« ថ្ងៃទី ១២–១៨ ខែ មិថុនា ។ លូកា ២២; យ៉ូហាន ១៨ ៖ ‹ កុំតាមចិត្តទូលបង្គំឡើយ សូមតាមតែព្រះហឫទ័យទ្រង់វិញ › » ចូរមកតាមខ្ញុំ—សម្រាប់អង្គការបឋមសិក្សា ៖ ព្រះគម្ពីរសញ្ញាថ្មី ឆ្នាំ ២០២៣ ( ឆ្នាំ ២០២២ )
« ថ្ងៃទី ១២–១៨ ខែ មិថុនា ។ លូកា ២២; យ៉ូហាន ១៨ » ចូរមកតាមខ្ញុំ—សម្រាប់អង្គការបឋមសិក្សា ៖ ឆ្នាំ ២០២៣
សួនច្បារគែតសេម៉ានី ដោយ ឌេរេក ហិចស្ទេដ
ថ្ងៃទី ១២–១៨ ខែ មិថុនា
លូកា ២២; យ៉ូហាន ១៨
« កុំតាមទូលបង្គំឡើយ សូមតាមតែព្រះហឬទ័យទ្រង់វិញ »
ការរៀនចេញពី លូកា ២២ និង យ៉ូហាន ១៨ ជាមួយកុមារគឺជាឱកាសមួយ ដើម្បីជួយពួកគេឲ្យដុសខាត់សេចក្តីស្រឡាញ់របស់ពួកគេសម្រាប់ព្រះយេស៊ូវគ្រីស្ទ និងសេចក្តីជំនឿរបស់ពួកគេលើទ្រង់ ។ សូមពិចារណាពីរបៀបដែលបងប្អូនអាចធ្វើកិច្ចការនេះប្រកបដោយការអធិស្ឋាន ។
អញ្ជើញឲ្យចែកចាយ
សូមបង្ហាញរូបភាពពីព្រឹត្តិការណ៍នានានៅក្នុងជំពូកទាំងនេះ ដូចជា ព្រះគ្រីស្ទនៅក្នុងសួនច្បារគែតសេម៉ានី ( សៀវភៅរូបភាពដំណឹងល្អ ល.រ. ៥៦ ) និងរូបភាពនៅក្នុង ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ។ សូមអញ្ជើញកុមារឲ្យប្រាប់ពីអ្វីដែលកំពុងកើតឡើងនៅក្នុងរូបភាពនេះ ។
បង្រៀនគោលលទ្ធិ ៖ កុមារតូចៗ
ព្រះយេស៊ូវបានរងទុក្ខសម្រាប់ខ្ញុំ ដោយសារទ្រង់ស្រឡាញ់ខ្ញុំ ។
សូមពិចារណាពីរបៀបដែលបងប្អូនអាចជួយកុមារឲ្យមានអារម្មណ៍ពីសេចក្ដីស្រឡាញ់របស់ព្រះយេស៊ូវដែលមានសម្រាប់ពួកគេ កាលបងប្អូនពិភាក្សាពីដំណើររឿងនៃការរងទុក្ខរបស់ទ្រង់នៅសួនច្បារគែតសេម៉ានី ។
សកម្មភាពដែលអាចធ្វើបាន
-
សូមប្រាប់ដំណើររឿងពី លូកា ២២:៣៩–៤៦ ដល់កុមារ ប្រហែលដោយការប្រើ « ជំពូក ៥១ ៖ ព្រះយេស៊ូវរងទុក្ខនៅក្នុងសួនច្បារគែតសេម៉ានី » ( នៅក្នុង ដំណើររឿងព្រះគម្ពីរសញ្ញាថ្មីទំព័រ ១២៩–៣២ ឬវីដេអូដូចគ្នានេះនៅលើគេហទំព័រ ChurchofJesusChrist.org ) ។ សូមពន្យល់ថា ព្រះយេស៊ូវបានទទួលអារម្មណ៍នូវអស់ទាំងការឈឺចាប់ និងទុក្ខសោកដែលមនុស្សគ្រប់រូបធ្លាប់បានមាន ។ សូមសួរកុមារពីអ្វីដែលអាចធ្វើឲ្យមនុស្សម្នាក់មានអារម្មណ៍សោកសៅ ឈឺចាប់ ឬមិនសប្បាយចិត្ត ។ សូមថ្លែងទីបន្ទាល់ថា ព្រះយេស៊ូវអាចជួយយើងឲ្យមានអារម្មណ៍ល្អប្រសើរវិញ នៅពេលយើងមានអារម្មណ៍ទាំងនោះ ។
-
សូមហុចរូបព្រះអង្គសង្រ្គោះនៅក្នុងសួនច្បារគែតសេម៉ានីទៅជុំវិញថ្នាក់ ( ដូចជារូបភាពមួយដែលមាននៅក្នុង គម្រោងមេរៀនសប្តាហ៍នេះ នៅក្នុង ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ) ។ កាលដែលកុមារម្នាក់កាន់រូបភាពនេះ សូមនិយាយថា « ព្រះយេស៊ូវបានរងទុក្ខដោយសារតែទ្រង់ស្រឡាញ់ [ ឈ្មោះរបស់កុមារ ] » ។ សូមអញ្ជើញកុមារឲ្យអានតាមពាក្យទាំងនេះជាមួយបងប្អូន ។
-
សូមច្រៀងចម្រៀងមួយបទជាមួយកុមារអំពីសេចក្តីស្រឡាញ់របស់ព្រះយេស៊ូវគ្រីស្ទ ដូចជាបទ « ខ្ញុំស្គាល់ក្តីស្នេហ៍ព្រះសង្គ្រោះ » ( សៀវភៅចម្រៀងកុមារ ទំព័រ ៤២–៤៣ ) ។ សូមជួយពួកគេឲ្យគិតពីរបៀបដែលពួកគេបានទទួលអារម្មណ៍នៃសេចក្តីស្រឡាញ់របស់ព្រះយេស៊ូវ ។
ខ្ញុំអាចអធិស្ឋាននៅពេលខ្ញុំត្រូវការជំនួយ ។
នៅពេលព្រះយេស៊ូវបានអធិស្ឋាននៅក្នុងសួនច្បារគែតសេម៉ានី នោះមានទេវតាមួយអង្គបានលេចមកដើម្បីចម្រើនកម្លាំងដល់ទ្រង់ ។ តើបងប្អូនអាចជួយកុមារដែលបងប្អូនបង្រៀនឲ្យយល់ថា ពួកគេក៏អាចអធិស្ឋានទៅកាន់ព្រះវរបិតាសួគ៌ដើម្បីទូលសូមកម្លាំងបានផងដែរយ៉ាងដូចម្តេច ?
សកម្មភាពដែលអាចធ្វើបាន
-
សូមសង្ខេប លូកា ២២:៤១–៤៣ សម្រាប់កុមារ ។ សូមចែកចាយបទពិសោធន៍ដែលបងប្អូនបានអធិស្ឋានសូមជំនួយ ហើយព្រះវរបិតាសួគ៌បានពង្រឹងបងប្អូនតាមរយៈព្រះវិញ្ញាណបរិសុទ្ធ ឬតាមរយៈការបញ្ជូននរណាម្នាក់ឲ្យមកជួយបងប្អូន ។
-
នៅលើចម្រៀកក្រដាស សូមសរសេរអ្វីដែលយើងអាចពោលពាក្យក្នុងការអធិស្ឋានបាន ដូចជា « ឱព្រះវរបិតាសួគ៌ » « ទូលបង្គំសូមអរព្រះគុណទ្រង់ » « ទូលបង្គំសូមឲ្យទ្រង់ » និង « នៅក្នុងព្រះនាមនៃព្រះយេស៊ូវគ្រីស្ទ អាម៉ែន » ។ សូមដាក់ក្រដាសទាំងនោះនៅលើឥដ្ឋតាមលំដាប់លំដោយព្រាវៗ ហើយសូមជួយកុមារឲ្យតម្រៀបពាក្យទាំងនោះតាមលំដាប់លំដោយ ដែលពួកគេអាចពោលពាក្យទាំងនោះនៅក្នុងការអធិស្ឋានបាន ។ តើយើងអាចអរព្រះគុណដល់ព្រះវរបិតាសួគ៌សម្រាប់អ្វីខ្លះ ? តើមានអ្វីខ្លះទៀតដែលយើងអាចទូលទៅទ្រង់បាន ? សូមថ្លែងទីបន្ទាល់ថា កុមារអាចអធិស្ឋានទៅកាន់ព្រះវរបិតាសួគ៌នៅគ្រប់ទីកន្លែង និងនៅគ្រប់ ពេលវេលា ។
ព្រះគ្រីស្ទកំពុងអធិស្ឋាននៅក្នុងសួនច្បារគែតសេម៉ានី ដោយ ហែរម៉ាន់ ក្លេមិនហ្ស៍
បង្រៀនគោលលទ្ធិ ៖ កុមារធំៗ
នៅក្នុងសួនច្បារគែតសេម៉ានី ព្រះយេស៊ូវគ្រីស្ទបានលើកដាក់មកលើព្រះអង្គទ្រង់នូវអំពើបាប និងការឈឺចាប់របស់ខ្ញុំ ។
ការដឹងអំពីអ្វីដែលព្រះយេស៊ូវបានធ្វើសម្រាប់យើងនៅក្នុងសួនច្បារគែតសេម៉ានី អាចជួយកុមារឲ្យប្រែចិត្តពីអំពើបាបរបស់ពួកគេ ហើយងាកទៅរកព្រះអង្គសង្គ្រោះ នៅពេលពួកគេជួបនឹងឧបសគ្គពិបាកផ្សេងៗ ។
សកម្មភាពដែលអាចធ្វើបាន
-
សូមឲ្យកុមារអាន លូកា ២២:៣៩–៤៦ ហើយរកមើលពាក្យ ឬឃ្លានានាដែលពិពណ៌នាអំពីអារម្មណ៍ដែលព្រះយេស៊ូវបានទទួលនៅក្នុងសួនច្បារគែតសេម៉ានី ។ តើព្រះយេស៊ូវបានជួបបទពិសោធន៍អ្វីខ្លះ ដែលបានបណ្ដាលឲ្យទ្រង់មានអារម្មណ៍របៀបនេះ ? ( សូមមើល គោលលទ្ធិ និង សេចក្តីសញ្ញា ១៩:១៦–១៩ ) ។ សូមផ្ដល់ឱកាសឲ្យកុមារចែកចាយអារម្មណ៍របស់ពួកគេអំពីព្រះយេស៊ូវ និងពលិកម្មរបស់ទ្រង់សម្រាប់យើង ។
-
សូមឲ្យកុមារចែកចាយពីគ្រាមួយដែលពួកគេបានមានអារម្មណ៍សោកសៅ ឬឈឺចាប់ ។ សូមសួរកុមារថា តើពួកគេស្គាល់នរណាម្នាក់ដែលមានអារម្មណ៍ដូចគ្នានេះដែរឬទេ ។ សូមអញ្ជើញពួកគេឲ្យអាន អាលម៉ា ៧:១១–១២ ។ តើខគម្ពីរនេះបង្រៀនយើងអ្វីខ្លះអំពីព្រះយេស៊ូវគ្រីស្ទ និងការរងទុក្ខរបស់ទ្រង់សម្រាប់យើង ?
-
សូមឲ្យកំណាត់ឈើមួយដែលវែងជាងទទឹងនៃទ្វារចូលថ្នាក់រៀនដល់កុមារ ហើយស្នើសុំឲ្យពួកគាត់កាន់វាផ្ដេក ហើយព្យាយាមដើរកាត់តាមទ្វារនោះ ។ សូមពន្យល់ថា កំណាត់ឈើនោះតំណាងឲ្យអំពើបាបរបស់យើង ដែលរារាំងយើងមិនឲ្យចូលទៅក្នុងនគររបស់ព្រះបាន ។ សូមដកកំណាត់ឈើនោះចេញដើម្បីបង្ហាញថា ព្រះយេស៊ូវបានលើកដាក់មកលើព្រះអង្គទ្រង់នូវអំពើបាបរបស់យើង ដើម្បីឲ្យយើងអាចត្រូវបានអភ័យទោស កាលយើងប្រែចិត្ត ។
ខ្ញុំអាចធ្វើតាមគំរូរបស់ព្រះយេស៊ូវបាន តាមរយៈការគោរពប្រតិបត្តិដល់ព្រះវរបិតាសួគ៌ ។
ព្រះយេស៊ូវបានបង្ហាញការគោរពប្រតិបត្តិដល់ព្រះវរបិតាសួគ៌ កាលទ្រង់បានមានបន្ទូលថា « កុំតាមចិត្តទូលបង្គំឡើយ សូមតាមតែព្រះហឫទ័យទ្រង់វិញ » ( លូកា ២២:៤២ ) ។ តើបងប្អូនអាចជួយកុមារឲ្យរៀនសូត្រចេញពីគំរូរបស់ព្រះយេស៊ូវដោយរបៀបណា ?
សកម្មភាពដែលអាចធ្វើបាន
-
សូមជួយកុមារឲ្យទន្ទេញឃ្លានេះ « កុំតាមចិត្តទូលបង្គំឡើយ សូមតាមតែព្រះហឫទ័យទ្រង់វិញ » ( លូកា ២២:៤២ ) ជាមួយនឹងកុមារ ហើយពិភាក្សាពីអត្ថន័យនៃឃ្លានេះ ។ តើយើងអាចធ្វើអ្វីខ្លះ ដើម្បីគោរពតាមព្រះហឫទ័យរបស់ព្រះវរបិតាសួគ៌ ?
-
សូមជួយកុមារឲ្យស្វែងរកហេតុផលមួយចំនួន ដែលនៅពេលខ្លះវាលំបាកដើម្បីធ្វើអ្វីដែលព្រះវរបិតាសួគ៌ចង់ឲ្យយើងធ្វើ ។ តើពរជ័យអ្វីដែលយើងបានទទួល តាមរយៈការគោរពប្រតិបត្តិតាមព្រះវរបិតាសួគ៌ ទោះបីជាវាលំបាកក៏ដោយ ?
ព្រះយេស៊ូវស្រឡាញ់សត្រូវរបស់ទ្រង់ ។
ការរៀនសូត្រពីរបៀបដើម្បីធ្វើជាអ្នកសម្រុះសម្រួលគឺពុំមែនជារឿងងាយស្រួលនោះទេ នៅពេលអ្នកដទៃមិនធ្វើល្អចំពោះយើងនោះ ។ តើដំណើររឿងនៅក្នុង លូកា ២២:៥០–៥១ នេះអាចបំផុសគំនិតដល់កុមារដែលបងប្អូនបង្រៀនឲ្យធ្វើជាមនុស្សល្អនៅគ្រប់កាលៈទេសៈយ៉ាងដូចម្តេច ?
សកម្មភាពដែលអាចធ្វើបាន
-
សូមអញ្ជើញកុមារឲ្យអាន លូកា ២២:៥០–៥១ ។ តើយើងរៀនអ្វីខ្លះអំពីព្រះយេស៊ូវចេញពីដំណើររឿងនេះ ? នៅអំឡុងសប្តាហ៍នេះ សូមសាកសួរឪពុកម្តាយរបស់កុមារឲ្យប្រាប់បងប្អូន អំពីគ្រាដែលកូនៗរបស់ពួកគាត់បានបង្ហាញនូវសណ្តានចិត្តល្អ ទោះបីជាវាស្ថិតក្នុងគ្រាលំបាកក៏ដោយ ។ សូមចែកចាយដំណើររឿងទាំងនោះជាមួយសិស្សក្នុងថ្នាក់ ។ ( សូមរំឭកកុមារថា ការមានសណ្តានចិត្តល្អពុំមែនមានន័យថាបណ្តោយឲ្យអ្នកដទៃធ្វើឲ្យពួកគេឈឺចាប់នោះទេ ប៉ន្តែពួកគេគួរតែនិយាយទៅកាន់ឪពុកម្តាយរបស់ពួកគេ ឬមជ្ឈិមវ័យដែលពួកគេទុកចិត្ត ប្រសិនបើមាននរណាម្នាក់ធ្វើឲ្យពួកគេឈឺចាប់ ) ។
-
សូមច្រៀងចម្រៀងមួយបទអំពីការមានចិត្តល្អ ដូចជាបទ « ចិត្តល្អចាប់ផ្តើមនឹងខ្ញុំ » ( សៀវភៅចម្រៀងកុមារ ទំព័រ ៨៣ ) ។ តើបទចម្រៀងនេះបានបង្រៀនអ្វីខ្លះអំពីការមានសណ្តានចិត្តល្អ ? តើយើងអាចបង្ហាញសណ្តានចិត្តល្អដល់អ្នកដទៃដូចជាព្រះអង្គសង្រ្គោះបានធ្វើយ៉ាងដូចម្តេច ?
លើកទឹកចិត្តឲ្យមានការរៀនសូត្រនៅឯគេហដ្ឋាន
សូមអញ្ជើញកុមារឲ្យចែកចាយទីបន្ទាល់របស់ពួកគេអំពីព្រះអង្គសង្រ្គោះជាមួយក្រុមគ្រួសាររបស់ពួកគេ ។ ពួកគេក៏អាចស្នើសុំឲ្យសមាជិកគ្រួសាររបស់ពួកគេចែកចាយទីបន្ទាល់របស់ពួកគេអំពីទ្រង់ផងដែរ ។
ការកែលម្អការបង្រៀនរបស់យើង
អញ្ជើញកុមារឲ្យចែកចាយអ្វីដែលពួកគេដឹង ។ « ចូរសុំឲ្យ [ កុមារ ] ចែកចាយជាមួយបងប្អូនអំពីគំនិត អារម្មណ៍ និងបទពិសោធន៍របស់ពួកគេ ទាក់ទងនឹងគោលការណ៍ដែលបងប្អូនកំពុងបង្រៀននេះ ។ បងប្អូននឹងឃើញថា ពួកគេមានគំនិតយោបល់សាមញ្ញៗ បរិសុទ្ធ និងមានអានុភាព » ( ការបង្រៀនតាមរបៀបរបស់ព្រះអង្គសង្គ្រោះ ទំព័រ១៦ ) ។