ថ្ងៃទី ១១–១៧ ខែ កញ្ញា ។ កូនរិនថូស ទី២ ១–៧ ៖ ‹ ចូរឲ្យបានជាមេត្រីនឹងព្រះចុះ › » ចូរមកតាមខ្ញុំ—សម្រាប់អង្គការបឋមសិក្សា ៖ ព្រះគម្ពីរសញ្ញាថ្មី ឆ្នាំ ២០២៣ ( ឆ្នាំ ២០២២ )
« ថ្ងៃទី ១១–១៧ ខែ កញ្ញា ។ កូនរិនថូស ទី២ ១–៧ » ចូរមកតាមខ្ញុំ—សម្រាប់អង្គការបឋមសិក្សា ៖ ឆ្នាំ ២០២៣
ថ្ងៃទី ១១–១៧ ខែ កញ្ញា
កូរិនថូស ទី២ ១–៧
« ចូរឲ្យបានជាមេត្រីនឹងព្រះចុះ »
សូមចាប់ផ្ដើមការរៀបចំរបស់បងប្អូនដោយអានក្នុង កូរិនថូស ទី២ ១–៧ ។ ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ អាចជួយបងប្អូនឲ្យយល់ពីជំពូកទាំងនេះ ហើយគម្រោងមេរៀននេះអាចផ្ដល់នូវគំនិតបង្រៀននានាដល់បងប្អូន ។
អញ្ជើញឲ្យចែកចាយ
កុមារមួយចំនួននៅក្នុងថ្នាក់របស់បងប្អូនប្រហែលជាបានសរសេរសំបុត្រនៅសប្តាហ៍នេះ អំពីរបៀបដែលសមាជិកគ្រួសារធ្វើជាគំរូដ៏ល្អក្នុងនាមជាសិស្សរបស់ព្រះយេស៊ូវគ្រីស្ទ ( សូមមើល គម្រោងមេរៀនសប្តាហ៍នេះ នៅក្នុង ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ) ។ ប្រសិនបើពួកគេបានសរសេរ សូមប្រាប់ពួកគេពីមុនថ្នាក់រៀនចាប់ផ្តើមឲ្យចែកចាយសំបុត្រនេះដល់មិត្តរួមថ្នាក់ ។ ឬសូមឲ្យកុមារចែកចាយអ្វីមួយផ្សេងដែលពួកគេបានរៀន ។
បង្រៀនគោលលទ្ធិ ៖ កុមារតូចៗ
ព្រះវរបិតាសួគ៌លួងលោមចិត្តខ្ញុំ ហើយខ្ញុំអាចលួងលោមចិត្តមនុស្សដទៃបាន ។
តើបងប្អូនអាចធ្វើឲ្យកុមារមានទំនុកចិត្តថា ព្រះវរបិតាសួគ៌នឹងលួងលោមចិត្តពួកគេបានតាមរបៀបណា ? តើបងប្អូនអាចលើកទឹកចិត្តពួកគេ ឲ្យលួងលោមចិត្តមនុស្សដទៃបានតាមរបៀបណា ?
សកម្មភាពដែលអាចធ្វើបាន
-
សូមបង្ហាញកុមារនូវអ្វីដែលផ្តល់នូវភាពកក់ក្តៅ ដូចជា ភួយ ឬបង់រុំដំបៅ ។ សូមសួរកុមារពីអ្វីដែលធ្វើឲ្យពួកគេមានភាពកក់ក្តៅ នៅពេលពួកគេសោកសៅ ឬភ័យខ្លាច ឬមានបញ្ហាផ្សេងៗទៀត ។ សូមអាន កូរិនថូស ទី២ ១:៣–៤ ជាមួយកុមារតូចៗ ហើយសូមពន្យល់ថា « សេចក្តីវេទនា » គឺជាពាក្យមួយទៀតដែលមានន័យថាការមានបញ្ហាលំបាកខ្លាំងជាច្រើន ។ សូមចែកចាយវិធីមួយចំនួនដែលព្រះវរបិតាសួគ៌បានលួងលោមដល់បងប្អូន ហើយសូមថ្លែងទីបន្ទាល់ថា ទ្រង់នឹងសម្រាលទុក្ខដល់កុមារផងដែរ ។
-
សូមបង្ហាញរូបភាពរបស់មនុស្សដែលកំពុងទទួលបុណ្យជ្រមុជទឹក ( សូមមើល សៀវភៅរូបភាពដំណឹងល្អ ល.រ. ១០៣–៤ ) ខណៈដែលបងប្អូនអាន កូរិនថូស ទី២ ១:៤ ឲ្យកុមារស្តាប់ ។ សូមពន្យល់ថា នៅពេលយើងទទួលបុណ្យជ្រមុជទឹក នោះយើងសន្យាថានឹងជួយលួងលោមដល់អ្នកដទៃ ។ តើយើងអាចធ្វើតាមដំបូន្មានរបស់ ប៉ុល ឲ្យ « កម្សាន្ដចិត្តអ្នកឯទៀត ក្នុងអស់ទាំងសេចក្តីវេទនា » បានដោយរបៀបណា ?
ខ្ញុំអាចអត់ទោសឲ្យមនុស្សដទៃបាន ។
សូមជ្រើសរើសចេញពីសកម្មភាពខាងក្រោម—ឬបង្កើតដោយខ្លួនបងប្អូន—ដើម្បីជួយពង្រឹងបំណងប្រាថ្នារបស់កុមារ ឲ្យអត់ទោសដល់មនុស្សដទៃ ។
សកម្មភាពដែលអាចធ្វើបាន
-
សូមពន្យល់កុមារថា ប៉ុលចង់ឲ្យពួកបរិសុទ្ធកូរិនថូស អត់ទោសដល់បុរសម្នាក់ដែលបានប្រព្រឹត្តបាប ។ សូមអាន កូរិនថូស ទី២ ២:៧–៨, ១០ ហើយអញ្ជើញកុមារឲ្យដាក់ដៃរបស់ពួកគេនៅលើបេះដូងរបស់ពួកគេ រាល់ពេលដែលពួកគេឮពាក្យ អត់ទោស និង បានអត់ទោស ។
-
សូមអញ្ជើញឲ្យកុមារសម្ដែងរបៀបដែលពួកគេអាចឆ្លើយតបនៅក្នុងស្ថានភាពនានា ដែលនរណាម្នាក់បានប្រព្រឹត្តមិនល្អ ។ សូមឲ្យពួកគេដាក់វេនគ្នានិយាយថា « ខ្ញុំសុំទោស » និង « ខ្ញុំអត់ទោសឲ្យឯង » ។ តើយើងជួយមនុស្សឲ្យដឹងថា យើងអត់ទោសឲ្យពួកគេតាមរបៀបណា ? សូមពន្យល់ថា របៀបមួយគឺត្រូវ « សម្ដែងសេចក្ដីស្រឡាញ់ដល់អ្នកនោះឲ្យជាក់លាក់ » ឬបង្ហាញសេចក្ដីស្រឡាញ់ដល់ពួកគេ ( កូរិនថូស ទី២ ២:៨ ) ។
ខ្ញុំជឿលើការប្រព្រឹត្តដោយទៀងត្រង់ ។
ប៉ុលបានបង្រៀនថា ពួកអ្នកបម្រើរបស់ព្រះគ្រីស្ទបាន « លះចោលអស់ទាំងការលាក់កំបាំងដែលគួរខ្មាស » ។ សូមពិចារណាអំពីរបៀបនានា ដែលបងប្អូនអាចពង្រឹងបំណងប្រាថ្នាកុមារៗរបស់បងប្អូន ឲ្យប្រព្រឹត្តដោយទៀងត្រង់នៅគ្រប់កិច្ចការទាំងអស់ ។
សកម្មភាពដែលអាចធ្វើបាន
-
សូមជួយកុមារឲ្យទន្ទេញឃ្លា « យើងខ្ញុំជឿលើការប្រព្រឹត្តដោយទៀងត្រង់ » ( មាត្រានៃសេចក្តីជំនឿ ១:១៣ ) ។ សូមសរសេរឃ្លានេះនៅលើខ្សែដៃក្រដាសដែលកុមារអាចតុបតែង និងពាក់បាន ។ សូមពន្យល់ថាការស្មោះត្រង់ រួមមានទាំងការនិយាយការពិតផងដែរ ។
-
សូមឲ្យកុមារលើកដៃ នៅពេលបងប្អូននិយាយអ្វីមួយ ដែលជាការពិត ហើយដាក់ដៃចុះនៅពេលបងប្អូននិយាយអ្វីមួយដែលមិនពិត ។ សូមថ្លែងពីអ្វីដែលសាមញ្ញៗ ប៉ុន្ដែវាជាក់ស្ដែងដូចជា « ថ្ងៃនេះគឺជាថ្ងៃអាទិត្យ » ឬ « ខ្ញុំមានច្រមុះបី » ។ សូមធ្វើសកម្មភាពនោះម្ដងហើយម្ដងទៀតពីរបីដង ដោយទុកឲ្យកុមារដាក់វេនគ្នាធ្វើជាអ្នកថ្លែងពាក្យពិត និងពាក្យកុហក ។ ហេតុអ្វីព្រះវរបិតាសួគ៌សព្វព្រះទ័យឲ្យយើងនិយាយការពិត ?
-
សូមបង្ហាញវីដេអូ « A Visit with Elder Ulisses Soares » ( នៅលើគេហទំព័រChurchofJesusChrist.org ) ។ តើអែលឌើរ សូរ៉េស រៀនអ្វីខ្លះអំពីភាពស្មោះត្រង់ ? សូមលើកទឹកចិត្តកុមារឲ្យត្រៀមខ្លួនដើម្បីធ្វើសេចក្តីសញ្ញានៃពិធីបុណ្យជ្រមុជទឹករបស់ពួកគេតាមរយៈការមានភាពស្មោះត្រង់ ។
បង្រៀនគោលលទ្ធិ ៖ កុមារធំៗ
ព្រះវរបិតាសួគ៌លួងលោមចិត្តខ្ញុំ ហើយខ្ញុំអាចលួងលោមចិត្តមនុស្សដទៃបាន ។
ការចងចាំពីរបៀបដែលព្រះបានលួងលោមយើង បំផុសគំនិតយើងឲ្យផ្តល់ការលួងលោមដល់អ្នកដទៃ ។
សកម្មភាពដែលអាចធ្វើបាន
-
នៅពេលបងប្អូនអាន កូរិនថូស ទី២ ១:៣–៤ សូមឲ្យកុមារស្ដាប់រកចម្លើយចំពោះសំណួរ « តើព្រះបានធ្វើអ្វីសម្រាប់យើង ? » សូមជួយកុមារឲ្យសរសររបៀបនានា ដែលព្រះលួងលោមចិត្តយើង ។ សូមអញ្ជើញកុមារឲ្យចែកចាយបទពិសោធន៍ នៅពេលដែលពួកគេមិនសប្បាយចិត្ត ឬព្រួយបារម្ភ ឬភ័យខ្លាច ហើយព្រះបានលួងលោមចិត្តពួកគេ ។
-
សូមអញ្ជើញកុមារឲ្យចែកចាយរបៀប ដែលយើងអាចរក្សាសេចក្តីសញ្ញានៃពិធីបុណ្យជ្រមុជទឹករបស់យើងដើម្បីលួងលោមដល់អ្នកដទៃ ( សូមមើល ម៉ូសាយ ១៨:៩ ) ។ សូមឲ្យពេលពួកគេគិតពីនរណាម្នាក់ដែលពួកគេស្គាល់ ដែលត្រូវការការលួងលោម និងដាក់ផែនការដើម្បីជួយដល់បុគ្គលនោះ ។
ខ្ញុំអាចអត់ទោសឲ្យមនុស្សដទៃបាន ។
វាអាចជារឿងពិបាកធ្វើដើម្បីអត់ទោសឲ្យមនុស្សដទៃ នៅពេលដែលពួកគេប្រព្រឹត្តមិនល្អចំពោះយើង ។ ប៉ុន្តែកុមារដែលបងប្អូនបង្រៀននឹងដកពិសោធន៍សេចក្ដីស្រឡាញ់ ភាពសុខសាន្ត និងសុភមង្គល នៅពេលពួកគេរៀនអត់ទោស ។
សកម្មភាពដែលអាចធ្វើបាន
-
សូមប្រាប់កុមារថា មនុស្សម្នាក់នៅក្រុងកូរិនថូសបានប្រព្រឹត្តបាប ហើយ « បានបណ្តាលឲ្យកើតមានសេចក្តីព្រួយ » ដល់ពួកបរិសុទ្ធ ( សូមមើល កូរិនថូស ទី២ ២:៥ ) ។ សូមឲ្យកុមារស្រាវជ្រាវនៅក្នុង កូរិនថូស ទី២ ២:៧–៨ ដើម្បីស្វែងរកអ្វីដែលប៉ុលចង់ឲ្យពួកបរិសុទ្ធធ្វើ ។
-
សូមចែកចាយបទពិសោធន៍មួយ នៅពេលដែលបងប្អូនបានអភ័យទោសដល់នរណាម្នាក់—ឬនរណាម្នាក់បានអភ័យទោសឲ្យបងប្អូន—ហើយសូមពន្យល់ពីអារម្មណ៍របស់បងប្អូនចំពោះរឿងនោះនៅពេលក្រោយមក ។ ឬសូមចែកចាយវីដេអូ « The Goal: A Story of Faith, Friendship and Forgiveness » ( នៅលើគេហទំព័រChurchofJesusChrist.org ) ។ សូមអញ្ជើញកុមារឲ្យចែកចាយបទពិសោធន៍របស់ពួកគេអំពីការអភ័យទោស ។
ខ្ញុំ « ដើរដោយជំនឿ មិនមែនដោយមើលឃើញទេ » ។
សូមពិចារណាអំពីរបៀបដែលបងប្អូនអាចលើកទឹកចិត្តកុមារ ឲ្យគោរពប្រតិបត្តិតាមព្រះបញ្ញត្តិ ទោះជានៅពេលពួកគេពុំឃើញពរជ័យ ដែលពួកគេប្រាថ្នាចង់បានក្ដី ។
សកម្មភាពដែលអាចធ្វើបាន
-
សូមអាន កូរិនថូស ទី២ ៥:៦–៧ និង អាលម៉ា ៣២:២១ ជាមួយកុមារ ហើយសូមឲ្យពួកគេរកមើលពាក្យ និងឃ្លាដែលជួយពន្យល់ពីអត្ថន័យនៃសេចក្តីជំនឿ ។ សូមឲ្យពួកគេសរសេរនិយមន័យរបស់ពួកគេ ហើយចែកចាយអត្ថន័យនោះជាមួយគ្នា ។
-
សូមអញ្ជើញកុមារម្នាក់ឲ្យបិទភ្នែករបស់គាត់ ឬនាង ហើយសូមឲ្យកុមារផ្សេងទៀតផ្តល់ការណែនាំដើម្បីជួយគាត់ ឬនាងឲ្យបំពេញភារកិច្ចមួយដូចជា ការសង់ប៉មជាមួយដុំឈើ ឬដើរនៅក្នុងថ្នាក់ ។ តើសកម្មភាពនេះជួយយើងឲ្យយល់អំពីអត្ថន័យនៃការ « ដើរដោយជំនឿ » លើព្រះយ៉ាងដូចម្តេច ?
-
សូមបង្ហាញវីដេអូ « Reunited by Faith » ( នៅលើគេហទំព័រ ChurchofJesusChrist.org ) ហើយសូមសួរកុមារពីរបៀបដែលយុវជននៅក្នុងវីដេអូនេះបានដើរដោយជំនឿ ។ សូមចែកចាយបទពិសោធន៍មួយ នៅពេលដែលបងប្អូនបានដើរដោយសេចក្ដីជំនឿ ហើយសូមលើកទឹកចិត្តកុមារឲ្យចែកចាយពីបទពិសោធន៍ទាំងឡាយ ។
សេចក្តីព្រួយដែលគាប់ព្រះហឫទ័យដល់ព្រះនាំខ្ញុំឲ្យប្រែចិត្ត ។
វាជារឿងធម្មតាទេដែលត្រូវមានអារម្មណ៍ខ្មាសអៀន ឬបាក់មុខ នៅពេលដែលគេចាប់យើងបានធ្វើអ្វីមួយខុសនោះ ។ សូមជួយកុមារឲ្យបែងចែកអារម្មណ៍ទាំងនេះពីសេចក្តីព្រួយដែលគាប់ព្រះហឫទ័យដល់ព្រះ ដែលនាំឲ្យមានការប្រែចិត្តនោះ ។
សកម្មភាពដែលអាចធ្វើបាន
-
សូមពន្យល់ថានៅក្នុង កូរិនថូស ទី២ ៧:៨–១០ ប៉ុល បានសំដៅទៅលើសំបុត្រមួយច្បាប់ដែលលោកបានសរសេរពីមុនមកទៅកាន់ពួកបរិសុទ្ធ ដោយបានព្រមានយ៉ាងម៉ឺងម៉ាត់អំពីអំពើបាបរបស់ពួកគេ ។ សូមអានខគម្ពីរទាំងនេះទាំងអស់គ្នា ។ ហេតុអ្វីបានជាប៉ុលមានចិត្តរីករាយ នៅពេលពួកបរិសុទ្ធមានសេចក្ដីព្រួយ ? សូមចង្អុលបង្ហាញថា ប្រភេទនៃសេចក្ដីព្រួយនេះ ត្រូវបានហៅថា សេចក្តីព្រួយដែលគាប់ព្រះហឫទ័យដល់ព្រះ ។
-
សូមឲ្យកុមារគិតអំពីពេលដែលពួកគេបានធ្វើអ្វីខុស ហើយមានអារម្មណ៍មិនល្អចំពោះអំពើនោះ ។ សូមអញ្ជើញពួកគេឲ្យសួរខ្លួនឯងថា « ហេតុអ្វីបានជាខ្ញុំមានអារម្មណ៍មិនល្អ ? » ហើយបន្ទាប់មកសូមចែកចាយចម្លើយរបស់ពួកគេ ។ សូមសរសេរចម្លើយរបស់ពួកគេនៅលើក្តារខៀន ( ឧទាហរណ៍ « ខ្ញុំខ្លាចថា ខ្ញុំនឹងមានបញ្ហា » ឬ « ខ្ញុំដឹងថា ខ្ញុំបានធ្វើឲ្យព្រះវរបិតាសួគ៌ខកព្រះទ័យ » ឬ « ខ្ញុំបានធ្វើឲ្យនរណាម្នាក់យំ » ) ។ តើចម្លើយណាមួយនៅលើក្តារខៀនដែលហាក់ដូចជា « សេចក្តីព្រួយដែលគាប់ព្រះហឫទ័យដល់ព្រះ » ? ( កូរិនថូស ទី២ ៧:១០ ) ។ ហេតុអ្វីបានជាសេចក្តីព្រួយដែលគាប់ព្រះហឫទ័យដល់ព្រះ មានលក្ខណៈប្រសើរជាងប្រភេទសេចក្ដីព្រួយដទៃទៀត ដែលយើងអាចមាន បន្ទាប់ពីបានធ្វើខុស ?
លើកទឹកចិត្តឲ្យមានការរៀនសូត្រនៅឯគេហដ្ឋាន
សូមអញ្ជើញកុមារឲ្យចែកចាយជាមួយក្រុមគ្រួសាររបស់ពួកគេនូវសកម្មភាពមួយចេញពីថ្នាក់រៀននៅថ្ងៃនេះ ប្រហែលជាអាចចែកចាយនៅពេលធ្វើរាត្រីជួបជុំក្រុមគ្រួសារ ។
ការកែលម្អការបង្រៀនរបស់យើង
ដាក់បង្ហាញបទគម្ពីរមួយ ។ សូមជ្រើសរើសខគម្ពីរមួយដែលបងប្អូនគិតថាមានអត្ថន័យ ហើយសូមដាក់បង្ហាញខគម្ពីរនោះនៅក្នុងថ្នាក់រៀន នៅកន្លែងដែលកុមារអាចមើលឃើញជាញឹកញាប់ ។ កុមារអាចដាក់វេនគ្នាជ្រើសរើសបទគម្ពីរមួយមកដាក់បង្ហាញបាន ។