Jeptōm̧ba 11–17

2 Korint 1–7

“Kom̧win Reel n̄an Anij”

Jino kōppopo eo am̧ ilo am̧ riiti 2 Korint 1–7 Itok, Ļoor Eō—N̄an Kajjojo Armej im Baam̧le ko emaron̄ jipan̄ eok meļeļe jebta kein, im unin tōl in emaron̄ lewaj n̄an eok ļōmņak ko n̄an katakin.

Kajjitōk bwe ren Kwaļo̧k

Jet iaan ajri ro ilo kūlaaj eo am̧ remaron̄ je leta ko ilo wiik kōn ewi wāween an uwaan baam̧le eo juon waanjon̄ak em̧m̧an in rikaļooraņ Jisōs Kraist (lale laajrak eo an wiik in ilo Itok, Ļoor Eō—N̄an Kajjojo Armej im Baam̧le Ko). N̄e rekar, kajjitōk ippāer m̧oktaļo̧k n̄an kwaļo̧k leta eo ilo kūlaaj. Ak kajjitōk ippāer n̄an kwaļo̧k men ko rekar ekkatak.

Katakin Katak eo: Ajri ro Reddikļo̧k

2 Korint 1:3–4

Jemedwōj Ilan̄ ej kaenōm̧m̧an eō, im imaron̄ kaenōm̧m̧an ro jet.

Elmen am̧ maron̄ leļo̧k n̄an ajri ro leke bwe Jemedwōj Ilan̄ enaaj kaenōm̧m̧an er? Elmen am̧ maron̄ kōjerbal menin n̄an jerbal n̄an ro jet?

M̧akūtkūt ko Maron̄ Kōm̧m̧ani

• Kwaļo̧k n̄an ajri ro men ko me rej letok aenōm̧m̧an, āinwōt buļankōj ak teip. Kajjitōk ippān ajri ta eo ej kaenōm̧m̧an er n̄e rej būrom̧ōj ak mijak ak wōr būrabōļōm̧ ko jet. Riiti 2 Korint 1:3–4 ippān ajri ro, im kōmeļeļeiki bwe “jorrāān” ej bar juon naan n̄an būrabōļōm̧ ko. Kwaļo̧k jet wāween ko me Jemedwōj Ilan̄ ekar kaenōm̧m̧an eok, im kam̧ool bwe E enaaj kaenōm̧m̧an bar ajri ro.

• Kwaļo̧k pijain armej ro rej peptaij Gospel Art Book, nos. 103–4) ilo am riiti 2 Korint 1:4 n̄an ajri ro. Kōmeļeļeiki bwe ke jaar peptaij, jej kallim̧ur n̄an kaenōm̧m̧an ro jet. Elmen ad maron̄ ļoor kapilōk eo an Paul n̄an “kom̧win joļo̧k an nana kaenōm̧m̧an e”?

2 Korint 2:7–8, 10

Imaron̄ jeo̧rļo̧k an ro jet bōd.

Kālet jān m̧akūtkūt kein ilaļ—ak wanlōn̄tak kōn am make—n̄an jipan̄ kōkajoorļo̧k ikdeleel ko an ajri ro n̄an jeo̧rļo̧k an ro jet.

M̧akūtkūt ko Maron̄ Kōm̧m̧ani

• Kōmeļeļeiki n̄an ajri ro bwe Paul ekar kōņaan bwe ro Rikwojarjar ilo Korint ren jeo̧rļo̧k an armej bōd me rekar bōd. Riiti 2 Korint 2:7–8, 10, im kajjitōk ippān ajri ro n̄an likūt peier ilo ubweer aolep iien n̄e rej ron̄ naan ko jeo̧rļo̧k bōd im jeo̧rļo̧k bōd.

• Kajjitōk ippān ajri ro n̄an ikkure elmen aer maron̄ kōm̧m̧ani jekjek ko n̄e ro jet rekar kōm̧m̧ani men ko rejjab em̧m̧an. Kōtļo̧k aer bōk kuņaer im ba “ij joļo̧k aō bōd ” im “ ij jeo̧rļo̧k am̧ bōd.” Elmen ad jipan̄ armej ro jeļā ke jej jeo̧rļo̧k aer bōd? Kōmeļeļeiki bwe juon wāween maron̄ “kapen ami yokwe,” ak kwaļo̧k iakwe n̄an er (2 Korint 2:8).

2 Korint 4:1–2

Ij tōmak ilo m̧ool.

Paul ekar kwaļo̧k bwe ro rikarejeraņ Kraist reaikuj “ilọk jān men ko rettino men in kajook.” Kōļmenļo̧kjeņ kōn wāween ko komaron̄ kōkajoorļo̧k ikdeleel ko an ajri ro n̄an m̧ool ilo men otemjeļo̧k.

M̧akūtkūt ko Maron̄ Kōm̧m̧ani

• Jipan̄ ajri ro kakkilōklōke naan in “Kōmij tōmak ilo m̧ool” (Laajrak in Tōmak Ko 1:13 Je naan in ioon peba peān̄kōļ me ajri ro remaron̄ kainōknōke im kōņake. Kōmeļeļeiki bwe m̧ool ej kwaļo̧k m̧ool eo.

• Kajjitōk ippān ajri n̄an kajutak peier n̄e kwoj ba men eo me em̧ool im likūti n̄e kwoj ba men eo ejjab m̧ool. Kōm̧m̧ane jidik ennaan, āinwōt “Rainin ej Jabōt” ak “ewōr jilu botu.” Āliji m̧akūtkūt eo elōn̄ alen, kōtļo̧k an ajri ro bōk kuņaer eo ej kōm̧m̧an ennaan eo em̧ool im riab. Etke Jemedwōj Ilan̄ ekōņaan bwe jen kwaļo̧k m̧ool?

• Kwaļo̧k bitio eo “A Visit with Elder Ulisses Soares” (ChurchofJesusChrist.org). Ta eo Elder Soares ekar ekkatak kōn m̧ool? Rōjan̄ ajri ro n̄an kōppopo n̄an bujen peptaij eo ilo aer m̧ool.

Katakin Katak eo: Ajri ro Rerūttoļo̧k

2 Korint 1:3–4

Jemedwōj Ilan̄ ej kaenōm̧m̧an eō, im imaron̄ kaenōm̧m̧an ro jet.

Keememej elmen an Anij kar kaenōm̧m̧an kōj im̧we kōj n̄an leļo̧k aenōm̧m̧an n̄an ro jet.

M̧akūtkūt ko Maron̄ Kōm̧m̧ani

• Ilo am̧ riiti 2 Korint 1:3–4, kajjitōk ippān ajri ro n̄an ron̄jake uwaak eo n̄an kajjitōk in “Ta eo Anij ej kōm̧m̧ane n̄an kōj?” Jipan̄ ajri ro kōlaajraki wāween ko me Anij ej kaenōm̧m̧an kōj. Kajjitōk ippān ajri ro n̄an kwaļo̧k en̄jake ko ke rekar būrom̧ōj ak inepata ak mijak im Anij ekar kaenōm̧m̧an er.

• Kajjitōk ippān ajri ro n̄an kwaļo̧k wāween ko jemaron̄ kōjparok bujen peptaij eo ad n̄an kaenōm̧m̧an ro jet (lale Mosaia 18:9). Leļo̧k n̄an er iien n̄an ļōmņake ro jet rejeļā kajjiere me rej aikuj aenōm̧m̧an im kōm̧m̧ane juon pepe n̄an tōpar armej eo.

2 Korint 2:5–11

Imaron̄ jeo̧rļo̧k an ro jet bōd.

Emaron̄ pen n̄an jeo̧rļo̧k an ro jet bōd n̄e rejjab jouj n̄an kōj. Ak ajri ro kwoj katakin renaaj en̄jake iakwe, aenōm̧m̧an, im m̧ōņōņō ilo aer jeļā n̄an jeo̧rļo̧k bōd.

M̧akūtkūt ko Maron̄ Kōm̧m̧ani

• Kwaļo̧k n̄an ajri ro ke ro jet ilo Korint rekar jerawiwi im “kar kabūrom̧ōj” ro Rikwojarjar (lale 2 Korint 2:5). Kajjitōk bwe ajri ro ren lale 2 Korint 2:7–8 n̄an lale ta eo Paul ekar kōņaan bwe ro Rikwojarjar ren kōm̧m̧ane.

• Kwaļo̧k juon waanjon̄ak n̄e kwoj jeo̧rļo̧k an ro jet bōd—ak ro jet rej jeo̧rļo̧k am̧ bōd—im kōmeļeļeiki elmen am̧ kar en̄jake. Ak kwaļo̧k bitio eo “The Goal: A Story of Faith, Friendship im Forgiveness” (ChurchofJesusChrist.org). Kajjitōk ippān ajri ro n̄an kwaļo̧k en̄jake ko kōn menin jeorļo̧k bōd.

2 Korint 5:6–7

Ij “etetal kōn tōmak, jab kōn loe.”

Lōmņake elmen am̧ maron̄ rōjan̄ ajri ro n̄an kōjparok kien ko an Anij men̄e rejjab lo kōjeraam̧m̧an ko rej kajju kōņaan.

M̧akūtkūt ko Maron̄ Kōm̧m̧ani

• Riiti 2 Korint 5:6–7 im Alma 32:21 ippān ajri ro, im kajjitōk ippāer n̄an lali naan ko im eoon in jipan̄ ko me rej kōmeļeļeiki ta in tōmak. Kajjitōk ippāer n̄an je meļeļe ko aer im kwaļo̧ki n̄an doon.

• Kajjitōk ippān ajri ro n̄an kiil mejeer, im kajjitōk ippān ajri ro jet n̄an leļo̧k tōl n̄an jipan̄ e kadedeļo̧k juon jerbal āinwōt kalōk juon tawōr kōn pirōk ak etetal ilo ruum̧ eo. Elmen an m̧akūtkūt in jipan̄ kōj meļeļe ta meļeļein “etetal kōn tōmak” ilo Anij?

• Kwaļo̧k pija in alooj eo “Reunited by Faith” (ChurchofJesusChrist.org), im kajjitōk ippān ajri ro elmen an likao in ilo pija eo kar etetal ilo tōmak. Kwaļo̧k juon en̄jake ke kwaar etetal kōn tōmak, im rōjan̄ ajri ro n̄an kwaļo̧k en̄jake ko.

2 Korint 7:8–10

Būrom̧ōj ekkar n̄an Anij ej tōlļo̧k eō n̄an ukweļo̧k.

Emakijkij en̄jake jook im āliklik n̄e po ilo kōm̧m̧an ko rebōd. Jipan̄ ajri ro kāālet en̄jake kein jān būrom̧ōj ekkar n̄an anij, eo ej tōlļo̧k n̄an ukweļo̧k.

M̧akūtkūt ko Maron̄ Kōm̧m̧ani

• Kōmeļeļeiki bwe ilo 2 Korint 7:8–10, Paul ekar kōn leta eo ekar je ļo̧k n̄an ro Rikwojarjar, peran n̄an kakkōl er kōn jerawiwi ko aer. Riiti eoon kein ippān doon. Etke Paul ekar m̧ōņōņō ke ro Rikwojarjar rekar būrom̧ōj? Kalikkar bwe kain būrom̧ōj in ej ņaetan būrom̧ōj ekkar n̄an Anij.

• Kajjitōk ippān ajri ro n̄an ļōmņake juon tōre ke raar en̄jake būrom̧ōj kōn juon kāālet ebōd rekar kōm̧m̧ane. Kajjitōk ippāer n̄an kajjitōkin er make, “Etke ij būrom̧ōj?” innām kwaļo̧k uwaak ko aer. Je uwaak ko aer ioon bo̧o̧t eo (n̄an waanjon̄ak, “ikar mijak n̄e ipād ilo jorrāān” ak “ijeļā ikar kabūrom̧ōj Jemedwōj Ilan̄” ak “ikar kōjan̄ ro jet”). Ewi wōt iaan uwaak kein ioon bo̧o̧t reinļo̧k wōt “būrom̧ōj ekkar n̄an anij”? (2 Korint 7:10). Etke būrom̧ōj ekkar n̄an anij em̧m̧anļo̧k jān būrom̧ōj ko jet jemaron̄ en̄jaki ālkin kōm̧m̧an bōd?

Kōketak Ekkatak ilo M̧weo

Kajjitōk ippān ajri ro n̄an kwaļo̧k n̄an baam̧le ko aer juon iaan m̧akūtkūt ko jān kūlaaj eo rainin, bōle ilo iien nokon in jota an baam̧le.

Kōkōm̧anm̧anļo̧k Ad Katakin

Kwaļo̧k juon eoon. Kālet juon eoon kwoj lo eļap meļeļein, im likūt ijo ro uwaan baam̧le eo naaj emakijkij aer loe. Bōlen ajri ro remaron̄ bōk kuņaer kāālet juon eoon n̄an kwaļo̧ke.