Ti Agnanayon a Siudad, ni Keith Larson

Disiembre 23–29

Apocalipsis 12–22

“Ti Agballiginto Tawidennanto Amin Dagitoy a Bambanag”

Bayat ti panagsaganam a mangisuro, usarem dagiti padasmo iti panagadal iti Apocalipsis 12–22 iti bukodmo wenno kaduam ti pamiliam. Ania ti makitam a napateg kenka? Ania dagiti impresion a naawatmo? Laglagipem a dagiti aktibidad a naisingasing ditoy ket mabalin nga ibagay para kadagiti ubbing iti ania man nga edad.

Isuratmo dagiti Impresionmo

Yawis ti Panagbibinninglay

Awisem dagiti ubbing a mangibinglay no apay a kayatda a makipagnaed manen iti Nailangitan nga Ama. Iti intero a leksion, tulongam ida a sapulem dagiti banag a mabalinda nga aramiden tapno agsagana nga agsubli Kenkuana.

Isuro ti Doktrina

Dagiti In-inaudi nga Ubbing

Apocalipsis 12:7–11

Impakitak ti pammati ken ni Jesucristo iti biag sakbay daytoy a biag.

Iti Gubat idiay Langit, pinarmek dagiti napudno nga annak ti Dios ni Satanas babaen iti “ sao ti pammaneknekda” ken babaen ti panangipakita iti pammati ken ni Jesucristo (Apocalipsis 12:11).

Dagiti Mabalin nga Aktibidad

• Tapno matulongam dagiti ubbing a maawatanda no ania ti kaipapanan ti sumurot iti pagwadan ti maysa a tao, agpilika iti maysa nga ubing nga agbalin a “lider,” ket kiddawem kadagiti dadduma pay a sumurotda kenkuana babaen ti panangaramidda ti ania man nga aramidenna. Kalpasanna pagbalinem a lider dagiti dadduma pay nga ubbing.. Ibasam ti Apocalipsis 12:7–11 kadagiti ubbing ket ilawlawagmo a sakbay a nayanaktayo, pinilitayo a sinurot ni Jesus ket saan a ni Satanas.

• Agdamag kadagiti saludsod a kas, Ania ti napasamak idiay langit sakbay a nayanaktayo? Ania ti pinilitayo nga aramiden? (Kitaen met iti “Panangyam-ammo: Ti Plano ti Nailangitan nga Amatayo,” Dagiti Estoria iti Baro a Tulag, 1–5, wenno iti maitutop a video iti LDS.org.)

Apocalipsis 19:7

Makapagsaganaak para iti Maikadua a Yaay ni Jesucristo babaen ti panagpilik iti umno.

Kasano a matulongam dagiti ubbing a maawatanda a ti Maikadua a Yaay ket agbalinto a naragsak a pasken para kadatayo no surotentayo dagiti bilin ni Jesus?

Dagiti Mabalin nga Aktibidad

• Ipakitam ti ladawan iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia. ket basaen ti Apocalipsis 19:7. Ilawlawag a ti “kallaysa ti Kordero” ket mangibagi iti Maikadua a Yaay ni Jesucristo. Apay a “naragsak” dagiti tao? Kiddawen kadagiti ubbing no nakapandan iti maysa a kallaysa. Ania ti kayarigan daytoy? Apay a naragsak dagiti tao?

• Ibinglaymo kadagiti dagiti ubbing no apay a paspasungadam ti Maikadua a Yaay ni Jesus.

• Awisem dagiti ubbing nga ibinglayda no ania ti aramidenda a makapagsagana a mapan iti simbaan iti Domingo. Apay nga aramidentayo dagitoy a banag sakbay a mapan iti simbaan? Apay nga agsaganatayo para iti Maikadua a Yaay ni Cristo? Iti panid ti aktibidad iti daytoy a lawas, pagdrowingem dagiti ubbing iti no ania ti mabalinda nga aramiden tapno agsagana para iti Maikadua a Yaay.

Apocalipsis 21:1, 3–4, 22–27; 22:1–2

Makapagnaedak iti celestial a pagarian a kadennak ti Nailangitan nga Ama ken dagiti tao nga ay-ayatek.

Iti maudi a dua a kapitulo ti Apocalipsis, inusar ni Pablo ti napintas a pagsasao a pangiladawan iti celestial a gloria a pagragsakanto dagiti napudno.

Dagiti Mabalin nga Aktibidad

• Pagdrowingem dagiti ubbing ti kayo a nailadawan iti Apocalipsis 22:2 iti pisarra. Ilawlawag a daytoy a kayo ti kayo ti biag, ket ti bungana ti mangibagi iti ayat ti Dios (kitaen iti 1 Nephi 11:21–22). Mangtedka kadagiti ubbing kadagiti pedaso ti papel a sinan-prutas ti sukogna, ket awisem ida a mangidrowing iti maysa a banag a makatulong a mariknada ti ayat ti Nailangitan nga Ama. Ilawlawag a dagiti napudno ti makipagnaedto iti Nailangitan nga Ama iti celestial a pagarian.

• Ibinglaymo kadagiti ubbing dagiti sumagmamano a ladawan wenno detalye nga inusar ni Juan a pangiladawan iti celestial a gloria (kitaen iti Apocalipsis 21:1, 3–4, 22–27; 22:1–2), ket awisem dagiti ubbing a mangidrowing iti ladawan dagitoy a banag.

• Awisem dagiti ubbing a mangilasin no ania ti maaramidda tapno makipagnaed manen iti Nailangitan nga Ama.

Isuro ti Doktrina

Dagiti In-inauna nga Ubbing

Apocalipsis 12:7–11

Impakitak ti pammati ken ni Jesucristo iti biag sakbay daytoy a biag.

Adda iti daga dagiti ubbing a sursuruam gapu ta adda pammatida ken ni Jesucristo iti biag sakbay daytoy a biag ket pinilida ti sumurot Kenkuana.

Dagiti Mabalin nga Aktibidad

• Aggigiddan a basaen ti Apocalipsis 12:7–11, ken isurat iti pisarra ti balikas a dragon, Gubat idiay Langit, pinagtalaw, pammaneknek, ken Kordero. Kiddawen kadagiti ubbing a gupgopenda dagitoy a bersikulo nga usarenda dagiti balikas iti pisarra. Ania ti masursurotayo maipapan ken ni Jesucristo (ti Cordero) manipud kadagitoy a bersikulo? Ania ti masursurotayo maipapan kadagiti pili nga inaramidtayo iti biag sakbay daytoy a biag?

• Mangaramidka iti tallo a dasig iti pisarra, ket suratam dagitoy iti, Sakbay daytoy a biag, Kabayatan daytoy a biag, ken Agpadpada. Mangisaganaka kadagiti piraso ti papel a mangibaga kadagiti kinapudno maipapan iti biag sakbay daytoy a biag ken iti mortal a biag, kas kadagiti Aaddaantayo iti bagi, Awanantayo iti bagi Agnaedtayo iti sidong ti Dios, Makigubattayo ken ni Satanas, Aramatentayo ti pammati ken ni Jesucristo, ken Surotentayo ti plano ti Dios. Pagsisinnublattem dagiti ubbing a mangpidut ti maysa a piraso ti papel ket ikeddeng no ania a dasig ti pakaibilangan daytoy. Ibinglaymo ti panagtalekmo a mabalin nga ituloy dagiti ubbing ti mangipakita iti pammatida ken ni Cristo.

Apocalipsis 12:7–8

Makapagsaganaak para iti Maikadua a Yaay ni Jesucristo babaen ti panagpilik iti umno.

Kasano a matulongam dagiti ubbing a sursuruam tapno maawatanda nga agbalinto a naragsak a paskenpara kadagiti nalinteg ti Maikadua a Yaay ni Jesucristo?

Dagiti Mabalin nga Aktibidad

• Aggigiddan a basaen ti Apocalipsis 19:7–8, ken tulongam dagiti ubbing a maawatanda ti simbolismo dagitoy a bersikulo—ti kallaysa ket ti Maikadua a Yaay ti Mangisalakan, ti Kordero ket ti Mangisalakan, ken ti asawana ket ti Simbaan (wenno datayo amin). Kasano nga agsagana dagiti tao para iti maysa a kallaysa? Ania dagiti banag a maaramidtayo tapno agsagana para iti yaay manen ti Mangisalakan?

• Irebyu ken yulo ti Pagannurotan ti Pammati 1:10 a kadua dagiti ubbing. Ilawlawag a daytoy a pagannurotan ti pammati ket mangiladawan kadagiti naragsak ken nagloriaan a pasken a mapasamakto iti yaay manen ni Jesus. Ipakitam ti ladawan ti Maikadua a Yaay ni Jesus iti Umaykayo, Sumurot Kaniak—Para kadagiti Indibidual ken Pamilia, ket awisem dagiti ubbing nga agdrowingda iti no ania iti panagkunada a kayariganto ti ti Maikadua a Yaay ni Jesus.

Apocalipsis 21:1, 3–4, 22–27; 22:1–2, 17

Makapagnaedak iti celestial a pagarian a kadennak ti Nailangitan nga Ama ken dagiti tao nga ay-ayatek.

Bayat ti panangisagam a mangisuro maipapan iti celestial a pagarian, panunotem no ania ti kaipapanan kenka ti celestial a pagarian. Kasano a maibinglaymo ti pammaneknekmo kadagiti ubbing a sursuruam?

Dagiti Mabalin nga Aktibidad

• Awisem dagiti ubbing a mangsukisok kadagiti sumaganad a bersikulo iti sumagmamano a ladawan wenno detalye nga inusar ni Juan iti panangiladawanna ti celestial a gloria: Apocalipsis 21:1, 3–4, 22–27; 22:1–2. Pagpiliem ida iti maysa a ladawan wenno detalye a kayatda nga idrowing. Kalpasanna mabalinda a pagsasaritaan iti klase maipapan kadagiti drowingda. Allukoyem ida a mangipakita kadagiti drowingda kadagiti pamiliada iti pagtaengan.

• Aggigiddan a basaen ti Apocalipsis 22:17, ket ilawlawag a ti nobia nga agkuna iti “Umayka” ket ti Simbaan. Ania ti kayattayo a yawis kadagiti dadduma nga “umayanda”? Ania dagiti sumagmamano a nasayaat a wagas a pangawisan kadagiti tao nga “umay”?

Yallukoy ti Panagsursuro iti Pagtaengan

Tulongam dagiti ubbing nga agsagana a mangbasa iti Libro ni Mormon iti sumaruno a tawen babaen ti panangawis kadakuada a mangidawat iti maysa a miembro ti pamilia wenno gayyem tapno mangibinglay ti paggugustoda a bersikulo wenno estoria manipud iti Libro ni Mormon.

Panangpadur-as iti Panangisurotayo

Suruam dagiti ubbing a mangisurat kadagiti impresion. No masursuruan dagiti ubbing iti ugali a mangisurat kadagiti impresion, daytoy ti mangtulongto kadakuada a mangilasin ken mangsurot iti Espiritu. Mabalin nga isurat dagiti ubbing kadagiti impresion babaen ti panangmarka kadagiti nasantuan a kasuratan, panangidrowing kadagiti ladawan, wenno panagsurat kadagiti simple a serrek iti diurnal. (Kitaen iti Panangisuro iti Wagas ti Mangisalakan 30.)