ជំពូក ១៨
ព្រះយេស៊ូវជ្រើសរើសពួកសាវក
ថ្ងៃមួយ ព្រះយេស៊ូវបានបង្រៀនមនុស្សពីលើទូកនៅឯឆ្នេរសមុទ្រកាលីឡេ ។ ទូកនោះជារបស់បុរសម្នាក់ឈ្មោះពេត្រុស ។
ពេត្រុស ព្រមទាំងមិត្តភក្ដិរបស់គាត់ បាននេសាទត្រីពេញមួយយប់ដោយចាប់ត្រីពុំបានសោះ ។ បន្ទាប់ពីព្រះយេស៊ូវបានបញ្ចប់ការបង្រៀន ទ្រង់បានមានបន្ទូលប្រាប់ពេត្រុសឲ្យចែវទូកទៅកាន់ទឹកជ្រៅ ។ បន្ទាប់មក ទ្រង់បានមានបន្ទូលប្រាប់ពេត្រុស និង មិត្តភក្ដិរបស់គាត់ ឲ្យទម្លាក់សំណាញ់ទៅក្នុងទឹក ។
ពួកគាត់ដាក់ជាប់បានត្រីសន្ធឹក រហូតដល់សំណាញ់ចាប់ផ្ដើមរហែក ។
ពេត្រុសបានហៅមិត្តភក្ដិរបស់គាត់ ដែលនៅលើទូកមួយទៀតឲ្យមកជួយ ។ ទូកទាំងពីរពេញទៅដោយត្រី ហើយចាប់ផ្ដើមលិច ។
ពេត្រុស និង មិត្តភក្ដិរបស់គាត់មានសេចក្ដីអស្ចារ្យ ។ ពួកគាត់បានដឹងថា ព្រះយេស៊ូវគ្រីស្ទបានធ្វើឲ្យហេតុការណ៍នេះកើតឡើង ។
ពេត្រុសបានលុតជង្គង់ចុះនៅទៀបព្រះបាទរបស់ព្រះអង្គសង្គ្រោះ ។ គាត់បានពោលថា គាត់មិនសក្ដិសមនឹងនៅក្បែរព្រះយេស៊ូវឡើយ ។ ព្រះយេស៊ូវបានមានបន្ទូលប្រាប់ពេត្រុស កុំឲ្យភ័យឡើយ ។
មិត្តភក្ដិរបស់ពេត្រុសពីរនាក់ យ៉ាកុប និង យ៉ូហាន គឺជាបងប្អូនប្រុសនឹងគ្នា ។ ព្រះយេស៊ូវបានហៅពេត្រុស យ៉ាកុប និង យ៉ូហាន ឲ្យដើរតាមទ្រង់ ហើយធ្វើជា « អ្នកនេសាទមនុស្ស » វិញ ។ បុរសទាំងបីនាក់នោះលះបង់អ្វីគ្រប់យ៉ាងដែលពួកគាត់មាន ហើយបានទៅជាមួយព្រះយេស៊ូវ ។ ព្រះអង្គសង្គ្រោះក៏បានសុំឲ្យបុរសឯទៀតដើរតាមទ្រង់ដែរ ។
ព្រះយេស៊ូវបានជ្រើសរើសសាវកដប់ពីររូប ដើម្បីដឹកនាំសាសនាចក្ររបស់ទ្រង់ ។ ទ្រង់បានអធិស្ឋានពេញមួយយប់ ដើម្បីទ្រង់អាចជ្រើសរើសបុរសដ៏ត្រឹមត្រូវ ។ លុះព្រឹកឡើង ទ្រង់បានជ្រើសរើស ហើយតែងតាំងបុរសដប់ពីររូប ដោយប្រទានដល់ពួកគេនូវបព្វជិតភាព និង សិទ្ធិអំណាចដើម្បីធ្វើជាសាវក ។
ពួកសាវកបានធ្វើដំណើរទៅកាន់ទីក្រុងជាច្រើន ។ ពួកគាត់បានបង្រៀនដំណឹងល្អ ហើយព្យាបាលមនុស្ស ។ ពួកគាត់បានត្រឡប់មកវិញដើម្បីទូលប្រាប់ព្រះយេស៊ូវ នូវអ្វីដែលពួកគាត់បានធ្វើ ។