“Disiembre 16–22. Paskua: “Naimbag a Damag ti Dakkel a Ragsak’”Umaykayo, Sumurot Kaniak—Para kadagiti Indibidual ken Pamilia: Baro a Tulag 2019 (2019)
“Disiembre 16–22. Paskua,” Umaykayo, Sumurot Kaniak—Para kadagiti Indibidual ken Pamilia: 2019
Natalged iti Kuadra, ni Dan Burr
Disiembre 16–22
Paskua
“Naimbag a Damag ti Dakkel a Ragsak”
Para iti sumagmamano, ti Paskua ket napnuan iti pakakumikoman a panawen. Ibilangmo no kasano a ti panagadalmo iti Baro a Tulag ket makatulong a makaiyeg iti espiritu ti talna ken kinasagrado iti biagmo. Utobem ti impluensia ti pannakayanak ken mision ti Mangisalakan iti biagmo, ket isuratmo ti ania man kadagiti naespirituan nga impresion nga umay.
Isuratmo Dagiti Impresionmo
Apay a ti pannakaipasngay ti maysa a maladaga ket makaipaay iti kasta a dakkel a ragsak? Nalabit gapu ta ti maysa a kaiyanak a maladaga ket simbolo ti namnama. Adda maysa a banag maipapan iti baro a biag a napnuan kadagiti posibilidad a mangawis kadatayo nga agutob maipanggep iti no ania ti maipaay a biag ti dayta nga ubing ken no ania dagiti nakaskasdaaw a banag nga inna ipatungpal. Saan pulos nga iti kaanuman adda idin napudpudno ngem daydi pannakaipasngay ti Anak ti Dios, ni Jesucristo. Saan pulos nga iti kaanuman adda idin ad-adu a namnama a naited iti maysa nga ubing, ken pulos nga iti kaanuman adda idin maysa a mayanak nga addaan iti adu a kari.
Idi inawis ti maysa nga anghel dagiti pastor tapno biruken ti kayyanak nga ubing iti maysa a kullo-ong, inikkanna met ida iti mensahe maipapan iti dayta nga ubing. Daydi ket mensahe ti namnama—a daytoy a maladaga ket immay iti daga tapno mangipatungpal iti sagrado a mision. Inaramid dagiti papastor ti mensaheda nga “impakaammoda … ket amin dagiti nakangngeg nagsiddaawda kadagiti insao kadakuada dagiti papastor. Ngem sinalimetmetan amin ni Maria dagitoy a bambanag, ket inutobna ida iti pusona” (Lucas 2:17–19). Nalabit nga agbalin a nasayaat a suruten ti pagwadan ni Maria itoy a Paskua: a mangutob a naimpusuan dagiti banag a nasursurom maipapan iti Mangisalakan iti daytoy a tawen. Kasanuna a naipatungpal ti misionna a mangsubbot kadagiti nabasam a pakasaritaanna? Ken nangnangruna pay, kasano a nabaliwan ti biagmo ti misionna ?
Dagiti Kapanunotan para iti Bukod a Panagadal iti Nasantuan a Kasuratan
Mateo 1:18–25; 2:1–12; Lucas 1:26–38; 2:1–20
Ni Jesucristo bimmaba tapno mayanak kadatayo iti daga.
Uray no namin-adu idin a nabasam wenno nangngegam ti estoria ti pannakayanak ni Jesucristo, adalem itan a panawen nga addaan iti daytoy a kapanunotan: “Ti Paskua ket saan laeng a panagrambak iti no kasano nga immay ni Jesus iti lubong ngem pati pay ti panangammo no asino Isuna—ti Apo ken Mangisalakan, ni Jesucristo—ken ti apaynga immay Isuna”(Craig C. Christensen, “The Fulness of the Story of Christmas” [First Presidency Christmas devotional, Dis. 4, 2016], broadcasts.lds.org).
Ania ti ammom maipapan iti no asino ni Jesucristo idi sakbay a naipasngay? (kitaen, kas pagarigan, Juan 17:5; Mosiah 3:5; DkK 76:13–14, 20–24; Moises 4:2). Kasano nga apektuan daytoy a pannakaammo ti marikriknam no kasta a basbasaem ti maipapan iti pannakaipasngayna?
Ania ti ammom maipapan iti no apay nga immay ni Jesucristo ditoy daga? (kitaen, kas pagarigan ,iti Lucas 4:16–21; Juan 3:16–17; 3 Nephi 27:13–16; DkK 20:20–28). Kasano nga apektuan daytoy a pannakaammo ti marikriknam maipapan iti Mangisalakan? Kasano nga apektuan daytoy ti wagas ti panagbiagmo?
Kitaen met iti 2 Taga Corinto 8:9; Hebreo 2:7–18; 1 Nephi 11:13–33; Alma 7:10–13; “The Nativity” (video, LDS.org).
1 Taga Corinto 15:21–26; Taga Colosas 1:12–22; 1 Pedro 2:21–25
Naipatungpal ni Jesucristo ti misionna ket inaramidna a kabalinak nga agtawid ti biag nga agnanayon.
Nupay naalikubkob ti estoria ti pannakayanak ni Cristo kadagiti nakaskasdaaw a pasamak, ti pannakaypasngayna ket maysa lang a gagangay a pannakayanak no saan a gapu iti naindaklan nga aramid nga impatungpalna iti ud-udi nga aldaw ti panagbiagna. Kas panangilawlawag ni Presidente Gordon B. Hinckley, “Ti maladaga a ni Jesus iti Betlehem ket nagbalin laeng a sabali a maladaga nga awanan iti pannubbot ni Cristo iti Getsemani ken Kalbario, ken ti naballigian a kinapudno ti Panagungar” (iti“Ti Nakaskasdaaw ken Pudno nga Estoria ti Paskua,” Ensign Dis. 2000, 5).
Getsemani, ni J. Kirk Richards
Ti ebidensia iti nadiosan a mision ti Mangisalakan ken ti nabileg nga ayatna ket mabirukan iti intero a Baro a Tulag. Ania dagiti binatog wenno pakasaritaan ti sumangbay dita panunotmo? Mabalinmo a sublian daytoy a pagadawan wenno dyurnal a pagadalan ket rebiyuem ti sumagmamano kadagiti impresion nga insuratmo. Mabalinmo met a basaen ti 1 Taga Corinto 15:21–26; Taga Colosas 1:12–22; 1 Pedro 2:21–25 ket utobem no kasano a nabendisionan ti Mangisalakan ken ti aramidna ti biagmo. Ania ti naparegta a nariknam a mangbaliw iti biagmo? Kasanoka a mairanud iti bileg ti Mangisalakan?
Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening
Bayat ti panagbasam kadagiti nasantuan a kasuratan iti pamiliam, makatulong kenka ti Espiritu a mangammo no ania dagiti pagbatayan a yunay-unay ken ilawlawag tapno mangipaay kadagiti kasapulan ti pamiliam. Dagitoy ti sumagmamano a singasing:
Kasanom a lagipen ti pannakayanak ni Jesucristo iti pamiliam? Dagitoy ti sumagmamano a kapanunotan, wenno aramidem babaen iti bukodmo a wagas:
-
Sangsangkamaysatayo a basaen wenno iyakem dagiti pasettayo iti estoria ti Pannakayanak.
-
Buyaen met ti video “The Nativity” (LDS.org).
-
Sukisokem dagiti sumagmamano a resources iti christmas.mormon.org; jesuschrist.lds.org; wenno “Christmas,” Gospel Topics, topics.lds.org.
-
Agbuya iti maysa a Debosional ti Paskua ti Umuna a Panguluen (broadcasts.lds.org;).
-
Aggigiddan nga agkanta kadagiti himno ti Paskua, wenno mangpili kadagiti karruba wenno gagayyem a sarungkaran ken kantaan ida (kitaenDagiti Himno, num. 201–14).
-
Aramiden ti maysa a serbisio.
-
Dawatem kadagiti miembro ti pamilia dagiti detalye ti estoria ti Pannakayanak a mangted kadakuada kadagiti kapanunotan para kadagiti arkus wenno dekorasion nga aramidenda a mangipalagip kadakuada ken ni Jesucristo.
1 Taga Corinto 15:21–26; Taga Colosas 1:12–22; 1 Pedro 2:21–25
Apay nga agyamantayo iti pannakaypasngay ni Jesucristo? Ania dagiti sagut nga naitednan kadatayo? Kasano nga ipakitatayo Kenkuana ti kinamanagyamantayo?
“Ti Sibibiag a Cristo: Ti Pammaneknek dagiti Apostol”
No kalikagumantayo a tulongan ti pamiliatayo ipokustayo ti Mangisalakan iti panawen ti Paskua, nalabit mabalinyo ti mangbubos iti sumagmamano nga oras tapno sangsangkamaysa nga agbasa ken agadal. “Ti Sibibiag a Cristo: Ti Pammaneknek dagiti Apostol” (Ensign wenno Liahona, Mayo 2017, uneg ti akinsango a kalub). Nalabit mabalinmo nga ikabesa dagiti binatog manipud iti “Ti Sibibiag a Cristo” wenno sapulen dagiti panangiladawan ti kabibiag ti Mangisalakan iti Baro a Tulag a mangsuporta kadagiti palawag dita. Mabalinmo pay nga awisen ti tunggal miembro ti pamilia nga isurat ti bukodna a pammaneknek ken ni Jesucristo ken, no matignay, ibasam iti pamilia.
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Panangpadur-as iti Bukod a Panagadal
Sapulem ni Jesucristo. Isurodatayo dagiti nasantuan a kasuratan nga amin a bambanag ket paneknekanda ni Jesucristo (kitaen iti Moises 6:62–63), isu a nasken a sapulentayo Isuna kadagiti amin a bambanag. Bayat ti panangbasam kadagiti nasantuan a kasuratan, ibilangmo ti panangisurat wenno panangmarka kadagiti bersikulo a mangisuro kenka iti maipapan kenkuana. Maaddaan iti panawen kadagiti aldaw a mangpaspasungad iti Paskua tapno magsapul kadagiti bambanag iti aglawlawmo a mangipaneknek maipapan ken ni Jesucristo.
Ti Pannakayanak, ni Brian Call