Ni Cristo a Nangikaskasaba iti Lubong ti Espiritu, ni Robert T. Barrett

Nobiembre 25–Disiembre 1

1 ken 2 Pedro

“Agrag-okayo iti di Mayebkas a Rag-o ken Napno iti Dayag”

Rugiam ti panagadalmo iti 1 ken 2 Pedro babaen iti kararag. Laglagipem a ti kasayaatan a panagsaganam ti mangisuro umayto babaen dagiti padasmo iti bukod ken sangapamiliaan a panagadal.

Isuratmo Dagiti Impresionmo

Yawis ti Panagbibinninglay

Ipakitam ti ladawan a masarakan iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia, ket awisem dagiti ubbing nga isaritada kenka ti maysa a banag nga ammoda maipapan ken ni Pedro. Ipalagip kadakuada a ni Pedro ti dadaulo ti Simbaan kalpasan a nagungar ni Jesus, ket ilawlawag a ti 1 Pedro ken 2 Pedro ket sursurat manipud kenkuana a para kadagiti miembro ti Simbaan iti aldawna.

Isuro ti Doktrina

Dagiti In-inaudi nga Ubbing

1 Pedro 1:6–7; 3:14

Makapagragsakak uray kabayatan dagi ti narigat a panawen.

Ibilang no kasano a maisurom dagitoy a bersikulo iti wagas a makatulong kadagiti ubbing nga umasideg iti Mangisalakan no maipasangoda iti rigat.

Dagiti Mabalin nga Aktibidad

• Awisem dagiti ubbing a mangibinglay kadagiti narigat a banag nga inibturan ni Jesus, kas ti pannakailansa iti krus. Ilawlawag a maaddaantayonto iti narigat a panawen iti panagbiagtayo. Aggigiddana basaen ti 1 Pedro 1:6–7; 3:14 ken ibinglay ti padas idi naipasangoka iti “pannubok ti pammatim.” Mabalinmo met nga ibinglay ti kararag ni Propeta Joseph Smith iti Pagbaludan iti Liberty ken ti liwliwa nga inted ti Dios kenkuana (Kitaen iti DkK 121:1–8; 123:17). Kasano a makatulong kadatayo ti pammati ken ni Jesus a mangsapul iti rag-o kabayatan dagiti narigat a panawen?

  

  Ni Joseph Smith iti Pagbaludan iti Liberty, ni Greg K. Olsen

• Aggigiddan nga agkansion iti maysa a kanta a mangisuro no kasano ti mangsapul iti ragsak.

1 Pedro 2:9–12

Kayat ti Nailangitan nga Ama nga agbalinak a pagwadan kadagiti dadduma.

Insuro ni Pedro a datayo “dagiti tao ti Dios” ken dagiti nasayaat nga aramidtayo ket mabalin a “pakaidayawan ti Dios.”

Dagiti Mabalin nga Aktibidad

• Iladawam dagiti banag a naidumduma manipud kadagiti aglawlawda, wenno mangipakita ti ladawan dagiti kasta a bambanag. Kas pagarigan, naidumduma ti templo manipud kadagiti pasdek a naipalawlaw iti daytoy wenno maysa a bantay a timpuar iti tanap. Ilawlawag a no tungpalentayo dagiti bilin, maidumdumatayo ken makita dagiti dadduma a tao dagiti pagwadantayo. Isaritam maipapan iti sumagmamano a “naimbag nga aramid” a nakitam nga inaramid dagiti ubbing. Ilawlawag a dagiti nasayaat nga aramid kas kadagitoy ket “pakaidayawan ti Dios”—mangtulong dagitoy kadagiti dadduma a makarikna iti ad-adu pay nga ayat para iti Dios ken agtarigagay nga agserbi Kenkuana.

• Leppasen ti panid ti aktibidad a kadua dagiti ubbing. Kasano nga agdaydayaw iti Dios dagiti tao a nasarakanda iti ladawan?

1 Pedro 3:18–20; 4:6

Masursuro dagiti espiritu iti lubong dagiti espiritu ti maipapan iti ebanghelio.

Kalpasan ti ipapatayna, napan ni Jesus iti lubong dagiti espiritu ket nangibaon kadagiti nalinteg nga espiritu a mangisuro kadagiti dadduma pay nga espiritu a saan pay ng immawat iti ebanghelio.

Dagiti Mabalin nga Aktibidad

• Isaritam kadagiti ubbing maipapan iti maysa a tao nga ammom a natayen. Ilawlawag a no matay ti tao, panawan dagiti espirituda dagiti bagida ket mapanda iti lubong dagiti espiritu. Basaem ti 1 Pedro 3:19 ket ilawlawag nga idi natay ni Jesus, sinarungkaranna ti lubong dagiti espiritu. Sadiay, kiniddawna dagiti nalinteg nga espiritu a mangisuro iti ebanghelio kadagiti dadduma pay nga espiritu a saan pay nga immawat iti ebanghelio (kitaen iti DkK 138:30).

• Mangipan iti intar ti tugtugaw iti tengnga ti siled nga agakem a kay maysa a tubeng. Kiddawem dagiti sumagmamano nga ubbing nga agtakder iti maysa a bangir a mangibagi kadagiti espiritu iti lubong dagiti espiritu a saan pay a nabuniagan kabayatan ti biagda iti daga. Ikkam ti maysa kadagiti dadduma pay nga ubbing iti dakkel a papel a sinan-tulbek nga addaan a naisurat a “panangbuniag para kadagiti natay,” ket kiddawem kenkuana a mangikkat iti tubeng. Kalpasanna ilawlawagmo a dagiti miembro ti Simbaan a 12 ti tawenda ken natataengan ket makapandaiti templo ket mabuniagan para kadagiti kapuonan a saan pay a nabuniagan sakbay ti kaaddada iti daga. Kalpasanna mabalin nga awaten dagitoy a kapuonan ti ebanghelion iti lubong ti espiritu.

• Tulongan dagiti ubbing a mangpunno iti simple a family tree.

Isuro ti Doktrina

Dagiti In-inauna nga Ubbing

1 Pedro 3:12–17; 4:13–14, 16

Masarakak ti rag-o ken talna uray kabayatan dagiti narigat a panawen.

Mabalin a napadasan dagiti ubbing a sursuruam dagiti sumagmamano a kita ti panangsursuron wenno pananguy-uyaw gapu iti pammatida. Makatulong kadakuada dagitoy a bersikulo kabayatan kadagita a panawen.

Dagiti Mabalin nga Aktibidad

• Gupgopem ti sumagmamano nga estoria maipapan ken Jesus a naidadanes, wenno pabasam dagitoy kadagiti ubbing—kitaen, kas pagarigan, iti Mateo 12:9–14 wenno Lucas 22:47–54. Kiddawen kadagiti ubbing no napadasandan ti naangaw wenno nauyaw gapu ta agbibiagda kadagiti pannursuro ti ebanghelio. Kalpasanna aggigiddan a basaen ti 1 Pedro 3:12–14; 4:13–14, 16, ket kiddawen kadagiti ubbing a sapulenda no ania ti kinuna ni Pedro maipapan iti panagsagaba “gapu iti kinalinteg.” Apay a makapagragsaktayo pay laeng no uyawendatayo dagiti dadduma a tao gapu iti panagaramidtayo iti umno?

• Mangawis iti maysa a miembro ti ward a mangibinglay ti maysa a padas idi nakasarak iti rag-o wenno kappia kabayatan ti maysa a pannubok, wenno ibinglayno kasano a nakasarak iti kappia ni Propeta Joseph Smith idi adda isuna iti Pagbaludan ti Liberty (kitaen iti DkK 121:1–8; 123:17). Kasano a masarakantayo ti rag-o ken kappia kabayatan dagiti pannuboktayo?

1 Pedro 3:15

Masapul a kanayontayo a nakasagana a mangibinglay iti ebanghelio.

Maaddaanto dagiti ubbing iti adu a gundaway iti unos ti panagbiagda a mangsungbat kadagiti saludsod manipud iti dadduma a tao maipapan iti pammatida. Panunotem no ania ti mabalinmo nga aramiden tapno makatulong kadakuada a “kanayon a nakasagana a sumungbat.”

Dagiti Mabalin nga Aktibidad

• Isaritam maipapan ti maysa a panawen idi adda maysa a tao a nagsaludsod kenka maipapan iti Simbaan, ket iladawam no nariknam met laeng a nakasaganaka a sumungbat. Kiddawen kadagiti ubbing nga isaritada ti maipapan iti ania man a panawen idi nagsaludsod dagiti tao kadakuada maipapan iti Simbaan. Aggigiddan a basaen ti 1 Pedro 3:15. Kasano a masurottayo ti balakad ni Pedro iti daytoy a bersikulo?

• Babaen ti tulong dagiti ubbing, agpanunot kadagiti sumagmamano a saludsod a mabalin a damagen dagiti tao maipapan kadagiti pannursuro ti Simbaan. Pagsisinnublatem dagiti ubbing a mangilawlawag no kasano ti mangsungbat kadagitoy a saludsod tapno mabalinda ti “nakaagana a kanayon.”

1 Pedro 3:18–20; 4:6

Masursuro dagiti espiritu iti lubong dagiti espiritu ti maipapan iti ebanghelio.

Tulongam dagiti ubbing a maawatanda a no matay dagiti nalinteg, mapanda iti lubong dagiti espiritu tapno mangisuroda iti ebanghelio kadagiti saan pay nga immawawat iti daytoy bayat ti kaaddada iti daga.

Dagiti Mabalin nga Aktibidad

• Mangidrowing iti pisarra iti maysa a sikulo nga addaan ti maysa a linia iti tengngana. Isurat ti Paraiso ti Espiritu iti maysa a kagudua ti sikulo ken Pagbaludan ti Espiritu iti sabali pay a kaguduana. Awisem ti maysa kadagiti ubbing a basaenna ti 1 Pedro 3:18–20; 4:6 (kitaen iti 1 Pedro 4:6 iti Pangiwanwan iti Nasantuan a Kasuratan , para kadagiti rebision manipud iti Patarus ni Joseph Smith). Ilawlawag nga idi natay ni Jesus, napan Isuna iti paraiso ti espiritu. Binilinna dagiti nalinteg nga espiritu sadiay a mangisuro iti ebanghelio kadagiti espiritu iti pagbaludan ti espiritu.

• Awisem ti maysa a naganak wenno in-inauna nga kabsat ti maysa kadagiti ubbing a mangisarita maipapan iti ipapanna iti templo ken panangileppas iti aramid para iti maysa kadagiti kapuonanda.

• Awisem dagiti ubbing a mangpunno iti simple a family tree.

Yallukoy ti Panagsursuro iti Pagtaengan

Awisem dagiti ubbing nga ibinglayda ti family tree-da nga addaan kadagiti miembro ti pamiliada ket agpatulongka kadakuada a mangnayon kadagiti nagnagan iti daytoy.

Panangpadur-as iti Panangisurotayo

Ikalikagum a maawatan dagiti sursuruam nga ubbing. Am-ammom dagiti ubbing a sursuruam, isu a balbaliwam dagiti kapanunotan iti daytoy a balabala no kasapulan tapno maipaay dagiti kasapulanda. Mabalinmo nga usaren uray ania kadagiti naisingasing nga aktibidad iti daytoy a balabala, saan laeng kadagidiay naisurat para iti grupo-ti-edad a sursuruam. (Kitaen iti Panangisuro iti Wagas ti Mangisalakan 7.)