“Disiembre 23–29. Apocalipsis 2–22: ‘Ti Agballiginto Tawidennanto Amin Dagitoy a Bambanag’” Umaykayo, Sumurot Kaniak—Para kadagiti Indibidual ken Pamilia: Baro a Tulag 2019 (2019)
“Disiembre 23–29. Apocalipsis 12–22” Umaykayo, Sumurot Kaniak—Para kadagiti Indibidual ken Pamilia: 2019
Ti Agnanayon a Siudad, ni Keith Larson
Disiembre 23–29
Apocalipsis 12–22
“Ti Agballiginto Tawidennanto Amin Dagitoy a Bambanag”
Bayat ti panangbasam iti Apocalipsis12–22, kitaem dagiti nakahilera iti nagbaetan iti nakita ni Juan ken ti no ania ti makitam ita nga al-aldaw ditoy lubong. Agbiruk iti naespirituan a pannakasaluad a mangtulong kenka a mangsapul dagiti personal a leksion bayat ti panangigugormo iti bagim iti napnuan kaipapanan a pagsasao.
Isuratmo Dagiti Impresionmo
Iladawam ti maysa a babai nga “agikkis iti panagpasikalna,ken agrigrigat nga agpasngay.” Itatta iladawam “ti maysa a dakkel a dragon a nalabaga, nga adda pito nga ulona ken sangapulo a sarana” nga agrikusrikus iti ngatuen ti babae,a sisasagana nga “alun-unenna daydi anakna inton naipasngay” (Apocalipsis 12:2-4). Tapno maawatan dagitoy a bersikulo iti paltiing ni Juan, laglagipem a dagitoy a ladawan itakderanna ti Simbaan ken ti pagarian ti Dios ken dagiti didigra a sanguendanto Para kadagiti Santo a nakapadas iti napalalo a panangidadanes idi al-aldaw ni Juan, kasla saan nga agturay ti balligi iti kinadakes. Mabalin met a narigat a pugtuan daytoy a balligi iti aldaw a kas iti aldawtayo, no ti kabusor ket madama ti “pananggubatna kadagiti sasanto” ket naited kenkuana “ti panagturay … iti isuamin a kaputotan, ken ili, pagsasao, ken pagarian” (Apocalipsis 13:7). Ngem iti paggibusan ti paltiing ni Juan ket sidadayag nga ipakitana a ti naimbag ket paksiatenna ti dakes. Matnagto ti Babilonia. Agturayto ni Jesucristo a kas Ari dagiti Ari. “Ket punasennanto ti amin a lulua kadagiti matada” ket ti napudno makipagturayto kenkuana ket “tawidennanto amin dagitoy a bambanag” (Apocalipsis 21:4, 7).
Dagiti Kapanunotan para iti Bukod a Panagadal iti Nasantuan a Kasuratan
Naituloy iti daga ti Gubat idiay Langit.
Awan unay adu nga ammotayo maipapan iti Gubat diay Langit, ngem adda nalawag numan bassit laeng a pannakailadawan daytoy iti Apocalipsis 12:7–11. Bayat ti panagbasam kadagitoy a bersikulo, iladawam ti bagim kas maysa a paset ti di pagkikinnaawatan iti dayta biag sakbay iti yaay iti daga. Ania ti isuro dagitoy a bersikulo maipapan iti no kasanoka ken ti dadduma a napudno nga annak ti Dios naparmekda ni Satanas? Ania ti iparangarang daytoy maipapan iti no kasano a parmekem isuna iti panawentayo bayat ti panagtultuloyna a “napanna ginubat [dagidi] addaan pammaneknek ken Jesucristo”? (bersikulo 17).
Kitaen met iti 1 Nephi 14:12–14; “Gubat iti Langit,” Dagiti Topiko ti Ebanghelio, topics.lds.org; Pangiwanwan iti Biblia, “Miguel,” “Gubat iti Langit.”
Asino daydi anghel a nakita ni Juan a mangikaskasaba iti ebanghelio
Maysa a pannakaipatungpal iti padto kadagitoy a bersikulo ket napasamak idi nagparang ni Moroni ken ni Joseph Smith ket inturongna kadagiti sinurat nga impatarusna ket naipablaak nga isu ti Libro ni Mormon. Linaon daytoy a libro ti “awan patinggana nga ebanghelio” a naipakumit kadatayo nga ikaskasaba kadagiti “amin a pagpagarian, ken kaputotan, ken pagsasao, ken il-ili”(Apocalipsis 14:6).
Inawisnak ti Apo a pumanaw iti Babilonia ken dagiti basbasolna.
Naglaon ti Apocalipsis 17–18 kadagiti saan a naurnos a lamlamina a mangiladladawan iti basol, kinamaterialismo, ken dagiti kinaderrep ti Babilonia—ti simbolo iti nainlasagan ken kinadakes. Mangpanunot kadagiti pagarigan kadagiti kasla Babilonia a kasasaad nga adda ita nga al-aldaw iti lubong, ket utobem ti no ania ti aramidem a mangsurot iti balakad a “rummuarkay iti” Babilonia ken “dikay mairaman kadagiti basbasolna” (Apocalipsis 18:4).
Makednganto manipud iti libro ti biag amin dagiti annak ti Dios.
Ipapan a maysa nga otor ti mangidiaya nga isurat ti libro maipapan iti biagmo. Ania dagiti detalye wenno padas a kayatmo nga iraman? No naammuam a dagiti masungad a tignaymo ket maisurat, kasanom nga iduma a sanguen ti biagmo? Panunotem ti maipapan iti daytoy bayat ti panangbasam iti maipapan iti Aldaw ti Panangukom.Apocalipsis 20:12–15. Ania ti namnamaem a maisuratto maipapan kenka iti libro ti biag?
Kitaen met iti Pangiwanwan iti Nasantuan a Kasuratan, “Libro ti Biag.”
No napudnoak, maawatkonto ti celestial a gloria.
Kas kasupadi kadagiti pannakailadawan ti Babilonia, ti Apocalipsis 21–22 iladawanna ti celestial a gloria a mangur-uray kadagiti napudno a pasurot ni Cristo. Ania dagiti ladawan, ragup ti balikas, wenno karkari kadagitoy a kapitulo ti mangparegta kenka tapno agtalinaed a napudno uray no narigat.
Kayat kad a sawen dagitoy a bersikulo nga awanen ti ania pay a mainayon a nasantuan a kasuratan malaksid ti Biblia?
Inlanad dagiti sumagmamano a tattao iti Apocalipsis 22:18–19 kas rason a mangiddian iti Libro ni Mormon ken ti dadduma pay a nasantuan a kasuratan iti ud-udina nga aldaw. Nupay kasta, insuro ni Elder Jeffrey R. Holland:
“Adda itan naindakkelan a panagaannamong dagiti dumani aminen nga iskolar ti biblia a daytoy a bersikulo ket mayaplikar laeng iti libro ti Apocalipsis, saan a ti sibubukel a Biblia. Dagitoy nga iskolar iti panawentayo ket annugotenda ti bilang dagiti ‘libro’ iti Baro a Tulag a dumani nairanta a naisurat kalpasan a naawat ti paltiing ni Juan iti Isla ti Patmos. …
“Ngem adda nalaklaka a sungbat. … Kas pagaammotayo a daytoy sibubukel a Biblia—maysa a koleksion dagiti sursurat a nareppet iti maymaysa a naimaldit a pinanid—awan pay idi dayta a bersikulo ket naisurat” (“Dagiti Balikasko … Saan nga Agsardeng,” Ensign wenno Liahona, Mayo 2008, 91).
Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening
Bayat ti panagbasam kadagiti nasantuan a kasuratan iti pamiliam, makatulong kenka ti Espiritu a mangammo no ania dagiti pagbatayan a yunay-unay ken ilawlawag tapno mangipaay kadagiti kasapulan ti pamiliam. Dagitoy ti sumagmamano a singasing:
Nalabit, a magustuan dagiti miembro ti pamilia ken matulongan ida manipud iti panagdrowing kadagiti ladawan ti parparmata ni Pedro a nailadawan iti Apocalipsis. Kas pagarigan, agdrowing kadagiti ladawan a naadaw iti Apocalipsis 12 ket mangiturong iti panaglilinnawag maipapan iti Gubat ti Langit (kiten iti dagiti bersikulo7–11). Dagiti ladawan a naggapu iti Apocalipsis 21 ket mangparegta iti panagsasarita maipapan iti celestial a pagarian. Mabalinmo met nga ipakita ti ladawan a naipakuyog iti daytoy a balabala ket dawatem dagiti miembro ti pamilia nga agsapul kadagiti bersikulo iti Apocalipsis 19 nga iyak-akem ti ladawan.
Ania ti kayat a sawen ti ragup ti balikas a “sao iti pammaneknekda”? Kasano dagiti pammaneknektayo ken ni Jesucristo matulongannatayo ken dagiti dadduma a mangparmek ken ni Satanas ?
Ania dagiti pampanunot nga adda kadagiti miembro ti pamiliam maipapan iti mangal-allilaw nga ayup? Kasanotay a takuaten ket liklikan dagiti panangal-allilaw a makitkitatayo iti lubong ita nga al-aldaw?
Kasano a ti 1 Nephi 22:26; Doktrina ken Katulagan 43:30–31 tulongannatayo a maawatan ti mabalin a kaipapanan ti “pannakaigalot” ni Satanas
Ania ti mabalin a napnuan kaipapanan ti addaan iti nagan ti Mangisalakan “iti mugmuging[tayo]”? (Apocalipsis 22:4; kitaen met iti Apocalipsis 13:16–17).
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Panangpadur-as iti Panangisurotayo
Surnadan dagiti awis nga agtignay. “No surnadam ti maysa nga awis nga agtignay, ipakitam [kadagiti miembro ti pamiliam] nga adda panangisakitmo kadakuada ken no kasano a pinaraburan ti ebanghelio dagiti biagda. Maikkam pay ida kadagiti gundaway a mangibinglay kadagiti padasda, a mangpapigsa iti panagkumitda ken mangpalugod kadakuada a mangsuporta iti maysa ken maysa iti panagbiag iti ebanghelio” (Panangisuro iti Wagas ti Mangisalakan, 35).
Ni Cristo iti nalabaga a roba nga agtugtugaw iti maysa a puraw a kabalio