« ថ្ងៃទី ២២–២៨ ខែ ឧសភា ។ យ៉ូសែប ស្ម៊ីធ—ម៉ាថាយ ១; ម៉ាថាយ ២៤–២៥; ម៉ាកុស ១២–១៣; លូកា ២១ ៖ ‹ កូនមនុស្សនឹងមក › » ចូរមកតាមខ្ញុំ—សម្រាប់អង្គការបឋមសិក្សា ៖ ព្រះគម្ពីរសញ្ញាថ្មី ឆ្នាំ ២០២៣ ( ឆ្នាំ ២០២២ )
« ថ្ងៃទី ២២–២៨ ខែ ឧសភា ។ យ៉ូសែប ស្ម៊ីធ—ម៉ាថាយ ១; ម៉ាថាយ ២៤–២៥; ម៉ាកុស ១២–១៣; លូកា ២១ » ចូរមកតាមខ្ញុំ—សម្រាប់អង្គការបឋមសិក្សា ៖ ឆ្នាំ ២០២៣
ការយាងមកជាលើកទីពីរ ដោយ ហារី អាន់ឌើរសិន
ថ្ងៃទី ២២–២៨ ខែ ឧសភា
យ៉ូសែប ស្ម៊ីធ—ម៉ាថាយ ១; ម៉ាថាយ ២៤–២៥; ម៉ាកុស ១២–១៣; លូកា ២១
« កូនមនុស្សនឹងមក »
សូមសញ្ជឹងគិតពីអ្វីដែលកុមារដែលបងប្អូនបង្រៀនត្រូវរៀនចេញពី យ៉ូសែប ស្ម៊ីធ—ម៉ាថាយ ១; ម៉ាថាយ ២៤–២៥; ម៉ាកុស ១២–១៣ និង លូកា ២១ ។ សូមសម្របសម្រួលគំនិតនានាសម្រាប់កុមារធំៗនៅក្នុងគម្រោងមេរៀននេះ សម្រាប់កុមារតូចៗ ហើយគំនិតនានាសម្រាប់កុមារតូចៗសម្រាប់កុមារធំៗវិញតាមការគួរ ។
អញ្ជើញឲ្យចែកចាយ
សូមយកវត្ថុ ឬរូបភាពមួយដែលទាក់ទងនឹងពាក្យប្រៀបប្រដូច ឬដំណើររឿងនៅក្នុងអំណានប្រចាំសប្តាហ៍នេះមកកាន់ថ្នាក់រៀន ( ដូចជា ប្រេងដើម្បីតំណាងឲ្យស្រ្តីព្រហ្មចារីយទាំងដប់នាក់ ឬកាក់ដើម្បីតំណាងឲ្យទេព្យកោសល្យ ឬប្រាក់ស្លឹងរបស់ស្រ្តីមេម៉ាយ ) ។ សូមឲ្យកុមារចែកចាយអ្វីដែលពួកគេដឹងអំពីពាក្យប្រៀបប្រដូច ឬដំណើររឿងនេះ ។
បង្រៀនគោលលទ្ធិ ៖ កុមារតូចៗ
ពីមុនព្រះយេស៊ូវយាងមកម្ដងទៀត ដំណឹងល្អនឹងត្រូវបានប្រកាសដល់ពិភពលោកទាំងមូលហើយ ។
ទីសម្គាល់មួយដែលថាព្រះយេស៊ូវនឹងយាងមកវិញក្នុងពេលឆាប់ៗគឺថា ដំណឹងល្អរបស់ទ្រង់នឹងត្រូវបានផ្សព្វផ្សាយនៅទូទាំងពិភពលោកនេះ ។ កុមារអាចជួយបំពេញការព្យាករនេះដោយការចែកចាយដំណឹងល្អ ។
សកម្មភាពដែលអាចធ្វើបាន
-
សូមបង្ហាញផែនទី ភូគោល ឬរូបភាពផែនដី ( សូមមើល សៀវភៅរូបភាពដំណឹងល្អ ល.រ ៣ ) ហើយសូមជួយកុមារឲ្យនិយាយថា « ដំណឹងល្អនេះ… ត្រូវបានប្រកាសដល់ពិភពលោកទាំងមូល » ( យ៉ូសែប ស៊្មីធ—ម៉ាថាយ ១:៣១ ) ។ ហេតុអ្វីបានជាព្រះវរបិតាសួគ៌មានព្រះទ័យចង់ឲ្យបុត្រាបុត្រីទាំងអស់របស់ទ្រង់ស្ដាប់ឮដំណឹងល្អរបស់ទ្រង់ ?
-
សូមអញ្ជើញកុមារដើរក្បួននៅមួយកន្លែង កាលដែលបងប្អូនច្រៀងជាមួយគ្នានូវបទចម្រៀងអំពីការចែកចាយដំណឹងល្អ ដូចជាបទ « ខ្ញុំចង់ក្លាយជាអ្នកផ្សព្វផ្សាយសាសនាពេលនេះ » ឬ « ហៅឲ្យបម្រើ » ( សៀវភៅចម្រៀងកុមារ ទំព័រ ៩០, ៩៤ ) ។
-
សូមបង្ហាញវីដេអូ « I’ll Go Where You Want Me to Go » ( នៅលើគេហទំព័រ ChurchofJesusChrist.org ) ។ កាលដែលកុមារមើល សូមជួយពួកគេឲ្យរាប់ពីរបៀបដែលពួកគេអាចចែកចាយដំណឹងល្អ ដែលពួកគេមើលឃើញនៅក្នុងវីដេអូនេះ ។ តើរបៀបចែកចាយដំណឹងល្អផ្សេងទៀតអ្វីខ្លះដែលពួកគេអាចគិតដល់ ?
ដំណឹងល្អនឹងផ្សព្វផ្សាយនៅទូទាំងពិភពលោកទាំងអស់ ។ រូបថតទទួលសិទ្ធិអនុញ្ញាតពី NASA Johnson Space Center ( មជ្ឈមណ្ឌលអវកាស ណាសា ចនសិន )
ខ្ញុំអាចប្រើអំណោយទានដែលព្រះបានប្រទានដល់ខ្ញុំ ។
កុមារតូចៗកំពុងស្វែងរកអំណោយទាន និងសមត្ថភាពនានារបស់ពួកគេ ។ សូមជួយពួកគេឲ្យយល់ថា អំណោយទាន និងសមត្ថភាពទាំងនេះបានមកពីព្រះវរបិតាសួគ៌ ។
សកម្មភាពដែលអាចធ្វើបាន
-
សូមយកកាក់បីបួនមកប្រើ នៅពេលបងប្អូនតំណាលពាក្យប្រៀបប្រដូចអំពីទេពកោសល្យដែលមាននៅក្នុង ម៉ាថាយ ២៥:១៤–៣០ ។ បងប្អូនអាចសុំឲ្យកុមារបីនាក់មកធ្វើជាតំណាងឲ្យពួកទាំងបីនាក់ ។ សូមពន្យល់ថា នៅក្នុងជំនាន់របស់ព្រះយេស៊ូវ ទេពកោសល្យ សំដៅទៅលើប្រាក់ ប៉ុន្ដែនាពេលសព្វថ្ងៃនេះ ទេពកោសល្យ អាចមានន័យថា អំណោយទាន និងសមត្ថភាពរបស់យើង ។
-
សូមឲ្យកុមារប្រាប់ពីរបៀបដែលឪពុកម្ដាយ បងប្អូន គ្រូបង្រៀន ឬមិត្តភក្ដិរបស់ពួកគេបានជួយដល់ពួកគេ ។ តើទេព្យកោសល្យអ្វីដែលមនុស្សទាំងនេះមាន ដែលជួយពួកគេឲ្យបម្រើដល់មនុស្សដទៃបាន ?
-
សូមសរសេរសំបុត្រខ្លីមួយទៅកាន់កុមារប្រាប់ដល់ពួកគេម្នាក់ៗអំពីអំណោយទាន ឬសមត្ថភាពនានាដែលបងប្អូនកត់សម្គាល់ឃើញក្នុងពួកគេ ។ កាលដែលបងប្អូនចែកចាយជាមួយកុមារម្នាក់ៗពីអំណោយទានដែលបងប្អូនមើលឃើញថាពួកគេមាន សូមលើកទឹកចិត្តពួកគេឲ្យអភិវឌ្ឍអំណោយទានរបស់ពួកគេ ហើយប្រើអំណោយទានទាំងនោះដើម្បីបម្រើដល់អ្នកដទៃ ។
ព្រះយេស៊ូវសព្វព្រះទ័យឲ្យខ្ញុំបម្រើដល់មនុស្សដទៃ ។
យើងបម្រើដល់ព្រះវរបិតាសួគ៌ និងព្រះយេស៊ូវ តាមរយៈការបម្រើដល់មនុស្សដែលនៅជុំវិញខ្លួនយើង ។ សូមជួយកុមារឲ្យពិចារណាពីរបៀបដែលពួកគេអាចបម្រើដល់អ្នកដទៃបាន ។
សកម្មភាពដែលអាចធ្វើបាន
-
សូមសង្ខេបពាក្យប្រៀបប្រដូចនៅក្នុង ម៉ាថាយ ២៥:៣៤–៤៦ ។ សូមជួយកុមារឲ្យយល់ថា នៅពេលយើងបម្រើដល់មនុស្សដទៃ នោះយើងក៏កំពុងបម្រើព្រះយេស៊ូវដែរ ។
-
សូមលើករូបភាពកុមារម្នាក់ដោយមានរូបភាពរបស់ព្រះយេស៊ូវលាក់នៅពីក្រោយរូបភាពនោះ ។ តើយើងអាចធ្វើអ្វីខ្លះដើម្បីបម្រើដល់កុមាររូបនេះ ? សូមដករូបភាពកុមារចេញ ហើយពន្យល់ថា នៅពេលយើងបម្រើដល់គ្នាទៅវិញទៅមក នោះយើងកំពុងតែបម្រើដល់ព្រះយេស៊ូវដែរ ។
-
សូមឲ្យកុមារគូររូបភាពខ្លួនគេកំពុងបម្រើដល់មនុស្សដទៃ តាមរបៀបដែលព្រះអង្គសង្គ្រោះបានរៀបរាប់នៅក្នុង ម៉ាថាយ ២៥:៣៥–៣៦ ។ សូមអញ្ជើញកុមារផ្សេងទៀតឲ្យទស្សន៍ទាយថា តើពួកគេគូររូបអ្វី ។
-
សូមឲ្យកុមារចែកចាយនូវបទពិសោធន៍នានា កាលនរណាម្នាក់បានបង្ហាញការបម្រើដូចជាព្រះគ្រីស្ទចំពោះពួកគេ ឬក្រុមគ្រួសាររបស់ពួកគេ ។
បង្រៀនគោលលទ្ធិ ៖ កុមារធំៗ
ពីមុនព្រះយេស៊ូវយាងមកម្ដងទៀត ដំណឹងល្អនឹងត្រូវបានប្រកាសដល់ពិភពលោកទាំងមូលហើយ ។
កុមារដែលបងប្អូនបង្រៀនអាចជួយប្រកាសដំណឹងល្អទៅកាន់ពិភពលោកទាំងមូល ពីមុនការយាងមកជាលើកទីពីររបស់ព្រះអង្គសង្គ្រោះបាន ។
សកម្មភាពដែលអាចធ្វើបាន
-
សូមឲ្យកុមារចែកចាយនូវពរជ័យផ្សេងៗដែលពួកគេបានទទួល ឬនឹងទទួល ដោយសារពួកគេគឺជាសមាជិកនៃសាសនាចក្ររបស់ព្រះគ្រីស្ទ ។ សូមអាន យ៉ូសែប ស៊្មីធ—ម៉ាថាយ ១:៣១ ជាមួយគ្នា ហើយសួរកុមារថា តើដំណឹងល្អនឹងប្រទានពរដល់បុត្រាបុត្រីរបស់ព្រះទូទាំងពិភពលោកនេះដោយរបៀបណា ។
-
សូមបង្ហាញផែនទីពិភពលោក ឬផែនទីប្រទេសរបស់បងប្អូនដល់កុមារ ហើយជួយពួកគេឲ្យរកមើលកន្លែងមួយចំនួនដែលសមាជិកគ្រួសារ ឬមិត្តភក្ដិម្នាក់បានផ្សព្វផ្សាយដំណឹងល្អនៅក្នុងបេសកកម្មមួយ ។
-
សូមឲ្យកុមារពីរបីនាក់រៀបចំឡើងមកចែកចាយនូវរបៀបដែលសមាជិកគ្រួសាររបស់ពួកគេ ឬដូនតារបស់ពួកគេបានស្គាល់ដំណឹងល្អ ។
-
សូមឲ្យកុមារម្នាក់សរសេរឈ្មោះនរណាម្នាក់ដែលគេអាចប្រាប់អំពីព្រះយេស៊ូវគ្រីស្ទដល់គាត់ ឬអញ្ជើញគាត់ឲ្យមកព្រះវិហារ ។ សូមឲ្យកុមារសរសេរនូវរឿងដែលពួកគេអាចធ្វើបានដើម្បីក្លាយជាអ្នកផ្សព្វផ្សាយសាសនានាពេលនេះផងដែរ ។
ខ្ញុំទទួលខុសត្រូវលើការប្រែចិត្តជឿលើព្រះយេស៊ូវគ្រីស្ទរបស់ខ្ញុំផ្ទាល់ ។
ពាក្យប្រៀបប្រដូចអំពីស្ដ្រីព្រហ្មចារីយដប់នាក់បង្រៀនថា យើងមិនអាចខ្ចីការប្រែចិត្តជឿលើព្រះអង្គសង្រ្គោះរបស់យើងពីមនុស្សដទៃបានឡើយ ។ តើបងប្អូនអាចជួយកុមារឲ្យទទួលយកទំនួលខុសត្រូវសម្រាប់ការប្រែចិត្តជឿផ្ទាល់ខ្លួនគេដោយរបៀបណា ?
សកម្មភាពដែលអាចធ្វើបាន
-
សូមឲ្យកុមារមករៀនដោយបានរៀបចំខ្លួនចែកចាយពីរបៀបដែលគាត់ ឬនាងបានរៀនអំពីពាក្យប្រៀបប្រដូចពីស្រ្តីព្រហ្មចារីយដប់នាក់នៅឯផ្ទះនាសប្តាហ៍នេះ ។
-
សូមគូររូបចង្កៀងប្រេងមួយនៅលើក្ដារខៀន ហើយសរសេរថា ទីបន្ទាល់ ។ សូមឲ្យក្រដាសមួយសន្លឹកដល់កុមារម្នាក់ៗដែលមានរៀងដូចជាតំណក់ប្រេងមួយតំណក់ ហើយសូមឲ្យកុមារម្នាក់ៗសរសេរនៅលើក្រដាសនោះនូវអ្វីមួយដែលគេនឹងធ្វើ ដើម្បីកាន់តែប្រែចិត្តជឿជាងមុនទៅលើព្រះអង្គសង្រ្គោះ ។ សូមបិទតំណក់ប្រេងរបស់ពួកគេនៅលើក្ដារខៀនជុំវិញចង្កៀងនោះ ។
-
សូមឲ្យកុមារជួយបងប្អូនធ្វើបញ្ជីនូវការណ៍នានាដែលត្រូវធ្វើដើម្បីរៀបចំទទួលភ្ញៀវពិសេសមួយរូប ។ តើការណ៍ទាំងនេះស្រដៀង ឬខុសគ្នាពីរបៀបដែលយើងអាចរៀបចំខ្លួនខាងវិញ្ញាណ ដើម្បីទទួលការយាងមកជាលើកទីពីររបស់ព្រះអង្គសង្គ្រោះដោយរបៀបណា ?
-
សូមសរសេរការណ៍នានាដែលមិនអាចខ្ចីបាននៅលើក្រដាសប្រាំចម្រៀក ។ សូមសរសេរការណ៍នានាដែលអាចខ្ចីបាននៅលើក្រដាសប្រាំចម្រៀកផ្សេងទៀត ។ សូមច្របល់ចម្រៀកក្រដាសទាំងនោះចូលគ្នា ហើយសូមឲ្យកុមាររៀបបែងចែកវាជាពីរក្រុមនេះវិញ ។ សូមអាន ម៉ាថាយ ២៥:១–១៣ រួមគ្នា ។ ហេតុអ្វីបានជាវាសំខាន់ក្នុងការមិនពឹងផ្អែកលើមនុស្សដទៃសម្រាប់ការប្រែចិត្តជឿលើព្រះយេស៊ូវគ្រីស្ទរបស់យើង ?
នៅក្នុងសេចក្តីជំនុំជម្រះចុងក្រោយ យើងនឹងទូលពីដំណើររឿងនៃជីវិតរបស់យើងថ្វាយព្រះអម្ចាស់ ។
បន្ទាប់ពីការរស់ឡើងវិញ ព្រះអម្ចាស់នឹងកាត់សេចក្ដីយើងដោយផ្អែកលើការគោរពប្រតិបត្តិរបស់យើងតាមបទបញ្ញត្តិទាំងឡាយរបស់ទ្រង់ ព្រមទាំងការទទួលយកពលិកម្មដ៏ធួនរបស់ទ្រង់ផងដែរ ។ ពាក្យប្រៀបប្រដូចអំពីប្រាក់ និងពាក្យប្រៀបប្រដូចអំពីសត្វចៀម និងពពែបង្រៀនយើងអំពីការជំនុំជម្រះចុងក្រោយនេះ ។
សកម្មភាពដែលអាចធ្វើបាន
-
សូមឲ្យសិស្សពាក់កណ្ដាលថ្នាក់អាន ម៉ាថាយ ២៥:១៤–៣០ ហើយឲ្យសិស្សពាក់កណ្ដាលថ្នាក់ទៀតអាន ម៉ាថាយ ២៥:៣១–៤៦ ។ សូមឲ្យក្រុមទាំងពីរសម្ដែងរឿងប្រៀបប្រដូចដល់សិស្សនៅក្នុងថ្នាក់ ។ តើព្រះអម្ចាស់កំពុងបង្រៀនយើងអ្វីខ្លះនៅក្នុងពាក្យប្រៀបប្រដូចទាំងនេះ ?
-
សូមឲ្យកុមារអាន ម៉ាថាយ ២៥:៣៥–៣៦ ជាដៃគូ ហើយធ្វើបញ្ជីរឿងមួយដែលពួកគេអាចធ្វើបាន ដើម្បីបង្ហាញសេចក្ដីស្រឡាញ់របស់គេចំពោះព្រះយេស៊ូវគ្រីស្ទ ។
លើកទឹកចិត្តឲ្យមានការរៀនសូត្រនៅឯគេហដ្ឋាន
សូមឲ្យកុមារចែកចាយនូវរបៀបដែលពួកគេអាចក្លាយជាអ្នកផ្សព្វផ្សាយសាសនាដ៏ល្អមួយរួបជាមួយនឹងក្រុមគ្រួសាររបស់ពួកគេ ហើយប្រាប់ក្រុមគ្រួសារគេអំពីមនុស្សដែលពួកគេអាចចែកចាយដំណឹងល្អជាមួយបាន ។
ការកែលម្អការបង្រៀនរបស់យើង
ស្ដាប់ ឬសម្ដែងរឿង ។ ដោយសារកុមារចូលចិត្តរឿងនិទាន សូមរកមើលរបៀបដើម្បីឲ្យពួកគេអាចចូលរួមសកម្មភាពនៅក្នុងរឿងនិទាននានាក្នុងព្រះគម្ពីរដែលបងប្អូនចែកចាយ ។ ពួកគេអាចកាន់រូបភាព ឬវត្ថុនានា គូររូបភាពសាច់រឿង សម្ដែងរឿង ឬជួយតំណាលរឿងបាន ។ សូមនិទានរឿងសាឡើងវិញដើម្បីជួយពួកគេឲ្យស្គាល់ពីសេចក្ដីលម្អិតដ៏សំខាន់ និងការបង្រៀនទាំងឡាយអំពីដំណឹងល្អ ។