« ថ្ងៃទី ១–៧ ខែ ឧសភា ។ លូកា ១២–១៧; យ៉ូហាន ១១ ៖ ‹ សូមអរសប្បាយជាមួយនឹងខ្ញុំ ដ្បិតចៀមខ្ញុំដែលបាត់ នោះឃើញវិញហើយ › » ចូរមកតាមខ្ញុំ—សម្រាប់អង្គការបឋមសិក្សា ៖ ព្រះគម្ពីរសញ្ញាថ្មី ឆ្នាំ ២០២៣ ( ឆ្នាំ ២០២២ )
« ថ្ងៃទី ១–៧ ខែ ឧសភា ។ លូកា ១២–១៧; យ៉ូហាន ១១ » ចូរមកតាមខ្ញុំ—សម្រាប់អង្គការបឋមសិក្សា ៖ ឆ្នាំ ២០២៣
កូនប្រុសខ្ជះខ្ជាយ ដោយ លីស លីស ឡេមិន ស្វិនដល
ថ្ងៃទី ១–៧ ខែ ឧសភា
លូកា ១២–១៧; យ៉ូហាន ១១
« សូមអរសប្បាយជាមួយនឹងខ្ញុំ ដ្បិតចៀមខ្ញុំដែលបាត់ នោះឃើញវិញហើយ »
សូមអាន លូកា ១២–១៧ និង យ៉ូហាន ១១ ប្រកបដោយការអធិស្ឋាន ហើយសូមស្វែងរករបៀបដែលបងប្អូនអាចជួយកុមារដែលបងប្អូនបង្រៀនឲ្យយល់ពីសេចក្ដីពិតនៅក្នុងជំពូកទាំងនេះ ហើយទទួលអារម្មណ៍ពីសេចក្ដីស្រឡាញ់របស់ព្រះវរបិតាសួគ៌ ។
អញ្ជើញឲ្យចែកចាយ
សូមរំឭកកុមារអំពីពាក្យប្រៀបប្រដូច និងដំណើររឿងនានាមួយចំនួនដែលមាននៅក្នុង លូកា ១២–១៧ និង យ៉ូហាន ១១ ហើយសូមឲ្យពួកគេចែកចាយពីអ្វីដែលពួកគេដឹងអំពីដំណើររឿងទាំងនេះ ។
បង្រៀនគោលលទ្ធិ ៖ កុមារតូចៗ
ព្រះវរបិតាសួគ៌មានព្រះទ័យឲ្យបុត្រាបុត្រីទាំងអស់របស់ទ្រង់ត្រឡប់ទៅកាន់ទ្រង់វិញ ។
សូមគិតពីកុមារនៅក្នុងថ្នាក់របស់បងប្អូន រួមទាំងអ្នកដែលមិនអាចចូលរួមជាទៀងទាត់ផងដែរ ។ តើបងប្អូនអាចជួយពួកគេឲ្យទទួលអារម្មណ៍ពីសេចក្ដីស្រឡាញ់របស់ព្រះវរបិតាសួគ៌បានដោយរបៀបណា ? តើបងប្អូនអាចបំផុសគំនិតដល់កុមារផ្សេងទៀតឲ្យជួយបងប្អូនឈោងទៅជួយពួកគេដោយសេចក្ដីស្រឡាញ់យ៉ាងដូចម្ដេច ?
សកម្មភាពដែលអាចធ្វើបាន
-
សូមឲ្យកាក់មួយទៅកុមារម្នាក់ ឲ្យរូបភាពកូនចៀមមួយទៅកុមារម្នាក់ទៀត ហើយឲ្យរូបភាពកូនប្រុសខ្ជះខ្ជាយទៅកុមារម្នាក់ទៀត ( សូមមើលគេហទំព័រ ChurchofJesusChrist.org ឬទំព័រសកម្មភាពសប្ដាហ៍នេះ ) ។ សូមប្រាប់ពាក្យប្រៀបប្រដូចទាំងបីដែលមាននៅក្នុង លូកា ១៥ ហើយឲ្យកុមារលើកកាក់ ឬរូបភាពរបស់ពួកគេឡើង កាលបងប្អូននិយាយដល់ពាក្យនោះ ។ បងប្អូនអាចឲ្យកុមារតំណាលប្រាប់ពាក្យប្រៀបប្រដូចទាំងនេះសាឡើងវិញដល់គ្នាទៅវិញទៅមកជាពាក្យសម្ដីរបស់គេផ្ទាល់ ។
-
សូមឲ្យកុមារចែកចាយពីគ្រាមួយដែលពួកគេបានបាត់បង់អ្វីមួយ ។ តើពួកគេបានរកឃើញវាដោយរបៀបណា ? សូមពន្យល់ថា មនុស្សអាចវង្វេងខាងវិញ្ញាណ ពេលពួកគេមិនធ្វើតាមព្រះវរបិតាសួគ៌ ។ សូមថ្លែងទីបន្ទាល់ថា ព្រះសព្វព្រះទ័យឲ្យមនុស្សដែលវង្វេងដើរមករកទ្រង់វិញ ហើយយើងអាចជួយពួកគេបាន ។
-
សូមឲ្យកុមារគិតអំពីកុមារផ្សេងទៀតដែលមិនបានមកកាន់អង្គការបឋមសិក្សា ។ សូមជួយពួកគេឲ្យផាត់ពណ៌ ឬសរសេរលិខិតអញ្ជើញមួយទៅកុមារទាំងនេះ ដើម្បីឲ្យមកចូលរួមនៅក្នុងអង្គការបឋមសិក្សាវិញ ឬសកម្មភាពអង្គការបឋមសិក្សាមួយ ។ តើបងប្អូនអាចជួយកុមារទាំងនេះឲ្យមានអារម្មណ៍ពីសេចក្ដីស្រឡាញ់របស់ព្រះវរបិតាសួគ៌ដែលមានសម្រាប់ពួកគេដោយរបៀបណាទៀត ?
ខ្ញុំអាចបង្ហាញសេចក្ដីស្រឡាញ់របស់ខ្ញុំដល់ព្រះវរបិតាសួគ៌ ដោយការមានអំណរគុណចំពោះពរជ័យទាំងឡាយរបស់ខ្ញុំ ។
តើដំណើររឿងអំពីមនុស្សឃ្លង់ដប់នាក់អាចលើកទឹកចិត្តដល់កុមារឲ្យមានអំណរគុណដោយរបៀបណា ?
សកម្មភាពដែលអាចធ្វើបាន
-
សូមតំណាលរឿងអំពីមនុស្សឃ្លង់ដប់នាក់ ដែលព្រះយេស៊ូវបានប្រោសឲ្យជា ។ សូមបង្ហាញរូបភាពនៅក្នុង គម្រោងមេរៀនសប្ដាហ៍នេះ នៅក្នុង ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ហើយសូមឲ្យកុមាររាប់ម្រាមដៃរបស់ពួកគេដល់ដប់ ។ រួចសុំឲ្យពួកគេដាក់ម្រាមដៃប្រាំបួនចុះដើម្បីបង្ហាញពីមនុស្សឃ្លង់មួយរូប ដែលបានអរព្រះគុណដល់ព្រះយេស៊ូវ ។ សូមជួយកុមារឲ្យគិតពីមនុស្សម្នាក់ដែលពួកគេអាចថ្លែងអំណរគុណចំពោះទង្វើដ៏សប្បុរស ឬចេះជួយយកអសារ ។
-
សូមឲ្យកុមារម្នាក់ៗសម្ដែងរឿងអ្វីមួយដែលពួកគេមានអំណរគុណ ហើយសុំឲ្យកុមារក្នុងថ្នាក់ទាយថាវាគឺជាអ្វី ។ សូមឲ្យកុមារចែកចាយរបៀបដែលយើងអាចបង្ហាញព្រះវរបិតាសួគ៌ថា យើងមានអំណរគុណចំពោះពរជ័យទាំងឡាយរបស់យើង ។
យើងជឿថា ព្រះយេស៊ូវគ្រីស្ទគឺជាព្រះរាជបុត្រារបស់ព្រះ ។
ម៉ាថា ដែលជាបងស្រីរបស់ឡាសារ បានទូលទៅព្រះយេស៊ូវថា « ខ្ញុំម្ចាស់ជឿហើយថា ទ្រង់ជាព្រះគ្រីស្ទ គឺជាព្រះរាជបុត្រានៃព្រះ ដែលត្រូវយាងមកក្នុងលោកីយ៍មែន » ( យ៉ូហាន ១១:២៧ ) ។ ដំណើររឿងរបស់ម៉ារា ម៉ាថា និងឡាសារ អាចពង្រឹងដល់ទីបន្ទាល់របស់កុមារអំពីព្រះយេស៊ូវគ្រីស្ទ ។
សកម្មភាពដែលអាចធ្វើបាន
-
សូមសង្ខេបដំណើររឿងអំពីព្រះយេស៊ូវប្រោសឡាសារឲ្យរស់ពីស្លាប់ ( សូមមើលផងដែរ « ជំពូក ៤៣ ៖ ព្រះយេស៊ូវប្រោសឡាសារឲ្យរស់ឡើងវិញ » នៅក្នុង ដំណើររឿងព្រះគម្ពីរសញ្ញាថ្មី ទំព័រ ១០៧–៩ ឬវីដេអូដូចគ្នានេះនៅលើគេហទំព័រ ChurchofJesusChrist.org ) ។ សូមបង្ហាញកុមារនូវមែកឈើងាប់ និងកូនឈើរស់មួយ ហើយសួរពួកគេថាតើមួយណាងាប់ និងមួយណារស់ ។ សូមថ្លែងទីបន្ទាល់របស់បងប្អូនថា ដោយសារតែព្រះចេស្ដារបស់ព្រះយេស៊ូវគ្រីស្ទ នោះមនុស្សដែលស្លាប់ទៅនឹងត្រូវរស់ឡើងវិញម្ដងទៀត ហើយនឹងរស់នៅជារៀងរហូត ។
-
សូមជួយកុមារឲ្យទន្ទេញឃ្លាដែលព្រះយេស៊ូវបានមានបន្ទូលទៅ ម៉ាថា ថា « ខ្ញុំជាសេចក្តីរស់ឡើងវិញ ហើយជាជីវិត » ( យ៉ូហាន ១១:២៥ ) ។ សូមពន្យល់ថា ដោយសារតែការរស់ឡើងវិញរបស់ព្រះអង្គសង្គ្រោះ នោះយើងនឹងឃើញមនុស្សជាទីស្រឡាញ់របស់យើងដែលបានស្លាប់ទៅនោះជាថ្មីម្ដងទៀត ។
បង្រៀនគោលលទ្ធិ ៖ កុមារធំៗ
ខ្ញុំអាចជួយព្រះយេស៊ូវឲ្យស្វែងរកកូនចៀមដែលវង្វេងបាត់របស់ទ្រង់បាន ។
យើងទាំងអស់គ្នាស្គាល់មនុស្សម្នាក់ដែលប្រៀបដូចជាចៀមដែលបាត់ ប្រាក់កាក់ដែលបាត់ ឬកូនប្រុសខ្ជះខ្ជាយនៅក្នុងពាក្យប្រៀបប្រដូចរបស់ព្រះអង្គសង្គ្រោះដែរ ។ សូមពិចារណាពីរបៀបដែលបងប្អូនអាចបំផុសគំនិតដល់កុមារឲ្យឈោងទៅជួយមនុស្សទាំងនេះដោយសេចក្ដីស្រឡាញ់ ។
សកម្មភាពដែលអាចធ្វើបាន
-
សូមជួយកុមារឲ្យអានពាក្យប្រៀបប្រដូចអំពីចៀមដែលបាត់ក៏បាន ឬរឿងប្រាក់កាក់ដែលបាត់ក៏បាន ដែលមាននៅក្នុង លូកា ១៥:១–១០ ហើយចែកចាយអ្វីដែលពួកគេបានរៀន ។
-
សូមសរសេរឈ្មោះទាំងនេះនៅលើក្ដារខៀន ៖ ឪពុក, កូនប្រុសច្បងនិង កូនប្រុសពៅ ។ សូមបង្ហាញវីដេអូ « The Prodigal Son » ( នៅលើគេហទំព័រ ChurchofJesusChrist.org ) ហើយផ្អាកវាម្ដងម្កាល ដូច្នេះកុមារអាចសរសេរនៅលើក្ដារខៀនអំពីអារម្មណ៍របស់មនុស្សដែលមាននៅក្នុងរឿងនោះ ។ តើព្រះវរបិតាសួគ៌ និងព្រះយេស៊ូវមានព្រះទ័យបែបណាចំពោះមនុស្សដែលមានអំពើបាប ?
-
សូមឲ្យកុមារម្នាក់ចាកចេញពីបន្ទប់ កាលកុមារផ្សេងទៀតលាក់ប្រាក់កាក់មួយ ឬកូនចៀមក្រដាសមួយ ។ សូមឲ្យកុមារនោះត្រឡប់មកវិញ ហើយរកមើលប្រាក់កាក់ ឬកូនចៀមនោះ ។ តើវិធីមួយចំនួនណាខ្លះដែលមនុស្សអាចមានអារម្មណ៍ថា « បាត់ » ដូចជាកាក់ ឬសត្វចៀមនោះ ? សូមឲ្យកុមារផ្ដល់យោបល់ពីរបៀបដែលពួកគេអាចឈោងទៅជួយមនុស្សទាំងនេះបាន ។ សូមច្រៀងជាមួយនឹងកុមារនូវចម្រៀងមួយបទដែលទាក់ទងគ្នា ដូចជាបទ « បណ្តូលចិត្តរបស់អ្នកគង្វាល » ( ទំនុកតម្កើង ល.រ. ១៣៦ ) ហើយថ្លែងទីបន្ទាល់អំពីអំណរដែលកើតមាន នៅពេលមនុស្សត្រឡប់ទៅកាន់ព្រះវិញ ។
-
សូមពន្យល់ថា ព្រះយេស៊ូវបានប្រើរឿងកូនចៀមដែលបាត់ ប្រាក់កាក់ដែលបាត់ និងកូនប្រុសខ្ជះខ្ជាយដើម្បីតំណាងឲ្យមនុស្សដែល « វង្វេង » ដោយសារពួកគេមិនទទួលបានពរជ័យនៃដំណឹងល្អ ។ សូមអញ្ជើញកុមារឲ្យគិតពីមនុស្សដែលពួកគេស្គាល់ ដែលមិនបានទទួលពរជ័យទាំងនេះនៅក្នុងជីវិតរបស់ពួកគេ ។ តើពួកគេអាចធ្វើអ្វីខ្លះ ដើម្បីជួយដល់មនុស្សទាំងនេះឲ្យទទួលអារម្មណ៍ពីសេចក្ដីស្រឡាញ់របស់ព្រះវរបិតាសួគ៌ចំពោះពួកគេ ?
អ្នកគង្វាលសុភាពដោយ យ៉ុងស៊ុង គីម
ខ្ញុំអាចបង្ហាញសេចក្ដីស្រឡាញ់របស់ខ្ញុំដល់ព្រះវរបិតាសួគ៌ ដោយការមានអំណរគុណចំពោះពរជ័យទាំងឡាយរបស់ខ្ញុំ ។
ដំណើររឿងអំពីមនុស្សឃ្លង់ដប់នាក់អាចជារបៀបដ៏ល្អមួយ ដើម្បីបំផុសគំនិតដល់កុមារឲ្យបង្ហាញការដឹងគុណដល់ព្រះវរបិតាសួគ៌ចំពោះពរជ័យទាំងឡាយរបស់ពួកគេ ។
សកម្មភាពដែលអាចធ្វើបាន
-
សូមអានដំណើររឿងមនុស្សឃ្លង់ទាំងដប់រួមគ្នា ។ តើមនុស្សឃ្លង់ដែលបានថ្លែងអំណរគុណនោះ ត្រូវបានប្រទានពរចំពោះការដឹងគុណរបស់គាត់យ៉ាងដូចម្ដេច ? ហេតុអ្វីក៏វាសំខាន់ដើម្បីអរព្រះគុណដល់ព្រះសម្រាប់ពរជ័យទាំងឡាយរបស់យើង ?
-
សូមឲ្យកុមារសរសេររឿងដែលពួកគេមានអំណរគុណ ដែលចាប់ផ្ដើមពីអក្សរនីមួយៗនៃឈ្មោះរបស់ពួកគេ ។
-
សូមឲ្យកុមារសរសេរក្រដាសថ្លែងអំណរគុណទៅកាន់ព្រះវរបិតាសួគ៌ ចំពោះពរជ័យទាំងឡាយដែលទ្រង់បានប្រទានដល់ពួកគេ ។ ពួកគេអាចព្យួរក្រដាសទាំងឡាយក្បែរគ្រែគេងរបស់ពួកគេ ដើម្បីរំឭកពួកគេឲ្យបង្ហាញការដឹងគុណ នៅពេលពួកគេអធិស្ឋាន ។
យើងជឿថា ព្រះយេស៊ូវគ្រីស្ទគឺជាព្រះរាជបុត្រារបស់ព្រះ ។
តើបងប្អូនអាចប្រើដំណើររឿងរបស់ម៉ារា ម៉ាថា និងឡាសារ ដើម្បីជួយដល់កុមារឲ្យដឹង ដូចដែលម៉ាថាបានដឹងថា ព្រះយេស៊ូវគឺជា « ព្រះគ្រីស្ទជាព្រះរាជបុត្រានៃព្រះ » ដោយរបៀបណា ? ( យ៉ូហាន ១១:២៧ ) ។
សកម្មភាពដែលអាចធ្វើបាន
-
សូមសរសេរប្រយោគមួយចំនួនដែលបាននិយាយដោយមនុស្សនៅក្នុង យ៉ូហាន ១១ដាក់នៅលើក្ដារខៀន ។ សូមឲ្យកុមារកំណត់ថា តើនរណាបាននិយាយប្រយោគនីមួយៗនោះ ហើយសូមឲ្យពួកគេស្រាវជ្រាវក្នុង យ៉ូហាន ១១ ដើម្បីពិនិត្យមើលចម្លើយរបស់ពួកគេ ។ តើពួកគេនឹងមានអារម្មណ៍យ៉ាងណា ប្រសិនបើពួកគេគឺជាព្រះយេស៊ូវ ម៉ាថា ម៉ារា ឬឡាសារនោះ ? តើការជឿលើព្រះយេស៊ូវអាចជួយយើងដោយរបៀបណា នៅពេលយើងក្រៀមក្រំ ឬភ័យខ្លាច ?
-
សូមអានទីបន្ទាល់របស់ម៉ាថាដែលមាននៅក្នុង យ៉ូហាន ១១:២០–២៧ ។ ចូរសុំឲ្យកុមាររកមើលពាក្យ និងឃ្លានានាដែលបង្ហាញថា ម៉ាថាបានមានសេចក្ដីជំនឿលើព្រះយេស៊ូវគ្រីស្ទ ។ តើយើងអាចធ្វើអ្វីខ្លះ ដើម្បីមានសេចក្ដីជំនឿលើទ្រង់ ?
-
សូមជួយកុមារឲ្យទន្ទេញ យ៉ូហាន ១១:២៥ ។ សូមពន្យល់ថា មនុស្សគ្រប់រូបនឹងត្រូវរស់ឡើងវិញ ប៉ុន្ដែមានតែមនុស្សសុចរិតប៉ុណ្ណោះដែលនឹងទទួលបានជីវិតដ៏អស់កល្បជានិច្ច ហើយរស់នៅជាមួយនឹងព្រះវរបិតាសួគ៌ និងព្រះយេស៊ូវគ្រីស្ទម្ដងទៀត ។
លើកទឹកចិត្តឲ្យមានការរៀនសូត្រនៅឯគេហដ្ឋាន
សូមឲ្យក្រដាសមួយចំនួនមួយដល់កុមារ ដើម្បីពួកគេអាចប្រើវាសរសេរ ឬគូររូបភាពនៃរឿងអ្វីៗដែលពួកគេមានអំណរពេញក្នុងមួយសប្ដាហ៍នេះ ។
ការកែលម្អការបង្រៀនរបស់យើង
ការធ្វើសារឡើងវិញគឺជាគន្លឹះមួយសម្រាប់ការរៀនសូត្រ ។ កុមារនឹងទទួលបានប្រយោជន៍ច្រើនមកពីការស្ដាប់គោលការណ៍ដំណឹងល្អ ឬការធ្វើសកម្មភាពមួយច្រើនជាងម្ដង ។ សូមព្យាយាមធ្វើសកម្មភាពផ្សេងៗសាឡើងវិញតាមរបៀបជាច្រើនខុសៗគ្នា ។