« ថ្ងៃទី ២៦ ខែ មិថុនា–ថ្ងៃទី ២ ខែ កក្កដា ។ ម៉ាថាយ ២៨; ម៉ាកុស ១៦; លូកា ២៤; យ៉ូហាន ២០–២១ ៖ ‹ ទ្រង់មានព្រះជន្មរស់ឡើងវិញហើយ › » ចូរមកតាមខ្ញុំ—សម្រាប់អង្គការបឋមសិក្សា ៖ ព្រះគម្ពីរសញ្ញាថ្មី ឆ្នាំ ២០២៣ ( ឆ្នាំ ២០២២ )
« ថ្ងៃទី ២៦ ខែ មិថុនា–ថ្ងៃទី ២ ខែ កក្កដា ។ ម៉ាថាយ ២៨; ម៉ាកុស ១៦; លូកា ២៤; យ៉ូហាន ២០–២១ » ចូរមកតាមខ្ញុំ—សម្រាប់អង្គការបឋមសិក្សា ៖ ឆ្នាំ ២០២៣
ចូរឲ្យចំណីដល់ហ្វូងចៀមខ្ញុំស៊ីផង ដោយ ខាមីល ខូរី
ថ្ងៃទី ២៦ ខែ មិថុនា–ថ្ងៃទី ២ ខែ កក្កដា
ម៉ាថាយ ២៨; ម៉ាកុស ១៦; លូកា ២៤; យ៉ូហាន ២០–២១
« ទ្រង់មានព្រះជន្មរស់ឡើងវិញហើយ »
កុមារដែលមានទីបន្ទាល់ពីសេចក្តីពិតនេះនៅក្នុងជំពូកទាំងនេះ មានគ្រឹះដ៏រឹងមាំដើម្បីស្ថាបនាសេចក្តីជំនឿរបស់ពួកគេ ។ តើបងប្អូននឹងយាងអញ្ជើញព្រះវិញ្ញាណឲ្យថ្លែងទីបន្ទាល់ពីសេចក្តីពិតទាំងនេះយ៉ាងដូចម្តេច ?
អញ្ជើញឲ្យចែកចាយ
ការមើលរូបភាពមួយអាចជួយកុមារឲ្យចងចាំរឿងដែលពួកគេបានរៀននៅផ្ទះ ឬនៅក្នុងមជ្ឈដ្ឋានផ្សេងទៀត ។ ប្រហែលបងប្អូនអាចបង្ហាញរូបភាពនៅក្នុង គម្រោងមេរៀនសប្ដាហ៍នេះ នៅក្នុង ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ហើយសូមឲ្យកុមារចែកចាយអ្វីដែលពួកគេដឹងអំពីដំណើររឿងដែលមាននៅក្នុងរូបភាពនេះ ។
បង្រៀនគោលលទ្ធិ ៖ កុមារតូចៗ
ម៉ាថាយ ២៨; ម៉ាកុស ១៦; លូកា ២៤; យ៉ូហាន ២០:១–២៣
ខ្ញុំនឹងរស់នៅម្ដងទៀត បន្ទាប់ពីខ្ញុំស្លាប់ទៅ គឺដូចព្រះយេស៊ូវបានរស់ឡើងវិញដែរ ។
ដង្វាយធួនរបស់ព្រះយេស៊ូវគ្រីស្ទ រួមទាំងការរស់ឡើងវិញរបស់ទ្រង់ផង គឺជាព្រឹត្តិការណ៍ដ៏សំខាន់បំផុតនៅក្នុងប្រវត្តិសាស្ដ្រ ហើយវាគឺជាមូលដ្ឋានគ្រឹះនៃសេចក្ដីជំនឿរបស់គ្រិស្តសាសនិក ។ ពេលបងប្អូនអានអំពីការរស់ឡើងវិញ សូមសញ្ជឹងគិតអំពីរបៀបដែលបងប្អូននឹងជួយដល់កុមារឲ្យស្ថាបនាសេចក្ដីជំនឿរបស់ពួកគេលើព្រះយេស៊ូវ ។
សកម្មភាពដែលអាចធ្វើបាន
-
សូមប្រាប់ពីដំណើររឿងនៃការរស់ឡើងវិញរបស់ព្រះយេស៊ូវជាសម្ដីរបស់បងប្អូន ។ ( ប្រសិនបើចាំបាច់ សូមប្រើ « ជំពូក ៥៤ ៖ ព្រះយេស៊ូវមានព្រះជន្មរស់ឡើងវិញ » នៅក្នុង ដំណើររឿងព្រះគម្ពីរសញ្ញាថ្មី ទំព័រ ១៣៩–៤៤ ឬវីដេអូដូចគ្នានេះនៅលើគេហទំព័រ ChurchofJesusChrist.org ) ។ សូមពន្យល់ថា នៅពេលដែលព្រះយេស៊ូវបានសុគត នោះវិញ្ញាណរបស់ទ្រង់បានចាកចេញពីព្រះកាយរបស់ទ្រង់ ។ នៅពេលទ្រង់បានរស់ឡើងវិញ នោះវិញ្ញាណ និងរូបកាយរបស់ទ្រង់បានរួបរួមគ្នាឡើងវិញម្ដងទៀត ។ សូមឲ្យកុមារប្ដូរវេនគ្នាតំណាលរឿងនេះសាឡើងវិញប្រាប់បងប្អូនវិញ ។ សូមសួរកុមារថា តើពួកគេនឹងមានអារម្មណ៍បែបណា ប្រសិនបើពួកគេបានឃើញព្រះយេស៊ូវមានព្រះជន្មរស់ឡើងវិញម្តងទៀត ។
-
សូមបង្ហាញវីដេអូ « What Happens after We Die ? » ( នៅលើគេហទំព័រChurchofJesusChrist.org ) ហើយសូមប្រាប់អំពីនរណាម្នាក់ដែលបងប្អូនស្គាល់ ដែលបានស្លាប់ទៅហើយ ។ សូមចែកចាយទីបន្ទាល់របស់បងប្អូនថា មនុស្សគ្រប់រូបនឹងត្រូវរស់ឡើងវិញនៅថ្ងៃណាមួយ ។ សូមអញ្ជើញកុមារឲ្យចែកចាយទីបន្ទាល់របស់ពួកគេ ។
-
សូមច្រៀងចម្រៀងមួយបទអំពីការមាន ព្រះជន្មរស់ឡើងវិញរបស់ព្រះអង្គសង្រ្គោះ ដូចជាបទ « តើព្រះយេស៊ូវរស់ឡើងវិញឬ ? » ( សៀវភៅចម្រៀងកុមារ ទំព័រ ៤៥ ) ។ សូមឲ្យកុមារស្រមៃថា តើវាមានអារម្មណ៍បែបណាដែលមើលឃើញព្រះយេស៊ូវនោះ ។ សូមឲ្យពួកគេចែកចាយគំនិតរបស់ពួកគេជាមួយនឹងសិស្សនៅក្នុងថ្នាក់ ។
ខ្ញុំអាចមានសេចក្ដីជំនឿទៅលើព្រះយេស៊ូវគ្រីស្ទ ទោះបីជាខ្ញុំមិនបានឃើញទ្រង់ក្ដី ។
សូមពិចារណាពីរបៀបដែលបងប្អូនអាចជួយកុមារឲ្យយល់ពីអត្ថន័យនៃសេចក្ដីជំនឿ និងពីរបៀបដែលពួកគេអាចអនុវត្តសេចក្ដីជំនឿទៅលើព្រះអង្គសង្គ្រោះ ។
សកម្មភាពដែលអាចធ្វើបាន
-
សូមបង្ហាញរូបភាព ព្រះគ្រីស្ទមកឯថូម៉ាស ( នៅលើគេហទំព័រ ChurchofJesusChrist.org ) ខណៈដែលបងប្អូនប្រាប់អំពីបទពិសោធន៍របស់ថូម៉ាសនៅក្នុង យ៉ូហាន ២០:២៤–២៩ ។ សូមតំណាលរឿងនេះម្ដងទៀត ប៉ុន្តែលើកនេះសូមឲ្យកុមារប្រាប់ព័ត៌មានលម្អិតមួយចំនួនវិញ ។
-
សូមបង្ហាញប្រអប់មួយដែលមានរបស់របរនៅក្នុងនោះ ដែលកុមារមិនអាចមើលឃើញ ហើយសូមពិពណ៌នាពីរបស់របរនោះប្រាប់កុមារ ។ សូមសួរកុមារប្រសិនបើពួកគេជឿថាពិតជាមានរបស់របរនៅក្នុងប្រអប់នោះមែន និងឲ្យគេប្រាប់ពីមូលហេតុ ។ រួចមកសូមបង្ហាញរបស់នោះ ហើយពន្យល់ថា សេចក្ដីជំនឿគឺជាការជឿទៅលើអ្វីមួយដែលយើងមិនអាចមើលឃើញ ។ សេចក្តីជំនឿដ៏សំខាន់បំផុតដែលយើងអាចមានគឺការមានសេចក្ដីជំនឿទៅលើព្រះយេស៊ូវគ្រីស្ទ ។
ចូរមកមើលព្រះហស្តយើងចុះ ដោយ ចេហ្វ វួដ
ខ្ញុំអាចបង្ហាញសេចក្ដីស្រឡាញ់របស់ខ្ញុំចំពោះព្រះយេស៊ូវ តាមរយៈការបម្រើដល់មនុស្សដទៃ ។
តើបងប្អូនអាចបំផុសគំនិតដល់កុមារឲ្យស្រឡាញ់ និងជួយដល់អស់អ្នកដែលនៅជុំវិញខ្លួនគេដោយរបៀបណា ?
សកម្មភាពដែលអាចធ្វើបាន
-
សូមអាន យ៉ូហាន ២១:១៥–១៧ ឬសូមបង្ហាញវីដេអូ « Feed My Sheep » ( នៅលើគេហទំព័រChurchofJesusChrist.org ) ។ សូមជួយកុមារយល់ពីអ្វីដែលព្រះយេស៊ូវចង់ឲ្យពេត្រុសធ្វើ ៖ ចែកចាយដំណឹងល្អ និងអញ្ជើញមនុស្សគ្រប់គ្នាឲ្យជឿលើព្រះយេស៊ូវ ។ សូមឲ្យរូបសត្វចៀមក្រដាសទៅកុមារ ហើយសូមឲ្យពួកគេសរសេរ ឬគូរនៅលើចៀមក្រដាសនោះនូវអ្វីមួយដែលពួកគេអាចធ្វើបាន ដើម្បីជួយនរណាម្នាក់ដែលពួកគេស្គាល់ឲ្យមករកព្រះយេស៊ូវកាន់តែជិតជាងមុន ។
-
សូមជួយកុមារឲ្យគិតអំពីរឿងទាំងឡាយដែលពួកគេកំពុងធ្វើ ដើម្បីបង្ហាញសេចក្តីស្រឡាញ់ និងបម្រើអ្នកដទៃ ។ តើយើងអាចធ្វើអ្វីខ្លះដើម្បីបង្ហាញសេចក្តីស្រឡាញ់របស់យើង ?
-
សូមសរសេរឈ្មោះកុមារគ្រប់រូបនៅក្នុងថ្នាក់របស់បងប្អូននៅលើក្រដាសមួយសន្លឹក ដែលកាត់ជារាងកូនចៀម ហើយពង្រាយកូនចៀមទាំងនេះជុំវិញថ្នាក់ ។ ( រួមទាំងឈ្មោះរបស់កុមារមួយចំនួនដែលមិនបានចូលរួមទៀងទាត់ផង ) ។ សូមឲ្យកុមារប្រមូលកូនចៀម ដោយការស្វែងរកកូនចៀមមួយដោយមានឈ្មោះរបស់ពួកគេនៅលើនោះ ។ សូមជួយកុមារឲ្យគិតពីរបៀបដែលពួកគេអាចយោងទៅជួយមិត្តភក្តិម្នាក់ ដែលមិនមកព្រះវិហារ ។
បង្រៀនគោលលទ្ធិ ៖ កុមារធំៗ
ម៉ាថាយ ២៨; ម៉ាកុស ១៦; លូកា ២៤; យ៉ូហាន ២០:១–២៣
ដោយសារតែព្រះយេស៊ូវបានមានព្រះជន្មរស់ឡើងវិញ នោះមនុស្សគ្រប់រូបនឹងរស់ឡើងវិញដែរ ។
វាជាការធម្មតាដែលកុមារឆ្ងល់ពីអ្វីដែលនឹងកើតឡើងបន្ទាប់ពីយើងស្លាប់ទៅ ។ សូមពិចារណាពីរបៀបដែលបងប្អូនអាចបង្រៀនអំពីការរស់ឡើងវិញតាមរបៀបមួយដែលនឹងស្ថាបនាសេចក្ដីជំនឿរបស់ពួកគេ ។
សកម្មភាពដែលអាចធ្វើបាន
-
សូមឲ្យកុមារបិទភ្នែករបស់ពួកគេ ហើយស្រមៃថា ពួកគេកំពុងអង្គុយនៅក្បែរផ្នូរបស់ព្រះយេស៊ូវ កាលបងប្អូនអានក្នុង យ៉ូហាន ២០:១–១៧ ឬសូមសង្ខេបដំណើររឿងនៃការមានព្រះជន្មរស់ឡើងវិញរបស់ទ្រង់ ( សូមមើល « ជំពូក ៥៤ ៖ ព្រះយេស៊ូវមានព្រះជន្មរស់ឡើងវិញ » នៅក្នុង ដំណើររឿងព្រះគម្ពីរសញ្ញាថ្មី ទំព័រ ១៣៩–៤៤ ឬវីដេអូដូចគ្នានេះនៅលើគេហទំព័រ ChurchofJesusChrist.org ) ។ តើការរស់ឡើងវិញមានន័យដូចម្ដេច ? តើវានឹងមានសភាពដូចម្ដេច ដែលបានឃើញព្រះអង្គសង្គ្រោះមានព្រះជន្មរស់ឡើងវិញនោះ ?
-
សូមឲ្យកុមារម្នាក់ៗសិក្សាពីបទពិសោធន៍របស់នរណាម្នាក់ ដែលបានឃើញព្រះអង្គសង្គ្រោះដែលមានព្រះជន្មរស់ឡើងវិញ ហើយចែកចាយដល់កុមារក្នុងថ្នាក់នូវអ្វីដែលគេបានរៀន ។
-
សូមមើលវីដេអូទាំងនេះមួយ ឬច្រើនជាមួយនឹងកុមារ ៖ « Jesus Is Laid in a Tomb » , « Jesus Is Resurrected » , « Christ Appears on the Road to Emmaus » និង « The Risen Lord Appears to the Apostles » ( នៅលើគេហទំព័រChurchofJesusChrist.org ) ។ សូមអញ្ជើញកុមារឲ្យចែកចាយពីមូលហេតុដែលការមានព្រះជន្មរស់ឡើងវិញរបស់ព្រះអង្គសង្រ្គោះគឺមានសារៈសំខាន់ចំពោះពួកគេ ។
ខ្ញុំអាចមានសេចក្ដីជំនឿទៅលើព្រះយេស៊ូវគ្រីស្ទ ទោះបីជាខ្ញុំមិនបានឃើញទ្រង់ក្ដី ។
តើបងប្អូនអាចជួយកុមារឲ្យពង្រឹងសេចក្តីជំនឿរបស់ពួកគេនៅលើព្រះយេស៊ូវគ្រីស្ទបានយ៉ាងដូចម្តេច ?
សកម្មភាពដែលអាចធ្វើបាន
-
សូមអញ្ជើញកុមារឲ្យអាន យ៉ូហាន ២០:២៤–២៩ ។ ( សូមមើលវីដេអូ « Blessed Are They That Have Not Seen, and Yet Have Believed » នៅលើគេហទំព័រ ChurchofJesusChrist.orgផងដែរ ) ។ តើយើងអាចដឹងថា ព្រះយេស៊ូវគ្រីស្ទមានព្រះជន្មរស់ ទោះបីជាយើងមិនបានឃើញទ្រង់ផងយ៉ាងដូចម្តេច ?
-
សូមសរសេរពាក្យនីមួយៗក្នុងឃ្លា « មានពរហើយ អ្នកណាដែលជឿឥតឃើញសោះ » នៅលើក្រដាសដាច់ដោយឡែកពីគ្នា ។ សូមអញ្ជើញកុមារឲ្យតម្រៀបពាក្យទាំងនេះតាមលំដាប់លំដោយ ។ សូមឲ្យពួកគេប្រាប់ពីបទពិសោធន៍នានា ដែលពួកគេបានមានអារម្មណ៍ពីសេចក្ដីស្រឡាញ់របស់ព្រះអង្គសង្គ្រោះ ទោះបីជាពួកគេមិនបានឃើញទ្រង់ក្ដី ។
-
សូមឲ្យកុមារគូររូបភាពអ្វីៗដែលពួកគេអាចធ្វើបាន ដើម្បីពង្រឹងសេចក្ដីជំនឿរបស់ពួកគេ ។ សូមឲ្យពួកគេចែកចាយអ្វីដែលពួកគេគូរ ហើយចែកចាយអ្វីដែលបងប្អូនបានធ្វើដើម្បីពង្រឹងសេចក្តីជំនឿរបស់បងប្អូនលើព្រះយេស៊ូវគ្រីស្ទ ។
ខ្ញុំអាចបង្ហាញសេចក្ដីស្រឡាញ់របស់ខ្ញុំចំពោះព្រះយេស៊ូវ តាមរយៈការឲ្យចំណីចៀមរបស់ទ្រង់ ។
កុមារអាចមានឥទ្ធិពលដ៏អស្ចារ្យទៅលើអស់អ្នកដែលនៅជុំវិញពួកគេ ។ តើបងប្អូនអាចលើកទឹកចិត្តពួកគេឲ្យពង្រឹងដល់មនុស្សដទៃនៅក្នុងដំណឹងល្អដោយរបៀបណា ?
សកម្មភាពដែលអាចធ្វើបាន
-
សូមអាន យ៉ូហាន ២១:១–១៧ ជាមួយគ្នា ។ នៅពេលបងប្អូនអាន ខទី ៩–១៣ សូមឲ្យកុមារគិតពីគ្រាដែលនរណាម្នាក់បានធ្វើអាហារដ៏ពិសេសសម្រាប់ពួកគេ ហើយអញ្ជើញពួកគេឲ្យគិតអំពីរបៀបដែលព្រះយេស៊ូវឲ្យចំណីយើងខាងវិញ្ញាណ ។ នៅពេលបងប្អូនអាន ខទី ១៥–១៧ សូមជំនួសឈ្មោះរបស់ ស៊ីម៉ូនជាមួយនឹងឈ្មោះរបស់កុមារ ។ តើនរណាគឺជាចៀមរបស់ព្រះយេស៊ូវ ? តើយើងអាចជួយទ្រង់ដើម្បីឲ្យចំណីដល់ពួកគេយ៉ាងដូចម្តេច ?
-
សូមចែកនំមួយជាមួយនឹងកុមារ ។ កាលពួកគេកំពុងញ៉ាំនំនោះ សូមសួរពួកគេថា តើការចែកចាយដំណឹងល្អដល់នរណាម្នាក់គឺដូចជាការឲ្យចំណីដល់ពួកគេដោយរបៀបណា ។
លើកទឹកចិត្តឲ្យមានការរៀនសូត្រនៅឯគេហដ្ឋាន
សូមឲ្យកុមារប្រើទំព័រសកម្មភាពសប្ដាហ៍នេះ ដើម្បីបង្រៀនដល់ក្រុមគ្រួសាររបស់ពួកគេអំពីការមានព្រះជន្មរស់ឡើងវិញរបស់ព្រះអង្គសង្រ្គោះ ។
ការកែលម្អការបង្រៀនរបស់យើង
តាមដានការអញ្ជើញឲ្យធ្វើសកម្មភាព ។ នៅពេលបងប្អូនអញ្ជើញឲ្យកុមារធ្វើសកម្មភាពទៅលើអ្វីដែលពួកគេកំពុងរៀន សូមតាមដានការអញ្ជើញនោះ នៅពេលបង្រៀនលើកក្រោយ ។ ការណ៍នេះបង្ហាញដល់កុមារថា បងប្អូនយកចិត្តទុកដាក់អំពីរបៀបដែលដំណឹងល្អផ្តល់ពរជ័យដល់ជីវិតរបស់ពួកគេ ។ នៅពេលពួកគេចែកចាយបទពិសោធន៍របស់ពួកគេ នោះពួកគេនឹងត្រូវបានពង្រឹង ហើយនឹងជួយគ្នាទៅវិញទៅមកដើម្បីរស់នៅតាមដំណឹងល្អ ។