“4–10 Sepitema. 1 Kolinitō 14–16: ‘ʻOku ʻIkai Mei He ʻOtuá ʻa e Maveuveú, ka ko e Melinó,’” Haʻu, ʻo Muimui ʻIate Au—Maʻá e Palaimelí: Fuakava Foʻoú 2023 (2022)
“4–10 Sepitema. 1 Kolinitō 14–16,” Haʻu, ʻo Muimui ʻIate Au—Maʻá e Palaimelí: 2023
4–10 Sepitema
1 Kolinitō 14–16
“ʻOku ʻIkai mei he ʻOtuá ʻa e Maveuveú, ka ko e Melinó”
ʻI hoʻo lau e 1 Kolinitō 14–16, ʻe tokoniʻi koe ʻe he Laumālie Māʻoniʻoní ke ke ʻiloʻi e meʻa ke akoʻi ki he fānau ʻi ho kalasí. Toe vakaiʻi e fokotuʻutuʻu ko ʻení ki ha ngaahi fakakaukau lahi ange.
Fakaafeʻi e Feʻinasiʻakí
Te ke lava ʻo kamata ʻaki e lēsoni ʻo e uike ní ʻa hono lau leʻolahi e 1 Kolinitō 14:26. Fakamahinoʻi ange ko e taimi ʻoku tau fakataha mai ai ʻi he lotú, te tau lava ʻo fakamaama (pe langa hake mo tokoni) ki he niʻihi kehé ʻi he taimi ʻoku tau vahevahe ai e meʻa ʻoku tau akó. Fehuʻi ki he fānaú pe ko e hā te nau lava ʻo vahevahe ke fakamaama ai ha taha ʻi he kalasí he ʻahó ni.
Akoʻi e Tokāteliné: Fānau Iiki Angé
Te u lava ʻo nofo mo e Tamai Hēvaní hili ʻeku maté koeʻuhi naʻe toetuʻu ʻa Sīsū Kalaisi.
Te ke lava fēfē ʻo akoʻi ki he fānaú, koeʻuhi ko e toetuʻu ʻa Sīsū Kalaisí, te tau toe moʻui?
Ngaahi ʻEkitivitī ʻe Ala Fakahokó
-
Toutou lau ʻa e kupuʻi lea ko ʻení fakataha mo e fānaú: “ʻE moʻui kotoa pē ʻia Kalaisi” (1 Kolinitō 15:22). Fakaʻaliʻali ha fakatātā ʻo e Fakamoʻui kuo toetuʻú (vakai fokotuʻutuʻu ki he uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí) pe huluʻi e foʻi vitiō “Toetuʻu ʻa Sīsū” (ChurchofJesusChrist.org). Fakamatalaʻi ange, te tau mate kotoa ha ʻaho, ka koeʻuhi naʻe toetuʻu ʻa Sīsū Kalaisi, te tau toe foki ʻo moʻui hili ʻetau maté.
-
Fakaʻaliʻali ki he fānaú ha sāketi, ʻa ia ʻokú ne fakafofongaʻi hotau sino fakamatelié. ʻI he taimi ʻoku tau moʻui aí, ʻoku ʻi hotau sinó ʻa hotau laumālié, pea ʻoku lava ke ngaue ʻa hotau sinó (tui ʻa e sāketí). ʻI he taimi te tau mate aí, ʻe mavahe leva ʻa hotau laumālié mei hotau sinó, pea ʻikai lava hotau sinó ʻo ngaue (toʻo e sāketí pea hili ia ʻi ha tēpile pe sea ke ne fakafofongaʻi ha sino ʻoku ʻikai ai ha laumālie). ʻI he taimi te tau toetuʻu aí, ʻe foki leva hotau laumālié ki hotau sinó (toe tui ʻa e sāketí), pea ʻikai ʻaupito te na toe māvahevahe. Tuku ki he fānaú ke nau taufetongi ʻi hono tui mo vete ʻo e sāketí lolotonga hono fakamatalaʻi ʻe ha taha ʻi he fānaú, ʻa e meʻa ʻe hoko ʻi he taimi te tau toetuʻu aí.
ʻE lava ke u papitaiso maʻá e kakai kuo pekiá.
ʻI he teuteu ʻa e fānaú ki honau papitaisó, fakakaukau ki he founga te ke lava ai ʻo tokoni ke nau hanganaki atu foki ki he faingamālie ke papitaiso maʻá e kakai kuo pekiá.
Ngaahi ʻEkitivitī ʻe Ala Fakahokó
-
Tokoni ki he fānaú ke nau fakakaukau ki ha ngaahi meʻa ʻoku ʻikai ke nau lava ʻo fai maʻanautolu pē. Ko hai ʻokú ne tokoniʻi kinautolu ke nau fai e ngaahi meʻá ni? Fakaʻaliʻali ha fakatātā ʻo e taha ʻo hoʻo ngaahi kui naʻe pekia kae teʻeki ai ke papitaisó. Talanoa ki he fānaú fekauʻaki mo e tokotaha ko ʻení, pea fakamatalaʻi ange ʻoku fie maʻu ʻe he tokotahá ni ʻetau tokoní ke ne papitaiso.
-
ʻEke ki he fānaú pe ʻoku ʻi ai nai ha mēmipa honau fāmilí kuo ʻalu ki he temipalé ke fakahoko ʻa e papitaiso maʻá e kau pekiá. Fakaʻaliʻali ange ha ʻū fakatātā ʻo ha faiʻanga papitaiso ʻi he temipalé. Fehuʻi ki he fānaú pe ʻoku nau ʻilo e meʻa ʻoku fai hení. Fakamatalaʻi ange, ʻe lava ke tau papitaiso ʻi he temipalé maʻá e kakai kuo pekia ne teʻeki papitaisó. Pea ʻe lava leva ke fili ʻe he kakai ko iá pe te nau tali ʻa e papitaisó.
ʻOku finangalo ʻa e Tamai Hēvaní ke u nofo mo Ia ʻi he puleʻanga fakasilesitialé.
Te ke lava fēfē ʻo akoʻi e fānaú kau ki he ngaahi puleʻanga fakasilesitialé, fakatelesitialé mo e fakatilesitialé? ʻE lava ke tokoni ʻa e ngaahi ʻekitivitī ko ʻení.
Ngaahi ʻEkitivitī ʻe Ala Fakahokó
-
Hiki ʻi he palakipoé e silesitiale, telesitiale, mo e tilesitiale. Tokoniʻi e fānaú ke nau ako ke puʻaki e ngaahi foʻi lea ko ʻení.
-
Fakaʻaliʻali ha ʻū fakatātā ʻo e laʻaá, māhiná, mo e fetuʻú. Fakaafeʻi ʻa e fānaú ke nau fokotuʻutuʻu ia ke hokohoko mei he maama ulo lahi tahá ki he maama siʻisiʻi tahá. Lau ʻa e 1 Kolinitō 15:40–41 ki he fānaú (vakai foki ki he Liliu ʻa Siosefa Sāmitá ʻi he veesi 40). Fakamatalaʻi ange ʻoku fakafofongaʻi ʻe he laʻaá, māhiná, mo e ngaahi fetuʻú ʻa e ngaahi puleʻanga te tau lava ʻo nofo ai hili ʻetau toetuʻú. ʻI he puleʻanga fakasilesitialé, te tau lava ʻo nofo ai mo ʻetau Tamai Hēvaní.
-
ʻOange ki he fānaú ha tatau ʻo e peesi ʻekitivitī ʻo e uike ní ke nau valivali. Lolotonga ʻenau valivalí, vahevahe mo kinautolu hoʻo ngaahi ongo fekauʻaki mo e Fakamoʻuí mo e meʻa kuó Ne fai ke tau lava ai ʻo toe nofo fakataha mo e Tamai Hēvaní.
“ʻOku ai ʻa e nāunau ʻe taha ʻo e laʻaá” (1 Kolinitō 15:41).
Akoʻi e Tokāteliné: Fānau Lalahi Angé
Koeʻuhí ko Sīsū Kalaisi mo ʻEne Toetuʻú, te u toetuʻu mo au.
ʻOku mahino nai ki he fānau ʻokú ke akoʻí ʻa e mahuʻinga ʻo e Toetuʻu ʻa Sīsū Kalaisí? ʻE ala tokoni e ngaahi fakakaukau ko ʻení.
Ngaahi ʻEkitivitī ʻe Ala Fakahokó
-
Fakaafeʻi e fānaú ke nau taufetongi hono lau e ngaahi veesi ʻi he 1 Kolinitō 15:12–22, ʻo fekumi ki ha ngaahi tali ki he fehuʻi “Ko e hā ne mei hoko kapau naʻe ʻikai ha toetuʻu?”
-
Fakaafeʻi e fānaú ke nau fakatātaaʻi e founga ke fakamatalaʻi ai e toetuʻú ki ha taha. Ki ha ngaahi fakakaukau, ʻe lava ke nau toe vakaiʻi ha hiva fekauʻaki mo e Toetuʻu ʻa e Fakamoʻuí, hangē ko e “Naʻe Toetuʻu Nai ʻa Sīsū?” (Tohi Hiva ʻa e Fānaú, 45). Vahevahe hoʻo fakamoʻoni ki he Toetuʻu ʻa Kalaisí.
1 Kolinitō 15:12–13, 20–22, 29
Te u lava ʻo teuteu ke u hū ki he temipalé ke papitaiso maʻá e pekiá.
Ko e papitaiso maʻá e pekiá ko ha ngāue fakafiefia ia ʻo e ʻofa maʻa ʻetau ngaahi kuí. Te ke tokoniʻi fēfē ʻa e fānaú ke nau teuteu ke kau ʻi he ngāue ko ʻení?
Ngaahi ʻEkitivitī ʻe Ala Fakahokó
-
Lau e 1 Kolinitō 15:29. Ko e hā e ngaahi meʻa ne fai ʻe he Kāingalotu ʻi he kuonga ʻo Paulá ʻa ia ʻoku tau fakahoko foki ʻi he kuongá ni? Fehuʻi ki he fānaú pe ko e hā e ʻuhinga ʻoku tau papitaiso ai maʻá e kau pekiá. Kapau ʻe fie maʻu, fakamatalaʻi ange ko e tokolahi ʻetau ngaahi kuí naʻe ʻikai ke nau maʻu ha faingamālie ke papitaiso mo hilifakinima lolotonga e moʻuí ni. ʻI he temipalé, te tau lava ʻo papitaiso mo hilifakinima maʻanautolu.
-
ʻI ha ngaahi ʻaho kimuʻa ʻi he kalasí, kole ki ha mātuʻa ʻo ha taha ʻo e fānaú, ke tokoniʻi ʻenau fānaú ke nau haʻu mateuteu ke vahevahe ha ʻakau fakafāmili, pe fai ha talanoa kau ki ha taha ʻo e ngaahi kuí. Te ke lava foki ʻo vahevahe kau ki hoʻo ngaahi kuí.
-
Fakaafeʻi ha mēmipa ʻo e kau pīsopelikí pe ko ha toʻu tupu ʻi ho uōtí ke vahevahe ha ngaahi meʻa ʻe lava ʻe he fānaú ʻo fai ke nau hū ai ki he temipalé. Kole ki he fānaú ke tānaki mai ʻenau ngaahi fakakaukaú. Fakaafeʻi ke nau fokotuʻu ha taumuʻa ke ʻalu ki he temipalé ha ʻaho.
Hili ʻeku toetuʻú, te u lava ʻo nofo ʻi he puleʻanga fakasilesitialé.
Naʻe lave ʻa Paula ki he ngaahi nāunau ʻe tolú: selesitialé, telesitialé, mo e tilesitialé, ke akoʻi e kakai Kolinitoó kau ki he ngaahi sino te tau maʻu ʻi he Toetuʻú.
Ngaahi ʻEkitivitī ʻe Ala Fakahokó
-
Lau e 1 Kolinitō 15:40–41 pea fakaafeʻi ha taha ʻi he fānaú ke ne tā ha laʻā, māhina, mo ha fetuʻu ʻi he palakipoé. Kole ki he kau mēmipa ʻo e kalasí ke nau feinga ke ʻiloʻi pe ko e faʻahinga sino toetuʻu fē ʻoku fakafofongaʻi ʻe he fakatātā takitaha.
-
Hivaʻi fakataha ha foʻi hiva fekauʻaki mo e tefito ko ʻení, hangē ko e “Ko Hoku Temipale Mei he ʻEikí” (Tohi Hiva ʻa e Fānaú, 73). Ko e hā ʻoku akoʻi mai ʻe he hivá ni kiate kitautolu kau ki he teuteu ke nofo ʻi he nāunau fakasilesitialé?
-
Fakamatalaʻi ange naʻe mata meʻa-hā-mai ʻa Siosefa Sāmita ʻa ia naʻá ne mamata ai ki ha ngaahi puleʻanga ʻe tolu ʻa ia naʻe tatau mo e faʻahinga ʻo e ngaahi sino ne fakamatalaʻi ʻe Paulá. Tokoniʻi e fānaú ke nau fekumi ki he ngaahi kupuʻi lea ʻi he Tokāteline mo e Ngaahi Fuakava 76:50–53, 70; 76:71–79; 76:81–82 ʻokú ne fakamatalaʻi e ngaahi puleʻanga ʻe tolu ko ʻení.
Poupouʻi e Ako ʻi ʻApí
Fakaafeʻi e fānaú ke nau kole ki heʻenau mātuʻá ke nau talanoa kau ki he taha ʻo ʻenau ngaahi kuí. Te nau lava ʻo vahevahe e talanoá mo e kalasí ʻi he uike kahaʻú.
Fakatupulaki ʻEtau Founga Akoʻí
Poupouʻi e fānaú ke nau fai ha ngaahi fehuʻi. Feinga ke ʻiloʻi ko e ngaahi fehuʻi [ʻa e fānaú] ko ha ngaahi faingamālie ia kae ʻikai ko ha fakahohaʻa pe fakatuta ki hoʻo lēsoní. … ʻOku ʻoatu ʻe he faʻahinga fehuʻi peheé ha ʻilo mahuʻinga kiate koe, ki he meʻa ʻoku fakakaukau mo tokanga ki ai e fānaú, pea mo e anga ʻenau tali e meʻa ʻoku nau akó. Tokoni ke nau ʻilo ʻe lava ke maʻu e ngaahi tali ki heʻenau ngaahi fehuʻí mei he folofolá mo e ngaahi lea ʻa e kau palōfita moʻuí” (Ko e Faiako ʻi he Founga ʻo e Fakamoʻuí, 27).