Inanon te Rereua, iroun Eva Koleva Timothy

Tianuare 30–Beberuare 5

Mataio 4; Ruka 4–5

“E Mena Tanmein Iehova Iaou”

Waakina am katauraoi ibukin te reirei aei man warekan Matthew 4 ao Luke 4–5. Nakomai, Iriirai—Ibukiia Aomata n Tatabemaniia ao Utu e kona ni buokiko ni mataata ni mwakoro aikai, ao te kamataata aei e kona n anganiko iango ibukin am angareirei.

Kaunga te Tibwatibwa

Kaoia ataei bwa a na bwatina tamnein Iesu mai iroun te ataei temanna nakon temanna. Ngkai ataei n tatabemaniia a taua te tamnei, kaoa teuanne ke neienne bwa e na tibwa te bwai teuana are e karaoia Iesu ngke E mena iaon te aba.

Reirei te Reirei: Ataei aika a Uarereke Riki

Mataio 4:1–11; Ruka 4: 1–13

I kona n rinea ae eti n aron ae karaoia Iesu.

Ataei aika a uarereke “a aki kona ni bure” (Reirei ao Berita aika Tabu 29:47). Ma irarikin anne, rongorongon Iesu ngke e totokoa ana kariiri Tatan e kona ni kakorakoraia ataei bwa a na rinea te eti.

Waaki ni Kakukurei aika a Kona ni Karaoaki

• Karakina te karaki iaon kaririian Iesu man Mataio 4:1–11. (Taraa naba “Mwakoro 11: E Kaririaki Iesu,” inanon Karaki man Te Nu Tetamenti, 30–31, ke te witeo ae irekereke ma aei iaon ChurchofJesusChrist.org.) N te tai teuana raoi n te karaki, titiraki, “Tera n am iango ae e riai ni karaoia Iesu?”

• Kaota tamnein Iesu Kristo, ao imwiina kamataatai rinerine ae te ataei ae e uarereke e kona ni karaoi. Tuangiia ataei bwa a na kerake teuana te mwaneka nakon te tamnei ni katoa tai are ko taekina te rinerine ae tamaroa. Tuangiia ataei bwa a na kerikaaki teuana te mwaneka man te tamnei ni katoa tai are ko taekina te rinerine ae buakaka.

• Buokiia ataei n reiakina taekan te anene iaon karaoan te rinerine ae raoiroi, n aron “Choose the Right Way” (Aia Boki n Anene Ataei, 160–61). Kabonganai tamnei, bwaai, ke tabeua riki bwaai ni ibuobuoki aika a kona n noraki aika a irekereke ma taekan te anene.

Ruka 4:18–19

Iesu Kristo bon au Tia Kamaiu.

Ruka 4:18–19 e kabwarabwara ana mition Iesu. Ko na kanga ni buokiia ataei ni karabwarabwa n te bwai are e karaoia Iesu ibukiia?

Waaki ni Kakukurei aika a Kona ni Karaoaki

• Wareka Ruka 4:18–19 nakoia ataei, ao kamataata bwa tera te bwai ae e kanakoaki Iesu Kristo bwa e na karaoia iaon te aba (n reiakiniira bwa ti na kanga ni manga oki nakon Tamara are i Karawa, ni karau nanora, ao ni kamarurungiia aomata). Tibwauaia bwa e kanga te Tia Kamaiu ni karaoi baikai ibukim.

• Kaoiia tabeman ataei bwa aongkoa a namakina te mangaongao, te nanokawaki, ke te aoraki. Tuangiia ataei ake tabeman bwa ana karaoa te kaotioti bwa tera ae a kona ni karaoia ni buokiia. Taekina koauana ae Iesu Kristo e roko n reirei, ni karaunano, ao ni kamarurungiira ao ti riai ni iriira Ana banna ni katooto. Buokiia ni kinaa bwa te anene aei e reireiniira bwa bukin tera Iesu e bon bwabetitoaki ao bukin tera ti riai n iriira Ana katooto.

• Kaota tamnein Iesu ae e kakoroa nanon Ana mition (taraa Gospel Art Book). Tuangiia ataei bwa a na kabwarabwara bwa tera ae e karaoia Iesu n tamnei akanne. Kaota naba tamneia aomata aika a kataia n riki n aron Iesu (ko kona ni kunei tabeua n nutibeeban te Ekaretia).

Mataio 4:18–22; Ruka 5:1–11

Iesu Kristo e kaoiira bwa ti na riki bwa taan “akawaia aomata.”

Ana wewete te Tia Kamaiu, “Mai ri mwiu, ao N na karaoi ngkami ba taan akawa aika konami aomata” (Mataio 4:19), e kaeineti nakoia aomata ni kabane, ni ikotaki ma ataei.

Waaki ni Kakukurei aika a Kona ni Karaoaki

• Kaoiia uoman ataei bwa aongkoa ngaiia Timon Betero ao Anterea ngkai ko wareka Mataio 4:18–22. Buokiia ataei bwa a na ataia bwa tera ae a kanakoi mwaane aikai ni iriira Iesu.

• Kariaia ataei bwa a na ikaruoruo ni karakina te karaki man kiibu aikai ni kabonganai tamnei aika inano ao ake inanon te kamataata n te wiiki aei inanon Nakomai, Iriirai—Ibukiia Aomata n Tatabemaniia ao Utu.

• Uaia n anenea te anene iaon iriiran Iesu Kristo, n aron “I Will Follow God’s Plan” (Aia Boki n Anene Ataei, 164). Buokiia ataei ni kakaei bwaai ake a taekinaki n te anene ae a kona ni karaoi ni iriira iai Iesu.

• Kabongana te iteraniba ibukin te waaki ni kakukurei n te wiiki aei ni marooro iaona ma ataei bwa a na kanga n riki bwa “taan akawaia aomata” man iriiran Iesu. Ko kona naba n takakarona te takakaro are ataei a na katitebooi bwaai man te iteraniba n te waaki ni kakukurei. Korei ni kanakoi kaobiin aekan ika nako, kabarakii, ao kaoiia ataei bwa a na rairia teuana n teuana te tai ao ni katoatoai.

Iesu E Weteia Uoman Ana Reirei, iroun Gary Ernest Smith

Reirei te Reirei: Ataei aika a Ikawai Riki

Mataio 4:1–11; Ruka 4: 1–13

Iesu e katea te banna ni katooto ibukiu man totokoan te kariiri.

Iesu Kristo naba e kaririiaki iroun Tatan, ma E aki kona ni konaaki. Ko na kanga ni buokiia ataei ni iriira Ana katooto?

Waaki ni Kakukurei aika a Kona ni Karaoaki

• Karaoa te tiata iaon te burakibooti ae e koreaki iaona Ana Kariiri Tatan ao Ana Kaeka Iesu. Buokiia ataei ni karin taeka iaon te tiaata ni kabongana Mataio 4:1–11 ao Ruka 4:1–13. Titirakiniia ataei bwa a na kanga ni iriira ana banna ni katooto Iesu.

• Korei tabeua bwaai aika a kona ni karaoaki are te ataei e na kariiriaki bwa e na karaoa te rinerine ae e kairua. Kariaia ataei bwa a na rinea teuana ae a na warekia, ao tuangiia ataei bwa e na maroroakina bwa a na kanga n totokoa te kariiri ngkana e riki ae ai aron aei.

Mataio 4:1–2

Te aki mamatam e buokai n namakina ae I kaan nakon Tamara are i Karawa.

Imwaain wakinan Ana mition, Iesu e aki mamatam ao E “reitaki ma te Atua” (Ana Rairairi Iotebwa Timiti, Mataio 4:2 [ni Mataio 4:2, footnote c]). Buokiia ataei n noria bwa te aki mamatam e kona n anganiia te korakora n tamnei ao ni buokiia n namakina ae a kaan riki nakon Tamara are i Karawa.

Waaki ni Kakukurei aika a Kona ni Karaoaki

• Tuanga temanna te ataei bwa e na wareka Mwakuri 4:1–2 ni kabongana ana Rairairi Iotebwa Timiti are e kuneaki n te footnotes. Tera ae karaoia Iesu bwa e na “kaan ma te Atua? Tibwaia bwa e kanga te aki mamatam n tia ni buokiko n namakina ae ko kaan nakon Tamara are i Karawa.

• Kaoiia ataei ake a tia n karaoa te aki mamatam mai imwaina bwa a na tibwa te bwai are a rinanona. Ana kanga ni kabwarabwaraa te aki mamatam nakon temanna ae e tuai kakaraoa te aki mamatam mai imwaaina?

• Korei titiraki iaon te aki mamatam (n aron ae bukin tera, ningai, ke ti na kanga n aki mamatam) iaon mwakoro ni beeba ao kaaki inanon te boora. Kaoiia ataei bwa a na rinea te titiraki ao ni kataia ni kaekaa. Tera te bwai ae ko rinanona ke a rinanoa ataei ae kam kona n tibwaia iaon te aki mamatam?

Ruka 4:16–22, 28–30

Iesu Kristo bon au Tia Kamaiu.

Iangoia bwa e kanga te Tia Kamaiu n tia ni kakabaia maium. Kona kanga ni buokiia ataei n rangi ni kakaitau riki ibukin Ana kakairi inanon maiuia.?

Waaki ni Kakukurei aika a Kona ni Karaoaki

• Kaoiia ataei bwa a na roko n te kiraati n tauraoi n tibwa te rongorongo are inanon Ruka 4:16–30. E na ibuobuoki ngkana e kabonganaaki “Mwakoro 17: Aomata aika a Un i Natareta” (inanon Karaki man te Nu Tetemanti, 42–43, ke te witeo ae e irekereke ma ngaia iaon ChurchofJesusChrist.org). Ko kona naba ni kaota te witeo “Jesus Declares He Is the Messiah” (ChurchofJesusChrist.org).

• Wareka Ruka 4:18 ngkai a iriiriko ataei. Tuangiia bwa a na korei rinanin bwaai are e taku te Tia Kamaiu bwa e roko bwa e na karaoi. Kaoiia ataei bwa a na tibwai katotoon te tai ngke Iesu e karaoi baikai, tao inanon koroboki aika a tabu ke inanon maiuia.

• Korei iaon mwakoro ni beeba te taeka ae “Ibukin Iesu Kristo …” Anga te beeba nakoia ataei n tatabemaniia, ao kaoiia bwa a na koreia bwa a na kanga ni kabwanina te taeka. Kariaia bwa a na tibwa te bwai are a koreia.

Mataio 4:18–22; Ruka 5:1–11

Iesu Kristo e kaoiira bwa ti na Iriiria ao n riki bwa taan “akawaia aomata.”

A mwaiti kawai ae ataei a kona iai ni iriira te Tia Kamaiu ao n riki bwa taan “akawaia aomata” (Mataio 4:19). Ko na kanga ni buokiia n nora tamaroan aroia ae e kona n tiku iaon temanna?

Waaki ni Kakukurei aika a Kona ni Karaoaki

• Kaoiia ataei bwa a na wareka Mataio 4:18–22 ao Ruka 5:1–11. A kanga Ana reirei Iesu ni kaeka nakon Ana wewete bwa a na Iriiria? Tera ae ti kona ni karaoia n ira aia katooto?

• Kaotia nakoia ataei tabeua bwaai n akawa ke tamnein te tia akawa. Tera ae e nanonaki bwa te tia “akawaia aomata”? Tera bwaai ae ti na kabonganai ni buokiira n riki bwa taan akawaia aomata?

Kaungaa te Kamatebwai n te Mweenga

Kaoia ataei bwa ana tibwaia ma aia utu te bwai ae a reiakin iaon te riki bwa taan akawaia aomata.

Kanakoraoan Ara Anga reirei

Ataei a kona n ataa ana kairiiri te Tamnei. Reireiniia ataei bwa namakinan te rau, te tangira, ao te kimwareirei are a karekea ngkana a taetae ke n anenea taekan Iesu Kristo ao Ana euangkerio e roko mai iroun te Tamnei ae Raoiroi. Aekakin namakin aikai a kona ni kakorakorai aia koaua.