laj Pablo naq yoo chixtz’iib’ankil jun li hu

5–11 agosto

Romanos 1–6

“A’an xnimal xwankil li Dios re xkolb’al chixjunileb’ ”

K’a’ru li musiq’ahom nakak’ul naq nakawil ru Romanos 1–6? Eb’ li musiq’ahom a’an naru nakate’xtenq’a chixsik’b’aleb’ ru li na’leb’ re k’utuk.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Kanab’eb’ li kok’al chixwotzb’al li k’a’ru xe’xb’aanu re xsumenkil a’ yaal k’a’ru lix b’oqb’aleb’ xak’e sa’ li tzolok re li xamaan xnume’. Qayehaq, ma xe’aatinak rik’in lix junkab’aleb’ chirix lix sub’ik li jukub’ li nayeeman resil sa’ Hechos 27 ut chirix xtaaqenkil li profeet?

reetalil li k’utuk

Xk’utb’al li tzol’leb’

Kok’al toj ka’ch’ineb’ xyu’am

Romanos 1:16–17

Naru nink’ut lin paab’aal chirix li Jesukristo naq nintaaqe a’an.

Laj Pablo kixk’ut naq li evangelio wan xwankil re xk’eeb’al xkolb’al chixjunil li nawan rik’in paab’aal chirix li Jesukristo. Chan ru naru nakatenq’aheb’ li kok’al chixk’utb’al lix paab’aaleb’ chirix li Jesukristo rik’in xtaaqenkil?

Kok’ k’anjel naru chi b’aanumank

• Tenq’aheb’ li kok’al chixtawb’al Roma sa’ jun li reetalil li ch’och’. Ch’olob’ naq li hu Romanos a’an jun li hu kixtz’iib’a laj Pablo choq’ reheb’ laj santil paab’anel aran Roma re xtenq’ankileb’ chixtawb’aleb’ ru li na’leb’ re li evangelio, jo’ li paab’aal.

• Il ru Romanos 1:17 choq’ reheb’ li kok’al ut tenq’aheb’ chixkanab’ankil sa’ xk’a’uxleb’ li ch’ol aatin “Li tiik xch’ool twanq xyu’am xb’aan li xpaab’aal.” Naru nakak’e reheb’ li junjunq chi kok’al jun li aatin re li ch’ol aatin ut taapatz’ reheb’ naq te’xye naq taak’ut chawuq’. Ch’olob’ naq li ch’ol aatin a’an naraj naxye naq tento toowanq rajlal kutan rik’in paab’aal chirix li Jesukristo. Ma neke’xnaw li kok’al k’a’ru li paab’aal? K’ut jun lix jalam-uuch li Jesukristo ut ch’olob’ naq naqapaab’ naq a’an tz’aqal yo’yo us ta ink’a’ qilom ru. A’an li paab’aal—xpaab’ankil k’a’ruhaq us ta ink’a’ qilom ru.

• Ch’olob’ naq naqak’ut li qapaab’aal chirix li Jesukristo naq noko’ab’in chiru. Muq sa’ li tzoleb’aal xjalam-uucheb’ li kristiaan li yookeb’ chixb’aanunkil li k’a’ru naraj li Jesus naq taqab’aanu. Kanab’eb’ li kok’al chixk’eeb’al xhoonaleb’ chirib’ileb’ rib’ chixtawb’aleb’ ut chixch’olob’ankileb’ li jalam-uuch. K’a’ru naru naqab’aanu re xtaaqenkil li Jesus?

• Tz’ap li ru jun reheb’ li kok’al ut k’am xb’e sa’ li tzoleb’aal b’ar wi’ wan lix jalam-uuch li Jesus. Kanab’eb’ li junjunq chi kok’al chixb’aanunkil ajwi’ a’an. Tenq’aheb’ li kok’al chixtawb’al ru naq naru neke’xtaaqe lix k’utum li Jesus jo’ naq xe’xtaaqe laa b’eresihom laa’at.

Romanos 6:1–11

Naq nakub’e qaha’ a’an chanchan chik wulak jo’ jun ak’ kristiaan.

Eb’ li kok’al li nakatzoleb’ yookeb’ chixkawresinkil rib’ choq’ re li kub’iha’. K’a’ru naru neke’xtzol chirix li kub’iha’ sa’ lix k’utum laj Pablo naq “choowanq sa’ ak’ yu’am”?

Kok’ k’anjel naru chi b’aanumank

• Kanab’eb’ li kok’al chixka’sutinkil li ch’ol aatin “Choowanq sa’ ak’ yu’am” (Romanos 6:4). Ch’olob’ naq rik’in li kub’iha’, neke’kuye’ li qamaak. Naru nokoxik chi uub’ej rik’in xsik’b’al ru li us, xjalb’al qak’a’uxl naq naqab’aanu li ink’a’ us, ut xyalb’al qaq’e chi wulak jo’ tz’aqal li Jesus. Oksi li perel re kok’ k’anjel re li xamaan a’in re xk’utb’al chiruheb’ li kok’al naq li kub’iha’ nokoxtenq’a chi wulak jo’ jun ak’ kristiaan.

• Ye reheb’ li kok’al k’a’ru xaweek’a laa’at naq xkub’e aaha’, ut kanab’eb’ chixwotzb’al lix numsihomeb’ naq xe’wulak chaq sa’ jun kub’iha’. Kanab’eb’ chixyiib’ankil jun xjalam-uucheb’ ajwi’ a’an sa’ lix kutankileb’ chalel re lix kub’iha’eb’, ut chixwotzb’al li naru neke’xb’aanu re xkawresinkileb’ rib’ re a’an.

• B’icha rik’ineb’ li kok’al jun li b’ich chirix li kub’iha’, jo’ “Naq nakub’e lin ha’ ” (B’ichleb’aal choq’ reheb’ li Kok’al, 53). K’a’ru naqatzol chirix li kub’iha’ sa’ li b’ich a’an?

xkub’iha’ jun li ch’ina al

Li kub’iha’ nareetali lix tiklajik jun li ak’ yu’am jo’ xtzolom li Kristo.

reetalil li k’utuk

Xk’utb’al li tzol’leb’

Kok’al ak ninqeb’

Romanos 1:16–17

Naru nink’ut lin paab’aal chirix li Jesukristo rik’in xtaaqenkil a’an.

Laj Pablo kixk’ut naq li evangelio wan xwankil re xk’eeb’al xkolb’al chixjunil li nawan rik’in paab’aal chirix li Jesukristo. Li paab’aal a’an xb’een raqal chi na’leb’ re li evangelio. Naxwaklesi qach’ool chixpaab’ankileb’ li taqlahom. Chan ru naru nakatenq’aheb’ chi chaab’il li kok’al chixtawb’al ru li paab’aal?

Kok’ k’anjel naru chi b’aanumank

• Patz’ re jun li ch’ina al naq tixtaw Roma sa’ jun reetalil li ch’och’. Tenq’aheb’ li kok’al chixtawb’al ru naq chiruheb’ li xamaan chalkeb’ re, te’xtzol li hu kixtz’iib’a laj Pablo choq’ reheb’ li komon re li Iglees sa’ jalan jalanq li na’ajej, xtikib’ankil rik’in lix hu choq’ reheb’ laj Romano.

• Tz’iib’a li aatin wan sa’ Romanos 1:16 sa’ li pizarron, rik’in xjalb’al junjunq li aatin rik’ineb’ li juch’. Patz’ reheb’ li kok’al naq te’xsik’ li raqal sa’eb’ li loq’laj hu ut te’xnujob’resi xsa’eb’ li juch’. K’ut li ch’ol aatin “Xb’aan naq ink’a’ ninxutaanak chixpuktesinkil lix evangelio li Kristo,” ut kanab’eb’ li kok’al chixwotzb’al li k’a’ru naraj naxye li ch’ol aatin a’an choq’ reheb’.

• Kanab’ jun li ch’ina al chirilb’al ru chi kaw xyaab’ xkux Romanos 1:17, ut patz’ reheb’ xkomon li kok’al naq te’rab’i chi us re xtawb’al jun li aatin naka’sutiman. K’a’ru naraj naxye “twanq xyu’am xb’aan li xpaab’aal”? Tenq’aheb’ li kok’al chixtawb’al jun xch’olob’ankil li paab’aal sa’ junaq li tenq’ jo’ li K’utul Raqal reheb’ li Loq’laj Hu, “Paab’aal.” Chan raj ru jalan li qayu’am wi ta maak’a’ li paab’aal chirix li Jesukristo?

• K’ut chiruheb’ li kok’al jun li ch’ina che’ ut jun li iyaj, ut patz’ reheb’ chan ru naqatenq’a jun li iyaj chi wulak jo’ jun li che’. Ch’olob’ naq rik’in rawb’al ut xt’aqresinkil jun li iyaj, naqak’ut naq wan qapaab’aal naq taak’iiq. Chan ru naqak’ut naq wan qapaab’aal chirix li Jesukristo? Jo’ xkomon li ch’ina k’anjel a’in, b’ichahomaq jun li b’ich li na’aatinak chirix li paab’aal, jo’ “Li paab’aal” (B’ichleb’aal choq’ reheb’ li Kok’al, 50–51).

Romanos 3:23–24

Chiqajunilo naqaj ru li Jesukristo re naq te’kuye’q li qamaak.

Laj Pablo kiraj naq eb’ laj Romano te’xtaw ru naq li kolb’a-ib’ ka’ajwi’ nachal rik’in li Jesukristo ut li rusilal. K’oxlan chirix chan ru naru nakak’ut li yaal a’an chiruheb’ li kok’al.

Kok’ k’anjel naru chi b’aanumank

• Kanab’ jun li ch’ina al chirilb’al ru Romanos 3:23–24. K’a’ru neke’xk’ut li raqal a’an naq neke’xk’oxla li kok’al? Ch’olob’ naq li “usilal” sa’ li raqal 24 na’aatinak chirix li maatan re lix rahom ut li ruxtaan li Kolonel, li naqak’ul wi’ xkuyb’aleb’ li qamaak.

• T’uyub’ jun li saa’us malaj jun li jalam-uuch sa’ jun na’ajej taqenaq malaj sa’ junaq chik na’ajej b’ar wi’ ink’a’ te’xtaw li kok’al yal xjuneseb’ rib’. Kanab’eb’ chixyalb’al xtawb’al ut juntaq’eeta a’an rik’in li naxk’ut laj Pablo sa’ Romanos 3:23. Chirix a’an tenq’aheb’ chixtawb’al. K’a’ru xb’aanuhom li Kolonel choq’ qe li ink’a’ naru naqab’aanu laa’o qajunes? Kanab’eb’ li kok’al chixwotzb’al li neke’reek’a chirix li Kolonel naq neke’xk’oxla li k’a’ru xb’aanuhom a’an choq’ reheb’.

Romanos 6:1–11

Naq nakub’e qaha’ a’an chanchan chik wulak jo’ jun ak’ kristiaan.

Laj Pablo kixk’ut naq li kub’iha’ nareetali lix kamik ut lix waklijik chi yo’yo li Kristo. Nareetali ajwi’ lix “kamik” li qakristiaanil aj maak ut li waklesiik re naq “toowanq sa’ ak’ yu’am” (Romanos 6:4). Naqa’ak’ob’resi li qateneb’ankil re wank sa’ ak’ yu’am rajlal naq nokotz’aqon sa’ li loq’laj wa’ak.

Kok’ k’anjel naru chi b’aanumank

• Kanab’ jun laj tzolonel chirilb’al ru Romanos 6:3–6. K’a’ru nareetali li kub’iha’, jo’ kixye laj Pablo?

• K’oxlahomaq rix chan ru naq li kub’iha’ nareetali li kamk ut li wakliik chi yo’yo. K’oxla xk’utb’al li video “El bautismo de Jesús” (LDS.org). K’a’ut naq li kamk ut li wakliik chi yo’yo a’aneb’ xchaab’il reetalil li nak’ulman naq nakub’e qaha’?

• Ilomaqeb’ ru sa’ komonil li rosob’tesinkil li loq’laj wa’ak (chi’ilmanq Tz. ut S. 20:77, 79). Jultika reheb’ li kok’al naq rik’in xk’ulb’al li loq’laj wa’ak, naqa’ak’ob’resi li teneb’ahom qak’ulum chaq naq xkub’e qaha’ re xtaaqenkil li Jesukristo. Chan ru naq li loq’laj wa’ak nokoxtenq’a chi “wank sa’ ak’ yu’am”?

• Kanab’eb’ li kok’al chixyiib’ankileb’ jalam-uuch li te’reetaliheb’ li naraj naxye choq’ reheb’ li “wank sa’ ak’ yu’am.” Eb’ li kok’al naru neke’xt’uyub’ sa’ lix warib’aaleb’ re xtenq’ankileb’ chixjultikankil naq te’xsik’ ru li k’a’ru us.

reetalil li tzolok

Xb’oqb’aleb’ chi tzolok sa’ kab’l

Waklesiheb’ xch’ool li kok’al chixpatzb’al reheb’ li komon sa’eb’ lix junkab’al naq te’xye resil reheb’ naq te’rileb’ chixb’aanunkil k’a’ruhaq li naxk’ut lix paab’aal.

Xchaab’ilob’resinkil li qak’utum

K’e chi k’iik lix paab’aaleb’ li kok’al. Re xtenq’ankileb’ li kok’al chi wank xpaab’aaleb’ re naq te’ruuq chixtzolb’al li evangelio xjuneseb’ rib’, k’eheb’ xsahil xch’ooleb’ naq te’tz’aqonq sa’ li tzoleb’aal.

perel re kok’ k’anjel: kub’eek ha’