ជំពូក ៥
ព្រះយេស៊ូវគ្រីស្ទបានប្រសូតមក
ចក្រភពរ៉ូមម៉ាំងបានចេញច្បាប់មួយថា មនុស្សគ្រប់គ្នាត្រូវតែចុះបញ្ជីបង់ពន្ធ ។ យ៉ូសែប និង ម៉ារា បានរស់នៅឯក្រុងណាសារ៉ែត ។ ពួកគេត្រូវធ្វើដំណើរចម្ងាយ ១០៥ គ.ម ទៅភូមិបេថ្លេហិម ដើម្បីចុះបញ្ជីបង់ពន្ធ ។
វាពុំងាយស្រួលនោះទេសម្រាប់ម៉ារា ដើម្បីធ្វើដំណើរទៅភូមិបេថ្លេហិម ។ នៅមិនយូរទេ នាងនឹងសម្រាលកូនជាមិនខាន ។
នៅពេលយ៉ូសែប និង ម៉ារា បានមកដល់ភូមិបេថ្លេហិម បន្ទប់ទាំងអស់បានពេញ ។ ម៉ារា និង យ៉ូសែប ត្រូវស្នាក់នៅក្នុងក្រោលសត្វ ។ ក្រោលសត្វជាកន្លែងដែលគេរក្សាសត្វពាហនៈ ។
ព្រះឱរសបានប្រសូតនៅទីនោះ ។ ម៉ារាបានរុំទ្រង់នឹងសំពត់ ហើយដាក់ទ្រង់ឲ្យផ្ទុំក្នុងស្នូក ។ យ៉ូសែប និង ម៉ារា បានថ្វាយព្រះនាមដល់ព្រះឱរសថា យេស៊ូវ ។
នារាត្រីដែលព្រះយេស៊ូវបានប្រសូត មានពួកគង្វាលចៀមកំពុងមើលថែហ្វូងចៀមរបស់ខ្លួននៅឯវាលក្បែរភូមិបេថ្លេហិម ។ ទេវតាមួយអង្គបានយាងមកជួបពួកគេ ។ ពួកគង្វាលចៀមបានភ័យស្លុត ។
ទេវតាបានមានបន្ទូលប្រាប់ពួកគេកុំឲ្យខ្លាច ។ ទ្រង់មានដំណឹងដ៏អស្ចារ្យ ៖ ព្រះអង្គសង្គ្រោះ ព្រះយេស៊ូវគ្រីស្ទ បានប្រសូតនៅឯភូមិបេថ្លេហិម ។ ពួកគេនឹងឃើញទ្រង់កំពុងផ្ទុំនៅក្នុងស្នូក ។
ពួកគង្វាលចៀមបានទៅឯភូមិបេថ្លេហិម ជាទីកន្លែងដែលពួកគេបានឃើញព្រះឱរសយេស៊ូវ ។
ពួកគង្វាលមានក្ដីរីករាយដោយបានឃើញព្រះអង្គសង្គ្រោះ ។ ពួកគេបានបានប្រាប់មនុស្សដទៃទៀត អំពីអ្វីគ្រប់យ៉ាងដែលពួកគេបានឮ ហើយឃើញ ។