“28 ʻAokosi–3 Sepitema. 1 Kolinitō 8–13: ‘Ko e Sino ʻo Kalaisi ʻa Kimoutolu,’” Haʻu, ʻo Muimui ʻIate Au—Maʻá e Palaimelí: Fuakava Foʻoú 2023 (2022)
“28 ʻAokosi–3 Sepitema. 1 Kolinitō 8–13,” Haʻu, ʻo Muimui ʻIate Au—Maʻá e Palaimelí: 2023
28 ʻAokosi–3 Sepitema
1 Kolinitō 8–13
“Ko e Sino ʻo Kalaisí ʻa Kimoutolu”
ʻI hoʻo lau e 1 Kolinitō 8–13, fakafanongo ki he ngaahi ueʻi mei he Laumālié fekauʻaki mo e founga ke akoʻi ʻaki e ngaahi tefitoʻi moʻoni ʻi he ngaahi vahe ko ʻení. Manatuʻi ʻe lava ke fakafenāpasi ha faʻahinga fakakaukau ki he ʻekitivitií maʻá e fānau lalahí mo e īkí fakatouʻosi.
Fakaafeʻi e Feʻinasiʻakí
Fakaafeʻi e fānaú ke nau vahevahe ha meʻa ne nau fai lolotonga e sākalamēnití, ke nau fakakaukau ai kia Sīsū.
Akoʻi e Tokāteliné: Fānau Iiki Angé
ʻE tokoniʻi au ʻe he Tamai Hēvaní ke u fai e ngaahi fili totonú.
ʻOku ʻikai faingofua maʻu pē ke fili ki he totonú, pea ʻoku ʻafioʻi ia ʻe he Tamai Hēvaní. ʻI he taimi ʻoku tau kole aí, te Ne tokoniʻi kitautolu koeʻuhí ʻokú Ne finangalo ke tau lavameʻa.
Ngaahi ʻEkitivitī ʻe Ala Fakahokó
-
Lau ʻa e 1 Kolinitō 10:13 ki he fānaú, pea fakaafeʻi ke nau kalokalo honau ʻulú ʻi he taimi te nau fanongo ai ki he ongo foʻi lea “ʻahiʻahiʻi” mo e “ʻahiʻahi.” Fakamatalaʻi ange ʻa e ʻuhinga ʻo e veesi ko ʻení kiate koé.
-
Fai ha fanga kiʻi talanoa nounou ki ha kakai ne ʻamanaki ke nau fai ha fili ʻoku hala. Lolotonga e fanongo ʻa e fānaú, fakaafeʻi ke nau hiki hake honau nimá pe ko ha laʻipepa fakaʻilonga ʻi he taimi ʻoku fai ai ʻe he tokotaha he talanoá ha fili halá. Ko e hā e fili ʻoku totonú? Fakamoʻoniʻi ange ʻe tokoniʻi kitautolu ʻe he Tamai Hēvaní ke fili e totonú.
-
Fakaʻaliʻali ha fakatātā ʻo Sīsū, pea hivaʻi fakataha mo e fānaú ha hiva kau kiate Ia, hangē ko e “ʻOku ou Feinga ke Hangē ko Sīsuú” (Tohi Hiva ʻa e Fānaú, 40–41). Talanoa kau ki ha founga ne tokoniʻi ai koe ʻe hono manatuʻi ʻa Sīsuú, ke ke fai ha ngaahi fili ʻoku leleí. Fakaʻaliʻali ha ʻū fakatātā ʻo ha ngaahi meʻa kehe ʻokú ne tokoniʻi kitautolu ke tau fai ha ngaahi fili lelei, hangē ko e ongomātuʻá pe folofolá. Fehuʻi ki he fānaú pe ko e hā ha ngaahi meʻa ʻoku tokoni kiate kinautolu ke nau fai e ngaahi fili ʻoku leleí.
Kuo faitāpuekina au ʻe he Tamai Hēvaní ʻaki ha ngaahi meʻafoaki fakalaumālie.
Kuo foaki ʻe he Tamai Hēvaní ki he kotoa ʻo ʻEne fānaú ha ngaahi meʻafoaki fakalaumālie. Ko e hā ha ngaahi meʻafoaki fakalaumālie ʻokú ke mamata ki ai ʻi he fānau ʻokú ke akoʻí?
Ngaahi ʻEkitivitī ʻe Ala Fakahokó
-
Kole ki he fānaú ke nau tā ha fakatātā ʻo ha meʻaʻofa ne nau maʻu, ʻa ia ʻoku nau manako ai. Fakamatalaʻi ange, ʻoku ʻomi ʻe he Tamai Hēvaní kiate kitautolu ha ngaahi meʻafoaki fakalaumālie, ke fakamālohia ʻetau tuí mo tokoniʻi kitautolu ke tau faitāpuekina e niʻihi kehé. Vahevahe mo e fānaú ha niʻihi ʻo e ngaahi meʻafoaki fakalaumālie ʻoku fakamatalaʻi ʻi he 1 Kolinitō 12:7–11.
-
Fai ha kiʻi tohi ki he fānau takitaha, ʻo fakamatalaʻi ha meʻafoaki fakalaumālie kuó ke mātā ai ʻiate kinautolu (pe te ke lava fakaafeʻi e ngaahi mātuʻá ke nau fai e fanga kiʻi tohi ko ʻení). Faʻo e fanga kiʻi tohí ʻi ha ngaahi sila. Fakaʻatā e fānaú ke nau fakaava ʻa e silá, pea tokoniʻi ke nau laukonga fekauʻaki mo honau ngaahi meʻafoaki fakalaumālié.
Kuo foaki ʻe he Tamai Hēvaní ki he kotoa ʻo ʻEne fānaú ha ngaahi meʻafoaki fakalaumālie.
ʻOku ou lava ʻo ʻofa ki he niʻihi kehé.
ʻOku akoʻi mai ʻe he folofolá, ko e manavaʻofá ʻa e “ʻofa haohaoa ʻa Kalaisí” (Molonai 7:47). Te ke tokoniʻi fēfē ʻa e fānaú ke nau fakatupulaki mo fakahaaʻi e ʻofa faka-Kalaisí?
Ngaahi ʻEkitivitī ʻe Ala Fakahokó
-
Lau e 1 Kolinitō 13:13 mo e Molonai 7:47, pea tokoniʻi e fānaú ke nau toe lau e kupuʻi lea “Ko e manavaʻofá ʻa e ʻofa haohaoa ʻa Kalaisí.” Fakaʻaliʻali ha ʻū fakatātā ʻo e loto ʻofa mo angaʻofa ʻa Kalaisí, pea fehuʻi ki he fānaú pe naʻá Ne fakahaaʻi fēfē ʻa e ʻofá ki he niʻihi kehé (vakai, Tohi Fakatātā ʻo e Ongoongoleleí ki ha ngaahi fakakaukau).
-
Hivaʻi mo e fānaú ha hiva kau ki he ʻofa ki he niʻihi kehé, hangē ko e “Folofola ʻa Sīsū ʻFeʻofaʻakiʼ” pe “Ke Mou Feʻofaʻaki” (Tohi Hiva ʻa e Fānaú, 39, 74). Fakaʻaliʻali ha ʻū fakatātā ʻo ha kakai kehekehe (hangē ko e mātuʻá, tuongaʻane pe tuofefine, faiakó, pe kaungāmeʻa), pea kole ki he fānaú ke nau vahevahe e founga te nau lava ai ʻo tokoni ki he tokotaha ko iá. Fakaafeʻi e fānaú ke nau fakakaukau ki ha tokotaha te nau lava ʻo tokoni ki ai pea fai leva ha kiʻi tohi pe tā ha fakatātā ke ʻoange ki he tokotaha ko iá.
Akoʻi e Tokāteliné: Fānau Lalahi Angé
ʻE tokoniʻi au ʻe he Tamai Hēvaní ke u matuʻuaki e ʻahiʻahí.
ʻE lava ke ʻoange ʻe he ngaahi talaʻofa ʻi he veesi ko ʻení ha loto-falala ki he fānaú te nau lava ʻo tekeʻi ʻa e ʻahiʻahí ʻi he tokoni ʻa e Tamai Hēvaní.
Ngaahi ʻEkitivitī ʻe Ala Fakahokó
-
Fakaafeʻi e fānaú ke nau lau tautau toko ua ʻa e 1 Kolinitō 10:13 pea fakamatalaʻi fakanounou ʻa e vēsí ʻi he ngaahi lea pē ʻanautolu. Kole ki he fānaú ke nau vahevahe ha aʻusia naʻe tokoniʻi ai kinautolu ʻe he Tamai Hēvaní ke nau fakaʻehiʻehi pe tekeʻi ʻa e ʻahiʻahí. Ko e hā te tau lava ʻo fai ke tau fakafalala ai ki he Tamai Hēvaní ʻi he taimi ʻe ʻahiʻahiʻi ai kitautolú?
-
Hiki ʻi ha ʻū laʻipepa ʻa e ngaahi ʻahiʻahi ʻe ala fehangahangai mo e fānaú he kuongá ni. Fakaafeʻi e fānaú ke nau takitaha fili ha laʻipepa pea vahevahe pe ko e hā ha meʻa kuo foaki mai ʻe he Tamai Hēvaní ke tokoni kiate kitautolu ke tau fakaʻehiʻehi pe tekeʻi ai e ngaahi ʻahiʻahi ko ʻení. Ki ha ngaahi fakakaukau, lau fakataha e ʻAlamā 13:28–29.
Lolotonga e sākalamēnití, te u lava ʻo fakakaukau ki he anga ʻo ʻeku muimui ki he Fakamoʻuí.
Tokoniʻi e fānau ʻokú ke akoʻí ke nau vakai ki he sākalamēnití ko ha faingamālie ke “ʻahiʻahi” (sivisiviʻi) ai kinautolu mo fakafoʻou ʻenau fuakava ʻi he papitaisó ke tauhi ki he ʻEikí mo tauhi ʻEne ngaahi fekaú (1 Kolinitō 11:28).
Ngaahi ʻEkitivitī ʻe Ala Fakahokó
-
Kole ki ha taha ʻo e fānaú ke ne lau e 1 Kolinitō 11:28. Ko e hā hono ʻuhinga ke “ʻahiʻahiʻi” kitautolu kimuʻa ʻi hono maʻu ʻo e sākalamēnití? Kole ki he fānaú ke nau fakakaukau ki ha kakai kehe ʻoku nau sivisiviʻi ha ngaahi meʻa, hangē ko e kau toketaá, kau polisi fakatotoló, pe kau saienisí (hangē ko ʻení, ʻoku sivisiviʻi kitautolu ʻe he kau toketaá ke fakapapauʻi ʻoku tau moʻui lelei). ʻI he taimi ʻoku tau maʻu ai ʻa e sākalamēnití, ko e hā te tau lava ʻo fai ke sivisiviʻi ʻa e founga ʻoku tau moʻui ʻaki ai ʻetau ngaahi fuakava ʻo e papitaisó?
-
Kole ki he fānaú ke nau faʻu ha lisi ʻo e ngaahi meʻa ʻoku nau lava ʻo fakakaukau ki ai ʻi he taimi ʻoku nau maʻu ai e sākalamēnití. Fakaafeʻi ke nau fakaʻaongaʻi ʻenau lisí ko ha fakamanatu ia ke sivisiviʻi kinautolu lolotonga e sākalamēnití.
1 Kolinitō 12:4, 7–12, 31; 13:1–8
ʻOku ʻi ai hoku ngaahi meʻafoaki fakalaumālie.
Naʻe akoʻi mai ʻe Paula, ko e ngaahi meʻafoaki ʻo e laumālié ʻoku foaki ia “ki he tangata kotoa pē” (1 Kolinitō 12:7). ʻE lava ke tokoni ʻa e tefitoʻi moʻoni ko ʻení ki he fānaú, ke nau langaki ʻenau ongoʻi mahuʻingaʻia ʻiate kinautolú, tautefito ki he taimi te nau fakaʻaongaʻi ai ʻenau ngaahi meʻafoakí ke fai tāpuekina e niʻihi kehé.
Ngaahi ʻEkitivitī ʻe Ala Fakahokó
-
Kole ki he fānaú ke hiki ʻi he palakipoé ʻa e ngaahi meʻafoaki fakalaumālie ʻoku nau maʻu ʻi he 1 Kolinitō 12:7–11; 13:2. Fakaafeʻi ke nau fekumi ki ha toe meʻafoaki kehe ʻoku hā ʻi he Molonai 10:8–18 mo e Tokāteline mo e Ngaahi Fuakava 46:13–26. Vahevahe mo kinautolu ha ngaahi meʻafoaki fakalaumālie kehe naʻe lave ki ai ʻa ʻEletā Marvin J. Ashton: “Ko e meʻafoaki ʻo e kolé; ʻa e meʻafoaki ʻo e fakafanongó; … ʻa e meʻafoaki ʻo e fakaʻehiʻehi mei he fekeʻikeʻí; … ʻa e meʻafoaki ʻo e fekumi ki he meʻa ʻoku māʻoniʻoní; ʻa e meʻafoaki ʻo e ʻikai ke fakamāú; ʻa e meʻafoaki ʻo e falala ʻe tataki koe ʻe he ʻOtuá; … ʻa e meʻafoaki ʻo e tokanga ki he niʻihi kehé; … ʻa e meʻafoaki ʻo e lotú; ʻa e meʻafoaki ʻo hono fai ʻo ha fakamoʻoni mālohí” (“There Are Many Gifts,” Ensign, Nov. 1987, 20). Fakaafeʻi e fānaú ke nau talanoa ki ha ngaahi meʻafoaki fakalaumālie ʻoku nau mātā ʻi he niʻihi kehé.
-
Kimuʻa pea fai e kalasí, fehuʻi ki he ngaahi mātuʻa ʻo e fānau ʻi hoʻo kalasí, fekauʻaki mo e ngaahi meʻafoaki ʻoku nau mātā ʻi heʻenau fānaú, pe te ke fakakaukau pē ʻiate koe ki ha ngaahi meʻafoaki ʻoku nau maʻu. Talaange ki he fānaú kau ki he ngaahi meʻafoaki ko ʻení. Fakaafeʻi e fānaú ke nau hiki hifo ha taha ʻo e ngaahi founga te nau fakaʻaongaʻi ki ai ʻenau ngaahi meʻafoakí ke faitāpuekina ha taha he uiké ni.
-
Vahevahe ha ngaahi tūkunga ʻa ia ʻe lava ai ʻe he kakaí ʻo fakaʻaongaʻi ha meʻafoaki fakalaumālie mei he 1 Kolinitō 12:7–10. Fakaafeʻi e fānaú ke nau feinga ke ʻiloʻi ʻa e ngaahi meʻafoaki fakalaumālie ʻe lava ʻo fakaʻaongaʻi ʻi he tūkunga takitaha.
Poupouʻi e Ako ʻi ʻApí
Fokotuʻu ange ki he fānaú ke nau aleaʻi mo honau fāmilí ha meʻa naʻa mou talanoa ki ai ʻi he kalasí. Hangē ko ʻení, te ke lava ʻo fakaafeʻi e fānaú ke nau vahevahe honau ngaahi meʻafoaki fakalaumālié mo honau fāmilí, pea fehuʻi ki he kau mēmipa ʻo honau fāmilí pe ko e hā ʻenau ngaahi meʻafoakí.
Fakatupulaki ʻEtau Founga Akoʻí
Fai ha ngaahi fakaafe ʻa ia ʻoku nau fakaʻapaʻapaʻi e tauʻatāina ke filí. ʻI hoʻo fakaafeʻi e fānaú ke nau ngāueʻi e meʻa ʻoku nau akó, fakakaukau ki ha ngaahi founga ke fakaʻapaʻapaʻi ai ʻenau tauʻatāina ke filí. Fakakaukau ke fakaafeʻi ke nau fakakaukau ki he ngaahi founga pē ʻanautolu ke nau fakaʻaongaʻi ai e meʻa ne nau akó, kae ʻikai ko hono ʻoatu ha ngaahi fakaafe tukupau.