtawb’aleb’ ru li aatin li ink’a’ neke’xnaw ru.) Kanab’eb’ chixwotzb’al uuchinihom xe’xsik’ ru sa’ li tzoleb’aaal.
-
Kanab’eb’ li kok’al chirilb’al ru chirixeb’ li ruuchinihom li Musiq’ej sa’ Galatas 5:22–23 ut chixtz’iib’ankil malaj xyiib’ankil jun li jalam-uuch chirix junaq hoonal b’ar wi’ li Santil Musiq’ej xk’e chireek’ankil jun reheb’ li uuchinihom a’an. Kanab’eb’ chixwotzb’al lix esileb’ malaj lix jalam-uucheb’ rik’in jun chik li kristiaan sa’ li tzoleb’aal. K’a’ut naq li uuchinihom a’an jun chaab’il tenq’ re xtawb’al ru chan ru naq nak’anjelak li Santil Musiq’ej qik’in?
Li naqab’aanu, li us malaj li ink’a’ us, wan k’a’ru na’xk’am chaq.
Tenq’aheb’ li kok’al chixtawb’al ru naq li k’a’ru nachal xb’aan chan ru nokowan wan naq nawulak sa’ junpaat, ut wan naq nawulak “sa’ xq’ehil” (raqal 9).
Kok’ k’anjel naru chi b’aanumank
-
Ilomaq ru sa’ komonil Galatas 6:7–9. Kanab’eb’ li kok’al chixyiib’ankileb’ kok’ jalam-uuch b’ar wi’ anihaq yooq chirawb’al riyajil jun ki’il q’een ut tixq’ol jalan li ruuchinihom. K’a’ut naq ink’a’ naru nak’ulman a’an? Chan ru naq li xsik’b’al ru li ink’a’ us ut xk’ulb’al li k’a’ru chaab’il moko naru ta ajwi’ nak’ulman?
-
Jo’ tzoleb’aal, yiib’omaq jun li laberinto jo’ li wan sa’ li perel re kok’ k’anjel re li xamaan a’in. Kanab’eb’ li kok’al chixk’oxlankileb’ aatin jalaneb’ chiru li wankeb’ sa’ li laberinto li te’reetali li chaab’il eek’ahom nachal xb’aan li Santil Musiq’ej, malaj, li k’a’ru ink’a’ us naru neke’xb’aanu li naru chi najtob’resink re li Santil Musiq’ej. Aatinanqex chirixeb’ li k’a’ru nachal xb’aan xsik’b’aleb’ ru li ink’a’ us xe’xk’oxla.
-
Kanab’eb’ li kok’al chixtusb’al ru junjunqeb’ li osob’tesihom neke’royb’eni xk’ulb’al rik’in li qaChoxahil Yuwa’. Tenq’aheb’ chixk’oxlankileb’ li “iyaj” tento te’raw re “xq’olb’aleb’ ” li osob’tesihom a’an.
Xb’oqb’aleb’ chi tzolok sa’ kab’l
Kanab’eb’ li kok’al chi ab’ink re naq te’xk’e reetaleb’ li k’a’ru chaab’il nachal, malaj li “uuchinihom,” li nachal xb’aan xsik’b’al ru li k’a’ru us chiru li xamaan a’in. Ye reheb’ naq sa’ li xamaan chal re te’ruuq chixwotzb’al lix numsihomeb’.
Xchaab’ilob’resinkil li qak’utum
Jaleb’ li kok’ k’anjel a’ yaal lix chihab’eb’ li kok’al. K’e xhoonaleb’ li kok’al re tz’aqonk, a’b’an chijultiko’q aawe naq lix nawomeb’ najala a’ yaal lix chihab’eb’. Eb’ li kok’al maare te’raj xkomon xtenq’eb’ ut xb’eresinkileb’. Naq eb’ li kok’al yooqeb’ chi k’iik, te’ruuq chi tenq’ank chi us ut maare chi jo’kan moko ch’a’ajaq ta chik chiruheb’ xwotzb’al li neke’xk’oxla. (Chi’ilmanq Li k’utuk jo’ li Kolonel, 25–26.)