« ថ្ងៃទី ២៩ ខែ ឧសភា–ថ្ងៃទី ៤ ខែ មិថុនា ។ ម៉ាថាយ ២៦; ម៉ាកុស ១៤; យ៉ូហាន ១៣ ៖ ‹ ដោយនូវការចងចាំ › » ចូរមកតាមខ្ញុំ—សម្រាប់ថ្នាក់បឋមសិក្សា ៖ ព្រះគម្ពីរសញ្ញាថ្មី ឆ្នាំ ២០២៣ ( ឆ្នាំ ២០២២ )
« ថ្ងៃទី ២៩ ខែ ឧសភា–ថ្ងៃទី ៤ ខែ មិថុនា ។ ម៉ាថាយ ២៦; ម៉ាកុស ១៤; យ៉ូហាន ១៣ » ចូរមកតាមខ្ញុំ—សម្រាប់អង្គការបឋមសិក្សា ៖ ឆ្នាំ ២០២៣
ដោយនូវការចងចាំដល់ខ្ ដោយ វ៉លធើរ រ៉េន
ថ្ងៃទី ២៩ ខែ ឧសភា–ថ្ងៃទី ៤ ខែ មិថុនា
ម៉ាថាយ ២៦; ម៉ាកុស ១៤; យ៉ូហាន ១៣
« ដោយនូវការចងចាំ »
កាលបងប្អូនអាន ម៉ាថាយ ២៦; ម៉ាកុស ១៤ និង យ៉ូហាន ១៣ សូមរកមើលគោលការណ៍ដែលបងប្អូនមានអារម្មណ៍ថានឹងផ្តល់ពរជ័យដល់កុមារដែលបងប្អូនបង្រៀន ។
អញ្ជើញឲ្យចែកចាយ
សូមបង្ហាញរូបភាពព្រឹត្តិការណ៍នានានៅក្នុងជំពូកទាំងនេះដូចជានៅក្នុង សៀវភៅរូបភាពដំណឹងល្អ ល.រ. ៥៤–៥៥ ហើយសូមអញ្ជើញកុមារឲ្យប្រាប់ពីអ្វីដែលកំពុងកើតឡើងនៅក្នុងរូបភាពទាំងនេះ ។
បង្រៀនគោលលទ្ធិ ៖ កុមារតូចៗ
ម៉ាថាយ ២៦:២៦–២៩; ម៉ាកុស ១៤:២២–២៤
ពិធីសាក្រាម៉ង់ជួយខ្ញុំឲ្យគិតអំពីព្រះយេស៊ូវ ។
សូមជួយកុមារឲ្យយល់ថា ការទទួលទានសាក្រាម៉ង់គឺជាឱកាសមួយ ដើម្បីចងចាំអ្វីដែលព្រះយេស៊ូវបានធ្វើសម្រាប់យើង ។
សកម្មភាពដែលអាចធ្វើបាន
-
សូមសង្ខេបដំណើររឿងព្រះយេស៊ូវតាំងពិធីសាក្រាម៉ង់ឡើង ។ បងប្អូនអាចប្រើ « ជំពូក ៤៩ ៖ ពីធីសាក្រាម៉ង់លើកដំបូង » ( នៅក្នុង ដំណើររឿងព្រះគម្ពីរសញ្ញាថ្មី ទំព័រ ១២៤–២៦ ឬ វីដេអូដូចគ្នានេះនៅលើគេហទំព័រនៅលើគេហទំព័រ ChurchofJesusChrist.org ) ឬវីដេអូ « Sacrament » ( ChurchofJesusChrist.org ) ។ តើហេតុអ្វីយើងទទួលទានសាក្រាម៉ង់ ? សូមជួយកុមារឲ្យយល់ថា យើងរំឭកចាំដល់ព្រះយេស៊ូវនៅអំឡុងពេលសាក្រាម៉ង់ ។
-
សូមបង្ហាញកុមារនូវដុំនំបុ័ង និងពែងទឹក ។ សូមសួរកុមារថា តើពួកគេដឹងថានំប៉័ង និងទឹកក្នុងពិធីសាក្រាម៉ង់តំណាងឲ្យអ្វីដែរឬទេ ។ សូមពន្យល់ថា សាក្រាម៉ង់ទាំងនេះជួយយើងឲ្យរំឭកចាំថា ព្រះយេស៊ូវបានសុគតជំនួសយើង ហើយបានមានព្រះជន្មឡើងវិញពីការសុគត ។
-
សូមឲ្យកុមារបិទភ្នែករបស់គេ ហើយគិតដល់នរណាម្នាក់ដែលពួកគេស្រឡាញ់ រួចហើយស្នើសុំឲ្យពួកគេប្រាប់បងប្អូនអំពីបុគ្គលនោះ ។ សូមឲ្យកុមារបិទភ្នែករបស់គេម្ដងទៀត ហើយគិតដល់ព្រះអង្គសង្គ្រោះ រួចហើយចែកចាយអ្វីៗដែលពួកគេដឹងអំពីទ្រង់ ។ សូមលើកទឹកចិត្តពួកគេឲ្យគិតអំពីព្រះយេស៊ូវអំឡុងពេលពិធីសាក្រាម៉ង់រាល់សប្ដាហ៍ ។
-
សូមឲ្យកុមារបង្ហាញអ្វីដែលពួកគេអាចធ្វើបាន ដើម្បីរំឭកចាំដល់ព្រះយេស៊ូវ ហើយមានគារវភាពអំឡុងពិធីសាក្រាម៉ង់ ។ សូមជួយកុមារឲ្យធ្វើកូនសៀវភៅមួយដែលមានពិពណ៌នានៅលើទំព័រសកម្មភាពនាសប្តាហ៍នេះ ហើយប្រើកូនសៀវភៅនេះដើម្បីជួយពួកគេឲ្យគិតអំពីព្រះយេស៊ូវនៅអំឡុងពេលសាក្រាម៉ង់ ។ ឬសូមឲ្យពួកគេស្វែងរករូបភាពព្រះយេស៊ូវមួយចំនួននៅក្នុង ទស្សនាវដ្តីសាសនាចក្រ ហើយយកវាមកបង្កើតរូបផ្គុំ ដែលពួកគេអាចមើលនៅអំឡុងពេលសាក្រាម៉ង់បាន ។
ខ្ញុំអាចស្រឡាញ់អ្នកដទៃដូចជាព្រះយេស៊ូវបានស្រឡាញ់ដែរ ។
ព្រះយេស៊ូវបានបង្ហាញសេចក្តីស្រឡាញ់របស់ទ្រង់ តាមរយៈការយកចិត្តទុកដាក់ចំពោះអស់អ្នកដែលនៅជិតទ្រង់ ។ តើកុមារដែលបងប្អូនបង្រៀនមានឱកាសអ្វីខ្លះ ដើម្បីបង្ហាញសេចក្តីស្រឡាញ់របស់ពួកគេចំពោះអ្នកដទៃ ?
សកម្មភាពដែលអាចធ្វើបាន
-
សូមបង្ហាញរូបភាពនៃដំណើររឿងដែលកុមារបានរៀននៅឆ្នាំនេះ នៅពេលព្រះយេស៊ូវបានបង្ហាញសេចក្តីស្រឡាញ់របស់ទ្រង់ចំពោះអ្នកដទៃ ( សូមមើលគម្រោងមេរៀនចាស់ៗនៅក្នុង ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ) ។ សូមអាន យ៉ូហាន ១៣:៣៤–៣៥ ហើយជួយកុមារឲ្យអានឃ្លា « … ត្រូវឲ្យស្រឡាញ់គ្នា ដូចជាខ្ញុំបានស្រឡាញ់អ្នករាល់គ្នាដែរ » ។ តើយើងអាចបង្ហាញសេចក្តីស្រឡាញ់របស់យើងចំពោះគ្រួសារ និងមិត្តភក្តិរបស់យើងយ៉ាងដូចម្តេច?
-
សូមអញ្ជើញកុមារម្នាក់ឲ្យកាន់រូបភាពរបស់ព្រះអង្គសង្រ្គោះ កាលដែលសិស្សក្នុងថ្នាក់ច្រៀងបទចម្រៀងអំពីសេចក្តីស្រឡាញ់របស់ព្រះអង្គសង្រ្គោះ ដូចជាបទ « ចូរឲ្យអ្នកស្រឡាញ់គ្នា » ( សៀវភៅចម្រៀងកុមារ ទំព័រ ៧៤ ) ។ សូមចែករូបបេះដូងក្រដាសឲ្យសិស្ស ហើយអញ្ជើញពួកគេគូររូបរបស់ពួកគេកំពុងធ្វើអ្វីមួយ ដែលបង្ហាញសេចក្តីស្រឡាញ់ចំពោះមនុស្សដទៃទៀត ។
បង្រៀនគោលលទ្ធិ ៖ កុមារធំៗ
ម៉ាថាយ ២៦:២៦–២៩; ម៉ាកុស ១៤:២២–២៤
ពិធីសាក្រាម៉ង់ជួយខ្ញុំឲ្យរំឭកចាំដល់ព្រះយេស៊ូវគ្រីស្ទ និងពលិកម្មរបស់ទ្រង់សម្រាប់ខ្ញុំ ។
តើបងប្អូនអាចជួយកុមារឲ្យមានបទពិសោធន៍ដ៏កាន់តែមានអត្ថន័យអំពីពិធីសាក្រាម៉ង់យ៉ាងដូចម្ដេច ?
សកម្មភាពដែលអាចធ្វើបាន
-
សូមអញ្ជើញកុមារឲ្យប្ដូរវេនគ្នាអានខគម្ពីរនៅក្នុង ម៉ាថាយ ២៦:២៦–២៩ ឬ ម៉ាកុស ១៤:២២–២៤ ( សូមមើលផងដែរ ការបកប្រែដោយ យ៉ូសែប ស្ម៊ីធ ម៉ាកុស ១៤:២០–២៤ [ នៅក្នុងការបកប្រែដោយ យ៉ូសែប ស្ម៊ីធ ] ) និង គោលលទ្ធិ និង សេចក្តីសញ្ញា ២០:៧៥–៧៩ ។ តើពាក្យ និងគំនិតអ្វីខ្លះដែលស្រដៀងគ្នានៅក្នុងវគ្គបទគម្ពីរទាំងពីរនេះ ?
-
សូមសួរកុមារថា តើពួកគេត្រូវធ្វើអ្វីខ្លះដើម្បីជួយខ្លួនគេឲ្យគិតអំពីព្រះយេស៊ូវអំឡុងពិធីសាក្រាម៉ង់ ។ សូមជួយពួកគេឲ្យស្វែងរកបទគម្ពីរ ឬពាក្យពេចន៍មកពីទំនុកតម្កើងនៃពិធីសាក្រាម៉ង់ ដែលពួកគេអាចអានអំឡុងពិធីសាក្រាម៉ង់បាន រួចហើយសរសេរវានៅលើកាតមួយដែលកុមារអាចបើកទៅនៅពេលក្រោយ ពេលពួកគេទទួលទានសាក្រាម៉ង់ ។ សូមច្រៀងចម្រៀងទាំងនេះពីរបីជាមួយនឹងកុមារ ( សូមមើល ទំនុកតម្កើង ល.រ. ៩៩–១១៨ ) ។
រូបភាពកុមារទទួលទានសាក្រាម៉ង់ពិធីសាក្រាម៉ង់ជួយយើងឲ្យចងចាំដល់ព្រះយេស៊ូវគ្រីស្ទ និងពលិកម្មរបស់ទ្រង់សម្រាប់ខ្ញុំ ។
-
សូមសរសេរឃ្លាគន្លឹះមកពីការអធិស្ឋានអំឡុងពិធីសាក្រាម៉ង់នៅលើក្ដារខៀន ហើយជួយកុមារឲ្យទន្ទេញវាឲ្យចាំ ។ តើឃ្លាទាំងនេះមានន័យយ៉ាងដូចម្តេច ? ហេតុអ្វីវាមានសារៈសំខាន់ដើម្បីរំឭកសេចក្តីសញ្ញានៃពិធីបុណ្យជ្រមុជទឹករបស់យើងជារៀងរាល់សប្តាហ៍ ?
-
សូមឲ្យអ្នកកាន់បព្វជិតភាពអើរ៉ុនម្នាក់ប្រាប់កុមារអំពីបទពិសោធន៍របស់គាត់ក្នុងការរៀបចំ ប្រទានពរ ឬចែកសាក្រាម៉ង់ ។ តើអ្វីទៅដែលជួយគាត់ឲ្យរៀបចំធ្វើការណ៍នេះ ? តើគាត់មានអារម្មណ៍យ៉ាងណា កាលគាត់ធ្វើយ៉ាងនោះ ? តើនំប៉័ង និងទឹករំឭកគាត់អំពីព្រះអង្គសង្គ្រោះដោយរបៀបណា ?
-
សូមឲ្យកុមារដែលបានជ្រមុជទឹករួចហើយឲ្យឡើងចែកចាយអ្វីដែលពួកគេចងចាំអំពីពិធីបុណ្យជ្រមុជទឹករបស់ពួកគេ ។ តើពួកគេបានមានអារម្មណ៍បែបណាខ្លះ ? តើសេចក្តីសញ្ញាអ្វីដែលពួកគេបានធ្វើ ? ( សូមមើល ម៉ូសាយ ១៨:៨–១០ ) ។ សូមប្រាប់ពួកគេថា រាល់សប្ដាហ៍ពេលយើងទទួលទានសាក្រាម៉ង់ នោះវាអាចដូចជាការទទួលបុណ្យជ្រមុជទឹកម្ដងទៀតដូច្នោះដែរ—យើងអាចត្រូវបានអភ័យទោសឲ្យចំពោះអំពើបាបរបស់យើង ហើយយើងរំឭកសេចក្ដីសញ្ញារបស់យើងឡើងវិញ ។
ព្រះយេស៊ូវគ្រីស្ទបានបង្ហាញខ្ញុំពីរបៀបដើម្បីបម្រើដល់អ្នកដទៃ ។
ដំណើររឿងរបស់ព្រះអង្គសង្រ្គោះលាងជើងឲ្យពួកសិស្សរបស់ទ្រង់ អាចបំផុសគំនិតដល់កុមារដែលបងប្អូនបង្រៀនឲ្យបម្រើមនុស្សនៅជិតពួកគេដោយក្តីស្រឡាញ់ ។
សកម្មភាពដែលអាចធ្វើបាន
-
មុនពីរបីថ្ងៃ សូមឲ្យកុមារម្នាក់អាន យ៉ូហាន ១៣:៤–៩ ហើយចែកចាយដំណើររឿងនេះជាមួយសិស្សក្នុងថ្នាក់ចេញពីទស្សនវិស័យរបស់ពេត្រុស ។ តើព្រះអង្គសង្រ្គោះព្យាយាមបង្រៀនអ្វីដល់ពេត្រុស និងពួកសាវករបស់ទ្រង់ផ្សេងទៀត ? កុមារអាចនិយាយអំពីអ្វីដែលពួកគេបានរៀនចេញពីដំណើររឿងនេះអំពីព្រះយេស៊ូវគ្រីស្ទ ។ តើយើងបានរៀនអ្វីខ្លះអំពីការបម្រើដល់អ្នកដៃ ?
-
សូមអាន យ៉ូហាន ១៣:១២–១៧ រួមគ្នា ។ សូមឲ្យកុមារសរសេរអំពីគ្រាដែលព្រះអង្គសង្រ្កោះបានបម្រើមនុស្សដទៃ ។ សូមលើកទឹកចិត្តពួកគេឲ្យរួមបញ្ចូលអ្វីដែលពួកគេរៀនចេញពីគំរូរបស់ទ្រង់ ។ ប្រសិនបើពួកគេត្រូវការជំនួយ នោះពួកគេអាចរកមើលឧទាហរណ៍ទាំងនេះនៅក្នុងវីដេអូ « Christlike Attributes » ( នៅលើគេហទំព័រ ChurchofJesusChrist.org ) ។ សូមឲ្យពួកគេចែកចាយអ្វីដែលពួកគេបានសរសេរជាមួយកុមារផ្សេងទៀត ។
ពួកសិស្សរបស់ព្រះយេស៊ូវគ្រីស្ទស្រឡាញ់អ្នកដទៃដូចជាទ្រង់ស្រឡាញ់ដែរ ។
នៅពេលយើងបានទទួលបុណ្យជ្រមុជទឹក នោះយើងចុះសេចក្តីសញ្ញាដើម្បីក្លាយជាសិស្សរបស់ព្រះយេស៊ូវគ្រីស្ទ ។ នៅក្នុង យ៉ូហាន ១៣:៣៤–៣៥ ព្រះអង្គសង្រ្គោះបានពិពណ៌នាពីរបៀប ដែលយើងអាចបង្ហាញថាយើងជាសិស្សរបស់ទ្រង់បាន ។
សកម្មភាពដែលអាចធ្វើបាន
-
សូមសរសេរនៅលើក្តារខៀនថា ត្រូវ គ្នា ដូចជាខ្ញុំបាន អ្នករាល់គ្នាដែរ ( យ៉ូហាន ១៣:៣៤ ) ។ សូមអញ្ជើញកុមារឲ្យរកមើលនៅក្នុងព្រះគម្ពីរ ហើយបំពេញចន្លោះនេះ ។ តើមានកិច្ចការអ្វីផ្សេងទៀតដែលយើងអាចធ្វើបាន ដើម្បីបង្ហាញថាយើងជាសិស្សរបស់ព្រះគ្រីស្ទ ? កុមារអាចគិតពីពាក្យផ្សេងទៀតដែលអាចបំពេញប្រយោគនេះនៅលើក្តារខៀនបាន ដូចជា បម្រើ និង បានបម្រើ ឬ បង្រៀន និង បានបង្រៀន ។
-
សូមអញ្ជើញកុមារឲ្យអាន យ៉ូហាន ១៣:៣៥ ហើយគិតពីមនុស្សដែលពួកគេស្គាល់ដែលជាគំរូនៃសិស្សរបស់ព្រះយេស៊ូវគ្រីស្ទ ។ សូមស្នើសុំឲ្យពួកគេចែកចាយពីរបៀបដែលបុគ្គលទាំងនេះ បង្ហាញសេចក្តីស្រឡាញ់ចំពោះអ្នកដទៃដូចជាព្រះអង្គសង្រ្គោះបានធ្វើដែរ ។
លើកទឹកចិត្តឲ្យមានការរៀនសូត្រនៅឯគេហដ្ឋាន
សូមអញ្ជើញកុមារឲ្យចែកចាយជាមួយក្រុមគ្រួសាររបស់ពួកគេនូវអ្វីមួយដែលពួកគេនឹងធ្វើ ដោយសារតែអ្វីដែលពួកគេបានរៀននៅក្នុងថ្នាក់ ។ ឧទាហរណ៍ ពួកគេអាចបង្ហាញពីរបៀបដែលពួកគេនឹងចងចាំព្រះយេស៊ូវគ្រីស្ទនៅអំឡុងពេលសាក្រាម៉ង់ ។
ការកែលម្អការបង្រៀនរបស់យើង
ថ្លែងទីបន្ទាល់ទៅកាន់សិស្សរបស់បងប្អូន ។ ទីបន្ទាល់នោះអាចសាមញ្ញដូចជា « ខ្ញុំដឹងថា ព្រះវរបិតាសួគ៌ស្រឡាញ់ប្អូនៗម្នាក់ៗ » ឬ « ខ្ញុំមានអារម្មណ៍ល្អក្នុងខ្លួន កាលខ្ញុំរៀនអំពីព្រះយេស៊ូវគ្រីស្ទ » ។