“Disiembre 9–15. Apocalipsis 1–11: ‘Dayag, ken Pannakabalin, ti Adda Koma … iti Cordero iti Awan Inggana’” Umaykayo, Sumurot Kaniak—Para iti Primary: Baro a Tulag 2019 (2019)
“Disiembre 9–15. Apocalipsis 1–11,” Umaykayo, Sumurot Kaniak—Para iti Primary: 2019
Ti Naimbag a Pastor, ni Del Parson
Disiembre 9–15
Apocalipsis 1–11
“Dayag, ken Pannakabalintio Adda Koma … iti Cordero iti Awan Inggana”
Mabalin a narigat a maawatandagiti ubbing ti simbolismo iti Apocalipsis, ngem ti Apocalipsis ket naglaon pay iti napateg a doktrina a napintas ken simple.
Isuratmo Dagiti Impresionmo
Yawis ti Panagbibinninglay
Awisem dagiti ubbing a mangibinglay iti no kasano ti mariknada no makitada ni Jesucristo iti maysa a parmata. Ilawlawag nga iti libro ti Apocalipsis, inladawan ni Juan ti maysa a parmata a nakakitaanna ken ni Jesus ken dagiti napapateg a banag maipapan iti napalabas ken iti masakbayan.
Isuro ti Doktrina
Dagiti In-inaudi nga Ubbing
Maawisko ni Jesucristo iti biagko.
Makatulong kadagiti ubbing ti metapora maipapan ken ni Jesus a nakatakder iti ridaw ken agtuktuktok tapno maawatanda a kayatna ti umasideg kadakuada.
Dagiti Mabalin nga Aktibidad
-
Ipakitam ti ladawan manipud iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia. ken basaem ti Apocalipsis 3:20. Awisem dagiti ubbing nga ipapanda a nagtuktuktok ni Jesus iti ridaw kadagiti pagtaenganda. Pastrekenda kadi Isuna? Ania iti panagkunada nga isao ken aramidenna koma?
-
Awisem dagiti ubbing nga ibagada kenka iti maipapan kadagiti panawen a nagurayda iti maysa a tao a a sumaringkar iti pagtaenganda a naragsakanda a makita. Ania ngata ti rikna ti agur-uray iti dayta a tao nga agtuktok iti ridaw? Ania ngata no dida pulos pastreken ti tao iti uneg? Basaem ti Apocalipsis 3:20, ket pagsisinnublaten dagiti ubbing nga agiggem iti maysa a ladawan ni Jesus ket agpampamarang nga agtuktok iti maysa a ridaw. Mabalin nga agpammarang dagiti dadduma a miembro ti klase a manglukat iti ridaw. Ania ti mabalintayo nga aramiden tapno maiyasidegkadatayo ni Jesus, nupay saantayo a makita Isuna? Ibilang ti panangted iti tunggal ubing iti maysa a ladawan ni Jesus a mayawid.
Ni Jesuscristo ti agmaymaysa laeng a maikari nga agbalin a Mangisalakanko.
Naammuan ni Juan iti parmatana a ni Jesucristo laeng ti (ibagi ti maysa a kordero) mabalin a Mangisalakantayo ken mangipatungpal ti plano ti Ama (ibagi ti nakaserra a libro).
Dagiti Mabalin nga Aktibidad
-
Sakbay ti klase, mangsapul kadagiti ladawan a mangibagi kadagiti bendision a sidadaan a magun-od gapu iti Pannubbot ni Jesucristo (kas iti templo, panagbuniag, ken dagiti pamilia), ikabil dagitoy iti maysa a libro, ket bungonen ti libro iti papel wenno tali. Babaen ti panangusar iti sumagmamano a kangrunaan a ragup ti balikas manipud iti Apocalipsis 5:1–10, iladawam ti parmata a nakita ni Juan. Ipakitam kadagiti ubbing ti libro, ket ibagam kadakuada a ti laeng wagas a manglukat iti libro ket ti mangsapul iti ladawan ni Jesus nga inlemmengmo iti siled. No makitada ti ladawan, luktam ti libro ket ibinglaymo kadagiti ubbing dagiti ladawan iti libro. Paneknekam a ti Mangisalakan laeng ti agmaymaysa laeng a mangaramid a posibledagita a banag.
-
Gupgopem ti parmata a nailadawan iti Apocalipsis 5:1–10, ket awisem dagiti ubbing a mangyakem ti no kasano ti narikna ni Juan ken dagiti dadduma pay kabayatan ti nadumaduma a paset ti parmata. Kas pagarigan, mabalin nga agpammarangda nga agsangit no awan ti makalukat ti libro, wenno naragsakanda idi naluktan ti Mangisalakan ti daytoy.
Makatulong kaniak ni Jesuscristo nga agbalin a nadalus manipud iti basol.
Nakita ni Juan ti adu a tao a nakakawes iti roba “pinapudaw … iti dara ti Cordero” (bersikulo 14). Ibilangmo no kasano a makatulong daytoy a parmata kadagiti ubbing a makaawat iti kinapateg ti panagbalin a nadalus manipud kadagiti basbasoltayo babaen ti Pannubbot ni Jesucristo.
Dagiti Mabalin nga Aktibidad
-
Ipakitam kadagiti ubbing dagiti sumagmamano a kawes iti panagbuniag wenno dadduma pay a puraw a kawes ken ti maysa a ladawan ni Jesus. Ibasa ti Apocalipsis 7:9, 13–14 kadagiti ubbing, ket kiddawem kadakuada nga itudoda ti ladawan ken dagiti kawes tunggal mangeganda ti balikas a puraw. Ilawlawag a dagiti puraw a kawes ti mangibagi iti kinadalus ken mangipalagip kadatayo a maaramidnatayo a nadalus ni Jesucristo manipud kadagiti bidduttayo.
-
Ipakitam kadagiti ubbing ti maysa a pedaso ti puraw a lupot, ken parugita daytoy kadakuada babaen ti panangsuratda daytoy iti bolpen wenno panangikabilda iti rugit iti daytoy. Ilawlawag a ti basol ti mangparugit kadagiti espiritutayo. Mangipakitaka iti ladawan ni Jesus iti Getsemani a (kas iti Libro ti Arte ti Ebanghelio, num. 56), ipaknim ti narugit a lupot, ket ipakitam ti nadalus a puraw a lupot. Paneknekam a babaen ti Pannubbot ni Jesucristo, makapagbalintayo a nadalus.
-
Agkansion iti kanta maipapan iti panagbuniag, ket paglilinnawagan no kasano a makatulong ni Jesus kadatayo nga agbalin a nadalus no mabuniagantayo.
Isuro ti Doktrina
Dagiti In-inauna nga Ubbing
Makapiliak nga agbalin a paset ti biagko ni Jesucristo.
Kasano a matulongam dagiti ubbing a sursuruam a manglukat iti puspuso ken biagda iti bileg ken impluensia ni Jesucristo?
Dagiti Mabalin nga Aktibidad
-
Awisem dagiti ubbing a kumita iti ladawan manipud iti balabala iti daytoy a lawas iti Umayka, Sumurot Kaniak—Para kadagiti Indibidual ken Pamilia bayat ti panangbasam ti Apocalipsis 3:20. Tapno matulongan ida nga agbalin a napateg ti ladawan kadakuada, awisem ida a sagpaparis nga agtitinnulongda a mangsungbat iti saludsod a kas kadagitoy: Apay nga agtuktuktok ni Jesus iti ridaw? Apay nga awan ti doorknob iti ruar ti ridaw? Ania ti kaipapanan ti panangipalubos a sumrek ni Jesus iti biagtayo?
-
Kiddawen kadagiti ubbinga mangisurat iti pisarra ti nadumaduma a wagas a “manglukat ti ridaw” ken ni Jesus. Mabalin nga iraman iti sumagmamano a pagarigan ti panagserbi kadagiti dadduma, panagbasa kadagiti nasantuan a kasuratan, ken pannakiranud iti sakramento.
Ni Jesuscristo ti agmaymaysa laeng a maikari nga agbalin a Mangisalakanko.
Ti parmata a nailadawan iti Apocalipsis 5 ket isurona a ni laeng Jesucristo ti maikari ken makabael a mangaramid iti Pannubbot ken mangisalakan kadatayo manipud iti basol.
Dagiti Mabalin nga Aktibidad
-
Awisem dagiti ubbing nga agsarita maipapan kadagiti panawen idi kasapulanda ti maysa a tao nga agaramid iti maysa a banag a saanda a kabaelan nga aramiden para iti bagbagida. Kiddawem kadakuada a basaenda ti Apocalipsis 5:1–10 ket sarakenda dagiti kasapulan a maaramid a maysa laeng a tao ti makaaramid (ilawlawag a ni Jesucristo ti Cordero ket ti libro ti mangibagi iti plano ti Dios). Ania ti inaramid ni Jesus para kadatayo nga awan ti asino man a makaaramid?
-
Kiddawem kadagiti ubbing a mangsapul ti maysa a himno wenno kanta dagiti ubbing a mangipaneknek ti maipapan ken ni Jesucristo. Ania ti isuro dagiti balikas ti kanta maipapan ken ni Jesucristo? Kasano a maipada daytoy a kanta iti himno a pagdaydayaw a nakansion maipapan ken ni Jesucristo iti Apocalipsis 5:9–10?
Makatulong kaniak ti ebanghelio a mangparmek iti sulisog.
Mabalin a mayarig ti asuk a nangpasipnget iti tangatang iti Apocalipsis 9:2 kadagiti pannulisog (kitaen iti 1 Nephi 12:17).
Dagiti Mabalin nga Aktibidad
-
Mangidrowing ti ladawan ti maysa nga init ken maysa a nangisit nga ulep, ket gettengen dagitoy. Awisem dagiti ubbing a basaenda ti Apocalipsis 9:2 ken 1 Nephi 12:17 ket isuratda iti nasipnget nga ulep no ania ti ibagi ti asuk wenno dagiti angep kadagitoy a bersikulo. Ikabil ti nasipnget nga ulep iti pisarra, ket awisem dagiti ubbing nga agaramid iti listaan dagiti sulisog a pakaipasanguan dagiti ubbing a katawenda. Kalpasanna ikabil ti init iti pisarra ket kiddawem kadakuada a mangaramid iti listaan dagiti ramit nga inted ti Nailangitan nga Ama kadatayo a mangparmek iti kinasipnget iti lubong.
-
Kasano a matulongan dagiti ubbing dagiti dadduma nga adda iti naespirituan a sipnget? Tapno makatulong kadakuada a mangpanunot maipapan iti daytoy a saludsod, awisem dagiti ubbing nga agsarita maipapan iti no kasano a makatulongda kadagiti adda iti naespirituan a sipnget.
Yallukoy ti Panagsursuro iti Pagtaengan
Awisem dagiti ubbing nga ibinglayda kadagiti pamiliada dagiti wagas a pakaawisanda ti impluensia ti Mangisalakan iti pagtaenganda.
Panangpadur-as iti Panangisurotayo
Yallukoy ti panagraem. Ti panangpanunot maipapan iti Nailangitan nga Ama ken ni Jesucristo ket napateg nga aspekto ti panagraem. Mabalin nga ipalagipmo kadagiti ubbing nga agbalinda a managraem babaen ti siuulimek a panangkansion wenno panangdayyeng iti maysa a kanta wenno panangi-display iti ladawan ni Jesus.