« ថ្ងៃទី ២៧ ខែ កុម្ភៈ–ថ្ងៃទី ៥ ខែ មីនា ។ ម៉ាថាយ ៨; ម៉ាកុស ២–៤; លូកា ៧ ៖ ‹ សេចក្តីជំនឿរបស់នាងបានសង្គ្រោះនាងហើយ › » ចូរមកតាមខ្ញុំ—សម្រាប់អង្គការបឋមសិក្សា ៖ ព្រះគម្ពីរសញ្ញាថ្មី ឆ្នាំ ២០២៣ ( ឆ្នាំ ២០២២ )
« ថ្ងៃទី ២៧ ខែ កុម្ភៈ–ថ្ងៃទី ៥ ខែ មីនា ។ ម៉ាថាយ ៨; ម៉ាកុស ២–៤; លូកា ៧ » ចូរមកតាមខ្ញុំ—សម្រាប់អង្គការបឋមសិក្សា ៖ ឆ្នាំ ២០២៣
ថ្ងៃទី ២៧ ខែ កុម្ភៈ–ថ្ងៃទី ៥ ខែ មីនា
ម៉ាថាយ ៨; ម៉ាកុស ២–៤; លូកា ៧
« សេចក្តីជំនឿរបស់នាងបានសង្គ្រោះនាងហើយ »
កាលបងប្អូនអាន ម៉ាថាយ ៨; ម៉ាកុស ២–៤ និង លូកា ៧ នៅសប្តាហ៍នេះ សូមគិតអំពីកុមារដែលបងប្អូនបង្រៀន ។ សូមអធិស្ឋានថាព្រះវិញ្ញាណបរិសុទ្ធនឹងបំផុសគំនិតបងប្អូនឲ្យមានគំនិតនានា ដែលនឹងជួយពួកគេឲ្យរកឃើញសេចក្តីពិតនៅក្នុងជំពូកទាំងនេះ ។
អញ្ជើញឲ្យចែកចាយ
សូមឲ្យកុមារចែកចាយដំណើររឿងមួយអំពីព្រះយេស៊ូវធ្វើអព្ភូតហេតុមួយ ( សូមមើលបញ្ជីអព្ភូតហេតុនានានៅក្នុង គម្រោងមេរៀនសប្ដាហ៍នេះ នៅក្នុង ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ) ។ បងប្អូនក៏អាចបង្ហាញរូបភាពដែលទាក់ទងគ្នាផងដែរ ( ដូចជា សៀវភៅរូបភាពដំណឹងល្អ ល.រ. ៤០ ) ។
បង្រៀនគោលលទ្ធិ ៖ កុមារតូចៗ
ព្រះយេស៊ូវមានអំណាចដើម្បីសម្ដែងអព្ភូតហេតុផ្សេងៗ ។
កាលបងប្អូនអានអំពីអព្ភូតហេតុនានារបស់ព្រះអង្គសង្គ្រោះក្នុងការព្យាបាល សូមសញ្ជឹងគិតថាតើបងប្អូននឹងចែកចាយអព្ភូតហេតុមួយណា ។ តើបងប្អូនអាចជួយកុមារដែលបងប្អូនបង្រៀនឲ្យយល់ពីតួនាទីនៃសេចក្ដីជំនឿទៅលើអព្ភូតហេតុ ដែលព្រះយេស៊ូវបានសម្ដែងឡើងយ៉ាងដូចម្ដេច ?
សកម្មភាពដែលអាចធ្វើបាន
-
សូមចែកចាយនូវដំណើររឿងអំពីមនុស្សខ្វិនចេញពី ម៉ាកុស ២:១–១២ ។ សម្រាប់ជាជំនួយ សូមមើលជំពូក ២៣ ៖ បុរសស្លាប់ដៃស្លាប់ជើង » ( នៅក្នុង ដំណើររឿងព្រះគម្ពីរសញ្ញាថ្មី ទំព័រ ៥៧–៥៨ ឬវីដេអូដូចគ្នានេះនៅលើគេហទំព័រ ChurchofJesusChrist.org ) ។ សូមពន្យល់ថា មនុស្សដែលស្លាប់ដៃស្លាប់ជើងគឺមិនអាចដើរបានទេ ។ សូមជួយពួកគេឲ្យយល់ថា ព្រះអង្គសង្រ្គោះបានព្យាបាលឲ្យបុរសនេះ ។
-
សូមឲ្យកុមារនិយាយអំពីគ្រាមួយដែលពួកគេបានឈឺ ។ សូមប្រាប់ពីដំណើររឿងមួយរបស់ព្រះយេស៊ូវកំពុងព្យាបាលមនុស្សឈឺ ដូចជា ម៉ាថាយ ៨:១–៤, ៥–១៣, ១៤–១៥; ម៉ាកុស ៣:១–៥; លូកា ៧:១១–១៦ ។ សូមអញ្ជើញកុមារឲ្យប្រាប់ពីដំណើររឿងនេះឡើងវិញតាមពាក្យពេចន៍របស់ពួកគេផ្ទាល់ ។ សូមថ្លែងទីបន្ទាល់ថា ព្រះចេស្តារបស់ព្រះយេស៊ូវអាចព្យាបាល ប្រសិទ្ធពរ និងលួងលោមដល់យើងបាន ។
ខ្ញុំអាចបង្ហាញសេចក្ដីស្រឡាញ់ចំពោះមនុស្សដទៃ ដូចព្រះយេស៊ូវបានធ្វើដែរ ។
ព្រះយេស៊ូវបានបង្ហាញសេចក្ដីស្រឡាញ់ដ៏ធំធេង តាមរយៈការប្រោសអ្នកឈឺ និងអ្នករងទុក្ខឲ្យជាសះស្បើយ ។ សូមសញ្ជឹងគិតអំពីរបៀបដែលបងប្អូនអាចបង្រៀនកុមារឲ្យបង្ហាញសេចក្ដីមេត្តាដល់មនុស្សដែលត្រូវការជំនួយ ។
សកម្មភាពដែលអាចធ្វើបាន
-
សូមជ្រើសរើសដំណើររឿងមួយ ឬច្រើនអំពីព្រះយេស៊ូវបង្ហាញសេចក្តីស្រឡាញ់ចំពោះនរណាម្នាក់ដែលទ័លក្រ ដូចជាអស់អ្នកដែលនៅក្នុង ម៉ាថាយ ៨:១–៤, ៥–១៣, ១៤–១៥; ម៉ាកុស ២:១–១២; ៣:១–៥; លូកា ៧:១១–១៦ ។ ( សូមមើលវីដេអូ « Widow of Nain » នៅលើគេហទំព័រ ChurchofJesusChrist.org ផងដែរ ) ។ សូមចែកចាយពីគ្រាដែលនរណាម្នាក់បានបង្ហាញសេចក្តីស្រឡាញ់ចំពោះបងប្អូនក្នុងគ្រាដែលទ័លក្រ ហើយតើបងប្អូនមានអារម្មណ៍បែបណា ។ សូមអញ្ជើញកុមារឲ្យចែកចាយបទពិសោធន៍របស់ពួកគេ ។
-
សូមបង្ហាញវីដេអូ « Gordon Hinckley: Lessons I Learned as a Boy » ឬ « The Coat » ( នៅលើគេហទំព័រ ChurchofJesusChrist.org ) ។ តើកុមារនៅក្នុងវីដេអូទាំងនេះបានធ្វើតាមគំរូរបស់ព្រះយេស៊ូវដោយរបៀបណា ? សូមឲ្យកុមារចែកចាយពីស្ថានភាពផ្សេងទៀត ពេលដែលនរណាម្នាក់អាចត្រូវការជំនួយ ។ តើយើងអាចធ្វើអ្វីខ្លះដើម្បីជួយដល់ពួកគេ ?
-
សូមច្រៀងចម្រៀងមួយបទអំពីការបង្ហាញសេចក្ដីស្រឡាញ់ និងការមានចិត្តល្អទៅកាន់អ្នកដទៃ ដូចជាបទ « ចិត្តល្អចាប់ផ្តើមនឹងខ្ញុំ » ( សៀវភៅចម្រៀងកុមារ ទំព័រ ៨៣ ) ។
ពីភាពភ័យខ្លាចទៅជាសេចក្ដីជំនឿ ដោយ ហូវ៉ឺដ លីយ៉ន
នៅពេលខ្ញុំខ្លាច ឬស្ថិតនៅក្នុងគ្រោះថ្នាក់ នោះព្រះយេស៊ូវអាចជួយខ្ញុំឲ្យមានអារម្មណ៍សុខសាន្ដបាន ។
ដំណើររឿងព្រះយេស៊ូវធ្វើឲ្យព្យុះស្ងប់អាចជួយកុមារឲ្យដឹងថា ទ្រង់អាចប្រទានដល់ពួកគេនូវសេចក្ដីសុខសាន្ដ កាលពួកគេមានអារម្មណ៍ភ័យខ្លាច ។
សកម្មភាពដែលអាចធ្វើបាន
-
សូមជួយកុមារឲ្យស្រមៃថា ពួកគេនៅលើនាវាមួយ កាលបងប្អូនអាននៅក្នុង ម៉ាកុស ៤:៣៥–៤១ ។ ( សូមមើលផងដែរ « ជំពូក ២១ ៖ ព្រះយេស៊ូវត្រាស់បញ្ជាខ្យល់ និងរលក » នៅក្នុង ដំណើររឿងព្រះគម្ពីរសញ្ញាថ្មី ទំព័រ ៥៣ ឬវីដេអូដូចគ្នានេះនៅលើគេហទំព័រ ChurchofJesusChrist.org ) ។ សូមឲ្យកុមាររៀបរាប់អំពីអារម្មណ៍ដែលពួកគេអាចមាន ប្រសិនបើពួកគេបាននៅទីនោះ ។ តើកុមារភ័យខ្លាចនៅពេលណាដែរ ? តើពួកគេបានរកឃើញការលួងលោមដោយរបៀបណា ?
-
សូមឲ្យកុមារធ្វើសំឡេងខ្យល់ព្យុះមួយ ហើយឈប់កាលនរណាម្នាក់និយាយថា « ចូរស្ងៀមទៅ ហើយឈប់ចុះ » ។ សូមថ្លែងទីបន្ទាល់ថា គឺដូចជាព្រះយេស៊ូវអាចនាំសេចក្ដីសុខសាន្ដមកដល់យើងកាលមានខ្យល់ព្យុះខាងក្រៅមួយដែរ នោះទ្រង់ក៏អាចនាំសេចក្ដីសុខសាន្ដមកដល់ដួងចិត្តយើង កាលយើងមានអារម្មណ៍មិនល្អក្នុងខ្លួនយើងផងដែរ ។
-
សូមបង្ហាត់កុមារឲ្យធ្វើកាយវិការនៅឃ្លាទីបីនៃបទ « សូមប្រាប់ខ្ញុំពីរឿងព្រះយេស៊ូវ » ( សៀវភៅចម្រៀងកុមារ ទំព័រ ៣៦ ) ហើយសូមច្រៀងឃ្លានេះជាមួយគ្នាខណៈពេលដែលកំពុងធ្វើកាយវិការ ។
បង្រៀនគោលលទ្ធិ ៖ កុមារធំៗ
ព្រះយេស៊ូវអាចសម្ដែងអព្ភូតហេតុនានានៅក្នុងជីវិតរបស់ខ្ញុំ កាលខ្ញុំមានសេចក្ដីជំនឿទៅលើទ្រង់ ។
ព្រះយេស៊ូវបានសម្ដែងអព្ភូតហេតុជាច្រើនអំឡុងការងារបម្រើខាងសាច់ឈាមរបស់ទ្រង់ ។ តើបងប្អូនអាចជួយកុមារឲ្យដឹងថា អព្ភូតហេតុនៅតែកើតឡើងនាសព្វថ្ងៃនេះដោយរបៀបណា ?
សកម្មភាពដែលអាចធ្វើបាន
-
សូមឲ្យកុមាររើសយកអព្ភូតហេតុមួយដូចខាងក្រោមនេះដើម្បីអាន និងគូររូបភាព ៖ ម៉ាថាយ ៨:១–៤, ៥–១៣, ១៤–១៥; ម៉ាកុស ២:១–១២; ៣:១–៥; លូកា ៧:១១–១៦ ។ សូមឲ្យកុមារពន្យល់ពីគំនូររបស់ពួកគេដល់សិស្សក្នុងថ្នាក់ ។ តើយើងរៀនអ្វីខ្លះអំពីព្រះយេស៊ូវមកពីដំណើររឿងទាំងនេះ ?
-
សូមឲ្យកុមារសម្ដែងពីអារម្មណ៍របស់ពួកគេ កាលពួកគេឈឺ ក្រៀមក្រំ ភ័យខ្លាច ឬព្រួយបារម្ភ ។ តើព្រះយេស៊ូវអាចជួយយើង កាលយើងមានអារម្មណ៍ទាំងនេះដោយរបៀបណា ? សូមថ្លែងទីបន្ទាល់ថា ព្រះយេស៊ូវអាចជួយដល់កុមារនៅក្នុងស្ថានភាពទាំងអស់នេះបាន ។
-
សូមឲ្យកុមារចែកចាយនូវបទពិសោធន៍នានា កាលពួកគេ ឬនរណាម្នាក់ដែលពួកគេស្គាល់បានទទួលពរជ័យបព្វជិតភាព ។ តើបុគ្គលនោះត្រូវបានព្យាបាល ឬប្រទានពរដោយរបៀបណា ?
ព្រះយេស៊ូវស្រឡាញ់យើង ទោះបីជាយើងមានបាបក្តី ហើយចង់ជួយយើងឲ្យប្រែចិត្ត ។
ដំណើររឿងនៅក្នុង ម៉ាកុស ២:១៥–១៧ និង លូកា ៧:៣៦–៥០ អាចជួយកុមារឲ្យយល់ថា ព្រះយេស៊ូវគ្រីស្ទស្រឡាញ់យើង ទោះបីជាយើងមានអំពើបាបក៏ដោយ ។ ទ្រង់ចង់ជួយយើងឲ្យប្រែចិត្ត និងខិតជិតទ្រង់ ។
សកម្មភាពដែលអាចធ្វើបាន
-
សូមសរសេរសំណួរ តើព្រះយេស៊ូវមានព្រះទ័យយ៉ាងដូចម្តេចពីអំពើបាប ? និង តើព្រះយេស៊ូវមានព្រះទ័យយ៉ាងដូចម្តេចអំពីយើង នៅពេលយើងមានបាប ? នៅលើក្តារខៀន ។ សូមឲ្យកុមារគិតអំពីសំណួរទាំងនេះ កាលពួកគេអានជាមួយគ្នាក្នុង ម៉ាកុស ២:១៥–១៧ ហើយបន្ទាប់មកសូមចែកចាយចម្លើយរបស់ពួកគេ ។ ( បងប្អូនអាចចង់អានជាមួយគ្នាក្នុងប្រធានបទ « អ្នកយកពន្ធ » ដែលមាននៅក្នុងសេចក្តីណែនាំដល់បទគម្ពីរទាំងឡាយ [ នៅលើគេហទំព័រ scriptures.ChurchofJesusChrist.org ] ) ។ ហេតុអ្វីបានជាវាមានសារៈសំខាន់ដើម្បីដឹងថា ព្រះយេស៊ូវស្រឡាញ់យើង ទោះបីជាយើងមិនឥតខ្ចោះក្តី ? តើការដឹងការណ៍នេះជួយយើងនៅពេលយើងត្រូវប្រែចិត្តយ៉ាងដូចម្តេច ?
-
ពីរបីថ្ងៃមុនថ្នាក់ចាប់ផ្តើម សូមអញ្ជើញកុមារម្នាក់ និងសមាជិកគ្រួសារម្នាក់ឲ្យមកថ្នាក់រៀនដោយបានត្រៀមខ្លួនចែកចាយដំណើររឿងនៅក្នុង លូកា ៧:៣៦–៥០ ។ ពួកគេអាចគូររូបភាពដែលពិពណ៌នាផ្នែកខ្លះនៃដំណើររឿងនេះ ដើម្បីបង្ហាញដល់សិស្សក្នុងថ្នាក់បាន ។ សូមពិភាក្សាជាមួយកុមារពីអ្វីដែព្រះអម្ចាស់ប្រហែលជាចង់ឲ្យយើងរៀនចេញពីដំណើររឿងនេះ ។
នៅពេលខ្ញុំខ្លាច ឬស្ថិតនៅក្នុងគ្រោះថ្នាក់ នោះព្រះយេស៊ូវអាចជួយខ្ញុំឲ្យមានអារម្មណ៍សុខសាន្ដបាន ។
កុមារត្រូវដឹងថា ព្រះអង្គសង្គ្រោះអាចប្រទានដល់ពួកគេនូវសេចក្ដីសុខសាន្ដ នៅពេលពួកគេជួបនឹងព្យុះជីវិត—នាពេលនេះ និងនៅពេលអនាគត ។
សកម្មភាពដែលអាចធ្វើបាន
-
សូមឲ្យកុមារម្នាក់ប្រើ ម៉ាកុស ៤:៣៥–៤១ និង រូបភាព ព្រះយេស៊ូវធ្វើឲ្យខ្យល់ព្យុះស្ងប់ ( សៀវភៅរូបភាពដំណឹងល្អ ល.រ.៤០ ) ដើម្បីតំណាលពីរឿងព្រះយេស៊ូវធ្វើឲ្យព្យុះស្ងប់ ។ សូមឲ្យកុមាររៀបរាប់អំពីអារម្មណ៍ដែលពួកគេអាចមាន ប្រសិនបើពួកគេបាននៅទីនោះ ។
-
សូមឲ្យសិស្សចែកចាយនូវបទពិសោធន៍នានា កាលពួកគេបានមានអារម្មណ៍សុខសាន្ដ បន្ទាប់ពីបានអធិស្ឋានទូលសូមជំនួយ ។ សូមរំឭកពួកគេថា សេចក្ដីសុខសាន្ដនេះចេញមកពីព្រះអង្គសង្គ្រោះ ។
-
សូមឲ្យក្រដាសដែលមានរូបពពកខ្មៅធ្លាក់ភ្លៀងមួយដល់កុមារម្នាក់ៗ ហើយសូមឲ្យពួកគេសរសេរនៅលើក្រដាសនោះនូវឧបសគ្គមួយដែលមនុស្សម្នាក់អាចមាន ។ សូមផ្គុំរូបពពកទាំងអស់នៅលើក្ដារខៀនគ្របលើរូបភាពព្រះអង្គសង្គ្រោះ ។ សូមឲ្យកុមារម្នាក់ដករូបពពកមួយចេញ ហើយប្រាប់ពីវិធីដែលយើងអាចជួយនរណាម្នាក់ជាមួយនឹងឧបសគ្គនោះ ដើម្បីឲ្យគេអាចរកឃើញសេចក្ដីសុខសាន្ដបាន ។ នៅពេលពពកទាំងអស់ត្រូវបានដកចេញហើយ សូមថ្លែងទីបន្ទាល់អំពីព្រះចេស្ដារបស់ព្រះអង្គសង្គ្រោះក្នុងការធ្វើឲ្យព្យុះស្ងប់នៅក្នុងជីវិតរបស់យើង ។
លើកទឹកចិត្តឲ្យមានការរៀនសូត្រនៅឯគេហដ្ឋាន
សូមជួយកុមារឲ្យសរសេរនូវសកម្មភាពបម្រើមួយ ដែលពួកគេនឹងធ្វើសម្រាប់នរណាម្នាក់នៅសប្ដាហ៍នេះ ។
ការកែលម្អការបង្រៀនរបស់យើង
កុមារមានភាពសកម្ម ។ នៅពេលខ្លះ បងប្អូនអាចមានអារម្មណ៍ថា កម្លាំងរបស់កុមារគឺជាការបង្វែរអារម្មណ៍កុមារពីការរៀនសូត្រ ។ ប៉ុន្ដែបងប្អូនអាចបង្កើតសកម្មភាពដោយផ្អែកលើធម្មជាតិដ៏សកម្មរបស់ពួកគេបាន ដោយឲ្យពួកគេសម្ដែងរឿង ឬធ្វើសកម្មភាពដែលទាក់ទងនឹងព្រឹត្តិការណ៍នានានៅក្នុងបទចម្រៀង ឬព្រះគម្ពីរ ។ ( សូមមើល ការបង្រៀនតាមរបៀបរបស់ព្រះអង្គសង្គ្រោះ ទំព័រ២៥ ) ។