Risamaria eo Em̧m̧an, jān Dan Burr

Eprōļ 17–23

Matu18; Luk 10

“Ta Men eo Inaaj Kōm̧m̧ane Bwe in Bōk Aō Jolōt Mour Indeeo?”

Ta m̧ool ko ilo Matu 18 im Luk 10 me ajri ro raikuj jeļā? Ron̄jake unoojdikdik ko an Jetōb Kwōjarjar ilo am̧ riit jebta kein. Itok, Ļoor Eō—N̄an Kajjojo Armej im Baam̧le ko emaron̄ jipan̄ tōl am̧ ekkatak, im laajrak in enaaj lewaj n̄an eok ļōmņak n̄an katak ko.

Kajjitōk bwe ren Kwaļo̧k

Rōjan̄ ajri ro n̄an kwaļo̧k jet men rekar ekkatak kōn Jisōs Kraisto ilo m̧weo ak ilo Būraimere.

Katakin Katak eo: Ajri ro Reddikļo̧k

Matu 18:21–35

Ij aikuj aolep iien jeo̧rļo̧k an ro jet bōd.

Ilo am̧ riiti Matu 18:21–35, ļōmņak kōn en̄jake ko am make kōn jeo̧rļo̧k bōd im ta eo ajri ro rekōņaan jeļā kōn pedped in.

M̧akūtkūt ko Maron̄ Kōm̧m̧ani

• Kwaļo̧k kōn būrabōļ eo (lale Matu 18:23–35). Kōmeļeļeiki bwe n̄e juon jouj im kōm̧m̧an em̧m̧an, jenaaj bar illu wōt ak inepata. Ak jeo̧rļo̧k bōd ej meļeļein jemaron̄ en̄jake bar aenōm̧m̧an. N̄e jej jeo̧rļo̧k an ro jet bōd, jej kāālet n̄an jab bar illu ippāer. (Jipan̄ ajri ro meļeļe bwe n̄e armej eo ejjab jouj ak kōm̧m̧an aem̧m̧an n̄an er, rek ba n̄an jineer im jemeer ak rūtto ro jet rej leke n̄an jipan̄.)

• Je Ij jeo̧rļo̧k am̧ bōd ioon bo̧o̧t eo, im ba n̄an ajri ro bwe naan kein remaron̄ jipan̄ er ukōt būrom̧ōj n̄an m̧ōņōņō. Jin̄aik juon mej ebūrom̧ōj ioon bo̧o̧t eo, im kwaļo̧k jet iaan waanjon̄ak ko me ajri ro remaron̄ jeo̧rļo̧k an doon bōd. Ālkin kajjojo waanjon̄ak, kajjitiōk ippān ajri ro n̄an ukōt mej eo būrom̧ōj n̄an m̧ōņōņō.

• Al juon al kōn jeorļo̧k bōd, eo āinwōt “Help Me, Dear Father” (Children’s Songbook,,99). Kwaļo̧k naan in kam̧ool eo am̧ bwe Jemedwōj Ilan̄ enaaj jipan̄ kōj jeo̧rļo̧k an ro jet bōd.

Luk 10:25–37

Jisōs ekar katakin eō n̄an lale aolep armej āinwōt ro rituru im iakw er.

Būrabōļ eo an RiSamaria eo em̧m̧an emaron̄ kwaļo̧k n̄an ajri ro wōn ro ritūrid im elmen ad kōm̧m̧an em̧m̧an n̄an er. Ļōmņak wāween ko komaron̄ im̧we ajri ro n̄an “etal, im kōm̧m̧an … āinwōt” (Luk 10:37).

M̧akūtkūt ko Maron̄ Kōm̧m̧ani

• Kajjitōk ippān kajjojo ajri, “Wōn eo ritūrum̧?” Kōmeļeļeik bwebwenato eo ilo Luk 10:25–37, im kwaļo̧k elmen an kar Jisōs uwaake kajjitōk in. Ta eo Jisōs ekar kwaļo̧k kake bwe jen kōm̧m̧an em̧m̧an n̄an ro ritūrid?

• Riiti Luk 10:25–37 ilo an ajri ro kōm̧m̧ane būrabōļ eo kōn RiSamaria eo em̧m̧an. Jipan̄ er ļōmņake wāween ko remaron̄ in āinwōt RiSamaria eo em̧m̧an n̄an kwaļo̧k iakwe im jouj n̄an ro jet.

• Je jet waanjon̄ak im men ko armej ro remaron̄ aikuj jipan̄, im ņooji peba ko ipeļaakin ruum̧ eo. Kajjitōk ippān ajri ro n̄an kapukkōt peba ko. Riiti jekjek ko, im kajjitōk ippān ajri ro n̄an kwaļo̧k elmen aer maron̄ kwaļo̧k jouj n̄an armej eo ilo jekjek eo.

• Al ippān aj ri ro juon al kōn jouj, āinwōt“Jesus Said Love Everyone” ak “Kindness Begins with Me” (Children’s Songbook, 61, 145). Jipan̄ ajri ro ļōmņake jet wāween ko remaron̄ kwaļo̧k iakwe im jouj n̄an ro jet. Remaron̄ jin̄aik pijaier make aer kōm̧m̧ane men kein.

Katakin Katak eo: Ajri ro Rerūttoļo̧k

Matu 18:21–35

Jemedwōj Ilan̄ enaaj jeo̧rļo̧k ad bōd n̄e ij jeo̧rļo̧k an ro jet bōd.

Būrabōļ eo kōn rikarejar eo ejjab jouj emaron̄ in wāween eo n̄an katakin ajri ro bwe Jemedwōj Ilan̄ ekōņaan bwe jen jeo̧rļo̧k an doon bōd.

M̧akūtkūt ko Maron̄ Kōm̧m̧ani

• Riiti Matu 18:23–35 ippān ajri ro. Kōmeļeļeiki bwe kiin̄ eo ak irooj rej pinej jenkwan Jemedwōj Ilan̄, rikarejar eo ej pinej jenkwan kōj, im rikarejar ro jet rej pinej jenkwan ro rekar bōd ņae kōj. Kajjitōk ippān ajri ro kajjitōk in “Ta eo bwebwenato in ej katakin kōj elmen ad kōm̧m̧an n̄an ro jet? N̄āāt eo kwaar lo ke epen n̄an jeo̧rļo̧k an ro jet bōd? Elmen am̧ meļo̧kļo̧k en̄jake kein rōkōmetak? N̄āāt eo kwaar aikuj jipan̄ n̄an jeo̧rļo̧k bōd kōn kāālet eo ebōd?”

• Kwaļo̧k bitio eo “Forgive Every One Their Trespasses: The Parable of the Unmerciful Servant” (ChurchofJesusChrist.org) n̄an jipan̄ ajri ro lale būrabōļ in.

• Je ioon bo̧o̧t eo būrabōļōm̧ ko 70 × 7, im jipan̄ ajri ro jerbale. Kajjitōk bwe jet ren riiti Matu 18:21–22, im kōmeļeļeiki bwe Jisōs Kraist ekar kōjerbal nōm̧ba in n̄an katakin kōj ke jej aikuj iien otemjej jeo̧rļo̧k bōd.

• Kajjitōk ippān ajri ro n̄an jipan̄ kwe ļōmņake jejjo̧ jekjek ko ijo ro jet remaron̄ aikuj jipan̄ n̄an jeo̧rļo̧k bōd an armej eo juon. Kajjitōk ippān ajir ro n̄an ikkure kake elmen aer kwaļo̧k jeo̧rļo̧k bōd ilo jekjek kein.

• Al juon al kōn jeorļo̧k bōd, eo āinwōt “Help Me, Dear Father” (Children’s Songbook,, 99). Jipan̄ ajri ro meļeļe ta eo al in ej katakin kōj kōn jeo̧rļo̧k bōd an ro jet.

Luk 10:30–37

Imaron̄ iakwe im jerbal n̄an ro jet, eļaptata ro rej pād ilo aikuj.

Kōļmenļo̧kjeņ kōn tōre ko ilo mour eo am̧ n̄e juon ekar “juon RiSamaria eo em̧m̧an” n̄an kwe. Elmen am maron̄ im̧we ajri ro bwe ren “juon RiSamaria eo em̧m̧an” n̄an ro jet.

M̧akūtkūt ko Maron̄ Kōm̧m̧ani

• Jitōn̄ kajjojo ajri n̄an kadikdik riiti m̧ōttan būrabōļ eo an RiSamaria eo em̧m̧an. Kajjitōk ippān ajri ro n̄an kwaļo̧k m̧ōttan ko aer kōn būrabōļ eo ilo karōkier kōn ta ko rekar waļo̧k.

• Kōmeļeļeiki n̄an ajri ro bwe RiJu ro rekar lukkuun dike RiSamaria ro ilo iien aer etal jān Jerusalem n̄an Galilee, renaaj kōjekdoon RiSamaria eo n̄an bōbrae aer jab bwebwenato ippān jabdewōt RiSamaria. N̄ān kōmeļeļeiki menin, kwalo̧k Bible map 1, “Physical Map of the Holy Land.” Etke Jisōs ekar kōjerbal RiSamaria in āinwōt juon waanjon̄ak an jouj ilo būrabōļ in? Ta eo bwebwenato in ej katakin kōj n̄an jipan̄ ro rej pād ilo aikuj? (Bar lale Mosaia 4:16–22.)

• Kajjitōk ippān ajri ro n̄an kwaļo̧k juon en̄jake n̄e armej eo enkar āinwōt RiSamaria eo em̧m̧an ej jibadōktok er.

• Kajjitōk ippān ajri ro n̄an jeke kōttōpar n̄an āinwōt juon RiSamaria eo em̧m̧an ilo wiik in. Kwomaron̄ kajjitōk ippāer n̄e rejeļā kajjien armej ro me renan̄inmej ak ajimakeke ak armej eo ejjab emakijkij an jar. Kajjitōk ippān ajri ro elmen aer maron̄ jipan̄ armej in. Jipan̄ ajri ro meļeļe elmen jipan̄ ro jet kōjparok kallim̧ur ko rekar kōm̧m̧an ilo peptaij (lale Mosaia 18:8–10).

Kōketak Ekkatak ilo M̧weo

Kajjitōk ippān ajri ro n̄an kwaļo̧k n̄an baam̧le ko aer ta pepe eo aer n̄an kōm̧m̧an eļapļo̧k jeo̧rļo̧k bōd im elapļo̧k āinwōt RiSamaria eo em̧m̧an wiik in.

Kōkōm̧anm̧anļo̧k Ad Katakin

Katakin ajri ro n̄an je im̧we ko rej en̄jake. N̄e ajri ro remaron̄ jeļā kile im̧we ko, enaaj jipan̄ er kile im ļoor Jetōb. Remaron̄ ļo̧o̧ke im̧we ko jān kōkaļļeik jeje ko rekwojarjar, jin̄aik pija ko, ak kōm̧m̧ani men ko rej je reļem waan ilo jōnōļ eo.