« ថ្ងៃទី ២១–២៧ ថែស្សាឡូនីច ទី១ និង ទី២ ៖ ‹ កុំឲ្យអ្នករាល់គ្នាឆាប់មានគំនិតរវើរវាយ ឬថប់ព្រួយអ្វី › » ចូរមកតាមខ្ញុំ—សម្រាប់ថ្នាក់បឋមសិក្សា ៖ ព្រះគម្ពីរសញ្ញាថ្មី ឆ្នាំ ២០១៩ ( ២០១៩ )
« ថ្ងៃទី ២១–២៧ ថែស្សាឡូនីច ទី១ និង ទី២ » ចូរមកតាមខ្ញុំ—សម្រាប់ថ្នាក់បឋមសិក្សា ៖ ព្រះគម្ពីរសញ្ញាថ្មី ឆ្នាំ ២០១៩
ថ្ងៃទី ២១–២៧ ខែ តុលា
ថែស្សាឡូនីចទី១ និង ទី២
« កុំឲ្យអ្នករាល់គ្នាឆាប់មានគំនិតរវើរវាយ ឬថប់ព្រួយអ្វី »
នៅពេលអ្នកអាន ថែស្សាឡូនីច ទី១ និង ទី២ ដោយគិតដល់កុមារប្រកបដោយការអធិស្ឋាន អ្នកនឹងរកឃើញគោលការណ៍នានា ដែលពួកគេចាំបាច់ត្រូវយល់ ។
កត់ត្រាចំណាប់អារម្មណ៍របស់បងប្អូន
អញ្ជើញឲ្យចែកចាយ
នៅក្នុងមេរៀនកាលពីសប្ដាហ៍មុន តើអ្នកបានអញ្ជើញកុមារឲ្យអនុវត្តតាមអ្វីដែលពួកគេបានរៀន នៅតាមរបៀបមួយចំនួនដែរឬទេ ? សូមទុកឲ្យកុមារប្រើពីរបីនាទីដំបូងនៃថ្នាក់រៀនសប្ដាហ៍នេះ ដើម្បីចែកចាយបទពិសោធន៍របស់ពួកគេ ។
បង្រៀនគោលលទ្ធិ
កុមារតូចៗ
នៅពេលខ្ញុំធ្វើតាមព្រះបញ្ញត្តិទាំងឡាយរបស់ព្រះ ខ្ញុំនឹងត្រៀមខ្លួនរួចរាល់សម្រាប់ការយាងមកជាលើកទីពីររបស់ព្រះយេស៊ូវគ្រីស្ទ ។
ដំបូន្មានរបស់ប៉ុលអាចជួយយើងឲ្យត្រៀមខ្លួនរួចរាល់ ហើយចាំមើលទិវាដ៏មហស្ចារ្យនៅពេលព្រះអង្គសង្គ្រោះយាងមកផែនដីម្ដងទៀត ។
សកម្មភាពដែលអាចជ្រើសរើស
-
សូមអញ្ជើញម្ដាយមួយរូបឲ្យនិយាយអំពីអារម្មណ៍របស់គាត់ ក្នុងការទន្ទឹងរង់ចាំទារករបស់គាត់កើតមក ដោយមិនដឹងពិតប្រាកដថា ពេលណាទារកនោះកើតមកឡើយ ។ សូមអាន ថែស្សាឡូនីច ទី១ ៥:២–៣ រួចប្រាប់កុមារថា ព្រះយេស៊ូវគ្រីស្ទនឹងយាងមកផែនដីម្ដងទៀត ប៉ុន្តែគ្មាននរណាដឹងយ៉ាងប្រាកដទេ—ដូចម្ដាយដែលមិនដឹងថាទារករបស់គាត់នឹងកើតមកពេលណាដែរ ។
-
សូមឲ្យកុមារនិយាយអំពីគ្រាដែលពួកគេបានត្រៀមខ្លួន ដើម្បីធ្វើដំណើរ ឬចូលរួមព្រឹត្តិការណ៍ណាមួយ ។ តើពួកគេបានធ្វើដើម្បីរៀបចំខ្លួន ? សូមនាំយកវ៉ាលី ឬកាតាប រួចឲ្យកុមារធ្វើជារៀបចំខោអាវដាក់ដើម្បីរៀបចំសម្រាប់ការធ្វើដំណើរ ឬព្រឹត្តិការណ៍ណាមួយ ។ សូមពន្យល់ថា យើងត្រៀមខ្លួនទទួលព្រះយេស៊ូវគ្រីស្ទយាងមកម្ដងទៀត ដោយការអធិស្ឋាន ការអានព្រះគម្ពីរ ការធ្វើតាមព្យាការី និងការរស់នៅដោយសុចរិតជារៀងរាល់ថ្ងៃ ។ សូមឲ្យកុមារគូររូបអំពីរបៀបដែលពួកគេអាចធ្វើដូចនេះបាន រួចដាក់ចូលទៅក្នុងវ៉ាលី ។
-
សូមអាន ថែស្សាឡូនីច ទី១ ៥:៦ ឲ្យសិស្សស្ដាប់ រួចពន្យល់ថា ប្រសិនបើយើងមិនត្រៀមខ្លួនទទួលការយាងមកម្ដងទៀតរបស់ព្រះយេស៊ូវទេ វាហាក់ដូចជាយើងបានដេកលក់ ហើយយើងមិនបានត្រៀមខ្លួនសម្រាប់ទ្រង់ឡើយ ។ សូមអញ្ជើញកុមារឲ្យធ្វើជាដេកលក់ ។ សូមពន្យល់ថា ប្រសិនបើយើងពិតជាត្រៀមខ្លួន វាហាក់ដូចជាយើងមិនដេកលក់ ហើយរង់ចាំទ្រង់ ។ សូមអញ្ជើញពួកគេឲ្យក្រោកឡើង ។ សូមច្រៀងជាមួយគ្នានូវបទ « ពេលទ្រង់យាងមកម្តងទៀត » ( សៀវភៅចម្រៀងកុមារ ទំព័រ ៤៦–៤៧ ) ។
ប៉ុលបានបង្រៀនថា ការក្បត់សាសនាមួយនឹងកើតឡើងនៅពីមុនព្រះយេស៊ូវគ្រីស្ទយាងមកម្ដងទៀត ។
សាសនាចក្រដែលព្រះយេស៊ូវគ្រីស្ទបានស្ថាបនា បានធ្លាក់ទៅក្នុងការក្បត់សាសនានៅទីបំផុត មានន័យថា សិទ្ធិអំណាចបព្វជិតភាព និងសេចក្ដីពិតនៃដំណឹងល្អ ត្រូវបានដកចេញពីផែនដី ។ ប៉ុលបានព្យាករថា « ការក្បត់សាសនា » នេះ នឹងកើតឡើងនៅពីមុនព្រះអង្គសង្គ្រោះយាងមកជាលើកទីពីរ ។
សកម្មភាពដែលអាចជ្រើសរើស
-
បន្ទាប់ពីបានអាន ថែស្សាឡូនីច ទី២ ២:៣ ជាមួយកុមារ សូមប៉មមួយពីពែងក្រដាស ។ សូមប្រាប់កុមារថា ពែងក្រដាសតំណាងឲ្យបំណែកសំខាន់ៗនៃសាសនាចក្រដ៏ពិត មានដូចជាសេចក្ដីពិតនៃដំណឹងល្អ បព្វជិតភាព ពិធីផ្សារភ្ជាប់ក្នុងព្រះវិហារបរិសុទ្ធ និងព្យាការី ។ បន្ទាប់ពីប៉ុល និងសាវកដទៃទៀតបានស្លាប់ អ្វីទាំងអស់នេះបានបាត់បង់ ហើយសាសនាចក្រដ៏ពិតពុំបានមានវត្តមាននៅលើផែនដីអស់រយៈពេលជាច្រើនឆ្នាំ ។ សូមអញ្ជើញកុមារឲ្យអង្រួនប៉ម រួចពន្យល់ថា ការធ្វើដូចនេះត្រូវបានហៅថា « ការក្បត់សាសនា » ។ នៅពេលព្រះយេស៊ូវបាននាំយកសាសនាចក្ររបស់ទ្រង់មកវិញ វាត្រូវបានហៅថា ការស្តារឡើងវិញ ។ ( សូមមើល « ការក្បត់សាសនា » ពិតចំពោះសេចក្ដីជំនឿ ទំព័រ ៣–៤ ) ។
-
សូមដាក់បង្ហាញព្រះគម្ពីរមរមន និងរូបភាពព្យាការី និងព្រះវិហារបរិសុទ្ធ ។ សូមអញ្ជើញកុមារឲ្យថាពាក្យ « ការក្បត់សាសនា » នៅពេលអ្នកលាក់របស់នៅក្នុងថង់ និងថា « ការស្ដារឡើងវិញ » នៅពេលអ្នកយករបស់នោះចេញមកវិញ ។
-
សូមច្រៀងចម្រៀងដែលបង្រៀនសេចក្ដីពិត ដែលត្រូវបានដកចេញអំឡុងការក្បត់សាសនា និងត្រូវបានស្ដារឡើងវិញនៅជំនាន់របស់យើង ដូចជា « ខ្ញុំជាកូនរបស់ព្រះ » « សាសនាចក្រព្រះយេស៊ូវគ្រីស្ទ និង « ខ្ញុំចូលចិត្តមើលព្រះវិហារបរិសុទ្ធ » និង ( សៀវភៅចម្រៀងកុមារ ទំព័រ ២–៣, ៤៨, ៩៩ ) ។
បង្រៀនគោលលទ្ធិ
កុមារធំៗ
នៅពេលខ្ញុំធ្វើតាមព្រះបញ្ញត្តិទាំងឡាយរបស់ព្រះ ខ្ញុំនឹងត្រៀមខ្លួនរួចរាល់សម្រាប់ការយាងមកជាលើកទីពីររបស់ព្រះយេស៊ូវគ្រីស្ទ ។
ដំបូន្មានរបស់ប៉ុលអាចជួយយើងឲ្យត្រៀមខ្លួនរួចរាល់ ហើយចាំមើលទិវាដ៏មហស្ចារ្យនៅពេលព្រះអង្គសង្គ្រោះយាងមកផែនដីម្ដងទៀត ។
សកម្មភាពដែលអាចជ្រើសរើស
-
សូមអញ្ជើញកុមារម្នាក់ឲ្យអាន ថែស្សាឡូនីច ទី១ ៥:១–៦ ខណៈពេលដែលកុមារដទៃទៀតអានតាម ។ បន្ទាប់ពីអានចប់ខគម្ពីរនីមួយៗ សូមឲ្យកុមារសង្ខេបសេចក្ដីដែលពួកគេគិតថាខគម្ពីរនេះបានប្រាប់ ។ អ្នកអាចនឹងចង់ពន្យល់ថា « ថ្ងៃនៃព្រះអម្ចាស់ » មានន័យថា ការយាងមកជាលើកទីពីររបស់ព្រះយេស៊ូវគ្រីស្ទ ។ ហេតុអ្វីបានជាកុមារគិតថា ការយាងមកជាលើកទីពីរ ត្រូវបានប្រៀបធៀបទៅនឹងចោរដែលមកនៅពេលយប់ ឬស្ត្រីដែលមានកូន ?
-
សូមប្រាប់កុមារឲ្យស្រមៃថា ព្រះអង្គសង្គ្រោះនឹងយាងមកក្នុងថ្នាក់របស់ពួកគេនៅថ្ងៃណាមួយ ។ តើយើងអាចរៀបចំថ្នាក់រៀនរបស់យើង ទទួលការយាងមករបស់ទ្រង់តាមរបៀបណា ? សូមជួយកុមារឲ្យគិតអំពីកិច្ចការនានា ដែលយើងអាចធ្វើដើម្បីរៀបចំខ្លួនយើង សម្រាប់ទិវាដែលព្រះយេស៊ូវគ្រីស្ទនឹងយាងមក ។ ឧទាហរណ៍ យើងអាចប្រែចិត្ត អភ័យទោស បង្កើនមិត្តភាពជាមួយក្រុមគ្រួសារ ធ្វើតាមព្យាការី ហើយរក្សាសេចក្ដីសញ្ញារបស់យើង ។ សូមលើកទឹកចិត្តកុមារឲ្យជ្រើសរើសកិច្ចការមួយដែលពួកគេនឹងធ្វើ ដើម្បីរៀបចំខ្លួនទទួលព្រះអង្គសង្គ្រោះនៅពេលទ្រង់យាងមក ។
ប៉ុលបានបង្រៀនថា ការក្បត់សាសនាមួយនឹងកើតឡើងនៅពីមុនព្រះយេស៊ូវគ្រីស្ទយាងមកម្ដងទៀត ។
ប្រសិនបើកុមារយល់ថា សាសនាចក្ររបស់ព្រះយេស៊ូវគ្រីស្ទ និងដំណឹងល្អរបស់ទ្រង់ ត្រូវបានដកចេញពីផែនដីអំឡុងការក្បត់សាសនាដ៏ធំ នោះភាពចាំបាច់នៃការស្ដារឡើងវិញនឹងកាន់តែមានភាពច្បាស់លាស់សម្រាប់ពួកគេ ។
សកម្មភាពដែលអាចជ្រើសរើស
-
សូមអញ្ជើញកុមារម្នាក់អាន ថែស្សាឡូនីច ទី២ ២:១–៣ ។ យោងតាមខគម្ពីរទាំងនេះ តើមានអ្វីត្រូវកើតឡើងពីមុន « ថ្ងៃនៃព្រះអម្ចាស់ » ដែលមានន័យថា ការយាងមកជាលើកទីពីរនោះ ? តើកុមារដឹងអំពីអត្ថន័យនៃ « ការក្បត់សាសនា » ឬទេ ? សូមប្រាកដថា កុមារយល់អំពីអត្ថន័យថាវាមានន័យជា ការក្បត់សាសនាដ៏ធំ ដែលបានកើតឡើងបន្ទាប់ពីការស្លាប់របស់ពួកសាវករបស់ព្រះអង្គសង្គ្រោះ ។ អ្នកអាចនឹងចង់ចែកចាយព័ត៌មានចេញពី « ការក្បត់សាសនា » ពិតចំពោះសេចក្ដីំជំនឿ ទំព័រ ទំព័រ ៣–៤ ។
-
សូមជួយកុមារឲ្យសរសេរនៅលើក្ដារខៀន អំពីសេចក្ដីពិតមួយចំនួន និងពរជ័យដែលយើងអររីករាយដោយសារតែដំណឹងល្អ ។ ( ឧទាហរណ៍មួយចំនួនអាចរួមមានព្រះវិហារបរិសុទ្ធ ព្យាការី បព្វជិតភាព និង អំណោយទានជាព្រះវិញ្ញាណបរិសុទ្ធ ) ។ សូមលុបពាក្យទាំងនេះម្ដងមួយៗ រួចសួរកុមារថា តើជីវិតរបស់ពួកគេនឹងមានសភាពខុសពីនេះយ៉ាងដូចម្ដេច ប្រសិនបើគ្មានពិធីបរិសុទ្ធទាំងនេះទេនោះ។ សូមពន្យល់ថា សេចក្តីពិតទាំងនេះបានបាត់បង់អំឡុងការក្បត់សាសនា ។ ហេតុអ្វីបានជាវាមានសារៈសំខាន់ ដែលសាសនាចក្រនៃព្រះយេស៊ូវគ្រីស្ទត្រូវតែបានស្ដារឡើងវិញ នៅលើផែនដីនៅថ្ងៃចុងក្រោយ ? សូមអញ្ជើញកុមារឲ្យ « ស្ដារ » ឬសរសេរសេចក្ដីពិត និងពរជ័យនានានៅលើក្ដារខៀន ។
ព្រះវរបិតាសួគ៌សព្វព្រះទ័យឲ្យខ្ញុំធ្វើការ ។
តើអ្នកអាចជួយកុមារឲ្យចាត់ទុកការងារថាជាពរជ័យ មិនមែនជាអ្វីមួយដែលត្រូវគេចចេញ យ៉ាងដូចម្ដេច ?
សកម្មភាពដែលអាចជ្រើសរើស
-
សូមអញ្ជើញកុមារឲ្យដាក់វេនគ្នាអានខគម្ពីរចេញពី ថែស្សាឡូនីច ទី២ ៣:៧–១៣ ហើយស្វែងរកបញ្ហាដែលពួកបរិសុទ្ធជួបប្រទះ ។ ហេតុអ្វីបានជាព្រះវរបិតាសួគ៌សព្វព្រះទ័យឲ្យយើងធ្វើការ ? តើអ្វីដែលនឹងកើតឡើង ប្រសិនបើយើងមិនរៀនដើម្បីខិតខំធ្វើការទេនោះ ? សូមឲ្យកុមារដាក់វេនគ្នាសម្ដែងធ្វើជាការធ្វើការងារផ្ទះ ខណៈពេលកុមារដទៃទៀតទាយថា តើពួកគេកំពុងធ្វើអ្វី ។
-
សូមអញ្ជើញកុមារឲ្យនិយាយអំពីគ្រាមួយ ដែលពួកគេបានខិតខំធ្វើការងារ គម្រោង ឬគោលដៅណាមួយ ។ តើពួកគេមានអារម្មណ៍ដូចម្ដេចអំពីខ្លួនពួកគេ នៅពេលពួកគេបានបញ្ចប់ការងារទាំងនោះ ? តើឃ្លាថា « កុំឲ្យរសាយចិត្តខាងឯការល្អឡើយ » មានន័យដូចម្ដេច ? ( ថែស្សាឡូនីច ទី២ ៣:១៣ ) ។
លើកទឹកចិត្តឲ្យមានការរៀនសូត្រនៅឯគេហដ្ឋាន
សូមអញ្ជើញកុមារឲ្យប្រាប់សមាជិកគ្រួសារ ឬមិត្តម្នាក់ អំពីមូលហេតុដែលពួកគេមានអំណរគុណសម្រាប់ដំណឹងល្អ ដែលមានលើផែនដីសព្វថ្ងៃនេះ ( ទំព័រសកកម្មភាពសប្ដាហ៍នេះ អាចជួយពួកគេឲ្យចងចាំបាន ) ។
ការកែលម្អការបង្រៀនរបស់យើង
គាំទ្រឪពុកម្ដាយរបស់កុមារ ។ « ឪពុកម្ដាយគឺជាគ្រូបង្រៀនដំណឹងល្អដ៏សំខាន់បំផុតសម្រាប់កូនចៅរបស់ពួកគេ—ពួកគេមានទាំងទំនួលខុសត្រូវជាចម្បង និងអំណាចដ៏អស្ចារ្យក្នុងការមានឥទ្ធិពលទៅលើកូនចៅរបស់ពួកគេ ( សូមមើល ចោទិយកថា ៦:៦–៧ ) ។ កាលអ្នកបង្រៀនកុមារនៅឯព្រះវិហារ សូមអធិស្ឋានស្វែងរករបៀបគាំទ្រដល់ឪពុកម្ដាយរបស់ពួកគេនៅក្នុងតួនាទីដ៏ចាំបាច់ហើយសំខាន់របស់ពួកគេ » ( ការបង្រៀនតាមរបៀបរបស់ព្រះអង្គសង្គ្រោះ ទំព័រ ២៥ ) ។