Ti Naimbag a Pastor, ni Del Parson

Disiembre 9–15

Apocalipsis 1–11

“Dayag, ken Pannakabalin ti Adda Koma … iti Cordero iti Awan Inggana”

Ibilangmo nga isurat dagiti saludsod nga adda kenka maipapan iti no ania ti basaem iti Apocalipsis. Mabalinmo ti agsukisok kadagiti saludsod wenno ilawlawag dagitoy iti maysa a miembro ti pamilia wenno iti klase iti Simbaan.

Isuratmo Dagiti Impresionmo

Nagkarigatanka kadi a yebkas kadagiti dadduma no ania ti nariknam kabayatan ti nabileg a naespirituan a padas? Ti inaldaw a lengguahe ket makarikna iti panagkurang a mangiladawan kadagiti naepirituan a rikna ken impresion. Nalabit a daytoy ti no apay nga inusar ni Juan ti kasta a simbolismo ken ar-arapaap a panangiladawan iti nangayed a paltiingna. Simple lang koma ti panangdakamatna a nakitana ni Jesucristo, ngem tapno makatulong kadatayo a maawatan ti padasna, inladawanna ti Mangisalakan nga ar-aramatenna dagiti balikas a kas kadagitoy: “Dagiti matana kas da la darang ti apuy,” “ket iti ngiwatna rimuar ti maysa a kampilan, a dua ti tademna”, ket “daydi rupana kas la panaglawag ti init no karaniagna” (Apocalipsis 1:14–16). Bayat ti panangbasam iti libro ti Apocalipsis, padasem a takuaten dagiti mensahe ni Juan a tinarigagayanna a sursuruem ken riknaen uray no dimo maawatan ti kaipapanan iti likudan ti tunggal simbolo. Apay koma nga indiligna dagiti pagu-ummongan iti Simbaan iti pagsilawan, ni Satanas iti dragon ken ni Jesucristo iti kordero? Kangrunaanna, saan a kasapulan a maawatanyo ti tunggal simbolo iti Apocalipsis tapno maawatan dagiti napateg a tema, agraman ti tema ti kangrunaan a gapu: Ni Jesucristo ken Dagiti pasurotna abakendanto dagiti pagarian ti tao ken ni Satanas.

Dagiti Kapanunotan para iti Bukod a Panagadal iti Nasantuan a Kasuratan

Paltiing

Kasano a maaddaannak iti kaipapanan iti libro ti Apocalipsis?

Ti libro ti Apocalipsis ket mabalin a narigat a maawatan, ngem saanka koma a maupay. Mabalin a paregtaennaka ti kari ni Juan nga agtultuloy iti panagkagumaan: “Nagasat dagiti agbasa, ken dagiti dumngeg ken makaawat kadagiti balikas ti daytoy a padto, ken mangtungpal kadagiti banag a naisurat dita, ta asidegen ti yaay ti Apo” (Patarus ni Joseph Smith, Apocalipsis 1:3 [iti Pangiwanwan iti Nasantuan a Kasuratan], nainayon ti panangyunay-unay).

Dagiti sumaganad a saludsod ken resources ket mangipaay kadagiti nauneg a pannakaammo ken pannakaawat bayat ti panangadalmo iti Apocalipsis:

• Asino ni Juan? (Kitaen iti 1 Nephi 14:18–27; Pangiwanwan iti Nasantuan a Kasuratan, “Juan.”)

• Kasano a nabukel ti libro, ken ania dagiti sumagmamano a tema a sapulen? (Kitaen iti Pangiwanwan iti Nasantuan a Kasuratan, “Paltiing ni Juan.”)

• Ania ti ibagi dagiti simbolo iti Apocalipsis? (Kitaen iti Doktrina ken Katulagan 77; New Testament Student Manual [Church Educational System manual, 2014], 525–68.)

Mabalin met a makatulong ti mangkita kadagiti nauneg a pannakaammo ken pannakaawat iti Patarus ni Joseph Smith dagiti sabasabali a binatog ti Paltiing. (Kitaen dagiti footnote ken ti Bible appendix.)

Paltiing

Isuro ti parmata ni Juan ti no kasano nga isalakan ti Nailangitan nga Ama dagiti annakna.

Bayat ti panangirugim nga adalen ti libro ti Apocalipsis, panunotem no kasano nga isaip dagiti banag a nabasam iti no ania ti ammom maipapan iti plano ti Nailangitan nga Ama para iti pannakasubbot ken pannakaitan-ok dagiti annakna. Mabalinmo nga irugi babaen ti panangrebyu ti pakagupgopan ti plano ti pannakaisalakan iti Preach My Gospel (dagiti panid 47–59). Kalpasanna, bayat ti panangbasam ti pakaammuan ni Juan iti parmatana, saludsodem ita bagim dagitoy a saludsod: Ania dagiti kinapudno ti maadalko manipud iti Apocalipsis maipapan iti no ania ti naaramid ti Nailangitan nga Ama tapno tulongannak a makasubli Kenkuana? Kasano a matulungannak daytoy tapno maaawatak ti plano ti Dios para kaniak?

Matulongannaka tapno maammuam nga iti sapasap:

• Adu iti kapitulo 12 ti maipapan kadagiti pasamak sakbay daytoy a biag (kitaen met iti “Premortality,” Gospel Topics, topics.lds.org).

• DagitiKapitulo 6–11, 13–14, 16–19 ket iladawanna ti mortal a biag ken dagiti pasamak iti pakasaritaan ti daga (kitaen met iti “Mortality,” Gospel Topics, topics.lds.org).

• DagitiKapitulo2–3, 15, 20–22 ket iladawanna ti Maudi a Panangukom ken ti pannakaitan-ok nga agur-uray kadagiti napudno iti lugar nga agnanayon (kitaen met iti “Postmortality,” Gospel Topics, topics.lds.org).

Apocalipsis 2–3

Personal nga am-ammonak ni Jesucristo ket tulongannak a mangparmek kadagiti karitko.

Ipalgak dagiti balikas ti Mangisalakan iti Apocalipsis 2–3 a naawatanna dagiti balligi ken pannakibalubal a nagduduma iti kada tunggal branch ti Simbaan kadagidi aldaw ni Juan. Impanamnamana kadagiti Santo iti sumagmamano a paguummongan nga ammona, dagiti dadduma pay a banag, dagiti “aramid,” “panagtutuok,” “kinapanglaw”, ken “panangngaasida” (Apocalipsis 2:2, 9, 19)—karagpin ti sumagmamano a wagas a mabalinda a pasayaaten.

Dagitoy a kapitulo ket mangipalagip kenka a maawatan ti Mangisalakan dagiti pagpigsaam ken ti pagkapsutam ket kayatnaka a tulongan a mangparmek kadagiti naindagaan a karit kenka. Ania ti inkari ni Jesucristo kadagiti mangparmek? Ania dagiti panagbalbaliw ti mariknam a pakaguyugoyam nga aramiden a mangparmek kadagiti karit kenka?

Apocalipsis 5

Ni laeng Jesucristo ti makaaramid iti pannakaipatungpal ti plano ti Nailangitan nga Ama.

Nupay dimo malagip daytoy, nalabit nga addaka kadagidi paspasamak nga inladawan ni Juan iti Apocalipsis 5. Bayat ti panangbasam maipapan kadagitoy a pasamak, ibilang ti no kasano koma idi no naamiristayo a ni Jesuscristo (“ti cordero”) ket maaramidna a posible ti plano ti Nailangitan nga Ama (luktan ti libro ken warwaren dagiti pito a selyo). Apay a ni Jesucristo laeng ti makaaramid iti daytoy? Kasano a maipakitam ti pammatim kenkuana a kas Mangisalakanmo?

Kitaen met iti Job 38:4–7; “Atonement of Jesus Christ,” Gospel Topics, topics.lds.org.

Apocalipsis 6–11

Ti Pannakaisubli ket immun-una ngem iti pannakadadael a mapasamak sakbay ti Maikadua a Yaay ni Jesucristo.

Ti Apocalipsis 6–11 ket iladawanna dagiti paspasamak a maaramidto kabayatan ti panaglabas ti panagindeg ti daga (kitaen iti DkK 77: 6), agraman ti Pannakaisubli ti ebanghelio kadagiti ud-udina nga aldaw (kitaen iti Apocalipsis 7). Bayat ti panangbasam maipapan kadagiti paspasamak nga impadto ni Juan ket buyaem ti pannakapasamaken ti dadduma, ania ti nangparegta kenka nga aramidem tapno nasaysayaat a maisaganam ti bagim ken ti pamiliam para iti Maikadua a Yaay?

Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening

Bayat ti panagbasam kadagiti nasantuan a kasuratan iti pamiliam, makatulong kenka ti Espiritu a mangammo no ania dagiti pagbatayan a yunay-unay ken ilawlawag tapno mangipaay kadagiti kasapulan ti pamiliam. Dagitoy ti sumagmamano a singasing:

Apocalipsis 2–3

Agpammarang a nangted ni Juan iti mensahe iti pamiliam kas kadagiti intedna kadagiti simbaan idi panawenna. Ania ti sawenna nga agbalin a nasayaat? Kasano a makapagbalinka a nasaysayaat?

Apocalipsis 3:20

Mangipakitaka iti ladawan ti Mangisalakan a tugtugtogenna ti ridaw (kitaen ti ladawan a nangkadua iti daytoy a balabala). Awisem ti pamiliam a mangbasa iti Apocalipsis 3:20 ken paglilinnawagan dagiti saludsod a kas iti sumaganad: Apay a nagtugtog ni Jesus imbes a sumbrek latta koman iti uneg? Kasano a maawistayo ti impluensiana iti pagtaengantayo?

Apocalipsis 7:9, 13–14

Ania ti isuro dagitoy a bersikulo kadatayo maipapan iti no apay a puraw ti usarentayo para kadagiti ordinansa ti templo?

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Panangpadur-as iti Panangisurotayo

Yallukoy dagiti saludsod. Dagiti saludsod ti mangipakita a nakasagana dagiti miembro ti pamilia nga agsursuro ken mangted iti nauneg a pannakaammo ken pannakaawat iti no kasanoda nga agresponde iti no ania ti maisursuro kadakuada. Isurom iti pamiliam no kasano ti mangsarak kadagiti sungbat iti nasantuan a kasuratan. (Kitaen iti Panangisuro iti Wagas ti Mangisalakan, 25–26.)

Pastreken Isuna, ni Greg K. Olsen