« ថ្ងៃទី ៨–១៤ ខែ ឧសភា ។ ម៉ាថាយ ១៩–២០; ម៉ាកុស ១០; លូកា ១៨ ៖ ‹ តើនៅខ្វះអ្វីទៀត ? › » ចូរមកតាមខ្ញុំ—សម្រាប់អង្គការបឋមសិក្សា ៖ ព្រះគម្ពីរសញ្ញាថ្មីឆ្នាំ ២០២៣ ( ឆ្នាំ ២០២២ )
« ថ្ងៃទី ៨–១៤ ខែ ឧសភា ។ ម៉ាថាយ ១៩–២០; ម៉ាកុស ១០; លូកា ១៨ » ចូរមកតាមខ្ញុំ—សម្រាប់អង្គការបឋមសិក្សា ៖ ឆ្នាំ ២០២៣
ថ្ងៃទី ៨–១៤ ខែ ឧសភា
ម៉ាថាយ ១៩–២០; ម៉ាកុស ១០; លូកា ១៨
« តើនៅខ្វះអ្វីទៀត ? »
សូមអាន ម៉ាថាយ ១៩–២០; ម៉ាកុស ១០ និង លូកា ១៨ ដោយគិតដល់កុមារដែលបងប្អូនបង្រៀននៅក្នុងចិត្ត ។ សូមកត់ត្រារាល់ការបំផុសគំនិតនានាដែលបងប្អូនទទួលបាន ។ ការរៀបចំមេរៀនរបស់បងប្អូននឹងជួយដល់បងប្អូនឲ្យបង្រៀនកុមារនូវអ្វីដែលពួកគេត្រូវដឹងមកពីជំពូកទាំងនេះ ។
អញ្ជើញឲ្យចែកចាយ
សូមអញ្ជើញកុមារឲ្យចែកចាយអ្វីមួយដែលពួកគេចងចាំមកពីមេរៀនកាលពីសប្ដាហ៍មុន ។ សូមបង្ហាញរូបភាពដើម្បីជួយពួកគេឲ្យចងចាំ ។
បង្រៀនគោលលទ្ធិ ៖ កុមារតូចៗ
ព្រះវរបិតាសួគ៌សព្វព្រះទ័យឲ្យយើងរៀបការនៅក្នុងព្រះវិហារបរិសុទ្ធ ហើយមានក្រុមគ្រួសារដ៏នៅអស់កល្បជានិច្ច ។
តើកុមារដែលបងប្អូនបង្រៀនអាចទទួលបានប្រយោជន៍មកពីការរៀនសូត្រ អំពីគោលលទ្ធិនៃអាពាហ៍ពិពាហ៍ដ៏នៅអស់កល្បជានិច្ចបានយ៉ាងដូចម្ដេច ? វាអាចមានគុណប្រយោជន៍ចំពោះបងប្អូន ដើម្បីរំឭកពីសេចក្ដីពិតអំពីអាពាហ៍ពិពាហ៍នៅក្នុង « ក្រុមគ្រួសារ ៖ ការប្រកាសដល់ពិភពលោក » ( នៅលើគេហទំព័រChurchofJesusChrist.org ) ។
សកម្មភាពដែលអាចធ្វើបាន
-
សូមអាន ម៉ាកុស ១០:៦–៨ ដល់កុមារ ហើយសូមបង្ហាញរូបភាពគូស្វាមីភរិយាដែលបានរៀបការមួយគូ ។ សូមឲ្យកុមារចង្អុលទៅបុរស និងស្ដ្រី នៅពេលពួកគេឮបងប្អូនអានពាក្យ បុរស និង ស្ដ្រី ។ សូមពន្យល់ថា ព្រះវរបិតាសួគ៌សព្វព្រះទ័យឲ្យបុរសម្នាក់ និងស្ដ្រីម្នាក់រៀបការជាមួយនឹងគ្នា ( សូមមើល លោកុប្បត្តិ ១:២៧–២៨ ) ។
-
សូមបង្ហាញរូបភាពអំពីគ្រួសារ និងព្រះវិហារបរិសុទ្ធ ។ សូមអញ្ជើញកុមារឲ្យនិយាយអំពីអ្វីដែលពួកគេមើលឃើញនៅក្នុងរូបភាពទាំងនោះ ។ សូមពន្យល់ថា ព្រះវរបិតាសួគ៌សព្វព្រះទ័យឲ្យយើងបានផ្សារភ្ជាប់ជាមួយនឹងក្រុមគ្រួសាររបស់យើងនៅក្នុងព្រះវិហារបរិសុទ្ធ ដើម្បីឲ្យយើងអាចរស់នៅជាមួយនឹងគ្នាជារៀងរហូតតទៅ ។ សូមប្រុងប្រយ័ត្នចំពោះកុមារដែលមានឪពុកម្ដាយដែលមិនទាន់បានផ្សារភ្ជាប់នៅឡើយ ។
-
សូមច្រៀងនូវបទចម្រៀងអំពីក្រុមគ្រួសារដូចជាបទ « ក្រុមគ្រួសាររីករាយ » ( សៀវភៅចម្រៀងកុមារ ទំព័រ ១០៤ ) ។ សូមពិចារណាច្រៀងចម្រៀងនេះឲ្យបានច្រើនដង ។ សូមឲ្យកុមារចែកចាយពីរឿងសប្បាយៗដែលពួកគេបានធ្វើជាមួយនឹងក្រុមគ្រួសាររបស់ពួកគេ ។ ហេតុអ្វីពួកគេមានអំណរគុណចំពោះក្រុមគ្រួសាររបស់ពួកគេ ?
-
សូមច្រៀងចម្រៀងមួយអំពីព្រះវិហារបរិសុទ្ធ ដូចជាបទ « ខ្ញុំចូលចិត្តមើលព្រះវិហារបរិសុទ្ធ » ឬ « ក្រុមគ្រួសារអាចនៅជាមួយគ្នាជានិរន្តរ » ( សៀវភៅចម្រៀងកុមារ ទំព័រ ៩៩, ៩៨ ) ។ សូមឲ្យកុមារកាន់រូបភាពព្រះវិហារបរិសុទ្ធ ឬក្រុមគ្រួសារ ហើយឲ្យពួកគេលើករូបភាពរបស់ពួកគេឡើង នៅពេលពួកគេច្រៀងចំពាក្យ « ព្រះវិហារបរិសុទ្ធ » ឬ « ក្រុមគ្រួសារ » ។ សូមជួយកុមារឲ្យគិតពីហេតុផលដែលវាគឺជារឿងដ៏សំខាន់ដើម្បីរៀបការនៅក្នុងព្រះវិហារបរិសុទ្ធ ។
ព្រះយេស៊ូវស្រឡាញ់កុមារ ព្រោះ « នគរព្រះមានសុទ្ធតែមនុស្សដូចវារាល់គ្នា » ( ម៉ាកុស ១០:១៤ ) ។
ព្រះយេស៊ូវសព្វព្រះទ័យឲ្យកូនតូចៗមករកទ្រង់ ដើម្បីទ្រង់អាចប្រទានពរដល់ពួកគេ ។
ដំណើររឿងនេះផ្ដល់នូវឱកាសមួយដើម្បីជួយកុមារឲ្យមានអារម្មណ៍ថា ព្រះយេស៊ូវស្រឡាញ់ពួកគេខ្លាំងប៉ុណ្ណា ។
សកម្មភាពដែលអាចធ្វើបាន
-
សូមចែកចាយរឿងនៅក្នុង ម៉ាកុស ១០:១៣–១៦ជាសម្ដីរបស់បងប្អូនផ្ទាល់ ។ បងប្អូនក៏អាចចាក់បង្ហាញវីដេអូ « Suffer the Little Children to Come unto Me » ( នៅលើគេហទំព័រChurchofJesusChrist.org ) ផងដែរ ។ សូមជួយកុមារឲ្យគិតពីពេលដែលពួកគេបានទទួលអារម្មណ៍នូវសេចក្ដីស្រឡាញ់របស់ព្រះយេស៊ូវចំពោះពួកគេ ។ សូមថ្លែងទីបន្ទាល់របស់បងប្អូនទៅកាន់កុមារថា ព្រះយេស៊ូវស្រឡាញ់ពួកគេ ហើយសព្វព្រះទ័យប្រទានពរជ័យដល់ពួកគេ ។
-
សូមដាក់បង្ហាញរូបភាព ព្រះគ្រីស្ទ និងកូនក្មេង ( សៀវភៅរូបភាពដំណឹងល្អ ល.រ. ៤៧ ) ។ សូមជួយកុមារឲ្យនឹកស្រមៃអារម្មណ៍នៃការក្លាយជាក្មេងម្នាក់ ដែលកំពុងអង្គុយនៅក្បែរព្រះយេស៊ូវនៅក្នុងរូបភាពនោះ ។ សូមអញ្ជើញកុមារឲ្យចែកចាយនូវអារម្មណ៍របស់ពួកគេអំពីព្រះយេស៊ូវ ។
-
សូមឲ្យកុមារគូររូបភាពខ្លួនគេកំពុងទទួលការប្រសិទ្ធពរពីព្រះយេស៊ូវ ( សូមមើល ម៉ាកុស ១០:១៦ និងទំព័រសកម្មភាពសប្ដាហ៍នេះ ) ។
ប្រសិនបើខ្ញុំគោរពតាមបទបញ្ញត្តិទាំងឡាយ នោះខ្ញុំអាចទទួលបានជីវិតដ៏នៅអស់កល្បជានិច្ច ។
ព្រះយេស៊ូវបានបង្រៀនដល់អ្នកមានវ័យក្មេងម្នាក់ ដែលចង់ទទួលបានជីវិតដ៏នៅអស់កល្បជានិច្ច—ជាជីវិតមួយដូចជាព្រះវរបិតាសួគ៌—នោះគាត់ត្រូវគោរពតាមបទបញ្ញត្តិទាំងឡាយ ។
សកម្មភាពដែលអាចធ្វើបាន
-
សូមអានដំណើររឿងអំពីអ្នកមានវ័យក្មេងនៅក្នុង ម៉ាកុស ១០:១៧–២២ ទៅកាន់កុមារ ។ ( សូមមើលផងដែរ « ជំពូក ៤២ ៖ កំលោះអ្នកមាន » ដំណើររឿងព្រះគម្ពីរសញ្ញាថ្មីទំព័រ ១០៥–៦ ឬវីដេអូដូចគ្នានេះនៅលើគេហទំព័រ ChurchofJesusChrist.org ) ។ សូមឲ្យពួកគេស្ដាប់រកអ្វីដែលព្រះយេស៊ូវបានមានបន្ទូលទៅកាន់យុវជននេះឲ្យធ្វើ និងរបៀបដែលយុវជនរូបនេះបានឆ្លើយតបវិញ ។
-
សូមតំណាលរឿងមួយ ឬច្រើនអំពីកុមារដែលសុំពាក្យទូន្មាន ឬការដឹកនាំពីឪពុកម្ដាយរបស់ពួកគេ ប៉ុន្ដែបែរជាមិនបានធ្វើតាម ឬគោរពតាមពាក្យនោះទៅវិញ ។ តើមានរឿងមួយចំនួនអ្វីខ្លះដែលព្រះវរបិតាសួគ៌បង្គាប់ឲ្យយើងធ្វើ ? តើយើងមានអារម្មណ៍យ៉ាងណា នៅពេលយើងគោរពតាមបទបញ្ញត្តិទាំងឡាយរបស់ទ្រង់ ?
-
សូមចែកចាយបទពិសោធន៍ដែលបងប្អូនបានទទួលការបំផុសគំនិតផ្ទាល់ខ្លួនឲ្យធ្វើអ្វីមួយ ដើម្បីក្លាយខ្លួនជាមនុស្សដ៏ប្រសើរម្នាក់ ។
បង្រៀនគោលលទ្ធិ ៖ កុមារធំៗ
ព្រះវរបិតាសួគ៌សព្វព្រះទ័យឲ្យយើងរៀបការនៅក្នុងព្រះវិហារបរិសុទ្ធ ហើយមានក្រុមគ្រួសារដ៏នៅអស់កល្បជានិច្ច ។
រឿងដែលព្រះយេស៊ូវបានបង្រៀនអំពីអាពាហ៍ពិពាហ៍អាចជួយកុមារឲ្យទន្ទឹងរង់ចាំដល់អាពាហ៍ពិពាហ៍នៅក្នុងព្រះវិហារបរិសុទ្ធ និងចិញ្ចឹមបីបាច់គ្រួសារដ៏នៅអស់កល្បជានិច្ច ។
សកម្មភាពដែលអាចធ្វើបាន
-
សូមឲ្យកុមារម្នាក់អាន ម៉ាកុស ១០:៦–៨ ឲ្យឮៗ ។ សូមពន្យល់ថា នៅជាប់នឹង មានន័យថា « មិនឃ្លាតពីគ្នា » ឬ « នៅកៀកនឹង » អ្វីមួយ ។ ហេតុអ្វីបានជាវាសំខាន់ដែលស្វាមី និងភរិយាត្រូវនៅជាប់ជាមួយគ្នា ស្រឡាញ់គ្នាទៅវិញទៅមក ហើយធ្វើការជាដៃគូនោះ ?
-
សូមឲ្យកុមារជួយបងប្អូនគិតអំពីចម្លើយចំពោះសំណួរដូចជា « ហេតុអ្វីបានជាក្រុមគ្រួសារមានសារៈសំខាន់នៅក្នុងសាសនាចក្រ ? » ឬ « ហេតុអ្វីបានជាវាសំខាន់សម្រាប់បងប្អូនដើម្បីរៀបការនៅក្នុងព្រះវិហារបរិសុទ្ធ ? » សូមជួយពួកគេឲ្យស្វែងរកចម្លើយនៅក្នុងធនធានដូចជា ម៉ាកុស ១០:៦–៨; កូរិនថូស ទី១ ១១:១១; គោលលទ្ធិ និង សេចក្ដីសញ្ញា ៤២:២២; ១៣១:១–៤; ម៉ូសេ ៣:១៨, ២១–២៤ និង « ក្រុមគ្រួសារ ៖ ការប្រកាសដល់ពិភពលោក » ។
-
សូមច្រៀងចម្រៀងមួយបទអំពីក្រុមគ្រួសាររួមគ្នា ដូចជាបទ « ក្រុមគ្រួសារអាចនៅជាមួយគ្នាជានិរន្តរ » ( សៀវភៅចម្រៀងកុមារ ទំព័រ ៩៨ ) ។ សូមចែកចាយទីបន្ទាល់របស់បងប្អូនអំពីអាពាហ៍ពិពាហ៍ និងគ្រួសារដ៏អស់កល្បជានិច្ចជាមួយនឹងកុមារ ។ សូមឲ្យពួកគេចែកចាយទីបន្ទាល់របស់ពួកគេផងដែរ ។
ព្រះយេស៊ូវអាចជួយខ្ញុំឲ្យដឹងពីអ្វីដែលខ្ញុំត្រូវធ្វើដើម្បីអភិវឌ្ឍទៅមុខបាន ។
អ្នកមានវ័យក្មេងបានទៅរកព្រះយេស៊ូវ ហើយបានទទួលការណែនាំជាក់លាក់ដែលមានអត្ថន័យជាពិសេសចំពោះរូបគាត់ ។ តើបងប្អូនអាចបំផុសគំនិតដល់កុមារឲ្យស្វែងរកការដឹកនាំស្រដៀងគ្នានេះនៅក្នុងជីវិតរបស់ពួកគេផ្ទាល់ដោយរបៀបណា ?
សកម្មភាពដែលអាចធ្វើបាន
-
សូមឲ្យកុមារស្វែងរកខគម្ពីរមួយនៅក្នុង ម៉ាកុស ១០:១៧–២២ ដែលរៀបរាប់ពីរូបភាពនៅក្នុង គម្រោងមេរៀនសប្ដាហ៍នេះ នៅក្នុង ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ។ សូមពន្យល់ថា ការប្រឹក្សាដែលព្រះយេស៊ូវបានផ្ដល់ដល់កំលោះអ្នកមានរូបនេះគឺមានលក្ខណៈផ្ទាល់ខ្លួន ហើយយើងទាំងអស់គ្នាអាចទទួលបានការដឹកនាំផ្ទាល់ខ្លួនមកពីព្រះអម្ចាស់តាមរយៈព្រះវិញ្ញាណបាន ។
-
សូមអាន ម៉ាកុស ១០:១៧–២២ រួមគ្នា ។ សូមឲ្យកុមារសរសេរបទបញ្ញត្តិទាំងឡាយ ដែលព្រះអង្គសង្គ្រោះបានប្រាប់ទៅអ្នកមានវ័យក្មេងរូបនេះឲ្យធ្វើតាមនៅលើក្ដារខៀន ( សូមមើល ខទី ១៩ ) ។ តើព្រះយេស៊ូបានបង្គាប់ឲ្យគាត់ធ្វើអ្វីទៀត ? ( សូម មើល ខទី ២១ ) ។ សូមលើកទឹកចិត្តឲ្យកុមារគិតអំពីរឿងផ្សេងៗដែលពួកគេត្រូវចាប់ផ្ដើមធ្វើ ឬឈប់ធ្វើដើម្បីដើរតាមព្រះយេស៊ូវឲ្យបានកាន់តែប្រសើរឡើង ។ តើមានវិធីមួយចំនួនអ្វីខ្លះ ដែលយើងអាចរកឃើញអ្វីដែលព្រះយេស៊ូវសព្វព្រះទ័យឲ្យយើងធ្វើនោះ ?
លើកទឹកចិត្តឲ្យមានការរៀនសូត្រនៅឯគេហដ្ឋាន
សូមអញ្ជើញកុមារឲ្យបង្ហាញដល់ក្រុមគ្រួសារថា ពួកគេស្រឡាញ់ពួកគាត់ ប្រហែលដោយការសរសេរសារខ្លីមួយ ឬធ្វើការបម្រើដោយទង្វើសប្បុរសមួយ ។
ការកែលម្អការបង្រៀនរបស់យើង
យកចិត្តទុកដាក់ចំពោះកុមារ ។ តើកុមារនៅក្នុងថ្នាក់របស់បងប្អូនឆ្លើយតបនឹងសកម្មភាពរៀនសូត្រនានាយ៉ាងដូចម្ដេច ? ប្រសិនបើពួកគេមើលទៅមិនសូវចូលរួមក្នុងសកម្មភាពទេ នោះវាអាចជាពេលដែលត្រូវធ្វើសកម្មភាពផ្សេងទៀត ឬចេញដើរបន្ដិចដោយគារវភាព ។ ប៉ុន្ដែ ប្រសិនបើបងប្អូនកត់សម្គាល់ឃើញថា កុមារចូលរួម ហើយរៀនពីផ្នែកមួយចំនួននៃមេរៀននេះ សូមកុំមានអារម្មណ៍តានតឹងដើម្បីបន្ដទៅមុខ ដើម្បីប្រាកដថា បងប្អូនបានបង្រៀនគ្រប់ចំណុចមេរៀនទាំងអស់ឡើយ ។