“Jeptōm̧ba 4–10. 1 Korint 14–16: ‘Anij e jab Anij in Airuwaro, a in Aenōm̧m̧an,’” Itok, Ļoor Eō—N̄an Būraimere: Kalim̧m̧ur Ekāāl 2023 (2022)
“Jeptōm̧ba 4–10, 1 Korint 14–16,” Itok, Ļoor Eō—N̄an Būraimere: 2023
Jeptōm̧ba 4–10
1 Korint 14–16
“Bwe Anij e jab Anij in Airuwaro, a in Aenōm̧m̧an”
Ilo am riiti 1 Korint 14–16, Jetōb Kwojarjar enaaj jipan̄ eok jeļā ta n̄an katakin ajri ro ilo kūlaaj eo am̧. Etale laajrak in n̄an eļapļo̧k kakkobaba.
Kajjitōk bwe ren Kwaļo̧k
Kwomaron̄ jino riiti laajrak eo an wiik ilo 1 Korint 14:26 eļaaj. Kalikkar bwe n̄e itok ippān doon n̄an m̧ōnjar in, jej kotak (ak lōn̄aj im jipan̄) doon n̄e jej kwaļo̧k ta eo jaar ekkatak. Kajjitōk ippān ajri ro ta eo remaron̄ kwaļo̧ke n̄an kotak ro jet ilo kūlaaj rainin.
Katakin Katak eo: Ajri ro Reddikļo̧k
Imaron̄ mour ippān Jemedwōj Ilan̄ ālkin aō mej kōnke Jisōs Kraist ekar jerkakpeje.
Elmen am̧ maron̄ katakin ajri ro bwe kōnke Jisōs Kraist ekar jerkakpeje jemaron̄ bar mour?
M̧akūtkūt ko Maron̄ Kōm̧m̧ani
-
Āliji naan kein elōn̄ alen ippān ajri ro: “Ilo Kraist ro otemjej re naaj mour” (1 Korint 15:22). Kwaļo̧k juon pija in jerkakpej Rilo̧mo̧o̧r (lale laajrak eo an wiik in ilo Itok, Ļoor Eō—N̄an Kajjojo Armej im Baam̧le Ko) ak pija in alooj in jipan̄ eo ilo “Jesus Is Resurrected” (ChurchofJesusChrist.org). Kōmeļeļeiki bwe jenaaj aolep mej juon raan, ak kōnke Jisōs ekar jerkakpeje, jenaaj aolep ro̧o̧lļo̧k im mour ālkin ad mej.
-
Kwaļo̧k n̄an ajri ro juon jakit, eo ej pinej jenkwan ānbwinnid. Ilo ad mour, jetōb ko ad ilo ānbwinnid im āinbwinnid remaron̄ m̧akūtkūt (kōņak jakit eo). N̄e jemej, jetōb ko ad rej etal jān ānbwin kanniōk eo ad im ānbwinnid eban m̧akūtkūt (kōm̧akūt jakit eo im likūti ioon table ak jea eo n̄an pinej jenkwan juon ānbwin ilo an ejjeļo̧k jetōb. N̄e jej jerkakpeje, jetōb ko ad rej koba ippān ānbwinnid (bar kōņak jakit eo), im reban bar jenoļo̧k. Kōtļo̧k an ajri ro bōk kuņaer kōņak jakit eo im utuki ilo an ajri ro jet kōmeļeļeiki ta eo ej waļo̧k n̄e jej jerkakpeje.
Imaron̄ peptaij kōn armej ro rekar mej.
Ilo an ajri ro kōppopo n̄na aer make peptaij, ļōmņake elmen am̧ maron̄ jipan̄ er reim̧aanļo̧k n̄an iien em̧m̧an n̄an peptaij kōn ro remej.
M̧akūtkūt ko Maron̄ Kōm̧m̧ani
-
Jipan̄ ajri ro ļōmņake men ko reban kōm̧m̧ani n̄an er make. Wōn ej jipan̄ er kōm̧m̧ani men kein? Kwaļo̧k juon pijain ro jibum̧ im jim̧m̧am̧ me remej ak rekar jab peptaij. Kwaļo̧k n̄an ajri ro kōn armej in, im kōmeļeļeiki bwe armej in eaikuji jipan̄ eo ad n̄an peptaij.
-
Kajjitōk ippān ajri ro n̄e ewōr jabdewōt uwaan baam̧le eo me rekar pād ilo tampeļ n̄an kōm̧m̧ani peptaij n̄an ro remej. Kwaļo̧k juon pijain jikin peptaij eo ilo tampeļ. Kajjitōk ippān ajri ro n̄e rejeļā ta eo ej waļo̧k ijeņ. Kōmeļeļeiki bwe ilo tampeļ jemaron̄ peptaij kōn aremj ro me em̧ōj aer mej me rejjjan̄in peptaij. Innām armej rein remaron̄ kāālet n̄an bōk peptaij eo.
Jemedwōj Ilan̄ ekōņaan bwe in mour Ippān ilo aiboojoj eo an aļ.
Elmen am̧ maron̄ katakin ajri ro kōn aiboojoj ko an aļ, allōn̄, im iju. Makūtkūt kein remaron̄ jipan̄.
M̧akūtkūt ko Maron̄ Kōm̧m̧ani
-
Je ioon bo̧o̧t eo aļ, allōn̄, im iju. Jipan̄ ajri ro jeļā kilen ba naan kein.
-
Kwaļo̧k pijain al, allōn̄, im iju kan. Kajjitōk ippān ajri ro n̄an karōki jān meram tata n̄an jemeram. Riiti 1 Korint 15:40–41 n̄an ajri ro (bar lale Josep Smith Ukook ilo eoon 40, footnote a). Kōmeļeļeiki bwe al, allōn̄, im iju ko rej pinej jenkwan aiboojoj ko jemaron̄ mour ie ālkin ad jerkakpeje. Ilo aiboojoj eo in al, jemaron̄ mour ippān Jemedwōj Ilan̄.
-
Leļo̧k n̄an ajri ro juon kape in peij in m̧akūtkūt eo an wiik in n̄an kōļare. Ilo aer kōļar, kwaļo̧k n̄an er en̄jake ko am̧ kōn Rilo̧mo̧o̧r im ta eo E ekar kōm̧m̧ane bwe en pidodo ad mour ippān Jemedwōj Ilan̄.
“Juon aiboojoj an al” (1 Korint 15:41).
Katakin Katak eo: Ajri ro Rerūttoļo̧k
Kōn wōt Jisōs Kraist im An Jerkakpeje, Inaaj bar jerkakpeje.
Ajri ro kwoj katakin remeļeļe ke kōn aorōk in Jerkakpeje eo an Jisōs Kraist? Ļōmņak ko maron̄ aikuji.
M̧akūtkūt ko Maron̄ Kōm̧m̧ani
-
Kajjitōk ippān ajri ro n̄an bōk kuņaer riiti eoon ko ilo 1 Korint 15:12–22, pukōt uwaak ko n̄an kajjitōk in “Ta eo enaaj kar waļo̧k n̄e ejjeļo̧k jerkakpeje?”
-
Kajjitōk ippān ajri ro ikkure kake elmen n̄an kōmeļeļeik jerkakpeje n̄an ro jet. N̄an ļōmņak ko, remaron̄ lale al eo kōn Jerkakpeje eo an an Rilo̧mo̧o̧r, āinwōt “Did Jesus Really Live Again?” (Children’s Songbook,, 64). Bar lale pija in alooj eo “Until We Meet Again” (ChurchofJesusChrist.org). Kwaļo̧k naan in kam̧ool eo am̧ kōn Jerkakpeje eo an Kraist.
Imaron̄ kōppopo n̄an etal n̄an tampeļ n̄an peptaij n̄an ro remej.
Peptaij kōn ro remej ej juon jerbal in lan̄lōn̄ kōn iakwe ilo etan ro jibud im jim̧m̧ad. Elmen am̧ maron̄ jipan̄ ajri ro pojak n̄an bōk kuņaer ilo jerbal in?
M̧akūtkūt ko Maron̄ Kōm̧m̧ani
-
Riiti 1 Korint 15:29. Ta eo ro Rikwojarjar ilo raan ko an Paul rekar kōm̧m̧ane me kōj je?j bar kōm̧m̧ane rainin Kajjitōk ippān ajri ro etke jej peptaij kōn ro remej. N̄e ekkar, kōmeļeļeiki bwe elōn̄ ro jibud im jim̧m̧ad ekar jab wōr aer iien em̧m̧an n̄an peptaij im kapen ilo mour in. Ilo tampeļ, jemaron̄ peptaij im kapen n̄an er.
-
Jejjo̧ raan m̧okta jān kūlaaj, kajjitōk ippān juon m̧am̧a ak baba an ajri ro n̄an jipan̄ ajri eo nejin n̄an pojaktok im kwaļo̧k juon menmenbwij ak kwaļo̧k juon bwebwenato kōn jibwier ak jim̧m̧aer. Kwomaron̄ bar kwaļo̧k kōn ro jibum̧ im jim̧m̧am̧.
-
Kūrtok juon uwaan bisoprik eo ak juon jodikdik in ward eo am̧ n̄an kwaļo̧k jet men ko ajri ro remaron̄ kōm̧m̧ane n̄an pojak n̄an deļo̧n̄e tampeļ eo. Kajjitōk ippān ajri ro n̄an kwaļo̧k ļōmņak ko aer. Kajjitōk ippāer n̄an kōm̧m̧ane juon kōttōbar n̄an etal n̄an tampeļ juon raan.
Ālkin aō jerkakpeje, imaron̄ bar mour ilo aiboojoj eo an al.
N̄an katakin armej ro ilo Korint kōn ānbwinnier jenaaj bōk Jerkakpeje, Paul ekar kwaļo̧k jilu aiboojoj ko: al, allōn̄, im iju.
M̧akūtkūt ko Maron̄ Kōm̧m̧ani
-
Riiti 1 Korint 15:40–41 im kajjitōk ippān juon ajri bwe en jin̄iki al, allōn̄, im iju ioon bo̧o̧t eo. Kajjitōk ippān membōr ro n̄an kalikkar kain ānbwin jerkakpeje eo ej pinej jenkwan ilo kajjojo jin̄a.
-
Al ippān doon juon al n̄an unin kōnono in, āinwōt “The Lord Gave Me a Temple” (Children’s Songbook, 153). Ak kwaļo̧k bitio eo “Our Eternal Life” (ChurchofJesusChrist.org). Ta eo al ak bitio eo ej katakin kōj n̄an kōppopo n̄an mour ilo aiboojoj in aļ?
-
Kōmeļeļeiki bwe Josep Smith ekar lo ilo visōn me ekar lo jilu aiboojoj ko me kalikkar kain āinbwin rot eo Paul ekar kōmeļeļeiki. Jipan̄ ajri ro lale eoon ko jān Katak im Bujen Ko 76:50–53, 70; 76:71–79; 76:81–82 me rej kōmeļeļeiki aiboojoj kein jilu.
Kōketak Ekkatak ilo M̧weo
Kajjitōk ippān ajri ro n̄an kajjitōkin jineer im jemeer n̄an kwaļo̧k juon bwebwenato kōn juon iaan ro jibwier im jim̧m̧aer. Remaron̄ kwaļo̧k bwebwenato in ilo kūlaaj eo ilo wiik in tok.
Kōkōm̧anm̧anļo̧k Ad Katakin
Rōjan̄ ajri ro n̄an kajjitōk kajjitōk ko. “Kajjieon̄ lo [kajjitōk ko an] ajri ro āinwōt iien em̧m̧an, ejjab inepata ak kapan̄pan̄ n̄an katak eo am̧. … Kain kajjitōk rot in elewaj n̄an eok ļōmņak ko n̄an ta eo ajri ro rej ļōmņake, ta inepata ko aer, im ewi wāween aer lo uwaak ko n̄an men ko rej ekkatak. Jipan̄ er lo uwaak ko n̄an kajjitōk ko aer maron̄ loi ilo jeje ko rekwojarjar im naan ko an rikanaan ro remour” (Teaching in the Savior’s Way,, 25–26).