Ni Jesucristo nga umis-isem a katugawna ti maysa nga umis-isem nga ubing

Naan-anay nga Ayat, ni Del Parson

Disiembre 2–8

1–3 Juan; Judas

“Ti Dios Isu ti Ayat”

Mangisuro dagiti surat daJuan ken Judas maipapan iti ayat ken silaw ti Nailangitan nga Ama. Bayat ti panagadalmo iti daytoy a lawas, utobem no apay a kasapulan dagiti ubbing a sursuruam ti silaw ken ayatna iti biagda. Laglagipem nga ibilang ti amin nga aktibidad iti daytoy a balabala, saan laeng a dagiti nailista iti baba ti grupo-ti-edad a sursuruam.

Isuratmo dagiti Impresionmo

icon iti panagbibinninglay

Yawis ti Panagbibinninglay

Awisem dagiti ubbing a mangibinglay iti no kasano a nariknada ti ayat ti Nailangitan nga Ama wenno no apay iti panagkunada a maipada iti maysa a lawag ti Nailangitan nga Ama.

icon iti panangisuro

Isuro ti Doktrina

Dagiti In-inaudi nga Ubbing

1 Juan 1:5–7; 2:8–11

Mangisangbay iti lawag iti biagko ti panangsurotko ken ni Jesus.

Kasano a ti panangidilig iti pisikal a lawag ken sipnget ket makatulong kenka iti panangisurom kadagiti ubbing maipapan iti lawag nga isangbay ti Nailangitan nga Ama iti biagda?

Dagiti Mabalin nga Aktibidad

• Kiddawen kadagiti ubbing nga agdrowing kadagiti banag a mangted iti lawag. Tulongam ida a makaawat kadagiti pagimbagan ti lawag, kas iti panangtulong a mangpadakkel kadagiti mulmula, a mangpalugod kadatayo a makakita, ken mangted iti bara. Awisem dagiti ubbing nga agsisinnublatda a mangsilaw iti flashlight iti maysa a ladawan ni Jesucristo bayat ti panangisaoda iti, “Ti Dios Isu ti Silaw” (1 Juan 1:5). Paneknekam a mankaisangbay iti lawag iti biagtayo ti Nailangitan nga Ama ken Jesucristo no tungpalentayo dagiti bilin.

• Pasipngetem ti siled ti klase, ket awisem dagiti ubbing a mangisingasing kadagiti wagas a pakaisangbayan ti lawag iti siled. Tulongam ida a mangpanunot kadagiti wagas a pakaisangbayan ti lawag ni Cristo iti biagtayo. Bayat ti panangibinglayda dagiti sungbatda, pagsilawem dagiti flashlight wenno lukatam ti maysa a tawa tapno in-inut a lumawag ti siled.

1 Juan 4:10–11, 20–21

Ipakitak ti panagayatko iti Dios no ipakitak ti panagayatko kadagiti dadduma.

Tulongam dagiti ubbing a mangkita iti pagnaigan ti ayat a mariknada para iti Nailangitan nga Ama ken ti ayat nga ipakitada kadagiti annakna.

Dagiti Mabalin nga Aktibidad

• Iasam ti 1 Juan 4:11kadagiti ubbing, ken agkansion iti maysa a kanta maipapan iti ayat ti Dios. Kiddawem iti sumagmamano nga ubbing a mangibinglay iti no kasano a naammuanda nga ay-ayaten ida ti Nailangitan nga Ama. Kalpasan ti tunggal sungbat, awisem dagiti ubbing nga arakupenda ti bagbagida ket isaoda ti, “Ti Dios isu ti ayat, ket ay-ayatennak ti Dios.”

• Ibasam ti 1 Juan 4:21 kadagiti ubbing. Awisem ida a mangibinglay wenno mangyakem kadagiti nadumaduma a wagas a mangipakita iti ayat iti maysa a gayyem, kas iti panangarakup wenno panangaramid ti maysa a kard. Kasano ti marikna dagiti gagayyemtayo kadagitoy a banag? Kasano ti marikna ti Nailangitan nga Ama no aramidentayo ti nasayaat a banag para kadagiti dadduma?

1 Juan 2:3–5; 5:3

Ipakitak ti ayatko ken ni Jesucristo no agtungpalak kadagiti bilinna.

Nupay ubbingda pay masursuroda a “saan a nadagsen dagiti bilin” ti Dios ken ti panangtungpal kadagitoy ket maysa a wagas a mangipeksa iti ayat kenkuana.

Dagiti Mabalin nga Aktibidad

• Basaem ti 1 Juan 5:3, ket kiddawem kadagiti ubbing a dumngegda no ania ti kuna daytoy a bersikulo maipapan iti no kasano a maipakitatayo nga ay-ayatentayo ti Dios. Awisem dagiti ubbing a mangdakamat iti adu a bilin aginggaa kabaelanda . Kasano ti rikna ti Nailangitan nga Ama no agtungpaltayo kadagiti bilinna?

• Awisem dagiti ubbing a mangidrowing iti ladawan a mangipakpakita iti maysa a wagas a mabalin a mangipeksaanda iti ayatda para iti Nailangitan nga Ama. Kas pagarigan, mabalin nga agdrowingda ti maysa a ladawan ti bagbagida nga agtungtungpal iti maysa kadagiti bilin. Aggigiddan nga agkansion iti kanta maipapan iti panagtungpal, kas iti “Pilien ti Rumbeng a Wagas”(Dagiti Himno ken Kanta dagiti Ubbing ). Kasano ti riknatayo no agpaltayo?

icon iti panangisuro

Isuro ti Doktrina

Dagiti In-inauna nga Ubbing

1 Juan 2:8–11; 4:7–8, 20–21

Ipakitak ti panagayatko iti Dios no ipakitak ti panagayatko kadagiti dadduma.

Kasano a matulongam dagiti ubbing a makaawat a ti panagayat iti Dios ket iramanna ti panagayat kadagiti adda iti aglawlawtayo—uray pay dagiti tao a mabalin anaiduma kadatayo wenno narigat nga ayaten?

Dagiti Mabalin nga Aktibidad

• Kiddawen kadagiti ubbing nga iladawanda nga adda maysa a kabarbaro a dumardar-ay iti pagadalan wenno wardda ket awan pay ti asino man a kaam-ammona sadiay. Kasano ti mabalin a rikna daytoy a tao? Awisem ti maysa nga ubing a basaenna ti 1 Juan 4:7–8. Ania ti isingasing daytoy a bersikulo maipapan iti no kasano ti nasken a panangtayotayo iti daytoy a tao? Mangiburay iti kasta met la a senario, wenno kiddawem kadagiti ubbing a mangpanunot kadagiti kasasaad a mabalin a pakaaddaanda iti gundaway a mangipakita iti ayat.

• Kiddawem kadagiti ubbing nga basaenda ti 1 Juan 4:7–8, 20–21, ket awisem ida a saggaysa a mangisuratda iti maysa a binatog a manggupgop iti no ania iti panagkunada ti kapatgan nga adalen kadagitoy a bersikulo. Awisem dagiti ubbing a mangibinglay iti dadduma pay a wagas a mabalin a pangipakitaanda iti ayat kadagitay adda iti aglawlawda.

1 Juan 2:3–6; 4:17–18; 5:2–5

Ipakitak ti ayatko ken ni Jesucristo no agtungpalak kadagiti bilinna.

Mabalin a nalaklaka ti panagtungpal kadagiti bilin no maawatantayo dagiti kinapudno a maisursuro iti 1 Juan 5:3. Kasano a matulongam dagiti ubbing a mangkita kadagiti bilin a saan a dadagsen ngem ketdi kas gundaway a pangyebkasan iti ayatda para iti Dios?

Dagiti Mabalin nga Aktibidad

• Awisem dagiti ubbing a mangilista iti pisarra dagiti wagas a mabalinda a pangipakitaan iti Dios nga ay-ayatenda Isuna. Kalpasanna aggigiddankayo a mangbasa iti 1 Juan 2:5–6; 5:2–5 para kadagiti nayon pay nga kapanunotan. Kasano a ti panagtungpal kadagiti bilin ket mangipakita nga ay-ayatentayo ti Nailangitan nga Ama?

  maysa a pamilia nga aggigiddan a nakaparintumeng nga agkarkararag

  Uray no narigat, mabalintayo a pilien ti agtungpal kadagiti bilin.

• Basaem ti 1 Juan 4:17, ket ilawlawag kadagiti ubbing a ti “adda kinaturedtayo iti aldaw ti pannakaokom” ket kaipapananna ti maaddaan ti panagtalek ken kappia inton tumakderda iti imatang ti Dios tapno maukom. Ania ti isuro daytoy a bersikulo a kasapulantayo nga aramiden tapno maaddaan iti daytoy a panagtalek? Ania dagiti sumagmamano a banag a maaramidtayo itan tapno agbalin a managtalek iti sango ti Dios?

Judas 1:18–22

Makapagbalinak a napudno uray no pagkakatawaandak dagiti dadduma.

Mabalin a mauyaw dagiti ubbing gapu iti pammatida wenno ti wagas ti panagbiagda kas disipulo ni Jesucristo. Naglaon dagitoy a bersikulo iti balakad ni Judas maipapan iti no kasano nga agtalinaed a napudno kadagiti kasta a kasasaad.

Dagiti Mabalin nga Aktibidad

• Kiddawen kadagiti ubbing a mangibinglay kadagiti panawen a nakakatawaanda gapu iti panagaramidda iti umno. Awisem dagiti ubbing a basaenda ti Judas 1:18–22 ket sapulenda no kasano a makapagtalinaedtayo a napudno no mauy-uyaw wenno makatkatawaantayo. Isurat iti pisarra no ania ti nasarakanda , ket paglilinnawagan dagiti wagas a mabalin a pakasurotanda iti daytoy a balakad.

• Gupgopem ti tagainep ni Lehi (kitaen ti 1 Nephi 8:1–35), kiddawem iti sumagmamano nga ubbing a basaenda dagiti bersikulo manipud iti 1 Nephi 8:26–28, 33. Ilawlawag no kasano a dagiti tao iti dakkel ken nalawa a pasdek ket maipada kadagiti aguy-uyaw nga insarita ni Judas. Ania ti maaramidtayo tapno saandatayo a maaringan dagiti mangkatkatawa kadatayo wenno saan nga umanamong ti pammatitayo? (kitaen iti 1 Nephi 16:15–31 33).

icon iti panagsursuro

Yallukoy ti Panagsursuro iti Pagtaengan

Allukoyem dagiti ubbing nga agplanoda nga agaramid iti maysa a banag a a pangibinglayanda iti lawagda kadagiti pamiliada.

Panangpadur-as iti Panangisurotayo

Naregta dagiti ubbing. No dadduma mabalin a mariknam a ti enerhia dagiti ubbing ket pakasingaan iti panagsursuro. Ngem mabalinmo a padur-asen dagiti naregta a kinataoda babaen ti panangawismo kadakuada a mangyakem, mangidrowing, wenno agkanta maipapan iti pagbatayan ti ebanghelio. (Kitaen iti Panangisuro iti Wagas ti Mangisalakan 25–26.

panid aktibidad: mangyeg iti lawag iti biagko ti panangsurotko ken ni Jesus