ជំពូក ៥៤
ព្រះយេស៊ូវមានព្រះជន្មរស់ឡើងវិញ
ព្រះសពព្រះអង្គសង្គ្រោះបានបញ្ចុះនៅក្នុងផ្នូរ រហូតដល់ព្រឹកថ្ងៃអាទិត្យ ។ ស្រាប់តែមានទេវតាពីរអង្គបានយាងមក ប្រមៀលថ្មចេញពីមាត់ផ្នូរ ។
មានស្ត្រីម្នាក់ដែលព្រះយេស៊ូវបានប្រោសឲ្យជាឈ្មោះ ម៉ារា ម៉ាក់ដាឡា បានទៅឯផ្នូរ ។ នាងភ្ញាក់ផ្អើលពេលឃើញថា ថ្មត្រូវបានប្រមៀលចេញ ។ ព្រះសពព្រះយេស៊ូវមិននៅក្នុងផ្នូរទៀតឡើយ ។
នាងបានរត់ទៅប្រាប់ពេត្រុស និង យ៉ូហាន ថា មានគេមកយកព្រះសពព្រះអង្គសង្គ្រោះទៅបាត់ហើយ ។ នាងពុំដឹងថាព្រះសពទ្រង់នៅកន្លែងណាទេ ។
ពេត្រុស និង យ៉ូហាន បានរត់ទៅឯផ្នូរ ។ ពួកគេបានឃើញសំពត់ដែលបានរុំព្រះយេស៊ូវ ប៉ុន្តែព្រះសពព្រះយេស៊ូវមិននៅទីនោះទេ ។ ពេត្រុស និង យ៉ូហាន ពុំដឹងថាត្រូវធ្វើដូចម្ដេចឡើយ ។ ពួកគេបានត្រឡប់ទៅផ្ទះវិញ ។
ម៉ារា ម៉ាក់ដាឡា បានបន្តនៅឯផ្នូរទាំងយំផង ។ នៅពេលនាងមើលទៅផ្នូរម្ដងទៀត នាងបានឃើញទេវតាពីរអង្គ ។
ទេវតាមានបន្ទូលសួរ ម៉ារា ម៉ាក់ដាឡា អំពីមូលហេតុដែលនាងយំ ។ នាងបានទូលថា មានគេបានយកព្រះសពព្រះយេស៊ូវទៅហើយ ។ នាងពុំដឹងថាព្រះសពទ្រង់នៅកន្លែងណាទេ ។
នាងបានងាកក្រោយ ហើយបានឃើញមនុស្សម្នាក់ ។ នាងបានគិតថា គាត់គឺជាអ្នកថែសួន ។ បុរសនោះបានសួរអំពីមូលហេតុដែលនាងយំ ។ នាងបានសួរបុរសនោះ ថាតើគាត់ដឹងអំពីទីកន្លែងដែលគេយកព្រះសពព្រះយេស៊ូវទៅឬទេ ។
លំដាប់នោះ បុរសនោះក៏បានពោលថា « ម៉ារាអើយ » ហើយនាងបានដឹងថាបុរសនោះគឺជាព្រះយេស៊ូវ ។ ទ្រង់បានមានបន្ទូលឲ្យនាងទៅប្រាប់ពួកសាវកថា ទ្រង់មានព្រះជន្មរស់ឡើងវិញហើយ ។
ម៉ារា ម៉ាក់ដាឡា និង ស្ត្រីឯទៀតៗ បានប្រាប់ពួកសាវកថា ព្រះយេស៊ូវ បានមានព្រះជន្មរស់ឡើងវិញហើយ ។ ដំបូង ពួកសាវកពុំបានជឿពួកគេទេ ។
ក្រោយមក កាលពួកសាវកកំពុងជជែកជាមួយគ្នា ព្រះយេស៊ូវបានបង្ហាញព្រះកាយមកក្នុងបន្ទប់ ។ ពួកសាវកមានការភ័យខ្លាច ។ ពួកគេនៅតែគិតថា ទ្រង់បានសុគតហើយ ។
ព្រះអង្គសង្គ្រោះបានមានបន្ទូលឲ្យពួកគេពាល់ព្រះហស្ត និង ព្រះបាទាទ្រង់ ។ ទ្រង់មានព្រះជន្មរស់ឡើងវិញ—ព្រះកាយ និង ព្រះវិញ្ញាណទ្រង់បានផ្គុំគ្នាសារជាថ្មី ។
ពួកសាវកត្រេកអរដែលបានឃើញទ្រង់ ។ ទ្រង់មានបន្ទូលចង់សោយអាហារ ។ ពួកគេបានយកត្រី និង ទឹកឃ្មុំថ្វាយទ្រង់សោយ ។ ទ្រង់ក៏បានសោយ ។
ព្រះយេស៊ូវគឺជាបុគ្គលដំបូងដែលបានរស់ឡើងវិញ ។ ក្រោយមកទៀត មានមនុស្សជាច្រើនដែលបានរស់ឡើងវិញ ហើយបានបង្ហាញខ្លួនឲ្យប្រជាជននៅក្រុងយេរ៉ូសាឡិមឃើញ ។ ព្រះយេស៊ូវបានមានបន្ទូលថា « ខ្ញុំជាសេចក្តីរស់ឡើងវិញ ហើយជាជីវិត » ។ ដោយសារតែទ្រង់បានយកឈ្នះលើសេចក្ដីស្លាប់ នោះយើងនឹងរស់ឡើងវិញនៅថ្ងៃមួយ ។