រឿងប្រៀបប្រដូចទីបី
កូនប្រុសវង្វេង
បុរសម្នាក់មានកូនប្រុសពីរនាក់ ។ បុរសនោះបានសន្យាថានឹងចែកប្រាក់ឲ្យពួកគេ នៅពេលគាត់ស្លាប់ ។ កូនប្រុសពៅមិនចង់រង់ចាំឡើយ ។ វាបានសូមឪពុកវាចែកចំណែកប្រាក់មកឲ្យវា ។ ឪពុកវាក៏បានចែកចំណែកនោះឲ្យវា ។
កូនប្រុសនោះបានទទួលយកប្រាក់ ហើយចេញពីផ្ទះទៅ ។ វាបានទៅស្រុកគេ ។ កូនប្រុសនោះបានប្រព្រឹត្តបាបម្ដងហើយម្ដងទៀត ។ វាបានចាយបង្ហិនប្រាក់ទាំងអស់ ។
ទីបំផុត កូនប្រុសនោះគ្មានប្រាក់ទិញអាហារបរិភោគឡើយ ។ វាឃ្លានខ្លាំងណាស់ ។ វាបានសូមជំនួយពីបុរសម្នាក់ ។ បុរសនោះបានជួលវាឲ្យដាក់ចំណីជ្រូក ។
កូនប្រុសនោះឃ្លានខ្លាំងណាស់ ទើបវាចង់ចម្អែតពោះដោយចំណីជ្រូក ។ វាបានដឹងថា ពួកបាវបម្រើនៅក្នុងផ្ទះឪពុកវា មានអាហារបរិភោគល្អជាងវាផង ។
វាបានសម្រេចចិត្តប្រែចិត្ត ហើយសូមធ្វើជាអ្នកបម្រើក្នុងផ្ទះឪពុកវា ។ កាលកូនប្រុសនោះដើរមកផ្ទះវិញ ឪពុកវាបានឃើញវាដើរមក ។
ឪពុកបានរត់ទៅឯកូនប្រុសគាត់ ។ គាត់បានឱប ហើយថើបវា ។
កូនប្រុសនោះបានប្រាប់ឪពុកវាថា វាបានប្រព្រឹត្តបាប ។ វាមានអារម្មណ៍ថា មិនសក្ដិសមនឹងត្រូវបានហៅថាជាកូនប្រុសរបស់ឪពុកវាទេ ។
ឪពុកនោះបានប្រាប់បាវបម្រើគាត់ ឲ្យនាំយកសំលៀកបំពាក់ល្អបំផុតមកបំពាក់ឲ្យវា ។ បាវបម្រើបានបំពាក់ស្បែកជើង និង ចិញ្ចៀនឲ្យវា ។
ឪពុកនោះបានប្រាប់ឲ្យបាវបម្រើរៀបចំពិធីស៊ីលៀងមួយ ។ គាត់ចង់ឲ្យមនុស្សគ្រប់គ្នាមកអបអរសាទរ ។ កូនប្រុសដែលបានប្រព្រឹត្តបាបនោះបានប្រែចិត្ត ហើយត្រឡប់មកផ្ទះវិញហើយ ។
កូនប្រុសច្បងបានធ្វើការនៅឯចម្ការ ។ កាលគាត់ត្រឡប់មកផ្ទះវិញ គាត់បានឮសូរភ្លេង និង របាំ ។ បាវបម្រើម្នាក់ជម្រាបគាត់ថា ប្អូនប្រុសរបស់គាត់បានត្រឡប់មកផ្ទះវិញហើយ ។ ឪពុករបស់គាត់ចង់ឲ្យមនុស្សគ្រប់គ្នាមកអបអរសាទរ ។
កូនប្រុសច្បងក៏ខឹង មិនព្រមចូលទៅក្នុងផ្ទះសោះ ។ ឪពុកគាត់បានចេញមកនិយាយជាមួយគាត់ ។
ឪពុកមានអំណរគុណដែលកូនប្រុសច្បង តែងតែនៅជាមួយលោក ។ អ្វីគ្រប់យ៉ាងរបស់ឪពុកគាត់នឹងក្លាយជារបស់គាត់ ។ ឪពុកគាត់ក៏បានប្រាប់គាត់ទៀតថា វាជារឿងត្រឹមត្រូវហើយដែលយើងអបអរសាទរនោះ ។ លោកមានចិត្តរីករាយដែលកូនប្រុសពៅរបស់លោក បានប្រែចិត្ត ហើយត្រឡប់មកផ្ទះវិញ ។
ព្រះយេស៊ូវមានបន្ទូលប្រាប់ពួកផារិស៊ី នូវរឿងប្រៀបប្រដូចចំនួនបី ដោយសារតែទ្រង់សព្វព្រះទ័យឲ្យពួកគេដឹង ថា តើព្រះវរបិតាសួគ៌ស្រឡាញ់មនុស្សគ្រប់គ្នាប៉ុណ្ណា ។ ទ្រង់ស្រឡាញ់មនុស្សដែលគោរពប្រតិបត្តិទ្រង់ ។ ទ្រង់ក៏ស្រឡាញ់មនុស្សមានបាបដែរ ប៉ុន្តែព្រះវរបិតាសួគ៌មិនអាចប្រទានពរដល់ពួកគេបានទេ លុះត្រាតែពួកគេប្រែចិត្ត ។ ទ្រង់សព្វព្រះទ័យឲ្យមនុស្សមានបាបប្រែចិត្ត ហើយត្រឡប់ទៅរកទ្រង់វិញ ។ ហើយទ្រង់សព្វព្រះទ័យឲ្យយើងជួយពួកគេប្រែចិត្ត ហើយបានរីករាយនៅពេលពួកគេត្រឡប់មកវិញ ។