« ថ្ងៃទី ៧–១៣ ខែ សីហា ។ រ៉ូម ១–៦ ៖ ‹ ព្រះចេស្តានៃព្រះសម្រាប់នឹងជួយសង្រ្គោះ › » ចូរមកតាមខ្ញុំ—សម្រាប់អង្គការបឋមសិក្សា ៖ ព្រះគម្ពីរសញ្ញាថ្មី ឆ្នាំ ២០២៣ ( ឆ្នាំ ២០២២ )

« ថ្ងៃទី ៧–១៣ ខែ សីហា ។ រ៉ូម ១–៦ » ចូរមកតាមខ្ញុំ—សម្រាប់អង្គការបឋមសិក្សា ៖ ឆ្នាំ ២០២៣

ថ្ងៃទី ៧–១៣ ខែ សីហា

រ៉ូម ១–៦

« ព្រះចេស្តានៃព្រះសម្រាប់នឹងជួយសង្គ្រោះ »

តើការបំផុសគំនិតណាខ្លះ ដែលបងប្អូនទទួលបាន ពេលបងប្អូនអាន រ៉ូម ១–៦ ? ការបំផុសគំនិតទាំងនេះអាចជួយបងប្អូនឲ្យជ្រើសរើសគំនិតសម្រាប់ការបង្រៀនដូចខាងក្រោមនេះ ឬបងប្អូនរៀបចំដោយខ្លួនឯងផ្ទាល់ ។

អញ្ជើញឲ្យចែកចាយ

សូមអញ្ជើញកុមារឲ្យចែកចាយអ្វីដែលពួកគេបានធ្វើ ដើម្បីឆ្លើយតបទៅនឹងការអញ្ជើញនានា ដែលបងប្អូនបានផ្ដល់ដល់ពួកគេនៅក្នុងមេរៀនកាលពីសប្ដាហ៍មុន ។

បង្រៀនគោលលទ្ធិ ៖ កុមារតូចៗ

រ៉ូម ១:១៦–១៧

ខ្ញុំអាចបង្ហាញសេចក្ដីជំនឿរបស់ខ្ញុំលើព្រះយេស៊ូវគ្រីស្ទ តាមរយៈការធ្វើតាមទ្រង់ ។

ប៉ុលបានបង្រៀនថា ដំណឹងល្អមានអំណាចនាំយកសេចក្ដីសង្គ្រោះទៅដល់មនុស្សគ្រប់រូបដែលរស់នៅដោយសេចក្ដីជំនឿលើព្រះយេស៊ូវគ្រីស្ទ ។ តើបងប្អូនអាចជួយកុមារឲ្យបង្ហាញសេចក្ដីជំនឿរបស់ពួកគេលើព្រះយេស៊ូវគ្រីស្ទ តាមរយៈការធ្វើតាមទ្រង់តាមរបៀបណា ?

សកម្មភាពដែលអាចធ្វើបាន

សូមអាន រ៉ូម ១:១៧ ឲ្យកុមារស្ដាប់ ហើយជួយពួកគេឲ្យទន្ទេញចាំឃ្លា « មនុស្សសុចរិតនឹងរស់នៅ ដោយអាងសេចក្តីជំនឿ » ។ បងប្អូនអាចចាត់ឲ្យកុមារអានមួយពាក្យម្នាក់ៗនៅក្នុងឃ្លានោះ ហើយឲ្យពួកគេថាពាក្យនោះ នៅពេលបងប្អូនចង្អុលទៅកាន់ពួកគេ ។ សូមពន្យល់ថា ឃ្លានេះមានន័យថា យើងគួរតែមានសេចក្តីជំនឿលើព្រះយេស៊ូវគ្រីស្ទ ។ សូមសួរកុមារ តើពួកគេដឹងថាសេចក្តីជំនឿគឺជាអ្វីដែរឬទេ ។ សូមបង្ហាញរូបភាពព្រះយេស៊ូវគ្រីស្ទ ហើយពន្យល់ថា យើងជឿថាទ្រង់មានព្រះជន្មពិត ទោះជាយើងមិនធ្លាប់មើលឃើញទ្រង់ក្ដី ។ នេះគឺជាសេចក្ដីជំនឿ—ការជឿលើអ្វីមួយ ទោះជាយើងមិនធ្លាប់ឃើញវាក្ដី ។
សូមពន្យល់ថា យើងបង្ហាញសេចក្ដីជំនឿរបស់យើងលើព្រះយេស៊ូវគ្រីស្ទ តាមរយៈការធ្វើតាមទ្រង់ ។ សូមលាក់រូបភាពនៅជុំវិញបន្ទប់រៀន ជារូបភាពនៃមនុស្សដែលធ្វើតាមអ្វីដែលព្រះយេស៊ូវបានត្រាស់បង្គាប់ឲ្យធ្វើ ។ សូមទុកឲ្យកុមារដាក់វេនគ្នាស្វែងរករូបភាព ហើយពិពណ៌នាអំពីរូបភាពទាំងនោះ ។ តើយើងអាចធ្វើអ្វីខ្លះ ដើម្បីធ្វើតាមព្រះយេស៊ូវ ?
សូមឲ្យកុមារម្នាក់បិទភ្នែករបស់គាត់ ឬនាង ហើយណែនាំគាត់ ឬនាងឲ្យដើរក្នុងបន្ទប់ឆ្ពោះទៅរករូបភាពព្រះយេស៊ូវ ។ ប្រសិនបើមានពេល សូមឲ្យកុមារផ្សេងទៀតប្ដូរវេនគ្នាធ្វើ ។ សូមជួយកុមារឲ្យយល់ថា ពួកគេអាចធ្វើតាមការបង្រៀនរបស់ព្រះយេស៊ូវបាន គឺដូចជាពួកគេបានធ្វើតាមការណែនាំរបស់បងប្អូនដែរ ។

រ៉ូម ៦:១–១១

ការទទួលពិធីបុណ្យជ្រមុជទឹក គឺដូចជាការក្លាយជាមនុស្សថ្មីម្នាក់ ។

កុមារដែលបងប្អូនបង្រៀន កំពុងតែរៀបចំខ្លួនទទួលពិធីបុណ្យជ្រមុជទឹក ។ តើពួកគេអាចរៀនអ្វីខ្លះអំពីពិធីបុណ្យជ្រមុជទឹកចេញពី រ៉ូម ៦ ?

សកម្មភាពដែលអាចធ្វើបាន

សូមអញ្ជើញកុមារឲ្យថាតាមបងប្អូននូវឃ្លា « ដើរក្នុងជីវិតបែបថ្មី » ( រ៉ូម ៦:៤ ) ។ សូមប្រាប់កុមារអំពីអត្ថន័យរបស់វាចំពោះបងប្អូន ។ ឧទាហរណ៍ បងប្អូនអាចចែកចាយអនុស្សាវរីយ៍អំពីថ្ងៃដែលបងប្អូនបានទទួលបុណ្យជ្រមុជទឹក និងនិយាយអំពីរបៀបដែលពិធីបុណ្យជ្រមុជទឹករបស់បងប្អូនបានជួយបងប្អូនឲ្យប្រែក្លាយកាន់តែដូចជាព្រះយេស៊ូវគ្រីស្ទ ។ សូមប្រើទំព័រសកម្មភាពនេះដើម្បីបង្រៀនកុមារថា ពិធីបុណ្យជ្រមុជទឹកជួយយើងឲ្យប្រែក្លាយជាមនុស្សថ្មី ។
ប្រសិនបើមានកុមារណាម្នាក់ធ្លាប់បានចូលរួមពិធីបុណ្យជ្រមុជទឹក សូមឲ្យពួកគេចែកចាយពីបទពិសោធន៍របស់ពួកគេ ។ សូមបង្ហាញរូបភាពអំពីមនុស្សម្នាក់កំពុងទទួលបុណ្យជ្រមុជទឹក ( សូមមើល សៀវភៅរូបភាពដំណឹងល្អ ល.រ. ៣៥, ១០៣–១០៤ ) ។ សូមជួយកុមារឲ្យយល់ថា នៅឯពិធីបុណ្យជ្រមុជទឹក យើងចុះសេចក្តីសន្យាដើម្បីប្រែក្លាយឲ្យតែដូចជាព្រះយេស៊ូវ ។ សូមអញ្ជើញពួកគេឲ្យគូររូបភាពរបស់ពួកគេផ្ទាល់បានទទួលបុណ្យជ្រមុជទឹក ហើយចែកចាយអ្វីដែលពួកគេអាចធ្វើបាន ដើម្បីរៀបចំខ្លួនសម្រាប់ពិធីបុណ្យជ្រមុជទឹករបស់ពួកគេផ្ទាល់ ។
សូមច្រៀងចម្រៀងមួយបទអំពីពិធីបុណ្យជ្រមុជទឹក ដូចជាបទ « ពេលខ្ញុំបានជ្រមុជទឹក » ( សៀវភៅចម្រៀងកុមារ ទំព័រ ៥៣ ) ។ តើយើងរៀនអ្វីខ្លះអំពីពិធីបុណ្យជ្រមុជទឹកនៅក្នុងបទចម្រៀងនេះ ?

កុមារម្នាក់កំពុងទទួលបុណ្យជ្រមុជទឹក — ពិធីបុណជ្រមុជទឹកជានិមិត្តរូបនៃការចាប់ផ្ដើមជីវិតថ្មីមួយ ក្នុងនាមជាសិស្សម្នាក់របស់ព្រះគ្រីស្ទ ។

បង្រៀនគោលលទ្ធិ ៖ កុមារធំៗ

រ៉ូម ១:១៦–១៧

ខ្ញុំអាចបង្ហាញសេចក្ដីជំនឿរបស់ខ្ញុំលើព្រះយេស៊ូវគ្រីស្ទ តាមរយៈការធ្វើតាមទ្រង់ ។

ប៉ុលបានបង្រៀនថា ដំណឹងល្អមានអំណាចនាំយកសេចក្ដីសង្គ្រោះទៅដល់មនុស្សគ្រប់រូបដែលរស់នៅដោយសេចក្ដីជំនឿលើព្រះយេស៊ូវគ្រីស្ទ ។ សេចក្ដីជំនឿលើព្រះយេស៊ូវគ្រីស្ទគឺជាគោលការណ៍ទីមួយនៃដំណឹងល្អ ។ វាជំរុញចិត្តយើងឲ្យគោរពប្រតិបត្តិតាមព្រះបញ្ញត្តិ ។ តើបងប្អូនអាចជួយកុមារឲ្យយល់អំពីសេចក្ដីជំនឿកាន់តែច្បាស់តាមរបៀបណា ?

សកម្មភាពដែលអាចធ្វើបាន

សូមឲ្យកុមារម្នាក់រកមើលទីតាំងក្រុងរ៉ូមនៅលើផែនទី ។ សូមជួយកុមារឲ្យយល់ថា នៅប៉ុន្មានសប្ដាហ៍ក្រោយទៀត ពួកគេនឹងរៀនអំពីសំបុត្រទាំងឡាយដែលប៉ុលបានសរសេរទៅកាន់សមាជិកសាសនាចក្រនៅទីកន្លែងផ្សេងៗគ្នា ដោយចាប់ផ្ដើមជាមួយសំបុត្ររបស់លោកទៅកាន់ពួករ៉ូម ។
សូមសរសេរអត្ថបទចេញពី រ៉ូម ១:១៦ នៅលើក្ដារខៀន ដោយលុបពាក្យខ្លះហើយ ជំនួសវិញដោយចន្លោះទទេ ។ សូមឲ្យកុមារស្វែងរកខគម្ពីរនោះ ហើយបំពេញចន្លោះនោះ ។ សូមអញ្ជើញកុមារឲ្យចែកចាយអ្វីដែល « ខ្ញុំគ្មានសេចក្តីខ្មាសចំពោះដំណឹងល្អនៃព្រះគ្រីស្ទទេ » មានន័យចំពោះពួកគេ ។
សូមអញ្ជើញកុមារអានឮៗ រ៉ូម ១:១៧ រួចឲ្យកុមារដទៃទៀតស្ដាប់ ស្វែងរកពាក្យដែលថ្លែងដដែលៗ ។ តើការ « រស់នៅដោយអាងសេចក្តីជំនឿ » មានន័យដូចម្ដេច ? សូមជួយកុមារឲ្យស្វែងរកនិយមន័យនៃពាក្យសេចក្តីជំនឿនៅក្នុងធនធានដូចជា សេចក្តីណែនាំដល់បទគម្ពីរទាំងឡាយ « សេចក្តីជំនឿ » ( នៅលើគេហទំព័រ scriptures.ChurchofJesusChrist.org ) ។ តើជីវិតរបស់យើងនឹងមានភាពខុសគ្នាដូចម្ដេច ប្រសិនបើយើងពុំមានសេចក្ដីជំនឿលើព្រះយេស៊ូវគ្រីស្ទទេនោះ ?
សូមបង្ហាញដល់កុមារនូវរុក្ខជាតិមួយដើម និង គ្រាប់ពូជមួយគ្រាប់ រួចសួរអំពីរបៀបដែលយើងជួយឲ្យគ្រាប់ពូជមួយក្លាយជារុក្ខជាតិ ។ សូមពន្យល់ថា នៅពេលយើងដាក់ដាំ ហើយស្រោចទឹកគ្រាប់ពូជ នោះយើងកំពុងបង្ហាញថា យើងមានសេចក្ដីជំនឿថាវានឹងដុះធំឡើង ។ តើយើងអាចបង្ហាញថា យើងមានសេចក្ដីជំនឿលើព្រះយេស៊ូវគ្រីស្ទបានយ៉ាងដូចម្ដេច ? សូមពិចារណាច្រៀងចម្រៀងមួយបទអំពីសេចក្តីជំនឿ ដូចជាបទ « ជំនឿ » ( សៀវភៅចម្រៀងកុមារ ទំព័រ ៥០ ) ដែលជាផ្នែកមួយនៃសកម្មភាពនេះ ។

រ៉ូម ៣:២៣–២៤

យើងទាំងអស់គ្នាត្រូវការព្រះយេស៊ូវគ្រីស្ទ ដើម្បីបានការអត់ទោសពីអំពើបាបរបស់យើង ។

ប៉ុលចង់ឲ្យពួករ៉ូមយល់ថា សេចក្តីសង្គ្រោះកើតឡើងតែតាមរយៈព្រះយេស៊ូវគ្រីស្ទ និងព្រះគុណរបស់ទ្រង់ប៉ុណ្ណោះ ។ សូមពិចារណាអំពីរបៀបដែលបងប្អូនអាចបង្រៀនសេចក្ដីពិតនេះដល់កុមារ ។

សកម្មភាពដែលអាចធ្វើបាន

សូមផ្តល់ឃ្លាមួយចេញពី រ៉ូម ៣:២៣–២៤ ដល់កុមារម្នាក់ៗ ដែលសរសេរនៅលើក្រដាសមួយសន្លឹក ។ សូមអញ្ជើញកុមារឲ្យដាក់ឃ្លារបស់ពួកគេតាមលំដាប់លំដោយដែលត្រឹមត្រូវ ហើយសូមអានឃ្លានេះជាមួយគ្នា ។ សូមសួរកុមារថាតើពួកគេរៀនបានអ្វីខ្លះពីឃ្លានេះ ។ សូមពន្យល់ថាពាក្យ « ព្រះគុណ » នៅក្នុង ខទី ២៤ មានន័យថាជាអំណោយទាន និងសេចក្តីស្រឡាញ់របស់ព្រះអង្គសង្រ្គោះ ដែលអាចធ្វើឲ្យយើងទទួលបានការអភ័យទោសសម្រាប់អំពើបាបរបស់យើងបាន ហើយប្រែក្លាយជាបុគ្គលដ៏ល្អប្រសើរ ។
សូមព្យួររូបភាពមួយឲ្យខ្ពស់នៅលើជញ្ជាំង ឬកន្លែងផ្សេងទៀតដែលកុមារមិនអាចឈោងដល់ដោយខ្លួនពួកគេបាន ។ សូមឲ្យពួកគេព្យាយាមឈោងទៅយករូបភាពនោះ ហើយប្រៀបធៀបការឈោងនេះទៅនឹងអ្វីដែលប៉ុល បានបង្រៀននៅក្នុង រ៉ូម ៣:២៣ ។ បន្ទាប់មក សូមជួយពួកគេឲ្យឈោងទៅរូបភាពនោះ ។ តើព្រះអង្គសង្រ្គោះបានធ្វើអ្វីសម្រាប់យើងដែលយើងមិនអាចធ្វើបានដោយខ្លួនឯង ? សូមអញ្ជើញកុមារឲ្យចែកចាយអ្វីដែលពួកគេមានអារម្មណ៍អំពីព្រះអង្គសង្រ្គោះ នៅពេលពួកគេគិតអំពីអ្វីដែលទ្រង់បានធ្វើ ហើយអាចធ្វើដើម្បីជួយពួកគេ ។

រ៉ូម ៦:១–១១

ការទទួលពិធីបុណ្យជ្រមុជទឹក គឺដូចជាការក្លាយជាមនុស្សថ្មីម្នាក់ ។

ប៉ុលបានបង្រៀនថា ពិធីបុណជ្រមុជទឹកតំណាងឲ្យការសុគត និងការមានព្រះជន្មរស់ឡើងវិញរបស់ព្រះគ្រីស្ទ ។ វាក៏ជានិមិត្តរូបនៃការងើបឡើងដើម្បី « ដើរក្នុងជីវិតបែបថ្មី » ( រ៉ូម ៦:៤ ) ។ យើងរំឭកការតាំងចិត្តរបស់យើងថានឹងដើរក្នុងជីវិតបែបថ្មីនេះ នៅគ្រប់ពេលដែលយើងទទួលទានសាក្រាម៉ង់ ។

សកម្មភាពដែលអាចធ្វើបាន

សូមអញ្ជើញកុមារម្នាក់ឲ្យអាន រ៉ូម ៦:៣–៦ ។ តើប៉ុលបានថ្លែងថា ពិធីបុណ្យជ្រមុជទឹកគឺជា « ការដែលជាគំរូ » នៃអ្វីខ្លះ ?
សូមពិភាក្សាអំពីនិមិត្តរូបនៃពិធីបុណ្យជ្រមុជទឹក ដែលជាសេចក្ដីស្លាប់ និងការរស់ឡើងវិញ ។ វាអាចជួយបាន បើដាក់តាំងរូបភាពនៃពិធីបុណ្យជ្រមុជទឹក ឬបង្ហាញវីដេអូដូចជា « The Baptism of Jesus » ( នៅលើគេហទំព័រChurchofJesusChrist.org ) ។ ហេតុអ្វីការស្លាប់ និងការរស់ឡើងវិញជានិមិត្តរូបល្អនៃអ្វីដែលបានកើតឡើង នៅពេលយើងទទួលបុណ្យជ្រមុជទឹក ?

3:7
សូមអានជាមួយគ្នានូវការអធិស្ឋានសាក្រាម៉ង់ ( សូមមើល គោលលទ្ធិ និង សេចក្តីសញ្ញា ២០:៧៧, ៧៩ ) ។ សូមរំឭកកុមារថា នៅពេលយើងទទួលទានសាក្រាម៉ង់ នោះយើងរំឭកការប្តេជ្ញាចិត្តដើម្បីធ្វើតាមព្រះយេស៊ូវគ្រីស្ទដែលយើងបានធ្វើ នៅពេលយើងទទួលបុណ្យជ្រមុជទឹក ។ តើពិធីសាក្រាម៉ង់ជួយយើងឲ្យ « ដើរក្នុងជីវិតបែបថ្មី » យ៉ាងដូចម្តេច ?
សូមអញ្ជើញកុមារឲ្យគូររូបភាពដែលបង្ហាញអំពីអត្ថន័យចំពោះពួកគេក្នុងការ « ដើរក្នុងជីវិតបែបថ្មី » ។ កុមារអាចព្យួររូបភាពទាំងនេះនៅបន្ទប់របស់ពួកគេដើម្បីជួយពួកគេឲ្យចងចាំថាត្រូវធ្វើការជ្រើសរើសល្អ ។

លើកទឹកចិត្តឲ្យមានការរៀនសូត្រនៅឯគេហដ្ឋាន

សូមផ្តល់យោបល់ដល់កុមារឲ្យសូមសមាជិកគ្រួសារប្រាប់ពួកគេឲ្យដឹង នៅពេលពួកគេធ្វើអ្វីមួយដែលបង្ហាញសេចក្តីជំនឿ ។

ការកែលម្អការបង្រៀនរបស់យើង

ធ្វើឲ្យកុមារមានទំនុកចិត្ត ។ សូមសរសើរកុមារ នៅពេលពួកគេចូលរៀននៅក្នុងថ្នាក់ ។ ការសរសើរគឺជារបៀបមួយដើម្បីស្ថាបនាទំនុកចិត្ត ដើម្បីឲ្យពួកគេអាចរៀនដំណឹងល្អបាន ។

ទំព័រសកម្មភាព ៖ ការទទួលបុណ្យជ្រមុជទឹកគឺដូចជាការក្លាយជាមនុស្សថ្មីម្នាក់