« ថ្ងៃទី ២០–២៦ ខែ មីនា ។ ម៉ាថាយ ១៣; លូកា ៨; ១៣ ៖ ‹ អ្នកណាដែលមានត្រចៀកសម្រាប់ស្ដាប់ ឲ្យស្ដាប់ចុះ › » ចូរមកតាមខ្ញុំ—សម្រាប់អង្គការបឋមសិក្សា ៖ ព្រះគម្ពីរសញ្ញាថ្មី ឆ្នាំ ២០២៣ ( ឆ្នាំ ២០២២ )
« ថ្ងៃទី ២០–២៦ ខែ មីនា ។ ម៉ាថាយ ១៣; លូកា ៨; ១៣ » ចូរមកតាមខ្ញុំ—សម្រាប់អង្គការបឋមសិក្សា ៖ ឆ្នាំ ២០២៣
ថ្ងៃទី ២០–២៦ ខែ មីនា
ម៉ាថាយ ១៣; លូកា ៨; ១៣
« អ្នកណាដែលមានត្រចៀកសម្រាប់ស្ដាប់ ឲ្យស្ដាប់ចុះ »
ពាក្យប្រៀបប្រដូចគឺជាដំណើររឿងសាមញ្ញៗដែលអាចទាក់ទាញកុមារបាន ។ គម្រោងមេរៀននេះ និង ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ អាចជួយបងប្អូនឲ្យប្រើពាក្យប្រៀបប្រដូចរបស់ព្រះអង្គសង្គ្រោះ ដើម្បីបង្រៀនកុមារអំពីសេចក្ដីពិតដ៏មានសារៈសំខាន់នានា ។
អញ្ជើញឲ្យចែកចាយ
សូមយកវត្ថុបីបួនដែលអាចជួយកុមារឲ្យចងចាំនូវពាក្យប្រៀបប្រដូចមួយចំនួន នៅក្នុង ម៉ាថាយ ១៣ ដូចជាគ្រាប់ពូជមួយ កែវមុក្ដាមួយ ឬកំណប់ទ្រព្យសម្បត្តិមួយ ។ សូមឲ្យកុមារចែកចាយអ្វីដែលពួកគេចងចាំអំពីពាក្យប្រៀបប្រដូចទាំងឡាយ ។
បង្រៀនគោលលទ្ធិ ៖ កុមារតូចៗ
ខ្ញុំត្រូវរៀបចំខ្លួនជាស្រេចដើម្បីរៀនអំពីការបង្រៀនរបស់ព្រះយេស៊ូវ ។
កុមារតូចៗមិនអាចយល់ពីនិមិត្តសញ្ញាទាំងអស់ ដែលមាននៅក្នុងពាក្យប្រៀបប្រដូចនៃការសាបព្រោះបានទេ ប៉ុន្ដែពួកគេអាចរៀនពីសេចក្ដីពិតនៃដំណឹងល្អសាមញ្ញនានា ដែលដំណឹងល្អបង្រៀនបាន ។ តើបងប្អូនអាចជួយពួកគេឲ្យយល់ពីរបៀបដែលពាក្យប្រៀបប្រដូចនេះទាក់ទងនឹងពួកគេយ៉ាងដូចម្ដេច ?
សកម្មភាពដែលអាចធ្វើបាន
-
សូមបង្ហាញប្រភេទដីខុសៗគ្នា ( ឬរូបភាពដី ) កាលបងប្អូនសង្ខេប ម៉ាថាយ ១៣:៣–៨ ។ សូមឲ្យគ្រាប់ពូជមួយទៅកុមារម្នាក់ៗ ហើយសួរពីអ្វីដែលពួកគេអាចធ្វើបានដើម្បីដាំគ្រាប់ពូជនេះ ។ សូមពន្យល់ថា ទីបន្ទាល់របស់យើងគឺដូចជាគ្រាប់ពូជនេះដែរ ។ តើយើងជួយឲ្យ « គ្រាប់ពូជ » នៃទីបន្ទាល់របស់យើងរីកចម្រើនយ៉ាងដូចម្តេច ?
-
សូមប្រើទំព័រសកម្មភាពនាសប្ដាហ៍នេះ ដើម្បីជួយកុមារឲ្យយល់ពីអ្វីដែលប្រភេទដីនីមួយៗ ដែលបានរៀបរាប់នៅក្នុង ម៉ាថាយ ១៣ បង្រៀនយើងអំពីដួងចិត្តរបស់យើង ។ សូមសួរកុមារថា តើដួងចិត្តប្រភេទណាដែលព្រះយេស៊ូវចង់ឲ្យពួកគេមាន ដើម្បីរៀនសូត្រអំពីការបង្រៀនរបស់ទ្រង់ ។
-
សូមអាន ម៉ាថាយ ១៣:៩, ១៥ ហើយសូមឲ្យកុមារចង្អុលទៅផ្នែកខុសៗគ្នានៃរាងកាយរបស់ពួកគេ កាលពួកគេឮឈ្មោះផ្នែកណាមួយត្រូវបានលើកឡើង ។ តើយើងអាចប្រើផ្នែកនៃរាងកាយទាំងនេះ ដើម្បីរៀនអំពីការបង្រៀនរបស់ព្រះយេស៊ូវបានដោយរបៀបណា ?
ព្រះវរបិតាសួគ៌មានព្រះទ័យឲ្យខ្ញុំជ្រើសរើសផ្លូវត្រូវ ។
ពាក្យប្រៀបប្រដូចមួយចំនួនរបស់ព្រះយេស៊ូវបង្រៀនថា នៅថ្ងៃចុងក្រោយ ព្រះនឹងញែកពួកទុច្ចរិតចេញពីពួកសុចរិត ។ តើបងប្អូនអាចប្រើពាក្យប្រៀបប្រដូចទាំងឡាយដើម្បីបំផុសគំនិតដល់កុមារឲ្យជ្រើសរើសផ្លូវត្រូវដោយរបៀបណា ?
សកម្មភាពដែលអាចធ្វើបាន
-
សូមឲ្យកុមារសម្ដែងរឿងប្រៀបប្រដូចនៃរឿងស្រូវសាលី និងស្រងែ ( សូមមើល ម៉ាថាយ ១៣:២៤–៣០ ) ។ សូមពន្យល់ថា ស្រូវសាលីតំណាងឲ្យមនុស្សដែលរើសយកជម្រើសដ៏សុចរិតនានា ហើយស្រងែ ( ជាស្មៅឥតប្រយោជន៍ដែលបំផ្លាញស្រូវ ) តំណាងឲ្យមនុស្សដែលមិនជ្រើសរើសយកសេចក្ដីសុចរិត ។ នៅថ្ងៃមួយ ព្រះវរបិតាសួគ៌នឹងប្រមូលមនុស្សសុចរិតឲ្យទៅរស់នៅជាមួយនឹងទ្រង់ ។
-
សូមផ្តល់ឲ្យកុមារនូវគំរូនៃការជ្រើសរើសត្រឹមត្រូវ និងខុសឆ្គង ។ សូមស្នើសុំឲ្យកុមារនិយាយថា « ជម្រើសស្រូវសាលី » នៅពេលបងប្អូនពិពណ៌នាការជ្រើសរើសត្រឹមត្រូវ និង « ជម្រើសស្រងែ » នៅពេលបងប្អូនពិពណ៌នាពីការជ្រើសរើសខុសឆ្គង ។
-
សូមយករូបភាពដើមស្រូវសាលី ហើយឲ្យកុមារគូរនៅលើរូបភាពនោះនូវរបៀបមួយចំនួនដែលពួកគេអាចធ្វើជាមនុស្សសុចរិតបាន ។
សមាជិកភាពរបស់ខ្ញុំនៅក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយនេះគឺជារតនសម្បត្តិមួយ ។
តើបងប្អូនអាចប្រើការស្រមៃអំពីរតនសម្បត្តិ និងកែវមុក្តាដ៏មានតម្លៃនានា ដើម្បីជួយកុមារឲ្យយល់ពីតម្លៃនៃការក្លាយជាសមាជិកនៃសាសនាចក្ររបស់ព្រះគ្រីស្ទបានដោយរបៀបណា ?
សកម្មភាពដែលអាចធ្វើបាន
-
សូមលាក់រូបភាពកំណប់ទ្រព្យមួយ និងកែវមុក្ដាមួយនៅក្នុងបន្ទប់ ហើយឲ្យកុមារដើររកវា ។ សូមប្រើរូបភាពនានាដើម្បីបង្រៀនអំពីពាក្យប្រៀបប្រដូចនានានៅក្នុង ម៉ាថាយ ១៣:៤៤–៤៦ ។ សូមនិយាយអំពីមូលហេតុដែលនរណាម្នាក់អាចបោះបង់ចោលអ្វីៗគ្រប់យ៉ាងដែលពួកគេមានដើម្បីបានកែវមុក្តា ឬរតនសម្បត្តិដ៏ស្រស់ស្អាតនៅក្នុងទីវាលមួយ ។ សូមពន្យល់ថា ពេលខ្លះយើងត្រូវលះបង់អ្វីមួយល្អដើម្បីទទួលបានអ្វីមួយដែលរឹតតែល្អជាងនេះ ។ សូមប្រាប់កុមារពីមូលហេតុដែលដំណឹងល្អមានតម្លៃចំពោះបងប្អូន ។
-
សូមដាក់របស់របរផ្សេងៗ ឬរូបភាពបីបួននៅក្នុងប្រអប់មួយដែលតំណាងឲ្យ « រតនសម្បត្តិ » នៅក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ដូចជា ព្រះអង្គសង្រ្គោះ ព្រះវិហារបរិសុទ្ធ ឬព្រះគម្ពីរមរមន ។ សូមឲ្យកុមារម្នាក់ៗរើសយកវត្ថុមួយ ឬរូបភាពមួយ ហើយប្រាប់ពីមូលហេតុដែលថា របស់នោះគឺជារតនសម្បត្តិមួយ ។
-
សូមច្រៀងរួមគ្នានូវបទ « សាសនាចក្រព្រះយេស៊ូវគ្រីស្ទ » ( សៀវភៅចម្រៀងកុមារ ទំព័រ ៤៨ ) ហើយសូមឲ្យកុមារនិយាយអំពីមូលហេតុ ដែលពួកគេមានអំណរគុណសម្រាប់សាសនាចក្ររបស់ព្រះអង្គសង្រ្គោះ ។ សូមថ្លែងទីបន្ទាល់អំពីពរជ័យនានា ដែលបងប្អូនបានទទួលដោយសារតែសមាជិកភាពនៅក្នុងសាសនាចក្ររបស់បងប្អូននេះ ។
បង្រៀនគោលលទ្ធិ ៖ កុមារធំៗ
ខ្ញុំត្រូវរៀបចំដួងចិត្តខ្ញុំដើម្បីទទួលយកការបង្រៀនរបស់ព្រះយេស៊ូវ ។
តើបងប្អូនអាចជួយកុមារឲ្យទទួលស្គាល់ពីសារៈសំខាន់នៃការមានដួងចិត្តទន់ទាប និងមានឆន្ទៈ ដើម្បីឲ្យព្រះយេស៊ូវអាចបង្រៀនពួកគេដោយរបៀបណា ?
សកម្មភាពដែលអាចធ្វើបាន
-
សូមចាត់តាំងកុមារម្នាក់ៗឲ្យអានប្រភេទដីមួយក្នុងចំណោមប្រភេទដីទាំងបួននៅក្នុង ម៉ាថាយ ១៣:៤–៨ ។ សូមឲ្យពួកគេរកមើល និងចែកចាយអ្វីដែលនឹងកើតឡើងដល់គ្រាប់ពូជនៅក្នុងប្រភេទដីដែលពួកគេអាននោះ ។ តើដួងចិត្តយើងអាចក្លាយដូចជាប្រភេទដីខុសៗគ្នាទាំងនេះដោយរបៀបណា ? ( សូមមើល ម៉ាថាយ ១៣:១៩–២៣ ) ។
-
សូមបង្ហាញរូបភាពសួនច្បារមួយដល់កុមារ ។ តើដីត្រូវមានសណ្ឋានបែបណាដើម្បីឲ្យរុក្ខជាតិដុះលូតលាស់នៅលើដីនោះ ? សូមបង្ហាញរូបភាពដីថ្ម ឬដីដែលមានបន្លាមួយ ។ ហេតុអ្វីបានជារុក្ខជាតិពិបាកលូតលាស់នៅក្នុងដីប្រភេទនេះ ? តើយើងអាចធានាឲ្យបានថា ដួងចិត្តយើងគឺដូចជាដីដ៏ល្អដើម្បីយើងអាចទទួលបានការបង្រៀនរបស់ព្រះអង្គសង្គ្រោះដោយរបៀបណា ?
-
សូមអញ្ជើញកុមារឲ្យអាន ម៉ាថាយ ១៣:១៥–១៧ ។ សូមគូររូបភ្នែក ត្រចៀក និងបេះដូងនៅលើក្ដារខៀន ។ តើយើងអាចប្រើអ្វីទាំងនេះនីមួយៗដើម្បីរៀនអំពីការបង្រៀនរបស់ព្រះយេស៊ូវបានដោយរបៀបណា ?
ខ្ញុំអាចជ្រើសរើសផ្លូវត្រូវបាន ទោះបីជាមនុស្សនៅជុំវិញខ្លួនខ្ញុំមិនជ្រើសរើសដូចខ្ញុំក្ដី ។
កាលបងប្អូនអានខគម្ពីរទាំងនេះដោយគិតដល់កុមារនៅក្នុងចិត្ត តើបងប្អូនទទួលបានចំណាប់អារម្មណ៍អ្វីខ្លះ ?
សកម្មភាពដែលអាចធ្វើបាន
-
សូមឲ្យកុមារគូរស្ថានភាពខុសៗគ្នាចេញពីពាក្យប្រៀបប្រដូចនៃស្រូវសាលី និងស្រងែ ដែលមាននៅក្នុង ម៉ាថាយ ១៣:២៤–៣០ ហើយចែកចាយគំនូររបស់ពួកគេជាមួយនឹងសិស្សក្នុងថ្នាក់ ។ សូមឲ្យពួកគេដាក់ចំណងជើងឲ្យគំនូររបស់ពួកគេ ដោយប្រើបំណកស្រាយនៃពាក្យប្រៀបប្រដូចដែលមាននៅក្នុង ម៉ាថាយ ១៣:៣៦–៤៣ ។ បងប្អូនអាចត្រូវពន្យល់ថា ស្រងែគឺជាគ្រាប់ពូជដែលមានគ្រោះថ្នាក់ ។
-
បើអាច សូមបង្ហាញរូបភាពស្រូវសាលី និងស្រងែ ។ សូមពន្យល់ថា ស្រូវសាលី និងស្រងែនឹងដុះជាមួយគ្នា រហូតដល់ពេលត្រូវច្រូតកាត់ ( ចុងបញ្ចប់នៃពិភពលោកនេះ ) ។ ការណ៍នេះបង្រៀនដល់យើងថា យើងនឹងរស់នៅជាមួយទាំងមនុស្សល្អ និងមនុស្សអាក្រក់ដែលនៅជុំវិញខ្លួនយើង ហើយយើងត្រូវតែប្រយ័ត្នប្រយែងដើម្បីជ្រើសរើសតែផ្លូវត្រូវ ។ សូមឲ្យកុមារចែកចាយរបៀបដែលពួកគេអាចប្រាប់ពីលក្ខណៈខុសគ្នារវាងសេចក្ដីល្អ និងសេចក្ដីអាក្រក់ ។
សមាជិកភាពរបស់ខ្ញុំនៅក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយនេះគឺជារតនសម្បត្តិមួយ ។
តើកុមារដែលបងប្អូនបង្រៀនឃើញថា សមាជិកភាពរបស់ពួកគេនៅក្នុងសាសនាចក្រនេះជារតនសម្បត្តិមួយដ៏មានតម្លៃដែរឬទេ ? ប្រហែលជាការពិភាក្សាអំពីពាក្យប្រៀបប្រដូចនៅក្នុង ម៉ាថាយ ១៣:៤៤–៤៦ អាចជួយពួកគេឲ្យចែកចាយអារម្មណ៍របស់ពួកគេអំពីសាសនាចក្ររបស់ព្រះអង្គសង្គ្រោះបាន ។
សកម្មភាពដែលអាចធ្វើបាន
-
សូមឲ្យកុមារអាន ម៉ាថាយ ១៣:៤៤–៤៦ ដោយខ្លួនឯង ហើយចែកចាយពាក្យប្រៀបប្រដូចជាសម្ដីខ្លួនឯងជាមួយនឹងមិត្តក្នុងថ្នាក់ផ្សេងទៀត ។
-
សូមកាត់រូបរង្វង់បីបួនដើម្បីធ្វើជាកាក់ ហើយដាក់វាទៅក្នុងប្រអប់រតនសម្បត្តិមួយ ។ សូមឲ្យកុមាររើសយកកាក់មួយ ហើយគូរ ឬសរសេររឿងមួយដែលពួកគេស្រឡាញ់អំពីភាពជាសមាជិកនៅក្នុងសាសនាចក្រនេះនៅលើកាក់នោះ ។ សូមឲ្យកុមារចែកចាយនូវអ្វីដែលពួកគេសរសេរនៅលើកាក់របស់ពួកគេ ។
-
សូមអញ្ជើញសមាជិកវួដមួយរូបឲ្យចែកចាយពីដំណើររឿងប្រែចិត្តជឿរបស់គាត់ដល់កុមារ ហើយប្រាប់ពីអ្វីដែលគាត់បានលះបង់ ដើម្បីចូលរួមនៅក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយនេះ ។ ឬសូមស្នើសុំឲ្យកុមារនិយាយអំពីពលិកម្មដែលពួកគេបានធ្វើសម្រាប់ព្រះអម្ចាស់ និងសាសនាចក្ររបស់ទ្រង់ ។
លើកទឹកចិត្តឲ្យមានការរៀនសូត្រនៅឯគេហដ្ឋាន
សូមអញ្ជើញកុមារឲ្យបង្រៀនពាក្យប្រៀបប្រដូចមួយ ដែលពួកគេបានរៀននៅក្នុងអង្គការបឋមសិក្សាទៅដល់គ្រួសាររបស់ពួកគេ ។
ការកែលម្អការបង្រៀនរបស់យើង
កុមារចូលចិត្តចែកចាយអ្វីដែលពួកគេកំពុងរៀន ។ ទោះបីជាពួកគេនៅក្មេងក្ដី ក៏កុមារអាចពង្រឹងដល់សមាជិកគ្រួសាររបស់ពួកគេបានដែរ ។ សូមលើកទឹកចិត្តពួកគេឲ្យចែកចាយអ្វីដែលពួកគេបានរៀននៅក្នុងអង្គការបឋមសិក្សាដល់គ្រួសាររបស់ពួកគេ ។ ( សូមមើល ការបង្រៀនតាមរបៀបរបស់ព្រះអង្គសង្គ្រោះទំព័រ ៣០ ) ។