« ថ្ងៃទី ១៩–២៥ ខែ មិថុនា ។ ម៉ាថាយ ២៧; ម៉ាកុស ១៥; លូកា ២៣; យ៉ូហាន ១៩ ៖ ‹ ការស្រេចហើយ › » ចូរមកតាមខ្ញុំ—សម្រាប់អង្គការបឋមសិក្សា ៖ ព្រះគម្ពីរសញ្ញាថ្មី ឆ្នាំ ២០២៣ ( ឆ្នាំ ២០២២ )
« ថ្ងៃទី ១៩–២៥ ខែ មិថុនា ។ ម៉ាថាយ ២៧; ម៉ាកុស ១៥; លូកា ២៣; យ៉ូហាន ១៩ » ចូរមកតាមខ្ញុំ—សម្រាប់អង្គការបឋមសិក្សា ៖ ឆ្នាំ ២០២៣
Ecce Homo ( ព្រះយេស៊ូវគ្រីស្ទដែលត្រូវគេធ្វើទុក្ខទោស ) ដោយ អាន់ថូញូ ស៊ីស៊ើរី
ថ្ងៃទី ១៩–២៥ ខែ មិថុនា
ម៉ាថាយ ២៧; ម៉ាកុស ១៥; លូកា ២៣; យ៉ូហាន ១៩
« ការស្រេចហើយ »
សូមចាប់ផ្ដើមការរៀបចំមេរៀនរបស់បងប្អូនដោយការអាន ម៉ាថាយ ២៧; ម៉ាកុស ១៥; លូកា ២៣ និង យ៉ូហាន ១៩ ។ សូមស្វែងយល់ពីតម្រូវការរបស់កុមារប្រកបដោយការអធិស្ឋាន ។
អញ្ជើញឲ្យចែកចាយ
សូមឲ្យកុមារម្នាក់ៗប្តូរវេនគ្នាកាន់រូបភាពមកពី គម្រោងមេរៀនសប្ដាហ៍នេះ នៅក្នុង ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ។ ខណៈកាន់រូបភាពនោះ កុមារម្នាក់ៗអាចចែកចាយអ្វីមួយដែលគាត់ ឬនាងមើលឃើញនៅក្នុងរូបភាពនោះ ។
បង្រៀនគោលលទ្ធិ ៖ កុមារតូចៗ
ម៉ាថាយ ២៧:១១–៦៦; លូកា ២៣; យ៉ូហាន ១៩
ដោយសារព្រះយេស៊ូវបានសុគតសម្រាប់ខ្ញុំ នោះខ្ញុំអាចរស់ឡើងវិញបាន ។
កុមារតូចៗអាចសោកសៅដោយការស្ដាប់ដំណើររឿងការឆ្កាងរបស់ព្រះយេស៊ូវ ។ « ជំពូក ៥២ ៖ ការសាកល្បងរបស់ព្រះយេស៊ូវ » និង « ជំពូក ៥៣ ៖ ព្រះយេស៊ូវត្រូវគេឆ្កាង » ( នៅក្នុង ដំណើររឿងព្រះគម្ពីរសញ្ញាថ្មី ទំព័រ ១៣៣–៣៨ ឬវីដេអូដែលដូចគ្នានេះ នៅលើគេហទំព័រ ChurchofJesusChrist.org ) ផ្ដល់នូវគំរូដ៏ល្អមួយអំពីរបៀបដែលបងប្អូនអាចចែកចាយរឿងនេះជាមួយនឹងពួកគេឲ្យបានត្រឹមត្រូវ ។
សកម្មភាពដែលអាចធ្វើបាន
-
សូមបង្ហាញរូបភាពនៅក្នុង គម្រោងមេរៀនសប្ដាហ៍នេះ នៅក្នុង ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ កាលបងប្អូនតំណាលអំពីការសាកល្បង ការឆ្កាង និងការបញ្ចុះសពរបស់ព្រះយេស៊ូវ ( សូមមើលផងដែរ សៀវភៅរូបភាពដំណឹងល្អ ល.រ. ៥៧–៥៨ ) ។ សូមឲ្យកុមារចែកចាយនូវអ្វីដែលពួកគេដឹងអំពីព្រឹត្តិការណ៍ទាំងនេះ ។ សូមបញ្ជាក់ថានៅថ្ងៃទីបី ព្រះយេស៊ូវបានមានព្រះជន្មរស់ឡើងវិញ ។ ឬនិយាយម្យ៉ាងទៀត ទ្រង់ត្រឡប់មកមានព្រះជន្មវិញ ។
-
សូមឲ្យកុមារសរសេរឈ្មោះរឿងមួយចំនួនដែលឪពុកម្ដាយរបស់គេធ្វើសម្រាប់ពួកគេ ដែលពួកគេមិនអាចធ្វើខ្លួនឯងបាន ។ សូមដាក់តាំងរូបភាពនៃព្រះអង្គសង្គ្រោះ ។ សូមពន្យល់ថា ដោយសារតែព្រះយេស៊ូវ នោះយើងអាចរស់ឡើងវិញបាន—ជាអ្វីមួយដែលយើងមិនអាចធ្វើបានដោយខ្លួនឯង ។
-
សូមបង្ហាញរូបភាពនរណាម្នាក់ដែលបងប្អូនស្គាល់ ដែលបានស្លាប់ទៅហើយ ។ សូមចែកចាយទីបន្ទាល់របស់បងប្អូនថា ដោយសារតែព្រះយេស៊ូវ នោះបុគ្គលនេះនឹងរស់ឡើងវិញម្ដងទៀត ។
ការបញ្ចុះសព ដោយ ខាល ហេនរីក ប្លក់
ខ្ញុំអាចអភ័យទោសឲ្យមនុស្សដទៃ ដូចព្រះយេស៊ូវបានធ្វើដែរ ។
តើបងប្អូននឹងជួយកុមារឲ្យយល់ពីរបៀបដើម្បីអភ័យទោសឲ្យអស់អ្នកដែលមិនមានចិត្តល្អ ដូចជាព្រះយេស៊ូវបានធ្វើដោយរបៀបណា ?
សកម្មភាពដែលអាចធ្វើបាន
-
សូមរៀបរាប់ពីរបៀបដែលពួកទាហានមិនមានចិត្តល្អចំពោះព្រះយេស៊ូវ ( សូមមើល ម៉ាថាយ ២៧:២៦–៣៧ ) រួចហើយសូមអាន លូកា ២៣:៣៤ ។ សូមពន្យល់ថា នៅពេលយើងអភ័យទោសឲ្យអ្នកដទៃ នោះយើងមិនខឹងនឹងពួកគេទៀតទេ ហើយបង្ហាញសេចក្តីស្រឡាញ់ចំពោះពួកគេ ។
-
សូមចែកចាយឧទាហរណ៍ដែលនរណាម្នាក់និយាយ ឬធ្វើអ្វីមួយដែលមិនសប្បុរស ។ សូមអញ្ជើញកុមារឲ្យនិយាយពីរបៀបដែលពួកគេនឹងបង្ហាញការអភ័យទោសនៅក្នុងស្ថានភាពទាំងនោះ ។
-
សូមច្រៀងចម្រៀងមួយបទរួមគ្នាអំពីការអភ័យទោស ដូចជាបទ « បិតាសូមជួយកូន » ( សៀវភៅចម្រៀងកុមារ ទំព័រ ៥២ ) ។ សូមសួរសំណួរដែលបានឆ្លើយនៅក្នុងបទចម្រៀងនេះ « តើខ្ញុំគួរតែអភ័យទោសឲ្យនរណា ? » ឬ « តើនរណាអាចជួយយើង នៅពេលយើងពិបាកធ្វើការអភ័យទោស ? »
-
សូមស្វែងរកលេខចេញថ្មីនៃទស្សនាវដ្ដី ប្រិយមិត្ត ដើម្បីរកមើលដំណើររឿងអំពីកុមារម្នាក់ដែលបានអភ័យទោសឲ្យនរណាម្នាក់ ។ សូមចែកចាយដំណើររឿងនេះជាមួយនឹងកុមារ ។
ដោយសារព្រះយេស៊ូវបានរងទុក្ខ និងសុគតសម្រាប់ខ្ញុំ នោះខ្ញុំអាចប្រែចិត្ត ហើយទទួលបានការអភ័យទោស ។
ទោះបីជាកុមារនៅក្រោមអាយុប្រាំបីឆ្នាំមិនទាន់មានការទទួលខុសត្រូវក្ដី ក៏វាសំខាន់សម្រាប់ពួកគេដើម្បីចាប់ផ្ដើមរៀនពីពេលនេះទៅ ពីរបៀបប្រែចិត្តពីជម្រើសខុសឆ្គងដែលពួកគេធ្វើដែរ ។
សកម្មភាពដែលអាចធ្វើបាន
-
សូមសង្ខេប លូកា ២៣:៣២–៣៣, ៣៩–៤៣ ហើយសូមរកមើលពីចោរពីរនាក់នៅក្នុង រូបភាព ៥៧ នៅក្នុង សៀវភៅរូបភាពដំណឹងល្អ ។ សូមពន្យល់ថា នៅពេលចោរទីមួយបានសើចចំអកដាក់ព្រះយេស៊ូវ នោះចោរទីពីរបានសារភាពថា គាត់បានធ្វើអ្វីមួយខុស—គាត់បានចាប់ផ្ដើមប្រែចិត្ត ។
-
សូមអាន គោលលទ្ធិ និង សេចក្ដីសញ្ញា ១៩:១៦ ឲ្យកុមារស្តាប់ ។ ហេតុអ្វីព្រះយេស៊ូវបានរងទុក្ខសម្រាប់យើង ?
-
សូមបង្ហាញវីដេអូ « The Shiny Bicycle » ( នៅលើគេហទំព័រ ChurchofJesusChrist.org ) ។ សូមពន្យល់ថា យើងអាចអធិស្ឋានទៅកាន់ព្រះវរបិតាសួគ៌ ហើយទ្រង់អាចជួយកែអំពើបាប និងកំហុសរបស់យើង ហើយទទួលបានការអភ័យទោស ។
-
សូមឲ្យកុមារគូសដីសនៅលើក្ដារខៀនដើម្បីតំណាងឲ្យជម្រើសខុសឆ្គងនានា ។ រួចហើយ សូមឲ្យពួកគេលុបវាចេញពីក្ដារខៀនដើម្បីតំណាងឲ្យការប្រែចិត្ត ។ សូមបង្ហាញរូបភាពរបស់ព្រះអង្គសង្គ្រោះមួយ ហើយសូមថ្លែងទីបន្ទាល់ថា យើងអាចប្រែចិត្តបានដោយសារតែទ្រង់ ។
បង្រៀនគោលលទ្ធិ ៖ កុមារធំៗ
ម៉ាថាយ ២៧:១១–៦៦; លូកា ២៣; យ៉ូហាន ១៩
ព្រះយេស៊ូវបានសុគតសម្រាប់ខ្ញុំ ដោយសារទ្រង់ស្រឡាញ់ខ្ញុំ ។
ហេតុអ្វីបងប្អូនមានអំណរគុណដែលព្រះយេស៊ូវគ្រីស្ទបានសុគតសម្រាប់បងប្អូន ? សូមពិចារណាពីរបៀបដែលបងប្អូនអាចជួយកុមារឲ្យយល់ពីសារៈសំខាន់នៃពលិកម្មរបស់ព្រះអង្គសង្គ្រោះសម្រាប់ពួកគេ ។
សកម្មភាពដែលអាចធ្វើបាន
-
សូមសរសេរព្រឹត្តិការណ៍សំខាន់ៗពី ម៉ាថាយ ២៧:១១–៦៦ នៅលើក្រដាសផ្សេងៗគ្នា ( ដើម្បីជាជំនួយសម្រាប់ធ្វើការងារនេះ សូមមើល « ជំពូក ៥២ ៖ ការសាកល្បងរបស់ព្រះយេស៊ូវ » និង « ជំពូក ៥៣ ៖ ព្រះយេស៊ូវត្រូវគេឆ្កាង » នៅក្នុង ដំណើររឿងព្រះគម្ពីរសញ្ញាថ្មី ទំព័រ ១៣៣–៣៨ ឬវីដេអូដូចគ្នានេះនៅលើគេហទំព័រ ChurchofJesusChrist.org ) ។ សូមឲ្យកុមារសិក្សាខគម្ពីរទាំងនេះ ហើយរៀបព្រឹត្តិការណ៍ទាំងឡាយតាមលំដាប់លំដោយត្រឹមត្រូវ ។
-
សូមឲ្យកុមារម្នាក់អាន ម៉ាថាយ ២៧:៥៤ ហើយសូមឲ្យកុមារចែកចាយរឿងអំពីព្រះយេស៊ូវដែលជួយពួកគេឲ្យដឹងថា ទ្រង់គឺជាព្រះរាជបុត្រានៃព្រះ ។
-
សូមសួរកុមារពីអ្វីដែលពួកគេបានរៀនអំពីការឆ្កាងចេញពីបទ « មើលព្រះប្រោសលោះយើងសុគតហើយ » ( ទំនុកតម្កើង ទំព័រ ១១៣ ) ឬទំនុកតម្កើងសាក្រាម៉ង់ផ្សេងទៀត ។ ហេតុអ្វីព្រះយេស៊ូវស្ម័គ្រព្រះទ័យដើម្បីរងទុក្ខសម្រាប់យើង ? ( សូមមើល គោលលទ្ធិ និង សេចក្តីសញ្ញា ១៨:១០–១១; ១៩:១៦ ) ។
ខ្ញុំអាចអភ័យទោសឲ្យមនុស្សដទៃ ដូចព្រះយេស៊ូវបានធ្វើដែរ ។
វាអាចជាការពិបាកដែលត្រូវអភ័យទោសឲ្យមនុស្សដទៃ ។ កុមារដែលបងប្អូនបង្រៀននឹងទទួលបានពរជ័យ កាលពួកគេធ្វើតាមគំរូរបស់ព្រះអង្គសង្គ្រោះ ហើយរៀនអភ័យទោសឲ្យអ្នកដទៃ ។
សកម្មភាពដែលអាចធ្វើបាន
-
សូមឲ្យកុមារប្ដូរវេនគ្នាអានអំពីពួកទាហានដែលមិនមានចិត្តល្អចំពោះព្រះយេស៊ូវនៅក្នុង ម៉ាថាយ ២៧:២៦–៣៧ ហើយព្រះយេស៊ូវបានអភ័យទោសឲ្យពួកគេនៅក្នុង លូកា ២៣:៣៤ ។ តើយើងរៀនអ្វីខ្លះចេញពីគំរូរបស់ព្រះយេស៊ូវ ?
-
សូមសរសេរនៅលើក្ដារខៀននូវ តើប្អូនអាចធ្វើអ្វីខ្លះដើម្បីអភ័យទោសឲ្យនរណាម្នាក់ដែលមិនមានចិត្តល្អចំពោះប្អូន ? សូមឲ្យកុមារប្ដូរវេនគ្នាសរសេរគំនិតនានានៅលើក្ដារខៀនដូចជា អធិស្ឋានសូមឲ្យមានអារម្មណ៍សណ្ដោសដល់បុគ្គលនោះ ឬ គិតដល់អ្វីល្អៗអំពីបុគ្គលនោះ ។
ដោយសារព្រះយេស៊ូវបានរងទុក្ខ និងសុគតសម្រាប់ខ្ញុំ នោះខ្ញុំអាចប្រែចិត្ត ហើយទទួលបានការអភ័យទោស ។
មេរៀននេះគឺជាពេលវេលាដ៏ល្អមួយដើម្បីថ្លែងទីបន្ទាល់ថា ដោយសារតែព្រះយេស៊ូវគ្រីស្ទ នោះយើងអាចប្រែចិត្តពីអំពើបាបរបស់យើងបាន ហើយទទួលបានការអភ័យទោស ។
សកម្មភាពដែលអាចធ្វើបាន
-
សូមឲ្យកុមារម្នាក់អាន លូកា ២៣:៣២–៣៣, ៣៩–៤៣ឲ្យឭៗ ។ សូមពន្យល់ថា មនុស្សពីរនាក់ដែលត្រូវបានគេឆ្កាងជាមួយនឹងព្រះយេស៊ូវនោះ គឺជាចោរ ។ តើចោរមួយបានបង្ហាញថា គាត់បានចាប់ផ្ដើមប្រែចិត្តដោយរបៀបណា ? តើយើងអាចធ្វើអ្វីខ្លះដើម្បីបង្ហាញថាយើងកំពុងប្រែចិត្ត ? ( សេចក្ដីណែនាំដល់បទគម្ពីរទាំងឡាយ « ប្រែចិត្ត, ការប្រែចិត្ត » នៅលើគេហទំព័រ scriptures.ChurchofJesusChrist.org ) ។
-
សូមសរសេរប្រយោគដូចតទៅនេះនៅលើក្ដារខៀន ដោយទុកចន្លោះសម្រាប់ពាក្យជាអក្សរទ្រេត ៖ « ខ្ញុំអាចទទួលបាន ការអភ័យទោស នៅពេលខ្ញុំ ប្រែចិត្ត ដោយសារតែ ដង្វាយធួន របស់ ព្រះយេស៊ូវគ្រីស្ទ » ។ សូមផ្ដល់តម្រុយឲ្យកុមារដើម្បីជួយពួកគេឲ្យបំពេញចន្លោះទាំងនោះ ។
-
សូមឲ្យកុមារម្នាក់កាន់កាបូប ហើយដាក់ដុំថ្មក្នុងកាបូបនោះ កាលកុមារផ្សេងទៀតប្រាប់នូវជម្រើសខុសឆ្គងដែលនរណាម្នាក់អាចជ្រើសរើស ។ សូមជួយកុមារឲ្យប្រៀបធៀបកាបូបទៅនឹងបន្ទុកខាងវិញ្ញាណ ដែលយើងស្ពាយមកពេលយើងធ្វើអំពើបាប ។ តើការប្រែចិត្តដូចជាការយកថ្មចេញពីកាបូបដោយរបៀបណា ? បងប្អូនអាចរំឭកកុមារថា ការប្រែចិត្តមិនមែនជាព្រឹត្តិការណ៍ដែលធ្វើឡើងតែម្តងនោះទេ ប៉ុន្តែវាជាដំណើរការប្រចាំថ្ងៃ ។
-
សូមរកមើលក្នុងលេខចេញថ្មីនៃទស្សនាវដ្តី ប្រិយមិត្ត សម្រាប់ដំណើររឿង ឬសារលិខិតអំពីការប្រែចិត្ត ហើយចែកចាយជាមួយកុមារ ។
លើកទឹកចិត្តឲ្យមានការរៀនសូត្រនៅឯគេហដ្ឋាន
សូមលើកទឹកចិត្តកុមារឲ្យគិតដល់នរណាម្នាក់ដែលត្រូវការការអភ័យទោស ហើយសម្រេចលើរឿងមួយដែលពួកគេនឹងធ្វើដើម្បីបង្ហាញដល់បុគ្គលនោះថា ពួកគេបានអភ័យទោសឲ្យគាត់ហើយ ។
ការកែលម្អការបង្រៀនរបស់យើង
រៀនស្គាល់វិវរណៈ ។ ជាញឹកញាប់ វិវរណៈកើតមាន « មួយបន្ទាត់ម្ដងៗ » ( នីហ្វៃទី២ ២៨:៣០ ) ហើយមិនមែនម្ដងទាំងអស់នោះទេ ។ នៅពេលបងប្អូនអធិស្ឋាន ហើយសញ្ជឹងគិតអំពីព្រះគម្ពីរ និងគម្រោងមេរៀននេះ នោះបងប្អូននឹងឃើញថា គំនិត និងចំណាប់អារម្មណ៍នានាអាចកើតមានគ្រប់ពេលវេលា និងគ្រប់ទីកន្លែង—ពេលបងប្អូនធ្វើដំណើរទៅធ្វើការ ពេលធ្វើកិច្ចការផ្ទះ ឬពេលជជែកលេងជាមួយនឹងគ្រួសារ និងមិត្តភក្ដិ ។