« ថ្ងៃទី ៤–១០ ខែ វិច្ឆិកា ហេព្រើរ ១–៦ ៖ ‹ ព្រះយេស៊ូវគ្រីស្ទ ‹ មេបង្កើត នៃសេចក្តីសង្គ្រោះដ៏នៅអស់កល្បជានិច្ច › » ចូរមកតាមខ្ញុំ—សម្រាប់ថ្នាក់បឋមសិក្សា ៖ ព្រះគម្ពីរសញ្ញាថ្មី ឆ្នាំ ២០១៩ ( ឆ្នាំ២០១៩ )
« ថ្ងៃទី ៤–១០ ខែ វិច្ឆិកា ហេព្រើរ ១–៦ » ចូរមកតាមខ្ញុំ—សម្រាប់ថ្នាក់បឋមសិក្សា ៖ ឆ្នាំ ២០១៩
ប្រទាលមុខសះនៅស្រុកកាឡាត ដោយ អានី ហិនរី
ថ្ងៃទី ៤–១០ ខែ វិច្ឆិកា
ហេព្រើរ ១–៦
ព្រះយេស៊ូវគ្រីស្ទ « មេបង្កើត នៃសេចក្តីសង្គ្រោះដ៏នៅអស់កល្បជានិច្ច »
តើអ្នកឃើញមានសេចក្ដីពិតណាខ្លះនៅក្នុង ហេព្រើរ ១–៦ ដែលអ្នកទទួលបានការបំផុសគំនិត ឲ្យបង្រៀនដល់កុមារ ? សូមប្រុងប្រៀបស្ដាប់ការបំផុសគំនិតពីព្រះវិញ្ញាណ ដែលកើតឡើងនៅពេលអ្នករៀបចំខ្លួន ហើយត្រូវប្រាកដថា អ្នកកត់ត្រាការបំផុសគំនិតទាំងនោះ ។
កត់ត្រាចំណាប់អារម្មណ៍របស់បងប្អូន
អញ្ជើញឲ្យចែកចាយ
តើកុមារបានទទួលយកការអញ្ជើញនៅពេលចុងម៉ោងកាលពីសប្ដាហ៍មុនឲ្យស្វែងរកបទគម្ពីរដែលពួកគេអាចចែកចាយ ដែរឬទេ ? ប្រសិនបើពួកគេបានធ្វើដូចនោះ សូមទុកពេលឲ្យពួកគេចែកចាយ ។ ប្រសិនបើពួកគេមិនបានធ្វើទេ សូមជួយពួកគេឲ្យគិតអំពីអ្វីមួយ ដែលពួកគេបានរៀនចេញពីបទគម្ពីរថ្មីៗនេះ ដែលពួកគេអាចចែកចាយបាន ។
បង្រៀនគោលលទ្ធិ
កុមារតូចៗ
ខ្ញុំជឿលើព្រះយេស៊ូវគ្រីស្ទ ។
ខគម្ពីរទាំងនេះអាចជួយកុមារ ឲ្យរៀនបន្ថែមអំពីព្រះយេស៊ូវគ្រីស្ទ និងពង្រឹងទំនាក់ទំនងរបស់ពួកគេជាមួយទ្រង់ ។
សកម្មភាពដែលអាចជ្រើសរើស
-
ដោយប្រើពាក្យពេចន៍របស់អ្នក សូមសរសេរនៅលើក្រដាស នូវសេចក្ដីពិតនានាអំពីព្រះយេស៊ូវគ្រីស្ទ ដែលអ្នករកឃើញនៅក្នុង ហេព្រើរ ១:២–១០, ២:៨–១០, ១៧–១៨ រួចលាក់ក្រដាសទាំងនោះនៅជុំវិញបន្ទប់ ។ សូមអញ្ជើញកុមារឲ្យស្វែងរកក្រដាសទាំងនោះ ។ សូមជួយពួកគេអានសេចក្ដីពិតនានាដែលបានសរសេរនៅលើក្រដាស រួចពិភាក្សាអំពីខ្លឹមសារនៃសេចក្ដីពិតទាំងនោះ ។ ប្រសិនបើចាំបាច់ សូមពន្យល់ថា ព្រះយេស៊ូវគ្រីស្ទត្រូវបានហៅថា ព្រះរាជបុត្រានៃព្រះ ព្រោះព្រះវរបិតាសួគ៌គឺជាព្រះបិតារបស់ទ្រង់ ទាំងព្រះវិញ្ញាណ និង ព្រះកាយទ្រង់ ។
-
សូមហុចរូបភាពព្រះអង្គសង្គ្រោះជុំវិញថ្នាក់រៀន រួចអនុញ្ញាតឲ្យកុមារចែកចាយអំពីមូលហេតុដែល ពួកគេមានអំណរគុណចំពោះព្រះយេស៊ូវគ្រីស្ទខណៈពេលពួកគេកំពុងកាន់រូបភាព ។
ព្រះវរបិតាសួគ៌សព្វព្រះទ័យឲ្យយើង « កុំឲ្យតាំងចិត្តរឹងរូសឡើយ » ។
ហេព្រើរ ៣ ផ្ដល់នូវឧទាហរណ៍នៃពួកសាសន៍អ៊ីស្រាអែល ដែលតាំងចិត្តរឹងរូស ហើយបដិសេធពរជ័យរបស់ព្រះអម្ចាស់ ។ ខគម្ពីរនេះក៏ព្រមានយើងទាំងអស់គ្នា កុំឲ្យតាំងចិត្តរឹងរូសដែរ ។
សកម្មភាពដែលអាចជ្រើសរើស
-
សូមយកអេប៉ុងលាងចាន និងថ្មមួយដុំទៅថ្នាក់រៀន ។ សូមអញ្ជើញកុមារឲ្យប៉ះវត្ថុទាំងនោះ រួចពិពណ៌នាអំពីលក្ខណៈនៃវត្ថុនោះ ។ សូមបន្តក់ទឹកពីរបីដំណក់នៅលើវត្ថុនីមួយៗ រួចបង្ហាញថា មានទឹកជក់ទៅក្នុងអេប៉ុងច្រើនជាងទៅក្នុងថ្ម ។ សូមពន្យល់ថា ចិត្តរបស់យើងត្រូវបន្ទន់ ហើយកុំរឹងរូស ដើម្បីយើងអាចទទួលយកសេចក្ដីពិតរបស់ព្រះវរបិតាសួគ៌ទៅក្នុងចិត្តរបស់យើង ។
-
សូមកាត់រូបបេះដូងពីវត្ថុទន់ ដូចជាក្រណាត់ និងមួយទៀតចេញពីវត្ថុរឹងដូចជា ក្រដាសកាតុង ។ សូមប្រាប់កុមារថា នៅពេលយើងស្ដាប់ ព្រមទាំងគោរពប្រតិបត្តិ នោះយើងមានដួងចិត្តទោរទន់ ហើយនៅពេលយើងមិនស្ដាប់ ព្រមទាំងមិនគោរពប្រតិបត្តិ នោះយើងមានចិត្តរឹងរូស ។ ដោយប្រើពាក្យពេចន៍ផ្ទាល់ខ្លួន សូមចែកចាយឧទាហរណ៍ចេញពីបទគម្ពីរ អំពីមនុស្សដែលមានចិត្តទោរទន់ ឬចិត្តរឹងរូស ( ដូចជា នីហ្វៃ, លេមិន និង លេមយួល [ នីហ្វៃទី១ ២:១៦–១៩ ] ប៉ុល [ កិច្ចការ ៨:១–២២ ] ឬ យ៉ូសែប ស៊្មីធ [ យ៉ូសែប ស្ម៊ីធ––ប្រវត្តិ ១:១១–២០ ] ) ។ នៅពេលអ្នកចែកចាយឧទាហរណ៍នីមួយៗ សូមអញ្ជើញកុមារឲ្យប្រាប់ថា តើនរណាដែលមានចិត្តទោរទន់ ឬនរណាដែលមានចិត្តរឹងរូស ។
ម៉ូសេហៅអើរ៉ុនឲ្យធ្វើការងារបម្រើ ដោយ ហារី អាន់ឌើរសិន
អ្នកកាន់បព្វជិតភាពត្រូវបានហៅដោយព្រះ ។
ហេព្រើរ ៥:៤ គឺជាខគម្ពីរមួយដ៏សំខាន់មួយ ព្រោះវាបញ្ជាក់ថា អ្នកកាន់បព្វជិតភាព—និងសមាជិកដទៃទៀតដែលបម្រើសាសនាចក្រ—ត្រូវតែបានហៅដោយព្រះ ។
សកម្មភាពដែលអាចជ្រើសរើស
-
សូមអាន ហេព្រើរ ៥:៤ ឲ្យកុមារស្ដាប់ ។ សូមអញ្ជើញអ្នកកាន់បព្វជិតភាពម្នាក់ ឲ្យពន្យល់ថា តើបព្វជិតភាពគឺជាអ្វី រួចចែកចាយបទពិសោធន៍របស់គាត់ ក្នុងការទទួលបព្វជិតភាព ។
-
សូមជួយកុមារឲ្យទន្ទេញចាំឃ្លាចេញពីមាត្រានៃសេចក្ដីជំនឿ ។ សូមចែកចាយទីបន្ទាល់របស់អ្នកថា សមាជិកដែលត្រូវបានហៅឲ្យធ្វើកិច្ចការរបស់ព្រះ ត្រូវបានហៅដោយព្រះតាមរយៈវិវរណៈ ។
បង្រៀនគោលលទ្ធិ
កុមារធំៗ
ខ្ញុំជឿលើព្រះយេស៊ូវគ្រីស្ទ ។
សំបុត្រទៅកាន់ពួកហេព្រើរ ត្រូវបានសរសេរដើម្បីពង្រឹងសេចក្ដីជំនឿរបស់ពួកបរិសុទ្ធហេព្រើរ លើព្រះយេស៊ូវគ្រីស្ទ ។ វាក៏អាចធ្វើដូចគ្នាសម្រាប់កុមារដែលអ្នកបង្រៀនដែរ ។
សកម្មភាពដែលអាចជ្រើសរើស
-
សូមចាត់តាំងកុមារពីរបីនាក់ ឲ្យអានខគម្ពីនៅក្នុង ហេព្រើរ ១:២–១០, ២:៨–១០, ១៧–១៨ រួចអញ្ជើញកុមារឲ្យស្វែងរកនៅក្នុងខគម្ពីរទាំងនោះ នូវសេចក្ដីពិតនានាអំពីព្រះយេស៊ូវគ្រីស្ទ ។ សូមឲ្យពួកគេចែកចាយ ឬសរសេរនៅលើក្ដារខៀន នូវអ្វីដែលពួកគេរកឃើញ ។ តើយើងដឹងអ្វីខ្លះទៀត អំពីព្រះយេស៊ូវគ្រីស្ទ ? កុមារអាចរកឃើញយោបល់មួយចំនួន នៅក្នុងទំនុកតម្កើង ដូចជា « ខ្ញុំដឹងថា ព្រះប្រោសលោះខ្ញុំនៅរស់ » ( ទំនុកតម្កើង លេខ ១៣៦ ) ឬ « ទ្រង់បញ្ជូនបុត្រាទ្រង់មក » ( សៀវភៅចម្រៀងកុមារ ទំព័រ ៣៤–៣៥ ) ។
-
សូមអញ្ជើញកុមារឲ្យគូររូបខ្លួនពួកគេជាមួយនឹងឪពុកម្ដាយរបស់ពួកគេ ។ សូមឲ្យពួកគេចែកចាយអ្វីដែលពួកគេមានដូចឪពុកម្ដាយរបស់ពួកគេ ។ សូមពន្យល់ថា នៅពេល ហេព្រើរ ១:៣ សរសេរថា ព្រះយេស៊ូវគ្រីស្ទ « ជារូបភាពនៃអង្គ [ ព្រះ ] » វាមានន័យថា ព្រះយេស៊ូវ និងព្រះវរបិតាសួគ៌ មានលក្ខណៈសម្បត្តិ និងគុណលក្ខណៈដូចគ្នា ។ សូមថ្លែងទីបន្ទាល់ថា យើងដឹងអំពីព្រះវរបិតាសួគ៌ តាមរយៈការរៀនសូត្រ និងការធ្វើតាមព្រះយេស៊ូវគ្រីស្ទ ។
-
សូមជួយកុមារគិតអំពីមនុស្ស ដែលពួកគេអាចចែកចាយទីបន្ទាល់របស់ពួកគេអំពីព្រះយេស៊ូវគ្រីស្ទ ។ សូមគិតដល់ការអញ្ជើញពួកគេ ឲ្យហ្វឹកហាត់ចែកចាយអ្វីដែលពួកគេ នឹងប្រាប់មនុស្សទាំងនោះអំពីព្រះយេស៊ូវគ្រីស្ទ ។
ដើម្បីទទួលបានការដឹកនាំ និងពរជ័យពីព្រះវរបិតាសួគ៌ យើងត្រូវតែ « កុំឲ្យតាំងចិត្តរឹងរូសឡើយ » ។
នៅក្នុង ហេព្រើរ ៣ រឿងរ៉ាវអំពីសាសន៍អ៊ីស្រាអែលនៅក្នុងទីរហោស្ថាន ត្រូវបានប្រើប្រាស់ដើម្បីបង្រៀនអំពីសារៈសំខាន់នៃការមិនតាំងចិត្តរឹងរូស ។ តើអ្នកអាចប្រើរឿងនេះ ដើម្បីបង្រៀនដល់កុមារក្នុងថ្នាក់របស់អ្នក អំពីគោលការណ៍នេះយ៉ាងដូចម្ដេច ?
សកម្មភាពដែលអាចជ្រើសរើស
-
សូមឲ្យកុមារគិតអំពីវត្ថុនានាដែលរឹង និងវត្ថុដែលទន់ ។ ( អ្នកអាចលើកឧទាហរណ៍មួយចំនួនដើម្បីបង្ហាញពួកគេ ) ។ សូមអាន ហេព្រើរ ៣:៨ រួមគ្នា ។ តើការតាំងចិត្តរឹងរូសមានន័យដូចម្ដេច ? ហេតុអ្វីបានជាព្រះសព្វព្រះទ័យឲ្យយើបន្ទន់ចិត្តយើង ?
-
ដោយប្រើពាក្យពេចន៍ផ្ទាល់របស់អ្នក សូមចែកចាយរឿងរ៉ាងនៃសាសន៍អ៊ីស្រាអែល ដែលតាំងចិត្តរបស់ពួកគេរឹងរូសទាស់នឹងព្រះអម្ចាស់នៅក្នុងទីរហោស្ថាន ( សូមមើល ជនគណនា ១៤:១–១២, ហេព្រើរ ៣:៧–១៩ ) ។ សូមឲ្យកុមារសម្ដែងតាមសាច់រឿង ។ តើនឹងមានអ្វីកើតឡើង ប្រសិនបើយើងតាំងចិត្តរឹងរូសទាស់នឹងព្រះអម្ចាស់ និងដំណឹងល្អទ្រង់ ?
-
សូមអញ្ជើញកុមារម្នាក់ឲ្យអាន ម៉ាថាយ ១៣:១៥, ហេព្រើរ ៣:១៥, ម៉ាថាយ ១១:២៩, និង ម៉ូសេ ៦:២៧ ។ សូមឲ្យពួកគេគូររូបផ្នែកនៃរាងកាយ ដែលមានចែងនៅក្នុងខគម្ពីរនេះ នៅលើក្ដារខៀន ។ តើការមានត្រចៀកធ្ងន់ ភ្នែកងងឹត និងចិត្តរឹងរូស មានន័យដូចម្ដេច ? តើយើងអាចធ្វើឲ្យប្រាកដថា ត្រចៀក ភ្នែក និងចិត្តរបស់យើង ត្រៀមរួចរាល់ដើម្បីទទួលពរជ័យពីព្រះ យ៉ាងដូចម្ដេច ?
អ្នកកាន់បព្វជិតភាពត្រូវបានហៅដោយព្រះ ។
ហេព្រើរ ៥ ផ្ដល់ឱកាសឲ្យយើងពិភាក្សាអំពីអ្វីដែលជាបព្វជិតភាព—ជាអំណាច និងសិទ្ធិអំណាចដើម្បីប្រព្រឹត្តក្នុងព្រះនាមរបស់ព្រះ—និងរបៀបដែលយើងទទួលបានវា ។ ការណ៍នេះអាចមានប្រយោជន៍ជាពិសេសសម្រាប់ក្មេងប្រុស ដែលរៀបចំខ្លួនទទួលការតែងតាំងឲ្យមានបព្វជិតភាព ។
សកម្មភាពដែលអាចជ្រើសរើស
-
សូមបង្ហាញរូបភាព ម៉ូសេប្រគល់បព្វជិតភាពដល់អើរ៉ុន ( សៀវភៅរូបភាពដំណឹងល្អ ទំព័រ ១៥ ) ខណៈពេលដែលកុមារម្នាក់អាន ហេព្រើរ ៥:៤ ។ វាអាចនឹងមានប្រយោជន៍ដើម្បីពន្យល់ថា ដោយសារតែអើរ៉ុនគឺជាបុគ្គលដំបូងដែលកាន់បព្វជិតភាពអើរ៉ុន ទើបបព្វជិតភាពនេះត្រូវបានហៅតាមឈ្មោះរបស់លោក ។ សូមជួយកុមារឲ្យគិតអំពីកាតព្វកិច្ចអ្នកកាន់បព្វជិតភាពដែលត្រូវធ្វើ ( មានដូចជា ការធ្វើពិធីបុណ្យជ្រមុជទឹក ការប្រសិទ្ធពរ និងការចែកសាក្រាម៉ង់ និងការអញ្ជើញមនុស្សដទៃឲ្យមកឯព្រះគ្រីស្ទ ) ។
-
សូមជួយកុមារឲ្យគិតអំពីរបៀបផ្សេងៗគ្នា ដែលមនុស្សទទួលបានសិទ្ធិអំណាច ។ ឧទាហរណ៍ តើគ្រូបង្រៀន វេជ្ជបណ្ឌិត ឬអ្នកដឹកនាំនយោបាយ ទទួលបានសិទ្ធិអំណាចតាមរបៀបណា ? តើព្រះប្រទានសិទ្ធិអំណាចរបស់ទ្រង់តាមរបៀបណា ? សូមអញ្ជើញកុមារឲ្យគិតអំពីសំណួរនេះ នៅពេលពួកគេអាន ហេព្រើរ ៥:៤ និងមាត្រាទីប្រាំនៅក្នុងមាត្រានៃសេចក្ដីជំនឿ ។
លើកទឹកចិត្តឲ្យមានការរៀនសូត្រនៅឯគេហដ្ឋាន
សូមអញ្ជើញកុមារឲ្យចែកចាយបទគម្ពីរ បទចម្រៀង ឬសកម្មភាពមួយ ដែលពួកគេបានរៀននៅក្នុងថ្នាក់ថ្ងៃនេះ ជាមួយក្រុមគ្រួសាររបស់ពួកគេ នៅក្នុងរាត្រីជួបជុំក្រុមគ្រួសារ ។
ការកែលម្អការបង្រៀនរបស់យើង
កុមារអាចទទួលស្គាល់ឥទ្ធិពលនៃព្រះវិញ្ញាណ ។ សូមបង្រៀនពួកគេថា អារម្មណ៍នៃសេចក្ដីសុខសាន្ត សេចក្ដីស្រឡាញ់ និងភាពកក់ក្ដៅ ដែលពួកគេមាននៅពេលដែលពួកគេនិយាយ ឬច្រៀងពីព្រះយេស៊ូវគ្រីស្ទ និង ដំណឹងល្អរបស់ទ្រង់ កើតមានមកពីព្រះវិញ្ញាណបរិសុទ្ធ ។ អារម្មណ៍ទាំងនេះអាចស្ថាបនាទីបន្ទាល់របស់ពួកគេ ។