ជំពូក ៥៥
ពួកសាវកដឹកនាំសាសនាចក្រ
បន្ទាប់ទ្រង់បានមានព្រះជន្មរស់ឡើងវិញ ព្រះយេស៊ូវបានគង់នៅជាមួយពួកសាវកអស់រយៈពេល៤០ថ្ងៃ ។ ទ្រង់បានត្រាស់បង្រៀនសេចក្ដីជាច្រើន អំពីដំណឹងល្អ និង សាសនាចក្រទ្រង់ ។
ទ្រង់មានបន្ទូលប្រាប់ពួកគេ ឲ្យបង្រៀនដំណឹងល្អដល់មនុស្សទាំងពួង ។ ទ្រង់ក៏បានមានបន្ទូលដែរថា ទ្រង់នឹងយាងចេញពីពួកគេទៅក្នុងពេលឆាប់ៗនេះ ប៉ុន្តែព្រះវិញ្ញាណនឹងយាងមកជួយពួកគេ ។
ពួកសាវកបានឃើញព្រះយេស៊ូវយាងឡើងទៅលើពពក ។ ពួកទេវតាគ្រងព្រះពស្តសមានបន្ទូលប្រាប់ពួកសាវកថា ព្រះយេស៊ូវនឹងយាងត្រឡប់មកវិញម្ដងទៀតនៅថ្ងៃមួយ ។
ឥឡូវនេះ ពួកសាវកគឺជាថ្នាក់ដឹកនាំសាសនាចក្រនៃព្រះយេស៊ូវគ្រីស្ទលើផែនដី ។ ពេត្រុសគឺជាប្រធាន ហើយ យ៉ាកុប និង យ៉ូហាន គឺជាទីប្រឹក្សា ។
ម៉ាថាយ ១៦:១៨–១៩, គោលលទ្ធិ និង សេចក្ដីសញ្ញា ៨១:១–២, Jesus the Christ ទំព័រ ២១៩–២២០
មានសាវកតែដប់មួយនាក់ប៉ុណ្ណោះ—ព្រោះយូដាសបានស្លាប់ហើយ ។ ព្រះវរបិតាសួគ៌បានមានបន្ទូលប្រាប់ពួកសាវក ឲ្យជ្រើសរើស ម៉ាត់ធាស ធ្វើជាសាវក ។ ពួកសាវកទាំងអស់គ្នាមានការហៅបម្រើមួយដ៏ពិសេសនៅក្នុងបព្វជិតភាព ។
ពួកសាវក និង ពួកសិស្សដទៃទៀតបានមានសេចក្ដីជំនឿលើព្រះអម្ចាស់ ។ ពួកគេបានគោរពប្រតិបត្តិតាមព្រះបញ្ញត្តិទាំងឡាយរបស់ទ្រង់ ។ ពួកគេស្រឡាញ់គ្នាទៅវិញទៅមក ។
ដោយមានបព្វជិតភាព និង ព្រះចេស្តានៃព្រះវិញ្ញាណបរិសុទ្ធ នោះពួកសាវកអាចធ្វើកិច្ចការជាច្រើន ។ ពួកគេបានព្យាបាលអ្នកឈឺ និង ធ្វើជាអ្នកផ្សព្វផ្សាយសាសនា ។ ពួកគេបានបង្រៀនអំពីព្រះយេស៊ូវគ្រីស្ទ និង ដំណឹងល្អរបស់ទ្រង់ ។ មានមនុស្សជាច្រើនបានជឿលើពាក្យពេចន៍របស់ពួកសាវក ហើយបានចូលសាសនាចក្រ ។ សមាជិកសាសនាចក្រត្រូវបានហៅថា ពួកបរិសុទ្ធ ។