“O̧kwōj 28–Jeptōm̧ba 3. 1 Korint 8–13: ‘Kom̧ Ānbwinnen Kraist,’” Itok, Ļoor Eō—N̄an Būraimere: Kalim̧m̧ur Ekāāl 2023 (2022)
“O̧kwōj 28–Jeptōm̧ba 3. 1 Korint 8–13,” Itok, Ļoor Eō—N̄an Būraimere: 2023
O̧kwōj 28–Jeptōm̧ba 3
1 Korint 8–13
“Kom̧ Ānbwinnen Kraist”
Ilo ami riiti 1 Korint 8–13, kōlaajraki im̧we ko jān Jetōb kōn wāween n̄an katakin pedped ko ilo jebta kein. Keememej bwe jabdewōt m̧akūtkūt in ļōmņak maron̄ koba jim̧or n̄an ajri ro rūttoļo̧k im reddikļo̧k.
Kajjitōk bwe ren Kwaļo̧k
Kajjitōk ippān ajri ro n̄an kwaļo̧k men ko rekar kōm̧m̧ani ilo kweilo̧k in kwojkwoj eo n̄an ļōmņak kōn Jisōs.
Katakin Katak eo: Ajri ro Reddikļo̧k
Jemedwōj Ilan̄ enaaj jipan̄ eō kōm̧m̧ani kāālet ko rejim̧we.
Ejjab pidodo n̄an kāālet jim̧we eo, im Jemedwōj Ilan̄ ejeļā kake. N̄e jej kajjitōk, E enaaj jipan̄ kōj kōnke E ekōņaan bwe jen tōprak.
M̧akūtkūt ko Maron̄ Kōm̧m̧ani
-
Riiti 1 Korint 10:13 n̄an ajri ro, kajjitōk ippāer n̄an kōm̧akūtkūt bōraer n̄e rej ron̄ naan ko “po” ak “kapo.” Kōmeļeļeiki ta meļeļein eoon in n̄an eok.
-
Kwaļo̧k jet iaan bwebwenato ko rekadu kōn armej ro rej kōm̧m̧ani kāālet ko rebōd. Ilo an ajri ro ron̄jake, kajjitōk ippāer n̄an kotak bōraer ak juon peba in kōbōjrak n̄e armej eo ilo bwebwenato eo ej kōm̧m̧an bōd. Enaaj ta kāālet eo ejim̧we? Kam̧ool bwe Jemedwōj Ilan̄ enaaj jipan̄ kōj kāālet jim̧we eo.
-
Kwaļo̧k juon pija in Jisōs, im al ippān ajri ro juon al kōn E, āinwōt “I’m Trying to Be like Jesus” (Children’s Songbook, 78–79). Kōnono kake wāween keememej Jisōs ejipan̄ eok kōm̧m̧ani kāālet ko rejim̧we. Kwaļo̧k pija in men ko jet me ejipan̄ kōj kōm̧m̧ani kāālet ko rejim̧we, āinwōt ro jinen im jemen ak jeje ko rekwojarjar. Kajjitōk ippān ajri ro ta eo ejipan̄ er kōm̧m̧ani kāālet ko rejim̧we.
Jemedwōj Ilan̄ ej kōjeraam̧m̧an eō kōn menin letok ko an jetōb.
Jemedwōj Ilan̄ eaar leļo̧k n̄an aolep ro Nejin menin letok ko an jetōb. Ta menin letok ko an jetōb kwoj loi ippān ajri ro kwoj katakin?
M̧akūtkūt ko Maron̄ Kōm̧m̧ani
-
Kajjitōk ippān ajri ro n̄an jin̄aiki juon pija in juon menin letok eo rekar bōke. Kōmeļeļeiki bwe Jemedwōj Ilan̄ ej letok n̄an kōj menin letok ko an jetōb n̄an kōkajoorļo̧k ad tōmak im jipan̄ kōj kōjeraam̧an ro jet. Kwaļo̧k n̄an ajri ro jet menin letok ko an jetōb kar kōmeļeļeiki ilo 1 Korint 12:7–11.
-
Je ju.on kein kakeememej n̄an kajjojo ajri, kōmeļeļeiki juon menin letok ko an jetōb kwaar loi ilo e (ak komaron̄ kūrtok ro jinen im jemen n̄an je kakeememej kein) Likūt kakeememej ko ilo juon nien peba. Kōtļo̧k an ajri ro kōpeļļo̧k nien peba eo, im jipan̄ er riiti kōn menin letok ko an jetōb.
Jemedwōj Ilan̄ eaar leļo̧k n̄an aolep ro Nejin menin letok ko ilo jetōb.
Imaron̄ iakwe ro jet.
Jeje ko rekwojarjar rej ba “ej iakwe eo erreo an Kraist” (Moronai 7:47). Elmen am̧ maron̄ jipan̄ ajri ro kōļapļo̧k im kwaļo̧k iakwe Āinwōt Kraist?
M̧akūtkūt ko Maron̄ Kōm̧m̧ani
-
Riit 1 Korint 13:13 im Moronai 7:47, im jipan̄ ajri ro āliji naan eo “iakwe em̧ool ej iakwe eo erreeo an Kraist.” Kwaļo̧k pijain Jisōs an iakwe im jouj, kajjitōk ippān ajri ro elmen An kar kwaļo̧k iakwe n̄an ro jet (lale Gospel Art Book n̄an ļōmņak ko).
-
Al juon al kōn iakwe ro jet, āinwōt “Jesus Said Love Everyone” ak “Love One Another” (Children’s Songbook, 61, 136), ippān ajri ro. Kwaļo̧k pijain armej ro roktak (āinwōt m̧am̧a ak baba, jeim-jati, rūkaki, ak m̧ōttad), im kajjitōk ippān ajri ro n̄an kwaļo̧k elmen aer maron̄ jipan̄ armej in. Kajjitōk ippān ajri ro n̄an ļōmņake juon eo remaron̄ jipan̄ e innām je juon kakeememej ak jin̄ain juon pija in armej eo. N̄e rej aikuj jipan̄ ko jet kōn wāween jippan̄, lale bitio eo “Pass It On” (ChurchofJesusChrist.org).
Katakin Katak eo: Ajri ro Rerūttoļo̧k
Jemedwōj Ilan̄ enaaj jipan̄ eō jum̧ae kapo.
Kallim̧ur eo ilo eoon in emaron̄ leļo̧k n̄an ajri ro leke ke remaron̄ jum̧ae kapo kōn jipan̄ eo an Jemedwōj Ilan̄.
M̧akūtkūt ko Maron̄ Kōm̧m̧ani
-
Kajjitōk ippān ajri eo bwe en riiti 1 Korint 10:13 ilo kurup im kakkilōklōke eoon in ilo naan ko aer make. Kajjitōk ippān ajri ro n̄an kwaļo̧k juon en̄jake me Jemedwōj Ilan̄ ekar jipan̄ er anjo̧ ak jum̧ae kapo. Ta eo jemaron̄ kōm̧m̧ane n̄an pedped ioon Jemedwōj Ilan̄ n̄e jej po?
-
Je ioon jidik peba kapo ko ajri ro remaron̄ ioon rainin. Kajjitōk ippān kajjojo ajri n̄an kāālet juon peba im kwaļo̧k ta eo Jemedwōj Ilan̄ ekar letok n̄an kōj n̄an anjo̧ ak jum̧ae kapo kein. N̄an jet ļōmņak, riit ippān doon Alma 13:28–29.
Ilo iien kwojkwoj, imaron̄ ļōmņak elmen aō ļoor Rilo̧mo̧o̧r.
Jipan̄ ajri ro kwoj katakin le bwe kwojkwoj eo ej juon iien em̧m̧an n̄an “mālejjon̄” er make im kōkāāl bujen peptaij eo aer n̄an jerbal n̄an Irooj im kōjparok kien ko An (1 Korint 11:28).
M̧akūtkūt ko Maron̄ Kōm̧m̧ani
-
Kajjitōk ippān juon ajri eo n̄an riiti 1 Korint 11:28. Ta meļeļein “mālejjon̄” kōj make m̧okta jān bōk kwojkwoj eo? Kajjitōk ippān ajri ro n̄an ļōmņanke armej ro jet ro rej mālejjon̄e men ko, āinwōt taktō ro, titektip ro, ak rimāletlet ro (n̄an waanjon̄ak, taktōk ro rej etale kōj n̄an lukkuun lale n̄e jej ājmour). N̄e jej bōk m̧ōttan kwojkwoj eo, ta eo jemaron̄ kōm̧m̧ane n̄an etale elmen ad mour kake bujen peptaij ko ad?
-
Kajjitōk ippān ajri ro n̄an kōm̧m̧ane juon laajrak in men ko remaron̄ ļōmņaki n̄e rej bōk m̧ōttan kwojkwoj eo. Kajjitōk ippān ajri ro n̄an kōjerbal laajrak ko āinwōt juon menin kakeemej n̄ān etale er make ilo iien kwojkwoj eo.
1 Korint 12:4, 7–12, 31; 13:1–8
Ewōr aō menin letok ko an jetōb.
Paul ekar kwaļo̧k bwe menin letok ko an jetōb kar “em̧ōj leļo̧k n̄an jabdewōt” (1 Korint 12:7). Pedped in enaaj jipan̄ ajri ro kōļapļo̧k jeļā eo aer kōn aorōk eo aer, eļaptata ilo aer kōjerbal mein letok ko aer n̄an kōjeraam̧m̧an ro jet.
M̧akūtkūt ko Maron̄ Kōm̧m̧ani
-
Kajjitōk ippān ajri ro n̄an je ioon bo̧o̧t eo menin letok ko an jetōb rej loi ilo 1 Korint 12:7–11; 13:2. Kajjitōk ippāer n̄an kappukot jabbdewōt menin letok ko rej waļo̧k ilo Moronai 10:8–18 im Katak im Bujen Ko 46:13–26. Kwaļo̧ki jet iaar menin letok ko an jetōb kar kwaļo̧ki jān Elder Marvin J. Ashton: “Menin letok ko n̄an kajjitōk; menin letok ko an ron̄ake; … menin letok ko n̄an bōbrae jum̧ae; … menin letok ko n̄an kappukot ta eo ejim̧we; menin letok ko n̄an jab ekajet; menin letok ko n̄an mije tōl jān Anij; … menin letok ko n̄an jipan̄ ro jet; … menin letok ko an jar; menin letok ko n̄an kwaļo̧k naan in kam̧ool eo ekajoor” (“There Are Many Gifts,” Ensign, Nov. 1987, 20). Kajjitōk ippān ajri ro n̄an kōnono kōn menin letok ko rej loi ippān doon.
-
M̧okta jān kūlaaj, kajjitōk ippān ro jinen ak jemen ajri ro ilo kūlaaj eo kōn menin letok ko rej loi ippān ajri ro nejier, ak am make ļōmņak kōn menin letok ko an ajri ro. Kwaļo̧k n̄an ajri ro kōn menin letok kein. Kajjitōk ippān ajri ro n̄an je juon wāween renaaj kōjerbal menin letok kein aer n̄an kōjeraam̧m̧an juon ilo wiik in.
-
Kwaļo̧k jekjek ko reoktak me armej ro remaron̄ kōjerbal juon menin letok jān 1 Korint 12:7–10. Kajjitōk ippān ajri ro n̄an kalikkar menin letok ko an jetōb me remaron̄ kōjerbali ilo kajjojo jekjek.
Kōketak Ekkatak ilo M̧weo
Kwaļo̧k bwe ajri ro ren kōnono kōn men ko kwaar kōnono kaki ilo kūlaaj eo ippān baam̧le ko aer. N̄an waanjon̄ak, komaron̄ kajjitōk ippān ajri ro n̄an kwaļo̧k menin letok ko aer ilo jetōb n̄an baam̧le ko aer im kajjitōk ippān ro uwaan baam̧le ko ta menin letok ko aer.
Kōkōm̧anm̧anļo̧k Ad Katakin
Leļo̧k kajjitōk me ebōk anemkwoj in kāālet. Ilo am kajjitōk ippān ajri ro n̄an ikkure kōn ta eo rekar ekkatak, ļōmņak kōn wāween ko n̄an dāpij anemkwoj eo aer. Ijeļo̧kin lukkuun leļo̧k kūr, ļōmņak in kajjitōk ippāer n̄an ļōmņake wāween ko aer make n̄an mour kake ta eo rej ekkatak.