« ថ្ងៃទី ៥–១១ ខែ មិថុនា ។ យ៉ូហាន ១៤–១៧ ៖ ‹ ចូរនៅជាប់ក្នុងសេចក្ដីស្រឡាញ់របស់ខ្ញុំចុះ › » ចូរមកតាមខ្ញុំ—សម្រាប់អង្គការបឋមសិក្សា ៖ ព្រះគម្ពីរសញ្ញាថ្មី ឆ្នាំ ២០២៣ ( ឆ្នាំ ២០២២ )

« ថ្ងៃទី ៥–១១ ខែ មិថុនា ។ យ៉ូហាន ១៤–១៧ » ចូរមកតាមខ្ញុំ—សម្រាប់អង្គការបឋមសិក្សា ៖ ឆ្នាំ ២០២៣

អាហារយប់ចុងក្រោយ ដោយ វិល្លាម ហ៊ែនរី ម៉ាហ្គែតសុន

ថ្ងៃទី ៥–១១ ខែ មិថុនា

យ៉ូហាន ១៤–១៧

« ចូរនៅជាប់ក្នុងសេចក្ដីស្រឡាញ់របស់ខ្ញុំចុះ »

សូមអធិស្ឋានដើម្បីដឹងពីតម្រូវការរបស់កុមារដែលបងប្អូនបង្រៀន កាលបងប្អូនអាន យ៉ូហាន ១៤–១៧ ។ ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ អាចជួយដល់ការសិក្សារបស់បងប្អូនបាន ហើយគម្រោងមេរៀននេះអាចបំភ្លឺគំនិតដល់បងប្អូនអំពីរបៀបដើម្បីបង្រៀនកុមារតូចៗក្នុងថ្នាក់របស់បងប្អូន ។

អញ្ជើញឲ្យចែកចាយ

ដើម្បីជួយកុមារឲ្យចែកចាយអ្វីដែលពួកគេកំពុងរៀននៅឯផ្ទះ សូមឲ្យកុមារម្នាក់ៗប្ដូរវេនគ្នាកាន់រូបបេះដូងក្រដាស ហើយចែកចាយអ្វីដែលគាត់ ឬនាងធ្វើដើម្បីបង្ហាញសេចក្តីស្រឡាញ់ចំពោះអ្នកដទៃ ។

បង្រៀនគោលលទ្ធិ ៖ កុមារតូចៗ

យ៉ូហាន ១៤:១៥

ខ្ញុំបង្ហាញសេចក្ដីស្រឡាញ់របស់ខ្ញុំចំពោះព្រះយេស៊ូវគ្រីស្ទ តាមរយៈការគោរពតាមព្រះបញ្ញត្តិទាំងឡាយរបស់ទ្រង់ ។

សូមជួយកុមារឲ្យយល់ថា ពួកគេអាចបង្ហាញដល់ព្រះអង្គសង្គ្រោះថា ពួកគេស្រឡាញ់ទ្រង់តាមរយៈការគោរពតាមព្រះបញ្ញត្តិទាំងឡាយរបស់ទ្រង់ ។

សកម្មភាពដែលអាចធ្វើបាន

សូមជួយកុមារឲ្យសូត្រ យ៉ូហាន ១៤:១៥ ។ សូមឲ្យពួកគេនិយាយថា « បើអ្នករាល់គ្នាស្រឡាញ់ខ្ញុំ » នៅពេលបងប្អូនលើករូបក្រដាសបេះដូងឡើង ។ សូមឲ្យពួកគេនិយាយថា « ចូរកាន់តាមបញ្ញត្តិរបស់ខ្ញុំចុះ » នៅពេលបងប្អូនលើកព្រះគម្ពីរឡើង ។
សូមជួយកុមារឲ្យគិតពីបទបញ្ញត្តិមួយចំនួនរបស់ព្រះយេស៊ូវ ។ សូមអញ្ជើញពួកគេឲ្យផ្តល់យោបល់ពីរបៀបដែលពួកគេអាចកាន់តាមបទបញ្ញត្តិនីមួយៗបាន ។ សូមថ្លែងទីបន្ទាល់ថាការធ្វើអ្វីៗទាំងនេះបង្ហាញសេចក្តីស្រឡាញ់របស់យើងចំពោះព្រះយេស៊ូវគ្រីស្ទ ។
សូមច្រៀងចម្រៀងមួយបទរួមគ្នាអំពីបទបញ្ញត្តិ ដូចជាបទ « រក្សាបទបញ្ញត្តិ » ( សៀវភៅចម្រៀងកុមារ ទំព័រ ៦៨–៦៩ ) ។
សូមលេងល្បែងនេះនៅលើទំព័រសកម្មភាពសប្តាហ៍នេះជាមួយកុមារ ។

យ៉ូហាន ១៤:២៦–២៧; ១៥:២៦; ១៦:១៣–១៤

ព្រះវិញ្ញាណបរិសុទ្ធជួយដល់ខ្ញុំ ។

ព្រះយេស៊ូវបានបង្រៀនពួកសិស្សរបស់ទ្រង់ពីសេចក្ដីពិតដ៏សំខាន់អំពីព្រះវិញ្ញាណបរិសុទ្ធ ។ សូមពិចារណាអំពីរបៀបដែលសេចក្តីពិតទាំងនេះអាចជួយដល់កុមារដែលបងប្អូនបង្រៀន ។

សកម្មភាពដែលអាចធ្វើបាន

សូមបង្ហាញរូបភាព អាហារយប់ថ្ងៃចុងក្រោយ ( សៀវភៅរូបភាពដំណឹងល្អ ល.រ. ៥៤ ) ។ សូមពន្យល់ដល់កុមារថា នៅអាហារយប់ថ្ងៃចុងក្រោយ ព្រះយេស៊ូវបានបង្រៀនពួកសិស្សរបស់ទ្រង់អំពីព្រះវិញ្ញាណបរិសុទ្ធ ។ សូមចែកចាយសេចក្តីពិតមួយចំនួនដែលទ្រង់បានបង្រៀននៅក្នុង យ៉ូហាន ១៤:២៦–២៧; ១៥:២៦; ១៦:១៣–១៤ ។

អាហារយប់ថ្ងៃចុងក្រោយ ដោយ ក្លាក ខេលី ប្រាយស៍
សូមចែកចាយបទពិសោធន៍មួយ នៅពេលដែលព្រះវិញ្ញាណបរិសុទ្ធបានលួងលោមបងប្អូន ដឹកនាំបងប្អូន ឬជួយបងប្អូនឲ្យស្គាល់ពីសេចក្តីពិត ។ សូមថ្លែងទីបន្ទាល់ថា ព្រះវិញ្ញាណបរិសុទ្ធអាចជួយកុមារតាមរបៀបដូចគ្នានេះដែរ ។
សូមច្រៀងចម្រៀងរួមគ្នាជាមួយកុមារអំពីព្រះវិញ្ញាណបរិសុទ្ធ ដូចជាបទ « ព្រះវិញ្ញាណបរិសុទ្ធ » ( សៀវភៅចម្រៀងកុមារ ទំព័រ ៥៦ ) ។ សូមអញ្ជើញពួកគេឲ្យស្ដាប់រកអ្វីដែលបានលើកឡើងនៅក្នុងបទចម្រៀងនេះ ដែលព្រះវិញ្ញាណបរិសុទ្ធបានធ្វើ ។

យ៉ូហាន ១៧:៣

ខ្ញុំអាចស្គាល់ព្រះវរបិតាសួគ៌ និងព្រះយេស៊ូវគ្រីស្ទ ។

ព្រះយេស៊ូវគ្រីស្ទបានបង្រៀនថា « ជីវិតដ៏នៅអស់កល្បជានិច្ច » គឺត្រូវស្គាល់ « ទ្រង់ដ៏ជាព្រះពិតតែមួយ និងព្រះយេស៊ូវគ្រីស្ទ » ។ នៅពេលកុមារដែលបងប្អូនបង្រៀនចាប់ផ្តើមដឹងអំពីទ្រង់ទាំងទ្វេ នោះពួកគេនឹងទទួលបានកម្លាំងខាងវិញ្ញាណ ដែលនឹងប្រទានពរដល់ពួកគេនៅពេញមួយជីវិតរបស់ពួកគេ ហើយជួយពួកគេឲ្យទទួលបានជីវិតដ៏នៅអស់កល្បជានិច្ច ។

សកម្មភាពដែលអាចធ្វើបាន

សូមអាន យ៉ូហាន ១៧:៣ ហើយសូមឲ្យកុមារស្តាប់រកថាតើព្រះយេស៊ូវចង់ឲ្យយើងស្គាល់នរណា ។ សូមបង្ហាញរូបភាពពីរបីដែលតំណាងឲ្យរបៀបដែលយើងអាចចាប់ផ្តើមស្គាល់ព្រះវរបិតាសួគ៌ និងព្រះយេស៊ូវគ្រីស្ទ ដូចជារូបភាពព្រះគម្ពីរ ក្រុមគ្រួសារកំពុងរៀនជាមួយគ្នា និងនរណាម្នាក់ដែលកំពុងបម្រើមនុស្សផ្សេងទៀត ។ សូមផ្កាប់រូបភាពចុះក្រោម ហើយអញ្ជើញកុមារឲ្យប្តូរវេនគ្នាផ្ងាររូបភាពទាំងនោះឡើង ហើយពិពណ៌នាពីអ្វីដែលមាននៅក្នុងរូបភាពនោះ ។ តើអ្វីៗទាំងនេះជួយយើងឲ្យស្គាល់ព្រះវរបិតាសួគ៌ និងព្រះយេស៊ូវដោយរបៀបណា ?
សូមនិយាយជាមួយកុមារអំពីអ្វីៗដែលពួកគេនឹងធ្វើ ដើម្បីរៀនស្គាល់មិត្តភក្តិរបស់ពួកគេឲ្យបានកាន់តែប្រសើរ ។ តើយើងស្គាល់ព្រះវរបិតាសួគ៌ និងព្រះយេស៊ូវគ្រីស្ទបានកាន់តែច្បាស់ជាងមុនយ៉ាងដូចម្តេច ? សូមចែកចាយពីរបៀបដែលបងប្អូនបានធ្វើការណ៍នេះ ។

បង្រៀនគោលលទ្ធិ ៖ កុមារធំៗ

យ៉ូហាន ១៤:១៥; ១៥:១០–១៤

ខ្ញុំបង្ហាញសេចក្ដីស្រឡាញ់របស់ខ្ញុំចំពោះព្រះយេស៊ូវគ្រីស្ទ តាមរយៈការគោរពតាមព្រះបញ្ញត្តិទាំងឡាយរបស់ទ្រង់ ។

កាលបងប្អូនអានវគ្គបទគម្ពីរទាំងនេះនៅក្នុងការសិក្សាផ្ទាល់ខ្លួនរបស់បងប្អូន សូមគិតអំពីកុមារដែលបងប្អូនបង្រៀន ។ តើពួកគេនឹងទទួលបានពរជ័យយ៉ាងណា នៅពេលពួកគេយល់ថា ការគោរពប្រតិបត្តិរបស់ពួកគេចំពោះព្រះអង្គសង្រ្គោះគឺជាទីសម្គាល់មួយនៃសេចក្តីស្រឡាញ់របស់ពួកគេចំពោះទ្រង់នោះ ?

សកម្មភាពដែលអាចធ្វើបាន

សូមអញ្ជើញកុមារឲ្យចែកចាយនូវរបៀបដែលព្រះយេស៊ូវបានបង្ហាញថា ទ្រង់បានគោរពប្រតិបត្តិតាមព្រះវរបិតាសួគ៌ ។ សូមបង្ហាញរូបភាពមកពីព្រះជន្មរបស់ព្រះអង្គសង្រ្គោះដើម្បីជួយដល់ពួកគេ ( សូមមើល សៀវភៅរូបភាពដំណឹងល្អ ល.រ. ៣៤–៣៥, ៥៦–៥៧ ) ។ សូមឲ្យកុមារនិយាយអំពីគ្រាដែលពួកគេបានគោរពប្រតិបត្តិតាមព្រះវរបិតាសួគ៌ ។
សូមឲ្យកុមារម្នាក់អាន យ៉ូហាន ១៤:១៥ ។ សូមឲ្យកុមារប្ដូរវេនគ្នាគូររូបដែលតំណាងឲ្យនរណាម្នាក់ដែលរក្សាបទបញ្ញត្តិ ខណៈកុមារផ្សេងទៀតទាយថា តើគេកំពុងគូរអ្វី ។ សម្រាប់ឧទាហរណ៍ពីបទបញ្ញត្តិនានា សូមមើលកូនសៀវភៅ ដើម្បីកម្លាំងនៃយុវជន ( ឆ្នាំ ២០២២ ) ។ តើការរក្សាបទបញ្ញត្តិទាំងនេះបង្ហាញដល់ព្រះអង្គសង្គ្រោះថា យើងស្រឡាញ់ទ្រង់ដោយរបៀបណា ?

យ៉ូហាន ១៤:២៦; ១៥:២៦; ១៦:១៣

ព្រះវិញ្ញាណបរិសុទ្ធដឹកនាំ លួងលោម ហើយថ្លែងទីបន្ទាល់អំពីសេចក្ដីពិត ។

តើកុមារដែលបងប្អូនបង្រៀនបានទទួលអំណោយទាននៃព្រះវិញ្ញាណបរិសុទ្ធហើយឬនៅ ? តើពួកគេដឹងថាព្រះវិញ្ញាណបរិសុទ្ធអាចជួយពួកគេអ្វីខ្លះ ? សូមពិចារណាពីរបៀបដែលបងប្អូននឹងជួយពួកគេឲ្យយល់កាន់តែច្បាស់អំពីតួនាទីរបស់ព្រះវិញ្ញាណបរិសុទ្ធ ។

សកម្មភាពដែលអាចធ្វើបាន

សូមឲ្យកុមារអានខគម្ពីរដូចតទៅនេះជាដៃគូ ៖ យ៉ូហាន ១៤:២៦; ១៥:២៦ និង ១៦:១៣ ។ សូមឲ្យពួកគេរកមើលពាក្យដែលបង្រៀនពួកគេពីអ្វីៗដែលព្រះវិញ្ញាណបរិសុទ្ធធ្វើ ។ សូមសរសេរពាក្យទាំងនេះនៅលើក្ដារខៀន ។
សូមចែកចាយបទពិសោធន៍មួយ កាលព្រះវិញ្ញាណបរិសុទ្ធបានដឹកនាំបងប្អូន បានលួងលោមបងប្អូន បានព្រមានបងប្អូន ឬបានថ្លែងទីបន្ទាល់អំពីសេចក្ដីពិតដល់បងប្អូន ។ សូមអញ្ជើញកុមារឲ្យចែកចាយរាល់បទពិសោធន៍ដែលពួកគេមាន ។ តើពួកគេបានស្គាល់ឥទ្ធិពលរបស់ព្រះវិញ្ញាណបរិសុទ្ធដោយរបៀបណា ?
សូមអញ្ជើញកុមារម្នាក់ៗឲ្យគូររូបមុខរបស់គេនៅលើកាបូបក្រដាសមួយ ។ សូមបញ្ចាំងភ្លើងពិល ដែលតំណាងឲ្យព្រះវិញ្ញាណបរិសុទ្ធទៅក្នុងកាបូបនីមួយៗ ។ រួចហើយ សូមដាក់វត្ថុនានាទៅក្នុងកាបូបដែលបាំងពន្លឺនោះដូចជា ក្រណាត់មួយចម្រៀក ដើម្បីបង្រៀនថា ជម្រើសខុសឆ្គងរបស់យើងអាចរារាំងដល់ឥទ្ធិពលនៃព្រះវិញ្ញាណបរិសុទ្ធនៅក្នុងជីវិតរបស់យើង ។ សូមឲ្យកុមារដកយករបស់ទាំងនោះចេញពីកាបូបរបស់គេ ដើម្បីតំណាងឲ្យការប្រែចិត្ត ។

យ៉ូហាន ១៥:១–៩; ១៧:៣

ព្រះវរបិតាសួគ៌ និងព្រះយេស៊ូវសព្វព្រះទ័យឲ្យខ្ញុំស្គាល់ទ្រង់ទាំងទ្វេ ។

បងប្អូននឹងផ្ដល់ពរជ័យដល់ជីវិតរបស់កុមារជាច្រើន តាមរយៈការជួយពួកគេឲ្យស្គាល់ព្រះវរបិតាសួគ៌ និងព្រះយេស៊ូវគ្រីស្ទកាន់តែច្បាស់ ។

សកម្មភាពដែលអាចធ្វើបាន

សូមបង្ហាញរុក្ខជាតិមួយដើម ( ឬរូបភាពរុក្ខជាតិមួយដើម ) កាលកុមារប្ដូរវេនគ្នាអានខគម្ពីរនៅក្នុង យ៉ូហាន ១៥:១–៩ ។ តើព្រះយេស៊ូវគ្រីស្ទដូចជាដើមទំពាំងបាយជូរដោយរបៀបណា ? តើយើងដូចជាមែករបស់វាដោយរបៀបណា ? តើយើងអាចធ្វើអ្វីខ្លះ ដើម្បី « នៅជាប់ » នឹងព្រះអង្គសង្គ្រោះ ?
សូមអាន យ៉ូហាន ១៧:៣ ឮៗ ។ សូមសួរកុមារថា តើពួកគេត្រូវធ្វើអ្វីខ្លះដើម្បីស្គាល់ព្រះវរបិតាសួគ៌ និងព្រះយេស៊ូវគ្រីស្ទ ។ សូមចែកចាយរបៀបដែលបងប្អូនស្គាល់ទ្រង់ទាំងទ្វេ ។

លើកទឹកចិត្តឲ្យមានការរៀនសូត្រនៅឯគេហដ្ឋាន

សូមលើកទឹកចិត្តកុមារឲ្យចែកចាយជាមួយក្រុមគ្រួសាររបស់ពួកគេនូវបទចម្រៀងមួយបទ ដែលពួកគេទើបតែបានរៀននៅក្នុងថ្នាក់ ឬនៅម៉ោងច្រៀងចម្រៀង ។

ការកែលម្អការបង្រៀនរបស់យើង

សម្របសម្រួលសកម្មភាពនានា ។ ប្រសិនបើបងប្អូនបង្រៀនកុមារតូចៗ នោះបងប្អូនអាចស្វែងរកគំនិតបន្ថែមដែលបងប្អូនអាចសម្របសម្រួលដល់កុមារក្នុងថ្នាក់របស់បងប្អូននៅក្នុងផ្នែកគម្រោងមេរៀននេះសម្រាប់កុមារធំៗបាន ។ ដូចគ្នាដែរ សកម្មភាពសម្រាប់កុមារតូចៗទាំងនេះក៏អាចសម្របសម្រួលសម្រាប់បង្រៀនកុមារធំៗបានផងដែរ ។

ទំព័រសកម្មភាព ៖ ខ្ញុំបង្ហាញសេចក្ដីស្រឡាញ់របស់ខ្ញុំចំពោះព្រះយេស៊ូវគ្រីស្ទ តាមរយៈការកាន់តាមព្រះបញ្ញត្តិទាំងឡាយរបស់ទ្រង់