« ថ្ងៃទី ២៨ ខែ សីហា–ថ្ងៃទី ៣ ខែ កញ្ញា ។ កូរិនថូស ទី១ ៨–១៣ ៖ ‹ អ្នករាល់គ្នាជារូបកាយនៃព្រះគ្រីស្ទ › » ចូរមកតាមខ្ញុំ—សម្រាប់អង្គការបឋមសិក្សា ៖ ព្រះគម្ពីរសញ្ញាថ្មី ឆ្នាំ ២០២៣ ( ឆ្នាំ ២០២២ )
« ថ្ងៃទី ២៨ ខែ សីហា–ថ្ងៃទី ៣ ខែ កញ្ញា ។ កូរិនថូស ទី១ ៨–១៣ » ចូរមកតាមខ្ញុំ—សម្រាប់អង្គការបឋមសិក្សា ៖ ឆ្នាំ ២០២៣
ថ្ងៃទី ២៨ ខែ សីហា–ថ្ងៃទី ៣ ខែ កញ្ញា
កូរិនថូស ទី១ ៨–១៣
« អ្នករាល់គ្នាជារូបកាយនៃព្រះគ្រីស្ទ »
នៅពេលបងប្អូនអាន កូរិនថូស ទី១ ៨–១៣ សូមស្ដាប់រកការបំផុសគំនិតពីព្រះវិញ្ញាណអំពីរបៀប ដើម្បីបង្រៀនគោលការណ៍ទាំងឡាយនៅក្នុងជំពូកទាំងនេះ ។ សូមចងចាំថា រាល់គំនិតសកម្មភាពនានាអាចបត់បែនបានសម្រាប់ទាំងកុមារធំៗ និងកុមារតូចៗ ។
អញ្ជើញឲ្យចែកចាយ
សូមអញ្ជើញកុមារឲ្យចែកចាយអ្វីមួយ ដែលពួកគេបានធ្វើនៅអំឡុងពេលការប្រជុំសាក្រាម៉ង់ដើម្បីគិតអំពីព្រះយេស៊ូវ ។
បង្រៀនគោលលទ្ធិ ៖ កុមារតូចៗ
ព្រះវរបិតាសួគ៌នឹងជួយខ្ញុំឲ្យធ្វើការជ្រើសរើសសុចរិត ។
វាមិនមែនងាយស្រួលជានិច្ចនោះទេដើម្បីជ្រើសរើសត្រឹមត្រូវ ហើយព្រះវរបិតាសួគ៌ទ្រង់ញាណដឹងអំពីរឿងនោះ ។ នៅពេលយើងទូលសូម នោះទ្រង់នឹងជួយយើង ពីព្រោះទ្រង់មានព្រះទ័យចង់ឲ្យយើងទទួលបានជោគជ័យ ។
សកម្មភាពដែលអាចធ្វើបាន
-
សូមអាន កូរិនថូស ទី១ ១០:១៣ ដល់កុមារ ដោយអញ្ជើញពួកគេឲ្យគ្រវីក្បាលរបស់ពួកគេ នៅពេលពួកគេឮពាក្យថា « ត្រូវល្បួង » ឬ « សេចក្តីល្បួង » ។ សូមពន្យល់ពីអត្ថន័យនៃខគម្ពីរនេះចំពោះបងប្អូន ។
-
សូមប្រាប់ដំណើររឿងខ្លះៗដោយសង្ខេបៗអំពីប្រជាជន ដែលហៀបនឹងធ្វើការជ្រើសរើសខុស ។ កាលដែលកុមារស្តាប់ សូមអញ្ជើញពួកគេឲ្យលើកដៃរបស់ពួកគេឡើង ឬក្រដាសស្លាកសញ្ញាឈប់ នៅពេលមានមនុស្សម្នាក់នៅក្នុងដំណើររឿងនេះធ្វើការជ្រើសរើសខុស ។ តើអ្វីទៅដែលនឹងជាការជ្រើសរើសត្រឹមត្រូវនោះ ? សូមថ្លែងទីបន្ទាល់ថា ព្រះវរបិតាសួគ៌នឹងជួយយើងឲ្យជ្រើសរើសត្រឹមត្រូវ ។
-
សូមបង្ហាញរូបភាពរបស់ព្រះយេស៊ូវ និងច្រៀងចម្រៀងមួយបទជាមួយកុមារអំពីទ្រង់ ដូចជាបទ « ខ្ញុំព្យាយាមក្លាយដូចព្រះយេស៊ូវ » ( សៀវភៅចម្រៀងកុមារ ទំព័រ ៤០–៤១ ) ។ សូមនិយាយអំពីរបៀបដែលការចងចាំដល់ព្រះយេស៊ូវ ជួយបងប្អូនឲ្យធ្វើការជ្រើសរើសត្រឹមត្រូវ ។ សូមបង្ហាញរូបភាពនៃអ្វីផ្សេងទៀត ដែលជួយយើងឲ្យជ្រើសរើសត្រឹមត្រូវ ដូចជាឪពុកម្ដាយ ឬព្រះគម្ពីរ ។ សូមសួរកុមារថា តើអ្វីដែលជួយពួកគេឲ្យជ្រើសរើសត្រឹមត្រូវ ?
ព្រះវរបិតាសួគ៌បានប្រទានពរខ្ញុំឲ្យមានអំណោយទានខាងវិញ្ញាណ ។
ព្រះវរបិតាសួគ៌បានប្រទានដល់អំណោយទានខាងវិញ្ញាណដល់បុត្រាបុត្រីរបស់ទ្រង់ទាំងអស់ ។ តើអំណោយទានខាងវិញ្ញាណណាខ្លះ ដែលបងប្អូនឃើញថាកុមារដែលបងប្អូនបង្រៀននោះមាន ?
សកម្មភាពដែលអាចធ្វើបាន
-
សូមឲ្យកុមារគូររូបអំណោយទានដែលពួកគេចូលចិត្ត ហើយបានទទួល ។ សូមពន្យល់ថា ព្រះវរបិតាសួគ៌ប្រទានឲ្យយើងនូវអំណោយទានខាងវិញ្ញាណ ដើម្បីពង្រឹងសេចក្ដីជំនឿរបស់យើង ហើយជួយយើងឲ្យផ្ដល់ពរជ័យដល់មនុស្សដទៃ ។ សូមចែកចាយជាមួយកុមារនូវអំណោយទានខាងវិញ្ញាណមួយចំនួន ដែលបានពិពណ៌នានៅក្នុង កូរិនថូស ទី១ ១២:៧–១១ ។
-
សូមសរសេរសារខ្លីមួយសម្រាប់កុមារម្នាក់ៗ ដោយពិពណ៌នាពីអំណោយទានខាងវិញ្ញាណដែលបងប្អូនបានឃើញកុមារា ឬកុមារីនោះមាន ( ឬបងប្អូនអាចអញ្ជើញឪពុកម្តាយឲ្យសរសេរសារខ្លីទាំងនេះបាន ) ។ សូមដាក់សារខ្លីៗទាំងនោះនៅក្នុងស្រោមសំបុត្រ ។ សូមអនុញ្ញាតឲ្យកុមារបើកស្រោមសំបុត្រនោះ ហើយជួយពួកគេឲ្យអានអំពីអំណោយទានខាងវិញ្ញាណរបស់ពួកគេ ។
ព្រះវរបិតាសួគ៌បានប្រទានដល់អំណោយទានខាងវិញ្ញាណដល់បុត្រាបុត្រីរបស់ទ្រង់ទាំងអស់ ។
ខ្ញុំអាចស្រឡាញ់មនុស្សដទៃបាន ។
បទគម្ពីរបង្រៀនថាសេចក្តីសប្បុរសគឺជា « សេចក្តីស្រឡាញ់ដ៏សុទ្ធសាធនៃព្រះគ្រីស្ទ » ( មរ៉ូណៃ ៧:៤៧ ) ។ តើបងប្អូនអាចជួយកុមារឲ្យអភិវឌ្ឍ ហើយបង្ហាញសេចក្ដីស្រឡាញ់ដូចព្រះគ្រីស្ទបានយ៉ាងដូចម្ដេច ?
សកម្មភាពដែលអាចធ្វើបាន
-
សូមអាន កូរិនថូស ទី១ ១៣:១៣ និង មរ៉ូណៃ ៧:៤៧ ហើយជួយកុមារឲ្យនិយាយសាឡើងវិញនូវឃ្លា « សេចក្ដីសប្បុរសគឺជាសេចក្ដីស្រឡាញ់ដ៏សុទ្ធសាធនៃព្រះគ្រីស្ទ » ។ សូមបង្ហាញរូបភាពរបស់ព្រះយេស៊ូវកំពុងបង្ហាញសេចក្តីស្រឡាញ់ និងព្រះទ័យយកចិត្តទុកដាក់ ហើយសូមសួរកុមារពីរបៀបដែលទ្រង់បានបង្ហាញសេចក្តីស្រឡាញ់ចំពោះអ្នកដទៃ ( សូមមើល សៀវភៅរូបភាពដំណឹងល្អ ទុកជាគំនិត ) ។
-
សូមច្រៀងចម្រៀងមួយបទអំពីការស្រឡាញ់អ្នកដទៃ ដូចជាបទ « ព្រះយេស៊ូវមានបន្ទូលថាស្រឡាញ់មនុស្សគ្រប់រូប » ឬ « ចូរអ្នកស្រឡាញ់គ្នា » ( សៀវភៅចម្រៀងកុមារ ទំព័រ ៣៩, ៧៤ ) ជាមួយកុមារ ។ សូមបង្ហាញរូបភាពមនុស្សផ្សេងៗគ្នា ( ដូចជា ឪពុកម្តាយ បងប្អូន គ្រូបង្រៀន ឬមិត្តភក្តិ ) ហើយសូមឲ្យកុមារចែកចាយពីរបៀបដែលពួកគេអាចបម្រើដល់បុគ្គលនោះបាន ។ សូមអញ្ជើញកុមារឲ្យគិតពីនរណាម្នាក់ដែលពួកគេអាចបម្រើបាន ហើយបន្ទាប់មកសូមកត់ត្រា ឬគូររូបភាពមួយដើម្បីជូនទៅបុគ្គលនោះ ។ ប្រសិនបើពួកគេត្រូវការគំនិតផ្សេងទៀតអំពីរបៀបដើម្បីបម្រើ សូមបង្ហាញវីដេអូ « Pass It On » ( នៅលើគេហទំព័រ ChurchofJesusChrist.org ) ។
បង្រៀនគោលលទ្ធិ ៖ កុមារធំៗ
ព្រះវរបិតាសួគ៌នឹងជួយខ្ញុំឲ្យតទល់នឹងការល្បួង ។
សេចក្តីសន្យានៅក្នុងខគម្ពីរនេះអាចផ្តល់ទំនុកចិត្តដល់កុមារថា ពួកគេអាចតទល់នឹងការល្បួងដោយមានជំនួយរបស់ព្រះវរបិតាសួគ៌ ។
សកម្មភាពដែលអាចធ្វើបាន
-
សូមជួយកុមារឲ្យអាន កូរិនថូស ទី១ ១០:១៣ ជាមួយដៃគូ រួចសង្ខេបខគម្ពីរនោះដោយប្រើពាក្យពេចន៍របស់គេផ្ទាល់ខ្លួន ។ សូមឲ្យកុមារចែកចាយបទពិសោធន៍មួយ ដែលព្រះវរបិតាសួគ៌បានជួយពួកគេឲ្យចៀសវាង ឬតតាំងនឹងការល្បួង ។ តើយើងអាចធ្វើអ្វីខ្លះ ដើម្បីពឹងផ្អែកទៅលើព្រះវវបិតាសួគ៌ នៅពេលយើងត្រូវបានល្បួង ?
-
សូមសរសេរនៅលើក្រដាសតូចៗ អំពីការល្បួងនានាដែលកុមារអាចនឹងប្រឈមមុខនាពេលបច្ចុប្បន្ននេះ ។ សូមអញ្ជើញកុមារឲ្យរើសយកក្រដាសមួយ រួចចែកចាយអំពីអ្វីដែលព្រះវរបិតាសួគ៌បានប្រទានឲ្យយើង ដើម្បីជួយយើងឲ្យចៀសវាង ឬតតាំងនឹងការល្បួងទាំងនេះ ។ ដើម្បីបានយោបល់មួយចំនួន សូមអានទាំងអស់គ្នានៅក្នុង អាលម៉ា ១៣:២៨–២៩ ។
នៅអំឡុងពិធីសាក្រាម៉ង់ ខ្ញុំអាចគិតអំពីរបៀបដែលខ្ញុំនឹងធ្វើតាមព្រះអង្គសង្គ្រោះបាន ។
សូមជួយកុមារដែលបងប្អូនបង្រៀនឲ្យយល់ថា ពិធីសាក្រាម៉ង់គឺជាឱកាសមួយដើម្បី « ល្បងខ្លួន » ពួកគេ និងរំឭកសេចក្តីសញ្ញានៃពិធីបុណ្យជ្រមុជទឹករបស់ពួកគេដើម្បីបម្រើព្រះអម្ចាស់ និងរក្សាព្រះបញ្ញត្តិរបស់ទ្រង់ ( កូរិនថូស ទី១ ១១:២៨ ) ។
សកម្មភាពដែលអាចធ្វើបាន
-
សូមឲ្យកុមារម្នាក់អាន កូរិនថូស ទី១ ១១:២៨ ។ តើការ « ល្បងខ្លួន » របស់យើងពីមុនទទួលទានសាក្រាម៉ង់មានអត្ថន័យយ៉ាងណា ? សូមឲ្យកុមារគិតពីមនុស្សដទៃដែលពិនិត្យមើលអ្វីមួយ ដូចជា វេជ្ជបណ្ឌិត អ្នកស៊ើបអង្កេត ឬអ្នកវិទ្យាសាស្រ្ត ( ឧទាហរណ៍ វេជ្ជបណ្ឌិតពិនិត្យមើលយើងដើម្បីធានាឲ្យបានថា យើងមានសុខភាពល្អ ) ។ នៅពេលយើងទទួលទានសាក្រាម៉ង់ តើយើងអាចធ្វើអ្វីខ្លះ ដើម្បីល្បងខ្លួនពីរបៀបដែលយើងរស់នៅតាមសេចក្តីសញ្ញានៃពិធីបុណ្យជ្រមុជទឹករបស់យើង ?
-
សូមឲ្យកុមារសរសេរកិច្ចការផ្សេងៗ ដែលពួកគេអាចគិតដល់ នៅពេលដែលពួកគេទទួលទានសាក្រាម៉ង់ ។ សូមអញ្ជើញពួកគេឲ្យប្រើបញ្ជីរបស់ខ្លួន ទុកជាវត្ថុរំឭកខ្លួនឯងអំឡុងពិធីសាក្រាម៉ង់ ។
កូរិនថូស ទី១ ១២:៤, ៧–១២, ៣១; ១៣:១–៨
ខ្ញុំមានអំណោយទានខាងវិញ្ញាណ ។
ប៉ុលបានបង្រៀនថា អំណោយទានខាងវិញ្ញាណ « សម្ដែងមកក្នុងគ្រប់គ្នា » ( កូរិនថូស ទី១ ១២:៧ ) ។ គោលការណ៍នេះអាចជួយកុមារឲ្យបង្កើតអារម្មណ៍នៃតម្លៃខ្លួន ជាពិសេសនៅពេលពួកគេប្រើប្រាស់អំណោយទានរបស់ពួកគេ ដើម្បីផ្ដល់ពរជ័យដល់មនុស្សដទៃ ។
សកម្មភាពដែលអាចធ្វើបាន
-
សូមឲ្យកុមារសរសេរនៅលើក្ដារខៀន អំពីអំណោយទានខាងវិញ្ញាណដែលពួកគេរកឃើញនៅក្នុង កូរិនថូស ទី១ ១២:៧–១១; ១៣:២ ។ សូមអញ្ជើញពួកគេឲ្យស្វែងរកអំណោយទានបន្ថែមទៀតដែលបានលើកឡើងនៅក្នុង មរ៉ូណៃ ១០:៨–១៨ និង គោលលទ្ធិ និង សេចក្តីសញ្ញា ៤៦:១៣–២៦ ។ សូមចែកចាយជាមួយពួកគេនូវអំណោយទានខាងវិញ្ញាណបន្ថែមទៀត ដែលបានលើកឡើងដោយអែលឌើរ ម៉ាវីន ជេ អាស្តុន ៖ « អំណោយទាននៃការសូម អំណោយទាននៃការស្ដាប់ … អំណោយទាននៃការចៀសវាងពីការឈ្លោះប្រកែក … អំណោយទាននៃការស្វែងរកអ្វីដែលសុចរិត អំណោយទាននៃការពុំវិនិច្ឆ័យលឿនពេក អំណោយទាននៃការមើលទៅព្រះសុំការដឹកនាំ … អំណោយទាននៃការមើលថែអ្នកដទៃ … អំណោយទាននៃការអធិស្ឋាន អំណោយទាននៃការថ្លែងទីបន្ទាល់ដ៏អស្ចារ្យ » ( « There Are Many Gifts » Ensign ខែ វិច្ឆិកា ឆ្នាំ ១៩៨៧ ទំព័រ ២០ ) ។ សូមអញ្ជើញកុមារឲ្យនិយាយអំពីអំណោយទានខាងវិញ្ញាណ ដែលពួកគេមើលឃើញនៅក្នុងគ្នាទៅវិញទៅមក ។
-
ពីមុនថ្នាក់ចាប់ផ្តើម សូមសួរឪពុកម្តាយរបស់កុមារនៅក្នុងថ្នាក់របស់បងប្អូនអំពីអំណោយទាន ដែលពួកគាត់មើលឃើញនៅក្នុងកូនៗរបស់ពួកគាត់ ឬគិតអំពីអំណោយទានរបស់កុមារទាំងនោះដោយខ្លួនរបស់បងប្អូនផ្ទាល់ ។ សូមប្រាប់កុមារអំពីអំណោយទានទាំងនេះ ។ សូមអញ្ជើញកុមារឲ្យសរសេររបៀបមួយដែលពួកគេនឹងប្រើអំណោយទានរបស់ពួកគេ ដើម្បីផ្តល់ពរជ័យដល់នរណាម្នាក់នៅសប្តាហ៍នេះ ។
-
សូមចែកចាយស្ថានភាពខុសៗគ្នា ដែលមនុស្សអាចប្រើអំណោយទានខាងវិញ្ញាណមួយចេញពី កូរិនថូស ទី១ ១២:៧–១០ ។ សូមអញ្ជើញកុមារឲ្យស្វែងរកអំណោយទានខាងវិញ្ញាណនានា ដែលអាចប្រើបាននៅក្នុងស្ថានភាពនីមួយៗ ។
លើកទឹកចិត្តឲ្យមានការរៀនសូត្រនៅឯគេហដ្ឋាន
សូមផ្តល់យោបល់ឲ្យកុមារពិភាក្សាពីអ្វីមួយដែលបងប្អូនបាននិយាយគ្នានៅក្នុងថ្នាក់ ជាមួយនឹងក្រុមគ្រួសាររបស់ពួកគេ ។ ឧទាហរណ៍ បងប្អូនអាចអញ្ជើញកុមារឲ្យចែកចាយអំណោយទានខាងវិញ្ញាណរបស់ពួកគេជាមួយសមាជិកក្រុមគ្រួសាររបស់ពួកគេ និងសួរក្រុមគ្រួសាររបស់ពួកគេថា តើពួកគេមានអំណោយទានអ្វីខ្លះ ។
ការកែលម្អការបង្រៀនរបស់យើង
ផ្ដល់ការអញ្ជើញដែលគោរពដល់សិទ្ធិជ្រើសរើស ។ នៅពេលបងប្អូនអញ្ជើញកុមារឲ្យធ្វើតាមអ្វីដែលពួកគេកំពុងរៀន សូមគិតអំពីរបៀបដើម្បីគោរពដល់សិទ្ធិជ្រើសរើសរបស់ពួកគេ ។ ជំនួសឲ្យការអញ្ជើញឲ្យធ្វើអ្វីមួយជាក់លាក់ សូមពិចារណាអំពីការអញ្ជើញពួកគេឲ្យគិតតាមរបៀបផ្ទាល់ខ្លួន ដើម្បីអនុវត្តតាមអ្វីដែលពួកគេបានរៀន ។