E reirei Iesu irarikin taari

E Reireiniia Aomata Iesu Irarikin Taari, iroun James Tissot

Beberuare 20–26

Mataio 6–7

“E reireiia n Aron ae Temanna ae Mwaaka”

Moanna man warekan Mataio 6–7, ni iangoia ataei ake ko reireiniia. Tera te rongorongo man mwakoro aikai ae a kainanoia n ongo? Nakomai, Iriirai—Ibukiia Aomata n Tatabemaniia ao Utu ao te kamataata n te booki aei e kona n anganiko iango ibukin te anga reirei ngkana ko kainanoia.

te aikaon ibukin te tibwatibwa

Kaunga te Tibwatibwa

Titirakiniia ataei bwa a na tibwauai baike a karaoi inanon te wiiki ae nako n riki bwa te oota ke te banna ni katooto ibukin temanna.

te aikaon ibukin te anga reirei

Reirei te Reirei: Ataei aika a Uarereke Riki

Mataio 6:5–13

I kona n tataro nakon Tamau are i Karawa n aron ae karaoia Iesu.

Ataei a kona n reiakinna n tataro man ongoraeakinan aia tataro tabeman. Ko na kanga ni buokiia n reirei man ana tataro Iesu Kristo ianon kiibu aikai?

Waaki ni Kakukurei aika a Kona ni Karaoaki

• Rinanon ana reirei Iesu iaon te tataro are e kuneaki ni Mataio 6:5–13. Ko kona naba ni kabonganaa “Mwakoro 20: Iesu E Reirei iaon te Tataro” (inanon Karaki man te Nu Tetemanti, 51–52, ke te witeo ae e irekereke ma ngaia iaon ChurchofJesusChrist.org).

• Kabongana te iteraniba ibukin waaki ni kakukurei n te wiiki aei ni buokiia ataei n uring nako mwakoron te tataro.

• Kaewea tamnein baia ataei iaon te mwakoro ni beeba. Maroroakinna bwa tera ae ti riai ni karaoi ma baira ao anganbaira ngkana ti tataro. Iaon tamnein baai, korei baike ti karaoi ni kaota te karinerine ngkana ti tataro (ibukin te katooto, kabaraaka atuura, kamatuui matara, ao a mwaiti riki).

• Anenea te anene ae taekan te tataro ma ataei, n aron “We Bow Our Heads” (Aia Boki n Anene Ataei, 25), ao kaota am koaua iaon mwaakan te tataro. Kaoiia ataei bwa a na tibwa aia taneiaia iaon te tataro.

e tataro te ataeinimwaane

I kona n tataro nakon Tamau are i Karawa n aron ae karaoia Iesu.

Mataio 7:12

I riai ni karaoia nakoia aomata te bwai are I tangiria bwa e na karaoaki nakoiu.

Ana reirei Iesu inanon Mataio 7:12—e ataaki naba bwa te—Te Tua Ae Moamoa—e katauraoi kairi aika a bebete bwa ti na kanga ni tabenanoia tabeman. Tera ae na buokiia ataei ake ko reiakiniia ni maiuakina te reirei aei?

Waaki ni Kakukurei aika a Kona ni Karaoaki

• Wareka Mataio 7:12, ao taekina n te aro ae bebete bwa a na mataata iai ataei. Buokiia ataei bwa a na iangoi kawai aika kakaokoro ni kabwanina te tiententi n aron: “I tangiria ngkana aomata tabeman nakoiu.” Imwiin taian tiententi, kaoia bwa a na kaokiokia ma ngkow, “Bwa I aonga ibukiia tabeman.”

• Ikotaki anenea te anene ae ko taku bwa e na kamatoa are ni Mataio 7:12, n aron “Jesus Said Love Everyone” (Aia Boki n Anene Ataei, 61). Karaoa kain te anene are e airi ma te anene. Tuangiia ataei bwa tera ae a reiakinna bwa ti na kanga n tabenanoia tabeman man ana katooto te Tia Kamaiu.

• Kaoiia ataei bwa a na korei bwaika a kaota te akoi are aia karo ke tabeman kaain aia utu a karaoi ibukiia. Wareka Mataio 7:12, ao kaoiia ataei bwa a na taekin bwaai aika a kaota te akoi are a kona ni karaoi ibukiia aia utu.

Mataio 7:24–27

I kona ni katea aau ae matoatoa man iriiran Iesu.

Kabonganaan ana kaikonaki te Tia Kamaiu iaon katean te auti iaon te tano ke iaon te bwaa e kona n riki bwa te kawai ae e ururingaki n reireinaia ataei iaon kakawakin mwakurian te bwai are ti a tia n reiakinna.

Waaki ni Kakukurei aika a Kona ni Karaoaki

• Aneneia ma ataei “The Wise Man and the Foolish Man” (Aia Boki n Anene Ataei, 281), ao karaoi kaina are e kaineti ma te taeka.

• Kabongana Mataio 7:24–27 n reirei iaon te kaokoro imarenan te aomata ae e wanawana ao te aomata ae e burababa. Kaoiia ataei bwa aongkoa a katea te auti. Ti na kanga n riki n ai aron te aomata ae wanawana?

• Kariaia ataei bwa a na korea tamnein te kaikonaki iaon te aomata ae e wanawana ao te aomata ae e burababa.

te aikaon ibukin te anga reirei

Reirei te Reirei: Ataei aika a Ikawai Riki

Mataio 6–7

Te Kabwarabwara iaon te Maunga iai inanona te rongorongo ibukiu.

Mwakoro aikai e rawata inanona rongorongo ake a kona ni kaineti nakoia ataei ake ko reireiniia. Warekii ao iangoia ataei n am iango. Tera ae e anaa nanom?

Waaki ni Kakukurei aika a Kona ni Karaoaki

• Kauringiia ataei bwa a tia n reiakinna bwa tera ae e reirei iaona Iesu n tain ana Kabwarabwara i aon te Maunga. Tera te koaua ae a kona n uringa ae a reiakinna n te wiiki ae nako?

• Koreia iaon te burakibooti tabeua kibu n taeka man te Kabwarabwara i aon te Maunga ao tabeua riki kibu n taeka ake tiaki man boki aika tabu. Kaoiia ataei bwa a na kotei kiibu n taeka ake a reke man te Kabwarabwara i aon te Maunga. Tuangiia bwa a na tibwai baike a reiakin man reirei aikai.

• Rinei ni kamwaitii kiibu man Mataio 6–7 ake ko namakin bwa a na uaana nakoia ataei. Korei kiibu man booki aika tabu iaon te kaati, ao karabai inanon te ruu. Kariaia ataei bwa a na kakaei, wareki kiibu, ao kabwarabwara bwa bukin tera a rangin ni kakawaki reirei aikai nakoia.

• Tibwa teuana am kibu ae ko tatangiria man Mataio 6–7, ao kabwarabwara bwa e aera ko tatangiria. Ngkana iai aia kibu ataei ae a tatangiria, kaoiia bwa a na tibwaia bwa bukin tera a tatangiria ao tera ae a reiakinna mai iai.

• Bootaki anenea te kuna iaon te Tia Kamaiu ao Ana reirei, n aron “I’m Trying to Be like Jesus” (Aia Boki n Anene Ataei, 78–79). Katoka te anene ngkana ko roko n te kibu n taeka are e kaineti nakon te reirei ae e reiakinaki ni Mataio 6–7. Buokiia ataei bwa a na namakina te bwai are a reiakinna man mwakoro aikai.

Mataio 6:5–13; 7:7–11

Tamara are i Karawa E na ongo ao ni kaekaai ngkana I tataro.

Ngkai ko wareka Mataio 6:5–13; 7:7–11, tera ae ko namakinna bwa a kainanoia ataei ni mataata iai iaon te tataro?

Waaki ni Kakukurei aika a Kona ni Karaoaki

• Kaoiia ataei bwa a na wareka Mataio 6: 9–13 ni kabaibati ao imwiina korei bwaai ake e taekin te Tia Kamaiu n ana tataro. Ti na kanga n ira Ana katooto ngkana ti tataro?

• Anenea te anene ae taekan te tataro ma ataei, n aron “Ko Kautinako n te Ingabong?” (Anene n Taromauri,, nambwa 37). Buokiia ataei bwa a na kakaea n taekan te anene bukin ae ti tataro ao kakabwaia ake a roko man te tataro.

• Buokiia ataei kamatenanoa Mataio 7:7 ngkai a takakaro n te takakaro: Temana te ataei e taekina te moan taeka ke te mwakoro man te kibu ao e a manga karenako te booro nakon te ataei temanna, are e na manga taekina te taeka ke te mwakoro n taeka.

• Karaoa te kaotioti man Mataio 7:9–10 ma ataei ni kabonganai kunikai ao bwaai ni kaotioti aika a bebete. Tuangiia ataei bwa a na tibwauaa te bwai ae a reiakinaki iaon te tataro.

• Tibwa am taneiai ngke am tataro a kaekaaki.

Mataio 6:19–21

I kona n ukoukora te kaubwai ae akea tokina nakon riki kaubwaina te aonaaba.

Ko na kanga ni buokiia ataei ake ko reireiniia n ataa riki kakawakin bwaai aika akea tokiia nakon bwain te aonaaba?

Waaki ni Kakukurei aika a Kona ni Karaoaki

• Uota te baoki “ni kaubwai” ae onrake ni bwaai ke tamnei ake e taraia te aonaaba bwa a kakawaki—te katooto, te mwane ke bwai n takakaro. Wareka Mataio 6:19–21 ni bootaki, ao imwiina tuangiia ataei bwa a na buokiko ni iangoi kaubwain karawa ake a kona n onea mwiin bwain te aonaaba ake inanon te baoki.

• Kaoiia ataei bwa a na taekina ke ni korotamnei tabeua bwaai are a kona ni karaoi ni “kaiko … kaubwai nako karawa” (Mataio 6:20).

te aikaon ibukin te kamatebwai

Kaungaa te Kamatebwai n te Mweenga

Kaoiia ataei bwa a na tibwaia ma aia utu te reirei ae mamaten nanoia man te Kabwarabwara i aon te Maunga.

Kanakoraoan Ara Anga reirei

Ukoukoria ni ataiia raoi kaain am kiraati. Ko kinaia ataei ake ko reireiniia. Iango inanon taina kamataata aikai a riai ni bibitaki ni buoka raoi kainanoia ataei ake n te kiraati. Ko na bae n tangiria n rinanon nikabane waaki ni kakukurei ake a karinanaki n te kamataata aei, tiaki tii waaki ni kakukurei ake a kaineti nakon aia ririki ataei ake ko reireiniia, bwa ko aonga ni kunei iango ibukiia kaain am kiraati. (Taraa Teaching in the Savior’s Way, 7.)

te iteraniba ibukin te waaki ni kakukurei: I kona n tataro n aron Iesu