« ថ្ងៃទី ១៨–២៤ ខែ វិច្ឆិកា យ៉ាកុប ៖ ‹ ចូរឲ្យអ្នករាល់គ្នាប្រព្រឹត្តតាមព្រះបន្ទូលទៅ កុំឲ្យគ្រាន់តែស្តាប់ប៉ុណ្ណោះ › »ចូរមកតាមខ្ញុំ—សម្រាប់ថ្នាក់បឋមសិក្សា ៖ ព្រះគម្ពីរសញ្ញាថ្មី ឆ្នាំ ២០១៩ ( ឆ្នាំ ២០១៩ )

« ថ្ងៃទី ១៨–២៤ ខែ វិច្ឆិកា យ៉កុប » ចូរមកតាមខ្ញុំ—សម្រាប់ថ្នាក់បឋមសិក្សា ៖ ឆ្នាំ ២០១៩

អ័ប្រាហាំនៅលើវាលទំនាបមេម ដោយ ហ្គ្រាន រ៉មនី ក្លសុន

ថ្ងៃទី ១៨–២៤ ខែ វិច្ឆិកា ។

យ៉ាកុប

« ចូរឲ្យអ្នករាល់គ្នាប្រព្រឹត្តតាមព្រះបន្ទូលទៅ កុំឲ្យគ្រាន់តែស្តាប់ប៉ុណ្ណោះ »

សំបុត្ររបស់យ៉ាកុបមាននូវសេចក្តីពិតជាច្រើនដែលអាចផ្តល់ពរដល់កុមារដែលអ្នកបង្រៀន ។ សូមធ្វើតាមការបំផុសគំនិតពីព្រះវិញ្ញាណដើម្បីកំណត់ថា តើសេចក្តីពិតណាមួយដែលអ្នកនឹងចែកចាយជាមួយពួកគេ ។ គំនិតយោបល់នៅក្នុងគម្រោងមេរៀននេះក៏អាចជួយបានផងដែរ ។

កត់ត្រាចំណាប់អារម្មណ៍របស់បងប្អូន

អញ្ជើញឲ្យចែកចាយ

សូមអញ្ជើញកុមារឲ្យចេកចាយគោលការណ៍ដំណឹងល្អមួយ ដែលពួកគេចងចាំពីការរៀនជាមួយក្រុមគ្រួសាររបស់ពួកគេអំឡុងសប្តាហ៍មុន ឬការរៀនមកពីថ្នាក់បឋមសិក្សារបស់ពួកគេកាលពីថ្ងៃអាទិត្យមុន ។ បន្ទាប់ពីកុមារម្នាក់ចែកចាយរួច សូមអញ្ជើញឲ្យកុមារផ្សេងទៀតនៅក្នុងថ្នាក់សង្ខេបអ្វីដែលបានចែកចាយ ។

បង្រៀនគោលលទ្ធិ

កុមារតូចៗ

យ៉ាកុប ១:៥–៦

ខ្ញុំអាចទូលសូមដល់ព្រះវរបិតាសួគ៌ឲ្យជួយខ្ញុំ ឲ្យរៀនអ្វីដែលពិត ។

សូមជួយកុមារដែលអ្នកបង្រៀនយល់ថា ពួកគេអាចងាកបែរទៅរកព្រះវរបិតាសួគ៌ទូលសូមប្រាជ្ញា ។ ការធ្វើបែបនេះ នឹងផ្តល់ពរដល់ពួកគេយ៉ាងមហិមា នៅពេលពួកគេប្រឈមមុខនឹងសំណួរពិបាកៗ ។

សកម្មភាពដែលអាចជ្រើសរើស

សូមជួយកុមារឲ្យរៀនឃ្លាថា « តែបើអ្នករាល់គ្នាណាមួយខ្វះប្រាជ្ញា មានតែសូមដល់ព្រះ » ( យ៉ាកុប ១:៥ ) ។ តើយើងសួរសំណួរដល់ព្រះដោយរបៀបណា ? តើទ្រង់ឆ្លើយតបដល់យើងយ៉ាងដូចម្ដេច ?
សូមបង្ហាញរូបភាពមួយនៃការនិមិត្តដំបូង ( សៀវភៅរូបភាពដំណឹងល្អ លេខ ៩០ ) ហើយចែកចាយអំពីរបៀបដែលការអាន យ៉ាកុប ១:៥ បានបំផុសគំនិតដល់យ៉ូសែប ស្ម៊ីធ ឲ្យទូលសួរព្រះវរបិតាសួគ៌ជួយលោកជាមួយនឹងសំណួរមួយ ( សូមមើល យ៉ូសែប ស៊្មីធ—ប្រវត្តិ ១:១–១៥ ) ។ សូមចែកចាយទីបន្ទាល់របស់អ្នកថា ព្រះឆ្លើយតបការអធិស្ឋាន ហើយថ្លែងទីបន្ទាល់ថា កុមារអាចអធិស្ឋានទៅកាន់ទ្រង់ នៅពេលពួកគេមានសំណួរ ។ សូមឲ្យកុមារគូររូបដោយខ្លួនពួកគេផ្ទាល់នូវរូប យ៉ូសែប ស៊្មីធ កំពុងអាន យ៉ាកុប ១:៥ និងការអធិស្ឋានទៅកាន់ព្រះវរបិតាសួគ៌ ។

យ៉ាកុប ៣:១–១៣

ខ្ញុំអាចនិយាយពាក្យសម្តីល្អៗ ។

ដូចយ៉ាកុបបានថ្លែងទីបន្ទាល់ ការរៀននិយាយតែពាក្យសម្តីល្អៗដល់អ្នកដទៃ នឹងជួយពួកយើងឲ្យក្លាយកាន់តែដូចជាព្រះយេស៊ូវគ្រីស្ទ ( សូមមើល យ៉ាកុប ៣:២ ) ។

សកម្មភាពដែលអាចជ្រើសរើស

សូមនាំយកអ្វីដែលផ្អែមៗ និងអ្វីដែលជូរៗមកឲ្យកុមារភ្លក់ ។ សូមជួយពួកគេឲ្យយល់ថា យើងគួរតែប្រើប្រាស់ពាក្យសម្តីរបស់យើងនិយាយពាក្យផ្អែមល្ហែម ( ឬពាក្យល្អៗ ) ហើយកុំនិយាយពាក្យគំរោះគំរើយ ( ឬមិនល្អ ) ឡើយ ( សូមមើល យ៉ាកុប ៣:១០ ) ។ សូមជួយពួកគេឲ្យគិតអំពីគំរូនៃរឿងល្អៗដែលយើងអាចនិយាយទៅកាន់មនុស្សដទៃ ។
សូមឲ្យកុមារម្នាក់ៗនូវរូបគំនូរសាមញ្ញមួយអំពីបុគ្គលម្នាក់កំពុងនិយាយ ។ សូមអញ្ជើញកុមារឲ្យកាន់រូបភាពនោះឡើងលើ នៅពេលអ្នកនិយាយពាក្យល្អៗដែលអណ្តាតរបស់យើងអាចធ្វើបាន ( ដូចជាប្រាប់ការពិត និយាយសរសើរ និងផ្តល់ជំនួយដល់នរណម្នាក់ ) ហើយដាក់រូបភាពនោះចុះ នៅពេលអ្នកនិយាយអ្វីដែលពួកយើងពុំគួរនិយាយដោយអណ្តាតរបស់យើង ( ដូចជានិយាយកុហក ហៅឈ្មោះមនុស្សដទៃផ្សេងទៀត និងជំទាស់ធ្វើតាមឪពុកម្តាយ ) ។
ដើម្បីពង្រឹងដល់សារលិខិតនៃ យ៉ាកុប ៣:១–១៣ ដោយការច្រៀងចម្រៀងមួយបទជាមួយគ្នាអំពីការមានចិត្តល្អ ដូចជាបទ « ចិត្តល្អចាប់ផ្តើមនឹងខ្ញុំ » ( សៀវភៅចម្រៀងកុមារ លេខ ៨៦ ) ។ សូមផ្តល់យោបល់ថា កុមារធ្វើ « ក្រឡចិត្តល្អ » មួយ ដែលពួកគេអាចដាក់បំពេញក្នុងក្រឡនោះជាមួយនឹងគ្រាប់ក្រួស ឬវត្ថុតូចៗផ្សេងទៀត នៅពេលពួកគេនិយាយពាក្យល្អៗទៅកាន់នរណាម្នាក់ ។

យ៉ាកុប ៥:៧–១១

ពរជ៧យរបស់ព្រះមួយចំនួនតម្រូវឲ្យមានចិត្តអត់ធ្មត់ ។

ចិត្តអត់ធ្មត់ពុំកើតមកដោយឯកឯងជានិច្ចនោះឡើយ ជាពិសេសសម្រាប់កុមារ ។ សូមគិតអំពីរបៀបដែលអ្នកអាចប្រើប្រាស់ការទូន្មានរបស់យ៉ាកុប ដើម្បីជួយកុមារដែលអ្នកបង្រៀនឲ្យរៀនមានចិត្តអត់ធ្មត់ ។

សកម្មភាពដែលអាចជ្រើសរើស

សូមជួយឲ្យកុមារគិតអំពីគ្រានានាដែលពួកគេត្រូវតែរង់ចាំអ្វីមួយដែលពួកគេពិតជាចង់បាន ។ សូមពន្យល់ថា ការរង់ចាំអ្វីមួយដែលយើងចង់បានដោយគ្មានការរអ៊ូរទាំត្រូវបានហៅថាចិត្តអត់ធ្មត់ ។
សូមសង្ខេប យ៉ាកុប ៥:៧ ជាពាក្យសម្តីផ្ទាល់របស់អ្នក ហើយបង្ហាញរូបភាពគ្រាប់ពូជ ឬកូនឈើតូចៗ ។ ហេតុអ្វីយើងត្រូវការអត់ធ្មត់នៅពេលយើងដាំដើមឈើ ? តើនឹងមានអ្វីកើតឡើង ប្រសិនបើយើងព្យាយាមទាញកូនឈើតូចៗនោះដើម្បីឲ្យវាលូតលាស់បានលឿននោះ ? សូមថ្លែងទីបន្ទាល់ថា ព្រះមានពរជ័យជាច្រើនសម្រាប់ពួកយើង ប៉ុន្តែពរជ៧យមួយចំនួនតម្រូវឲ្យមានចិត្តអត់ធ្មត់ ។
សូមចែកចាយរឿងរបស់យ៉ូប ដែលមាននៅក្នុង យ៉ាកុប ៥:១១ឲ ដែលជាឧទាហរណ៍អំពីចិត្តអត់ធ្មត់ ( សូមមើល « ជំពូកទី ៤៦ ៖ យ៉ូប » ដំណើររឿងព្រះគម្ពីរសញ្ញាចាស់ ទំព័រ ១៦៥–១៦៩ ឬវីដេអូដែលដូចគ្នានេះនៅលើគេហទំព័រ LDS.org ) ។ តើយ៉ូបបានទទួលពរជ័យដោយព្រោះការមានភាពចិត្តអត់ធ្មត់យ៉ាងដូចម្ដេច ?

បង្រៀនគោលលទ្ធិ

កុមារធំៗ

យ៉ាកុប ១:៥–៦

ព្រះវរបិតាសួគ៌នឹងជួយខ្ញុំឲ្យរៀនអំពីសេចក្តីពិត ប្រសិនបើខ្ញុំស្វែងរកជំនួយពីទ្រង់ ។

ទោះបីជាកុមារដែលអ្នកបង្រៀនហាក់ដូចជាក្មេងៗក្តី ពួកគេគ្រាន់តែក្មេងជាងយ៉ូសែប ស្ម៊ីធ តែពីរបីឆ្នាំប៉ុណ្ណោះ កាលលោកបានអាន យ៉ាកុប ១:៥ ហើយត្រូវបានបំផុសគំនិតឲ្យទៅរកព្រះវរបិតាសួគ៌តាមរយៈការអធិស្ឋាន ។ សូមពិចារណាពីរបៀបដែលអ្នកអាចជួយកុមារដែលអ្នកបង្រៀនឲ្យស្ថាបនាសេចក្តីជំនឿរបស់ពួកគេថា ព្រះនឹងជួយពួកគេ នៅពេលពួកគេខ្វះប្រាជ្ញា ។

សកម្មភាពដែលអាចជ្រើសរើស

សូមឲ្យកុមារប្រាប់អ្នកអំពីរឿងនៃការនិមិត្តដំបូងរបស់ យ៉ូសែប ស៊្មីធ ជាពាក្យសម្តីផ្ទាល់ពួកគេ ( សូមមើល យ៉ូសែប ស៊្មីធ—ប្រវត្តិ ១:៥–១៩ សូមមើលផងដែរ វីដេអូ « ការនិមិត្តដំបូងរបស់យ៉ូសែប » នៅលើគេហទំព័រ LDS.org ) ។ តើ យ៉ាកុប ១:៥ បានជួយយ៉ូសែបដោយរបៀបណា ? សូមជួយកុមារឲ្យគិតអំពីគំរូរបស់មនុស្សដទៃទៀតនៅក្នុងខគម្ពីរ ដែលបានទទួលចម្លើយចំពោះការអធិស្ឋានរបស់ពួកគេ ( ដូចជា នីហ្វៃ [ នីហ្វៃទី ១ ១១:១–៦ ] និងបងប្រុសយ៉ារេឌ [ អេធើរ ២:១៨–៣:៩ ] ) ។ តើមានអ្វីខ្លះដែលយើងអាចទូលសួរព្រះវរបិតាសួគ៌ក្នុងការអធិស្ឋាន ?
សូមអាន យ៉ូសែប ស្ម៊ីធ—ប្រវត្តិ ១:១០–១៤ ជាមួយកុមារ ។ សូមអញ្ជើញកុមារឲ្យស្វែងរកអ្វីដែលយ៉ូសែបពិតជាបានទទួលចម្លើយចំពោះសំណួររបស់លោក ។ តើយើងអាចធ្វើតាមគំរូរបស់យ៉ូសែប ស្ម៊ីធ យ៉ាងដូចម្តេច នៅពេលយើងមានសំណួរនោះ ?

យ៉ាកុប ១:២២–២៧; ២:១៤–២៦

« សេចក្តីជំនឿបើគ្មានការអនុវត្តគឺស្លាប់ » ។

តើអ្នកនឹងជួយកុមារឲ្យឃើញអំពីទំនាក់ទំនងរវាងអ្វីដែលពួកគេជឿ និងអ្វីដែលពួកគេធ្វើដោយរបៀបណា ?

សកម្មភាពដែលអាចជ្រើសរើស

សូមបង្ហាញកុមារនូវពិលមួយដែលគ្មានថ្ម ខ្មៅដៃមួយដែលគ្មានបណ្តូល ឬអ្វីផ្សេងទៀតដែលប្រើពុំបាន ឬ « ងាប់ » ។ សូមឲ្យកុមារអាន យ៉ាកុប ២:១៤–១៧ ។ តើវត្ថុទាំងនេះបង្ហាញសេចក្តីពិតនៅក្នុងខគម្ពីរទាំងនេះយ៉ាងដូចម្តេច ?
សូមអញ្ជើញកុមារអានស្ងាត់ៗនូវ យ៉ាកុប ១:២២–២៧; ២:១៤–២៦ ។ បន្ទាប់មក សូមអញ្ជើញពួកគេចែកចាយអ្វីដែលពួកគេអាចធ្វើដើម្បីបង្ហាញថា ពួកគេជាអ្នកប្រព្រឹត្តតាមពាក្យសម្តី ។ ឧទាហរណ៍ តើពួកគេស្គាល់នរណាម្នាក់ដែលឈឺ ឬនៅឯកោដែលពួកគេអាចទៅសួរសុខទុក្ខ ឬតើពួកគេអាចតាំងចិត្តបម្រើក្រុមគ្រួសាររបស់ពួកគេកាន់តែច្រើនជាងមុន ? អ្នកក៏អាចរំឭកពួកគេអំពីពាក្យសម្តីដែលពួកគេអាចស្តាប់ឭនៅក្នុងការប្រជុំសាក្រាម៉ង់ថ្ងៃនេះ ។ តើយើងអាចក្លាយជាអ្នកដែលធ្វើតាមពាក្យទាំងនោះដោយរបៀបណា ?

យ៉ាកុប ៣:១–១៣

ខ្ញុំអាចគ្រប់គ្រងពាក្យសម្តីដែលខ្ញុំនិយាយ ។

ពាក្យសម្តីដែលយើងនិយាយទៅកាន់គ្នាទៅវិញទៅមក អាចហាក់ដូចជាមិនសំខាន់ ប៉ុន្តែនៅពេលយ៉ាកុបបានថ្លែងទីបន្ទាល់ នោះពាក្យសម្តីអាចប្រែជាមានឥទ្ធិពលខ្លាំងក្លា ទាំងល្អ ឬទាំងអាក្រក់ ។

សកម្មភាពដែលអាចជ្រើសរើស

តើមាននរណម្នាក់នៅក្នុងវួដ ឬប្រហែលមានកុមារណាម្នាក់ដែលអ្នកបង្រៀន ដែលធ្លាប់ធ្វើការទាក់ទងនឹងសត្វសេះ ឬដឹងអ្វីមួយអំពីទូក ? អ្នកអាចអញ្ជើញឲ្យគាត់ផ្តល់យោបល់អំពីការបង្រៀនរបស់យ៉ាកុបនៅក្នុង យ៉ាកុប ៣:៣–៤ អំពីការប្រើប្រាស់ពាក្យសម្តីល្អៗ ឬផ្តល់ការយល់ដឹងមួយចំនួនរបស់អ្នកផ្ទាល់ ។ តើយើងរៀនអ្វីខ្លះអំពីការគ្រប់គ្រងអណ្តាតយើងចេញមកពីឧទាហរណ៍ទាំងនោះ ?
សូមឲ្យកុមារអាន យ៉ាកុប ៣:១–១៣ ហើយគូររូបភាពនៃអ្វីមួយដែលពួកគេរកឃើញដែលបង្រៀនអំពីការគ្រប់គ្រងអណ្តាតរបស់យើង ។ សូមផ្តល់ពេលឲ្យពួកគេដើម្បីចែកចាយរូបភាពរបស់ខ្លួន និងអ្វីដែលពួកគេបានរៀន ។
បន្ទាប់ពីរំឭក យ៉ាកុប ៣:១–១៣ ជាមួយគ្នា សូមរំឭកបទដ្ឋានសម្រាប់ពាក្យសម្តីនៅក្នុង ដើម្បីកម្លាំងនៃយុវជន ( ទំព័រ ២០–២១ ) ។ សូមជួយកុមារឲ្យគិតអំពីអ្វីមួយដែលពួកគេអាចធ្វើដើម្បីកែលម្អរបៀបដែលពួកគេនិយាយទៅកាន់អ្នកដទៃ ហើយលើកទឹកចិត្តពួកគេឲ្យដាក់គោលដៅផ្ទាល់ខ្លួន ។

លើកទឹកចិត្តឲ្យមានការរៀនសូត្រនៅឯគេហដ្ឋាន

សូមអញ្ជើញកុមារឲ្យអធិស្ឋានទៅកាន់ព្រះវរបិតាសួគ៌ជាមួយសំណួរ ឬព្យាយាមមានចិត្តអត់ធ្មត់កាន់តែច្រើនអំឡុងពេលសប្តាហខាងមុខ ។ សូមឲ្យពួកគេចែកចាយបទពិសោធន៍របស់ពួកគេ នៅក្នុងថ្នាក់បន្ទាប់មកទៀត ។

ការកែលម្អការបង្រៀនរបស់យើង

សូមជួយកុមារឲ្យសកម្មឡើង ។ « នៅពេលអ្នកបង្រៀនកុមារតូចៗ សូមអនុញ្ញាតឲ្យពួកគេសង់រូប គូររូប ផាត់ពណ៌ សរសេរ ហើយច្នៃប្រឌិត ។ រឿងទាំងនេះមានន័យច្រើនជាងសកម្មភាពដ៏សប្បាយរីករាយទៅទៀត—វាមានសារៈសំខាន់ណាស់នៅក្នុងការរៀនសូត្រ » ( ការបង្រៀនតាមរបៀបរបស់ព្រះអង្គសង្គ្រោះ ទំព័រ ២៥ ) ។

ទំព័រសកម្មភាព ៖ ខ្ញុំអាចមានចិត្តល្អដល់អ្នកដទៃ