« អ្នកគឺជាគ្រូបង្រៀនម្នាក់របស់កុមារ » ចូរមកតាមខ្ញុំ—សម្រាប់ថ្នាក់បឋមសិក្សា ៖ ព្រះគម្ពីរសញ្ញាថ្មី ឆ្នាំ ២០១៩ ( ២០១៩ )
« អ្នកគឺជាគ្រូបង្រៀនម្នាក់របស់កុមារ » ចូរមកតាមខ្ញុំ—សម្រាប់ថ្នាក់បឋមសិក្សា ៖ ឆ្នាំ ២០១៩
អ្នកគឺជាគ្រូបង្រៀនម្នាក់របស់កុមារ
អ្នកត្រូវបានហៅដោយព្រះឲ្យបង្រៀនកូនចៅរបស់ទ្រង់តាមរបៀបរបស់ព្រះអង្គសង្គ្រោះ ។ អ្នកត្រូវបានញែកចេញចំពោះការហៅបម្រើនេះដោយសិទ្ធិអំណាចនៃបព្វជិតភាពដ៏បរិសុទ្ធរបស់ទ្រង់ ។ ទោះបីជាអ្នកមិនមែនជាគ្រូបង្រៀនដ៏មានបទពិសោធន៍ម្នាក់ក្ដី ក៏ប៉ុន្ដែដរាបណាអ្នករស់នៅដោយភាពសក្ដិសម អធិស្ឋានជារៀងរាល់ថ្ងៃ ហើយសិក្សាព្រះគម្ពីរ នោះព្រះនឹងប្រទានដល់អ្នកនូវឥទ្ធិពល និង ព្រះចេស្ដានៃព្រះវិញ្ញាណបរិសុទ្ធ ( សូមមើល នីហ្វៃទី ២ ៣៣:១ ) ។
អស់កុមារដែលត្រូវបានទុកចិត្តនឹងអ្នកឲ្យមើលថែ គឺជាកូនចៅរបស់ព្រះវរបិតាសួគ៌ ហើយទ្រង់ជ្រាបពីអ្វីដែលពួកគេត្រូវការ និងពីរបៀបដ៏ល្អបំផុតដើម្បីជួយដល់ពួកគេ ។ តាមរយៈព្រះវិញ្ញាណបរិសុទ្ធ នោះព្រះនឹងដឹកនាំអ្នកពេលអ្នករៀបចំមេរៀន និងពេលដែលអ្នកកំពុងបង្រៀន ។ ទ្រង់នឹងបើកបង្ហាញដល់អ្នកនូវអ្វីដែលអ្នកត្រូវនិយាយ និង អ្វីដែលអ្នកត្រូវធ្វើ ។
នៅគ្រប់ទិដ្ឋភាពនៃជីវិតរបស់ពួកគេ កុមារជាទីស្រឡាញ់ទាំងនេះនឹងបន្ដស្រូបយកព័ត៌មាន បណ្ដុះ និងសម្រិតសម្រាំងទៅជាគំនិត ហើយធ្វើការស្វែងរក ព្រមទាំងចែកចាយគំហើញនោះ ។ ការណ៍នេះគឺពិតជាពិសេសចំពោះដំណឹងល្អ ដោយសារកុមារត្រៀមខ្លួនជាស្រេច និងអន្ទះសាចង់រៀនពីសេចក្ដីពិតសាមញ្ញរបស់វា ។ សេចក្ដីជំនឿរបស់ពួកគេក្នុងរឿងខាងវិញ្ញាណមានភាពរឹងមាំ និងបរិសុទ្ធ ហើយពួកគេមើលទៅគ្រប់នាទីទាំងអស់ជាពេលវេលារៀនសូត្រមួយ ។ ពួកគេស្ម័គ្រចិត្តធ្វើតាមអ្វីដែលពួកគេបានរៀនសូត្រ ទោះបីជាការយល់ដឹងរបស់ពួកគេពុំទាន់បានពេញលេញក្ដី ។ នេះគឺជារបៀបដែលពួកយើងទាំងអស់គ្នាគួរតែទទួលបានដំណឹងល្អ ។ កាលព្រះអង្គសង្គ្រោះបានបង្រៀនថា « អ្នកណាដែលមិនទទួលនគរព្រះ ដូចជាកូនតូចៗ នោះមិនបានចូលទៅក្នុងនគរនោះឡើយ » ( លូកា ១៨:១៧ ) ។
ការហៅបម្រើឲ្យបង្រៀនដល់កុមារគឺជាការទុកចិត្តដ៏ពិសិដ្ឋមួយ ។ វាជារឿងធម្មតាដែលពេលខ្លះមានអារម្មណ៍ថាស្មុគស្មាញខ្លាំងពេក ។ ប៉ុន្ដែសូមចងចាំថា ព្រះវរបិតាសួគ៌របស់អ្នកបានហៅអ្នក ហើយទ្រង់នឹងមិនដែលបោះបង់អ្នកចោលឡើយ ។ នេះគឺជាកិច្ចការរបស់ព្រះអម្ចាស់ ហើយកាលអ្នកបម្រើ « ឲ្យអស់ពីចិត្ត អស់ពីពលំ អស់ពីគំនិត ហើយអស់ពីកម្លាំង » ( គ. និង ស. ៤:២ ) នោះទ្រង់នឹងពង្រីកសមត្ថភាព អំណោយទាន និងទេពកោសល្យរបស់អ្នក ហើយការបម្រើរបស់អ្នកនឹងឲ្យពរដល់ជីវិតរបស់កុមារដែលអ្នកបង្រៀន ។