« ថ្ងៃទី ២៨ ខែ តុលា ឆ្នាំ–ថ្ងៃទី ៣ ខែ វិច្ឆិកា ធីម៉ូថេ ទី១ និង ទី២ ទីតុស ភីលេម៉ូន ៖ ‹ ចូរធ្វើជាគំរូដល់ពួកអ្នកជឿ › » ចូរមកតាមខ្ញុំ—សម្រាប់ថ្នាក់បឋមសិក្សា ៖ ព្រះគម្ពីរសញ្ញាថ្មី ឆ្នាំ ២០១៩ ( ឆ្នាំ ២០១៩ )
« ថ្ងៃទី ២៨ ខែ តុលា ឆ្នាំ–ថ្ងៃទី ៣ ខែ វិច្ឆិកា ធីម៉ូថេ ទី១ និង ទី២ ទីតុស ភីលេម៉ូន » ចូរមកតាមខ្ញុំ—សម្រាប់ថ្នាក់បឋមសិក្សា ៖ ព្រះគម្ពីរសញ្ញាថ្មី ឆ្នាំ ២០១៩
ថ្ងៃទី ២៨ ខែ តុលា ឆ្នាំ–ថ្ងៃទី ៣ ខែ វិច្ឆិកា
ធីម៉ូថេទី១ និង ទី២ , ទីតុស, ភីលេម៉ូន
« ចូរធ្វើជាគំរូដល់ពួកអ្នកជឿ »
សូមសិក្សាប្រកបដោយអធិស្ឋាននៅក្នុង ធីម៉ូថេទី១ និង ទី២ , ទីតុស និង ភីលេម៉ូន ដើម្បីរៀនអំពីរបៀបដែលអ្នកអាចប្រើសំបុត្រទាំងនេះ ដើម្បីបង្រៀនកុមារនៅក្នុងសេចក្ដីសុចរិត ( សូមមើល ធីម៉ូថេ ទី២ ៣:១៦ ) ។
កត់ត្រាចំណាប់អារម្មណ៍របស់បងប្អូន
អញ្ជើញឲ្យចែកចាយ
សូមឲ្យកុមារប្រាប់អំពីថា តើនរណាគឺជា « គំរូដល់ពួកអ្នកជឿ » ដ៏ល្អសម្រាប់ពួកគេ ។ តើពួកគេធ្វើដូចម្ដេចដើម្បីធ្វើជាគំរូដ៏ល្អសម្រាប់ពួកគេ ?
បង្រៀនគោលលទ្ធិ
កុមារតូចៗ
ធីម៉ូថេ ទី១ ៣:១–២, ទីតុស ១:៧–៩
ប៊ីស្សពដឹកនាំវួដក្នុងនាមជាអ្នកបម្រើរបស់ព្រះ ។
ប៉ុលបានបង្រៀនធីម៉ូថេ និងទីតុសអំពីសារៈសំខាន់របស់ប៊ីស្សព ។ តើអ្នកអាចបង្រៀនកុមារអំពីការងាររបស់ប៊ីស្សពយ៉ាងដូចម្ដេច ? ( ប្រធានសាខាត្រូវបានប្រៀបធៀបទៅនឹងប៊ីស្សព ) ។
សកម្មភាពដែលអាចជ្រើសរើស
-
សូមគូររូបប៊ីស្សពរបស់អ្នកនៅលើក្ដារខៀន ។ សូមឲ្យកុមារចែកចាយនូវអ្វីដែលពួកគេដឹងអំពីប៊ីស្សព ។ តើគាត់មានលក្ខណៈដូចម្ដេច ? តើគាត់ធ្វើអ្វីខ្លះ ? តើគាត់ផ្ដល់ពរដល់វួដដូចម្ដេចខ្លះ ? ( អ្នកអាចរកឃើញលក្ខណៈសម្បត្តិរបស់ប៊ីស្សពនៅក្នុង ធីម៉ូថេ ទី១ ៣:១–២ និង ទីតុស១:៧–៩ ) ។ នៅពេលកុមារចែកចាយយោបល់របស់ពួកគេ សូមសរសេរនៅលើចម្រៀកក្រដាស រួចឲ្យកុមារបិទនៅលើក្ដារខៀនក្បែររូបដែលអ្នកបានគូរ ។
ប៊ីស្សពត្រូវបានហៅឲ្យផ្ដល់ការដឹកនាំខាងវិញ្ញាណដល់សមាជិកវួដ ។
-
សូមសរសេរកាតព្វកិច្ចរបស់ប៊ីស្សពនៅលើក្រដាស—ដូចជាការទទួលដង្វាយមួយភាគក្នុងដប់ និងដង្វាយតមអាហារ ការផ្ដល់ការហៅបម្រើ ការសម្ភាសសមាជិក ការជួយជនក្រីក្រ និងអ្នកខ្វះខាត និងការអធិស្ឋានសម្រាប់មនុស្សដទៃ ។ សូមដាក់ក្រដាសទាំងនេះនៅក្នុងចានគោមមួយ រួចអញ្ជើញកុមារឲ្យចាប់យកម្នាក់មួយៗ ។ បន្ទាប់មក សូមជួយកុមារឲ្យសម្ដែងកាតព្វកិច្ចទាំងនេះជាមួយអ្នក ។ សូមចែកចាយទីបន្ទាល់ថា ប៊ីស្សពរបស់អ្នកត្រូវបានហៅដោយព្រះ ។
-
សូមអញ្ជើញកុមារឲ្យគូររូបប៊ីស្សព កំពុងបម្រើសមាជិកវួដ ។ សូមណែនាំឲ្យពួកគេផ្ដល់រូបដែលពួកគេបានគូរទៅដល់គាត់ ដើម្បីថ្លែងអំណរគុណគាត់ ។ តើយើងអាចធ្វើអ្វីខ្លះដើម្បីជួយដល់គាត់ ?
ខ្ញុំអាចធ្វើជា « គំរូដល់ពួកអ្នកជឿ » ។
តើអ្នកអាចធ្វើដូចម្ដេច ដើម្បីបំផុសគំនិតកុមារឲ្យមានទំនុកចិត្តទៅលើសមត្ថភាពរបស់ពួកគេ ដើម្បីធ្វើជា « គំរូដល់ពួកអ្នកជឿ » ?
សកម្មភាពដែលអាចជ្រើសរើស
-
សូមច្រៀងជាមួយកុមារនូវបទ « ធ្វើតាមដូចខ្ញុំធ្វើ » ( សៀវភៅចម្រៀងកុមារ ទំព័រ ១៤៨ ) ។ សូមឲ្យកុមារធ្វើតាមគំរូរបស់អ្នក ដោយធ្វើតាមសកម្មភាពដែលអ្នកធ្វើ ។ សូមឲ្យកុមារដាក់វេនគ្នាដឹកនាំកុមារទាំងអស់ ដើម្បីធ្វើតាមសកម្មភាពរបស់ពួកគេ ។ សូមអាន ធីម៉ូថេ ទី១ ៤:១២ រួចសួរកុមារថា តើពួកគេអាចធ្វើដូចម្ដេច ដើម្បីធ្វើជាគំរូល្អសម្រាប់មនុស្សដទៃ ។
-
សូមចែកចាយបទពិសោធន៍នៅពេលដែលអ្នកបានព្យាយាមធ្វើជាគំរូល្អដល់នរណាម្នាក់ ឬនៅពេលនរណាម្នាក់បានធ្វើជាគំរូល្អដល់អ្នក ។ សូមជួយកុមារឲ្យយល់ថា នៅពេលពួកគេធ្វើជាគំរូល្អ ពួកគេអាចជួយសមាជិកគ្រួសារ និងមិត្តភក្ដិរបស់ពួកគេ ។
ព្រះគម្ពីរនឹងជួយយើងឲ្យរៀនសេចក្ដីពិត ។
ប្រសិនបើអ្នកជួយកុមារឲ្យរៀនស្រឡាញ់ព្រះគម្ពីរ នោះអ្នកនឹងផ្ដល់ពរដល់ជីវិតរបស់ពួកគេសម្រាប់ពេលខាងមុខ ។
សកម្មភាពដែលអាចជ្រើសរើស
-
សូមបង្ហាញព្រះគម្ពីរ រួចជួយកុមារឲ្យស្គាល់ព្រះគម្ពីរទាំងនោះ តាមរយៈការបង្ហាញពួកគេនូវទំព័រចំណងជើងនៃព្រះគម្ពីរប៊ីប ព្រះគម្ពីរមរមន គោលលទ្ធិ និង សេចក្តីសញ្ញា និង មុក្តាដ៏មានតម្លៃមហិមា ។ សូមអញ្ជើញកុមារម្នាក់ឲ្យកាន់ព្រះគម្ពីរទាំងនេះ នៅពេលអ្នកអាន ធីម៉ូថេ ទី២ ៣:១៥–១៧ ។ សូមពន្យល់ថា ព្រះវរបិតាសួគ៌បានត្រាស់បង្គាប់ព្យាការីពេញមួយប្រវត្តិសាស្ត្រ ឲ្យសរសរសេចក្ដីពិតនានា ដែលទ្រង់បានបើកសម្ដែងដល់ពួកលោក ។ យើងអាចស្គាល់សេចក្ដីពិតទាំងនេះ នៅពេលយើងអានព្រះគម្ពីរ ។
-
សូមឲ្យកុមារប្រាប់អំពីទ្រព្យសម្បត្តិរបស់ពួកគេដែលមានតម្លៃខ្ពស់បំផុត ។ តើពួកគេធ្វើដូចម្ដេចជាមួយទ្រព្យសម្បត្តិនោះ ? សូមឲ្យពួកគេដាក់វេនគ្នាកាន់ព្រះគម្ពីរ រួចបើកទំព័រដោយប្រុងប្រយ័ត្ន ។ តើយើងប្រើព្រះគម្ពីរដើម្បីធ្វើអ្វី ? ហេតុអ្វីបានជាយើងថែទាំព្រះគម្ពីរឲ្យបានល្អ ? សូមជួយកុមារឲ្យបង្កើតសកម្មភាពនានា អមជាមួយបទចម្រៀងអំពីព្រះគម្ពីរ ដូចជាបទ « ស្វែងរក គិត និង អធិស្ឋាន » ឬ « រឿងក្នុងគម្ពីរមរមន » ( សៀវភៅចម្រៀងកុមារ ទំព័រ ៦៦ ៦២ ) ។
បង្រៀនគោលលទ្ធិ
កុមារធំៗ
ខ្ញុំអាចធ្វើជា « គំរូដល់ពួកអ្នកជឿ » ។
ធីម៉ូថេទីគឺជាអ្នកដឹកនាំសាសនាចក្រវ័យក្មេង ប៉ុន្តែប៉ុលមានបំណងឲ្យគាត់ដឹងថា គាត់នៅតែអាចធ្វើជាគំរូបាន ។ អ្នកអាចជួយកុមារដែលអ្នកបង្រៀនឲ្យមានទំនុកចិត្ត លើសមត្ថភាពរបស់ពួកគេដើម្បីធ្វើជាគំរូល្អ ។
សកម្មភាពដែលអាចជ្រើសរើស
-
សូមអានទាំងអស់គ្នានៅក្នុង ធីម៉ូថេ ទី១ ៤:១២ រួចឲ្យកុមារស្វែងរករបៀបទាំងប្រាំមួយដែលប៉ុលបានថ្លែង ដែលយើងអាចធ្វើជា « គំរូដល់ពួកអ្នកជឿ » ។ សូមចែកកុមារឲ្យធ្វើការជាដៃគូ ហើយសូមឲ្យដៃគូនីមួយៗគិតអំពីស្ថានភាពមួយ ដែលពួកគេអាចធ្វើជាគំរូដល់ពួកអ្នកជឿ ។ សូមឲ្យពួកគេសម្ដែងស្ថានភាពរបស់ពួកគេ សម្រាប់កុមារទាំងអស់ក្នុងថ្នាក់ ។
-
សូមសួរកុមារថា តើពួកគេចង់ចែកចាយបទពិសោធន៍ណាមួយ ដែលពួកគេបានព្យាយាមធ្វើជាគំរូល្អដល់មនុស្សដទៃឬទេ ។ សូមប្រាប់ពួកគេអំពីរបៀបដែលពួកគេបានធ្វើគំរូដល់មនុស្សដទៃចំពោះអ្នក និងរបៀបដែលអ្នកបានកត់ចំណាំអំពីពួកគេ ក្នុងការធ្វើជាគំរូល្អដល់មនុស្សដទៃ ។
ខ្ញុំគួរតែស្រឡាញ់អ្វីៗដែលអស់កល្បជានិច្ចឲ្យបានច្រើនជាងប្រាក់ ។
នៅក្នុងលោកិយដែលមនុស្សកាន់តែមានភាពសម្ភារនិយមច្រើនទៅៗ តើអ្នកអាចជួយកុមារឲ្យរក្សាការផ្ដោតអារម្មណ៍ និងសេចក្ដីស្រឡាញ់របស់ពួកគេ ទៅលើព្រះវរបិតាសួគ៌ និងព្រះយេស៊ូវគ្រីស្ទ យ៉ាងដូចម្ដេច ?
សកម្មភាពដែលអាចជ្រើសរើស
-
សូមអញ្ជើញកុមារឲ្យប្រាប់អំពីអ្វីដែលពួកគេនឹងធ្វើ ប្រសិនបើពួកគេមានប្រាក់ទាំងអស់ក្នុងលោកិយនេះ ។ សូមអញ្ជើញកុមារឲ្យអាន ធីម៉ូថេ ទី១ ៦:៧–១២ រួចសូមឲ្យកុមារសង្ខេបសេចក្ដីដែលប៉ុលបានបង្រៀន ដល់ធីម៉ូថេអំពីប្រាក់ ។ បន្ទាប់មក សូមអញ្ជើញកុមារឲ្យអានខគម្ពីរទាំងនេះម្ដងទៀត ដោយស្វែងរកសេចក្ដីទាំងឡាយដែលប៉ុលបានលើកឡើង ថាមានតម្លៃថ្លៃជាងប្រាក់ទៅទៀត ។
-
សូមបង្ហាញរូបភាពនៃរបស់ខាងលោកិយ ( ដូចជាប្រាក់ ប្រដាប់ក្មេងលេង ឬការកម្សាន្ត ) និងរបស់ខាងភាពអស់កល្ប ( ដូចជាក្រុមគ្រួសារ និងព្រះវិហារបរិសុទ្ធ ) ។ សូមអញ្ជើញកុមារឲ្យរៀបរូបភាពជាពីរគំនរ—របស់ទាំងឡាយដែលនាំឲ្យយើងខិតកាន់តែជិតព្រះគ្រីស្ទ និងរបស់ទាំងឡាយដែលអាចបង្អាក់យើងពីព្រះគ្រីស្ទ ប្រសិនបើយើងស្រឡាញ់វាខ្លាំងជាងទ្រង់ ។ ហេតុអ្វីបានជា « ការដែលស្រឡាញ់ប្រាក់ … ជាមេឫសនៃសេចក្តីអាក្រក់គ្រប់យ៉ាង » ?
ព្រះវរបិតាសួគ៌បានប្រទានព្រះគម្ពីរដើម្បីជួយយើងដឹងសេចក្ដីពិតចេញពីកំហុស ។
កុមារអាចមានបទពិសោធន៍ពរជ័យមកពីការអានព្រះគម្ពីរ ។ នៅពេលអ្នកបង្រៀនកុមារអំពីព្រះគម្ពីរ សូមស្វែងរករបៀបនានាដើម្បីលើកទឹកចិត្តពួកគេ ឲ្យមានបទពិសោធន៍ផ្ទាល់ខ្លួនដ៏មានអានុភាពជាមួយនឹងព្រះបន្ទូលព្រះ ។
សកម្មភាពដែលអាចជ្រើសរើស
-
សូមអញ្ជើញកុមារអាន ធីម៉ូថេ ទី២ ៣:១៥–១៧ ។ សូមនាំយករូបភាពមួយដែលពន្យល់អំពីរឿងមួយ ចេញពីព្រះគម្ពីរនីមួយក្នុងចំណោមបទដ្ឋានព្រះគម្ពីរទាំងបួន រួចដាក់រូបភាពទាំងនោះនៅក្នុងប្រអប់បិទជិត ។ សូមអញ្ជើញកុមារបីបួននាក់ ឲ្យចាប់យករូបភាពមួយ រួចប្រាប់រឿងរបស់វា ។ សូមសួរកុមារថា តើពួកគេអាចចែកចាយ អ្វីមួយផ្សេងទៀតអំពីព្រះគម្ពីរនោះដែរឬទេ ។ តើព្រះគម្ពីរ « អាចនឹងនាំឲ្យ [ យើង ] មានប្រាជ្ញាដល់ទីសង្គ្រោះ » បានតាមរបៀបណា ?
-
សូមអញ្ជើញកុមារឲ្យចែកចាយបទគម្ពីរដែលពួកគេចូលចិត្ត ឬបទពិសោធន៍មួយនៅពេលដែលសេចក្ដីពិតមួយនៅក្នុងព្រះគម្ពីរបានជួយពួកគេ ។ អ្នកអាចចែកចាយខគម្ពីរ ឬបទពិសោធន៍ផ្ទាល់ខ្លួនបាន ។
-
សូមអញ្ជើញកុមារម្នាក់អាន មរ៉ូណៃ ១០:៤–៥ ។ តើមរ៉ូណៃបានសន្យាដូចម្ដេចនៅក្នុងខគម្ពីរទាំងនេះ ? សូមសួរកុមារថា តើពួកគេបានធ្វើអ្វីខ្លះ ដើម្បីបង្កើនទីបន្ទាល់ដែលថា ព្រះគម្ពីរគឺជាការពិត ។ សូមអញ្ជើញពួកគេឲ្យអាន ឬស្ដាប់ព្រះគម្ពីរជារៀងរាល់ថ្ងៃ ។
លើកទឹកចិត្តឲ្យមានការរៀនសូត្រនៅឯគេហដ្ឋាន
សូមអញ្ជើញកុមារឲ្យចែកចាយជាមួយក្រុមគ្រួសាររបស់ពួកគេ នូវអ្វីដែលពួកគេបានរៀនអំពីព្រះគម្ពីរ រួចស្វែងរកបទគម្ពីរមួយដែលពួកគេអាចចែកចាយជាមួយមិត្តរួមថ្នាក់នៅសប្ដាហ៍ក្រោយ ( ដោយមានជំនួយពីឪពុកម្ដាយ ប្រសិនបើចាំបាច់ ) ។
ការកែលម្អការបង្រៀនរបស់យើង
កែសម្រួលសកម្មភាពឲ្យស្របទៅនឹងតម្រូវការ ។ ជំនួសឲ្យការមើលតាមគម្រោងមេរៀនទាំងនេះទុកជាការណែនាំដែលអ្នកត្រូវតែធ្វើតាម នោះសូមប្រើវាជាធនធានមួយនៃយោបល់ដើម្បីបណ្ដុះជាការបំផុសគំនិតផ្ទាល់ខ្លួនអ្នក នៅពេលអ្នកពិចារណាអំពីសេចក្ដីត្រូវការរបស់កុមារដែលអ្នកបង្រៀន ។ អ្នកអាចកែសម្រួលសកម្មភាពនានា ដើម្បីបង្រៀនកុមារបានគ្រប់អាយុទាំងអស់ ។