“18–24 Sepitema. 2 Kolinitō 8–13: ‘ʻOku ʻOfa ʻa e ʻOtuá ki ha Foaki Fiefia,’” Haʻu, ʻo Muimui ʻIate Au—Maʻá e Palaimelí: Fuakava Foʻoú 2023 (2022)
“18–24 Sepitema. 2 Kolinitō 8–13,” Haʻu, ʻo Muimui ʻIate Au—Maʻá e Palaimelí: 2023
18–24 Sepitema
2 Kolinitō 8–13
“ʻOku ʻOfa ʻa e ʻOtuá ki ha Foaki Fiefia”
ʻE hoko mai ʻa hoʻo fakakaukau lelei taha ki hono akoʻi e fānau ʻi ho kalasí, ʻi he lolotonga hoʻo ako ʻi he faʻa lotu ʻa e 2 Kolinitō 8–13 mo ke fakakaukau kiate kinautolú. ʻE lava ke maʻu ha toe ngaahi fakakaukau fakafaiako kehe ʻi he lēsoni ko ʻení.
Fakaafeʻi e Feʻinasiʻakí
Koha founga lelei ʻe taha ke fakaafeʻi e fānaú ke nau vahevahé, ko hono fakamanatu kiate kinautolu ha meʻa naʻá ke fakaafeʻi ke nau fai lolotonga ha lēsoni kimuʻa. Kole ange ke nau vahevahe ʻenau ngaahi aʻusiá.
Akoʻi e Tokāteliné: Fānau Iiki Angé
Te u lava ʻo foaki fiefia ki he kakai ʻoku faingataʻaʻiá.
ʻOku lelei maʻu pē ke tokoni ki he niʻihi kehé, ka ʻoku toe lelei ange ʻa e tokoni fiefiá. Fakakaukau ki ha meʻa te ne ueʻi fakalaumālie e fānau takitaha ke nau hoko ko ha taha “foaki fiefia.”
Ngaahi ʻEkitivitī ʻe Ala Fakahokó
-
Fakaafeʻi e fānaú ke nau toutou lea ʻaki e kupuʻi lea “ʻOku ʻofa ʻa e ʻOtuá ki ha foaki fiefia” (2 Kolinitō 9:7). Ko e hā e ʻuhinga ʻo e hoko ko ha taha “foaki fiefia”? Fakaʻaliʻali ha fakatātā ʻo ha fofonga fiefia mo ha fofonga mamahi, pea fehuʻi ki he fānaú pe ko e fē e taha ʻoku ngalingali ko ha taha foaki fiefiá.
-
Hivaʻi tuʻo lahi fakataha ha hiva fekauʻaki mo e ngāue tokoní, hangē ko e “ʻI heʻetau Tokoní” (Tohi Hiva ʻa e Fānaú, 108) ʻI hono ʻuluaki hivaʻí, kole ki he fānaú ke nau hivaʻi fiefia ia; pea kole ange leva ke nau hivaʻi ʻaki ha ngaahi ongo kehekehe pe ngaahi tōʻonga, hangē ko e loto-mamahí, ongosiá, loto-ʻitá, pe ilifia. Fakamanatu ki he fānaú ʻoku finangalo e Tamai Hēvaní ke tau tokoni fiefia ki he niʻihi kehé. Toe hivaʻi fiefia leva ʻa e foʻi hivá.
-
Tokoniʻi e fānaú ke nau faʻu ha ʻū fakatātā ʻo ha ngaahi fofonga malimali mo ha ngaahi fofonga fakafulofula. Kole ange ke nau puke ki ʻolunga ʻenau ʻū fakatātaá ʻi he taimi te nau fanongo ai ki he foʻi lea malimali ʻi heʻenau hivaʻi ʻa e “Malimali” (Tohi Hiva ʻa e Fānaú, 128). ʻE lava ke nau fai e meʻa tatau ʻaki e ʻū fakatātā ʻo e fofonga fakafulofulá mo e foʻi lea fakafulofulá. Tokoniʻi e fānaú ke nau ʻiloʻi pe ko e fē ʻa e fofonga ʻoku fiefiá pea ko e fē ʻoku ʻikaí. Fakamatalaʻi ange ko e founga ʻe taha ke fiefia mo tokoniʻi ai ki he niʻihi kehé ko e malimali mo tokoniʻi e niʻihi kehé ke nau malimali.
-
Palani ha ʻekitivitī fakakalasi ke tokoniʻi ha taha, hangē ko ha taha ʻoku ʻikai kau mai ki he Palaimelí pe ko ha mēmipa ʻo e uōtí pe kaungāʻapi ʻoku faingataʻaʻia. Te ke ala palani ke ʻaʻahi ki he ʻapi ʻo e tokotahá ni, fai ha fanga kiʻi tohi ʻofa pe tā ha ʻū fakatātā, pe ngaohi ha kiʻi kai maʻamaʻa ke vahevahe.
-
Fakaafeʻi e fānau takitaha ke palani ha ngāue tokoni fakafiefia ki ha mēmipa ʻo hono fāmilí. Lolotonga e kalasi ʻi he uike kahaʻú, kole ange ke nau vahevahe e meʻa ne nau faí.
ʻOku tali maʻu pē ʻe he Tamai Hēvaní ʻa e ngaahi lotú, kae ʻikai ʻi he founga ʻoku tau ʻamanaki maʻu pē ki aí.
ʻOku akoʻi kitautolu ʻe he aʻusia ʻa Paula ʻi heʻene lotu ke toʻo hono “tolounua ʻi he kakanó”, ʻoku fakamālohia kitautolu ʻe he ʻOtuá he taimi ʻe niʻihi ʻi hotau ngaahi faingataʻaʻiá kae ʻikai ke Ne toʻo ia.
Ngaahi ʻEkitivitī ʻe Ala Fakahokó
-
Fakaʻaliʻali ki he fānaú ha ʻakau ʻoku talatala (pe ko ha fakatātā). Tokoniʻi ke nau fakakaukau ki he ongo te nau maʻu kapau ne ʻi ai ha talatala naʻe pipiki ʻi honau kilí ʻo fuoloa. Fakamatalaʻi fakanounou ʻa e 2 Kolinitō 12:7–10 maʻá e fānaú, ʻo fakamatalaʻi ange ko e “tolounua [ʻa Paula] ʻi he kakanó” ko ha ʻahiʻahi, ʻa ia ko ha meʻa faingataʻa ʻi heʻene moʻuí. Neongo naʻe kole ʻe Paula ki he ʻOtuá ke ne toʻo ʻa e faingataʻá, ka naʻe ʻikai fai ia ʻe he ʻOtuá. Ka naʻe akoʻi ʻe he ʻOtuá kia Paula, ʻoku tokoniʻi kitautolu ʻe he ngaahi faingataʻá ke tau ako ke anga fakatōkilalo mo falala kiate Ia. ʻOku lava leva ke ngaohi kitautolu ʻe he ʻOtuá ke tau mālohi.
-
Fakamoʻoniʻi ʻoku ʻafioʻi ʻe he Tamai Hēvaní ʻa e meʻa ʻoku lelei taha maʻatautolú, pea te Ne ʻomi kiate kitautolu e meʻa ʻoku tau fie maʻú, neongo kapau ʻoku kehe ia mei he meʻa ʻoku tau fakakaukau ʻoku tau fie maʻú. Te ke lava foki ʻo vahevahe ha aʻusia ʻi ha taimi naʻe tali mai ai hoʻo lotú ʻi ha founga pe ko ha taimi naʻe kehe mei he meʻa naʻá ke ʻamanaki atu ki aí. ʻE lava foki ke tokoni ha talanoa hangē ko e “Ko e Palopalema ʻo e Suká” (Liahona, Sepitema. 2019).
-
Hivaʻi fakataha mo e fānaú ha hiva fekauʻaki mo e ʻofa ʻa e Tamai Hēvaní, hangē ko e “Lotu ʻa ha Kiʻi Tamasiʻi” (Tohi Hiva ʻa e Fānaú, 6–7). Fehuʻi ki he fānaú pe ko e hā te nau lea ʻaki ki ha taha ʻoku fifili pe ʻoku fanongoa mo tali nai ʻe he Tamai Hēvaní ʻa e ngaahi lotú. Toe hivaʻi ʻa e hivá, pea fakamahino ange ʻa e ngaahi laine ʻokú ne fakamatalaʻi e ongo ʻa e Tamai Hēvaní kiate kitautolú.
Akoʻi e Tokāteliné: Fānau Lalahi Angé
Te u lava ʻo foaki fiefia ki he kakai ʻoku faingataʻaʻiá.
Naʻe fie maʻu ʻe Paula ke ne ueʻi fakalaumālie e kau Māʻoniʻoní ke foaki ʻenau koloa lahí ke tokoniʻi e masivá. Te ke fakaʻaongaʻi fēfē ʻene ngaahi leá ke ueʻi fakalaumālie ʻaki e fānaú ke nau tokoni ki he niʻihi kehé?
Ngaahi ʻEkitivitī ʻe Ala Fakahokó
-
Hiki e lea ʻo e 2 Kolinitō 9:7 ʻi he palakipoé, pea tuku fakaava e ngaahi foʻi lea mahuʻingá. Fakaafeʻi e fānaú ke nau mateʻi pe ko e hā e ngaahi lea ʻoku pulí. Tuku leva ke nau lau e vēsí ʻi he folofolá ke fakafonu e ngaahi konga ʻoku avá. Ko e hā hono ʻuhinga ʻo e foaki “ʻi he mamahi, pe ʻi hono puleʻi”? Ko e hā e ʻuhinga ʻo e hoko ko ha taha “foaki fiefiá”?
-
Fakaafeʻi e fānaú ke nau tokoni atu ʻi hono kumi ha ʻū fakatātā ʻo hono tokoniʻi ʻe he Fakamoʻuí e niʻihi kehé (ʻoku lahi ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí). Fehuʻi ange pe ko e hā ʻoku nau mamata ki ai ʻi he ʻū fakatātā ko ʻení, ʻe tokoni ke nau ʻiloʻi naʻe tokoniʻi ʻe Sīsū e niʻihi kehé ʻi he ʻofa. Fokotuʻu ha taumuʻa ʻi he kalasí ke tali ʻio ʻi he taimi ʻoku kole tokoni mai ai ha mēmipa ʻo e fāmilí pe niʻihi kehe ʻi he uike ka hoko maí, hangē ko e tokoni ʻi ʻapi pe tokangaʻi e niʻihi kehé.
-
Tokoniʻi e fānaú ke nau teuteuʻi ha fanga kiʻi foʻi maka iiki. Fakamatalaʻi ange ko e “fanga foʻi maka ngāue tokoni” ʻeni te nau lava ʻo faʻo ʻi honau kató he uiké ni ke tokoni ke nau manatuʻi ke tokoni loto-fiefia ki he e niʻihi kehé.
-
Hivaʻi fakataha ha foʻi hiva fekauʻaki mo e ngāue tokoní, hangē ko e “Fakafiefia Ke Fakahoko” (Tohi Hiva ʻa e Fānaú, 129b). Tokoniʻi e fānaú ke nau fakakaukauʻi ha ngaahi veesi foʻou ki he hivá ʻokú ne fakamatalaʻi ha ngaahi founga kehekehe ke ngāue tokoni ai ki he niʻihi kehé.
ʻOku tali maʻu pē ʻe he Tamai Hēvaní ʻa e ngaahi lotú, ka ʻoku ʻikai maʻu pē ke Ne faʻa ʻomi ʻa e meʻa kotoa pē ʻoku ou koleá.
Naʻe kole ʻe Paula ki he ʻOtuá ke toʻo ʻa hono ngaahi vaivaí, ka naʻe ʻafioʻi ʻe he ʻOtuá ʻe ngaohi ia ʻe hono ngaahi vaivaí ke ne loto-fakatōkilalo pea ʻe ngaohi ia ʻe he ʻOtuá ke ne mālohi.
Ngaahi ʻEkitivitī ʻe Ala Fakahokó
-
Fakaafeʻi e fānaú ke nau fakahoa ʻa e 2 Kolinitō 12:9–10 mo e ʻEta 12:27. Ko e hā ha ngaahi foʻi lea pe kupuʻi lea ʻoku toutou hā ai? Ko e hā ʻoku akoʻi mai ʻe he ngaahi veesi ko ʻení? (Mahalo te ke fie fakamatalaʻi ange naʻe fakatatau ʻe Paula ʻa hono ngaahi faingataʻá ki ha tolounua ʻi hono kilí.) Ko e hā naʻe akoʻi ʻe he ʻOtuá kia Paula fekauʻaki mo e ngaahi faingataʻá?
-
Fakaafeʻi e fānaú ke nau lisi ha ngaahi faingataʻa ʻe niʻihi ʻoku maʻu ʻe he kakaí ʻi he moʻuí. Tokoniʻi ke nau fakakaukau ki he founga ʻe ala ako ai ha taha mei he ngaahi faingataʻa ko ʻení pea faitāpuekina ai kinautolu.
-
Lau fakataha mo e fānaú ʻa e “Ko e Palopalema ʻo e Suká” (Liahona, Sept. 2019). Kole ki he fānaú ke nau vahevahe ha ngaahi aʻusia ʻo ha taimi ne nau lotu ai ki ha meʻa pea ʻikai ke nau maʻu ia. Kole ange ke nau vahevahe ha meʻa ne nau ako mei heʻenau ngaahi aʻusiá. Te ke ala vahevahe foki hoʻo ngaahi aʻusia pē ʻaʻau. Vahevahe hoʻo fakamoʻoní, ʻoku tali mai maʻu pē ʻe he Tamai Hēvaní ʻetau ngaahi lotú, ʻi he founga pea mo e taimi te ne faitāpuekina lahi ʻaupito ai kitautolú.
Poupouʻi e Ako ʻi ʻApí
Fakaafeʻi e fānaú ke nau hoko ko ha kau foaki fiefia ʻi honau ngaahi ʻapí ʻi he uiké ni pea ke nau omi mateuteu ki he kalasí ʻi he uike kahaʻú, ke lipooti e founga ne nau tokoniʻi ai ha taha faingataʻaʻia.
Fakatupulaki ʻEtau Founga Akoʻí
Fakaleleiʻi e ngaahi fakahohaʻá ʻi he ʻofa. “Taimi ʻe niʻihi ʻe ʻi ai ha tōʻonga ʻa ha taha he fānaú te ne fakahohaʻasi e ako ʻa e toenga ʻo e kalasí. Kapau ʻe hoko ʻeni, faʻa kātaki, angaʻofa pea mo loto mahino ki he faingataʻa ʻoku siʻi fehangahangai mo e kiʻi tamasiʻí/taʻahiné. … Kapau ko e kiʻi tamasiʻi/taʻahine ko ia ʻokú ne fakatupu e fakahohaʻá ʻoku ʻi ai siʻane fie maʻu makehe, talanoa ki he mataotao faingataʻaʻia fakatuʻasino ʻa e uōtí pe siteikí pe vakai ki he [disability.ChurchofJesusChrist.org] ke ʻilo ai e founga ke ke feau lelei ʻaki e ngaahi fiemaʻu ko iá” (Ko e Faiako ʻi he Founga ʻa e Fakamoʻuí, 27).