mitinare n aine a maroro ma te kairake n ataeinimmwaane

Okitobwa 16–22

1 ao 2 I-Tetaronike

“Kakororaoa Ane Kabwaka n Am Onimaki”

Ngkae ko wareka 1 ao 2 I-Tetaronike ma ataei n am iango, ko na kunei reirei ake a kainnanoi am ataei.

te aikaon ibukin te tibwatibwa

Kaunga te Tibwatibwa

N te reirei n te wiiki ae nako, ko kaoiia ataei bwa a na karaoa nanon are a reiakinna? Anga te tai nakoia ataei ni moan te kiraati bwa a na tibwai rongorongoia ngke a karaoi nanon taian reirei.

te aikaon ibukin te anga reirei

Reirei te Reirei: Ataei aika a Uarereke Riki

1 I-Tetaronike 5:1–6

Ngkana I ira ana tua te Atua, N na bon tauraoi imwain Manga Okin Iesu Kristo.

Tiaki ataa te tai are e na oki iai te Tia Kamaiu. Ma ti riai ni kakantaningaia ao ni kakatauraoi imwain rokona.

Waaki ni Kakukurei aika a Kona ni Karaoaki

• Kaoa te tina bwa e na tibwaa ana namakin n tataningaan bungian natina. Wareka 1 I-Tetaronike 5:2–3, ao tuangiia bwa Iesu Kristo e na manga roko nakon te aonnaaba, ma akea ae ataa raoi te tai—n aron are e aki ataia raoi te tina bwa ningai ae e na bung iai.

• Tuangiia ataei bwa a na tibwaa rongorongon mwanangaia. Tera ae a katauraoia? Iai aia tuutikeiti ke te baeki, ao tuangiia ataei bwa a na katea kain are a na katauraoia imwaain te mwananga. N baike a karini n aia baeki, buokiia ataei bwa a na iangoa teuana te kawai are ti kona iai ni katauraoi imwaain rokon te Tia Kamaiu.

• Wareka 1 I-Tetaronike 5:6 nakoia ataei, ao kawbarabwara bwa ngkana ti aki tauraoi imwain rokon te Tia Kamaiu, kanga ai aron ae ti matu ao ti aki tauraoi Ibukina. Kaoiia ataei bwa aongkoa a matuu. Kabwarabwara bwa ngkana ti katauraoi, ai aron ae ti uti ao ti tataningaia. Tuangiia bwa angkoa a manga uti.

• Ikotaki anenea te kuna iaon Manga Okin te Tia Kamaiu, n aron “When He Comes Again” (Aia Boki n Anene Ataei,, 82-83).

2 I-Tetaronike 2:1–3

E reirei Bauro bwa te bwaka e na riki imwaain rokon Iesu Kristo.

Ana Ekaretia Iesu Kristo are e kateia e bwaka n te rootongitong, are nanona a anaaki mai aon te aba te kariaiakaki ae te nakoanibonga ma koauan te euangkerio. E taetae ni Burabeti Bauro iaon te rootongitong aei, ke “te tiotionako,” are e na riki imwaain rokon te Tia Kamaiu.

Waaki ni Kakukurei aika a Kona ni Karaoaki

• Imwiin warekan 2 I-Tetaronike 2:3 ma ataei, tuangiia bwa a na katea te taua man taian mwangko ke taian mwakoro ni kai. Tuangiia ataei bwa mwangko ma mwakoro ni kai ai aron mwakoron te Ekaretia ae eti, n aron koauan te euangkerio, te nakoanibonga, kabaebae n te tembora, ao burabeti. Imwiin maten Bauro ao Abotoro, a bua bwaai aikai, ao ai akea te Ekaretia ae eti iaon te aba inanon ririki aika bati. Kaoa te ataei bwa e na urua te taua, ao kabwarabwara bwa aio aron te rootongitong ke “te tiotio nako.” Ngke e kaoka ana Ekaretia Iesu Kristo, e aranaki bwa Kaokakin Bwaai.

• Kaota Ana Boki Moomon ao tamnein te burabeti ma te tembora. Kaoiia ataei bwa a na taekina “Te Bwaka” ngkana ko karabai bwaai inanon te baeki ao “Kaokan Bwaai” ngkana ko buuti man te baeki.

• Anenei kuuna ake a reirei koaua bwa anaaki n tain te Bwaka ao a manga kaokaki n boong aikai, n aron “The Church of Jesus Christ,” “The Priesthood Is Restored,” ao “I Love to See the Temple” (Aia Boki n Anene Ataei, 77, 89, 95).

te aikaon ibukin te anga reirei

Reirei te Reirei: Ataei aika a Ikawai Riki

1 I-Tetaronike 5:1–6

Ngkana I ira ana tua te Atua, N na bon tauraoi imwain Manga Okin Iesu Kristo.

Ana reirei Bauro e kona ni buokiira bwa ti na tauraoi ao n tataninga te bong are korakora ngkana e roko te Tia Kamaiu.

Waaki ni Kakukurei aika a Kona ni Karaoaki

• Kaoa te ataei bwa e na wareka 1 I-Tetaronike 5:1–6 ao tuangiia ataei bwa a na iriira ana wareware. Imwiin kiibu nako, tuanga te ataei bwa e na kakimototoa taekan te kibu aei nakon are e taku. Tao e na ibuobuoki kabwaraan nanon “ana bong te Uea” are nanonaki iai Manga Okin Iesu Kristo. Bukin tera ngkai te Kauaoki e kabotauaki ma te tia iraa n te tairiki ke te aine are e nang bung?

• Tuangiia ataei bwa a na iangoa ae te Tia Kamaiu e na kawariia n te kiraati n te bong aei. Tera aia katauraoi imwaain rokona? Buokiia ataei bwa a na iangoi bwaai aika a kona ni karaoi ni katauraoiia imwaain rokon te Tia Kamaiu. N aron te katooto, ti kona n raira nanora, kabwarai buure, kakorakorai ara reitaki ma ara utu, ti ira te burabeti, ti ukora ana kairiiri te Tamnei ae Raoiroi, ao ti kawakin ara berita aika tabu. Kaungaia ataei bwa a na rinea teuana te bwai ae a na karaoia ni katauraoiia iai ni butimwaea Manga Okin te Tia Kamaiu.

2 I-Tetaronike 2:1–3

E reirei Bauro bwa te bwaka e na riki imwaain okin Iesu Kristo.

Ngkana a oota ataei bwa Iesu Kristo ma Ana Euangkerio e anaaki mai aon te aba n tain te Bwaka ae Korakora, a na noora rian manga kaokakin bwaai.

Waaki ni Kakukurei aika a Kona ni Karaoaki

• Kaoa temanna te ataei bwa a na wareka 2 I-Tetaronike 2:1–3. Ni kaineti ma kiibu aikai, tera ae e na riki imwaain “ana bong Kristo,” are bon te Kauaoki? Tera nanon te taeka ae “te tiotionako”? Taraia bwa a na oota ataei n nanon te Bwaka ae Korakora, are e riki imwiin maten ana Abotoro te Tia Kamaiu. Ko kona n tibwaa te rongorongon man “Te Bwaka” n te Kairi nakon Koroboki aika Tabu (scriptures.ChurchofJesusChrist.org).

• Buokiia ataei ni korei tabeua koaua ao kakabwaia ae ti karekei man te euangkerio. Kamaunai bwaai aikai teuana imwiin teuana, ao tuangiia ataei bwa tera ae e na riki inanon maiuia n akea bwaai aikai. Kabwarabwara bwa koaua aikai a bua n tain te Bwaka ae Korakora. Bukin tera e kakawaki bwa Ana Ekaretia Iesu Kristo e na kaokaki nakon te aonnaaba ni boong aika kaitira? Kaoiia ataei bwa a na “kaokii” ke ni manga korei koaua ake a kamaunaaki iaon te burakibooti.

2 I-Tetaronike 3:7–13

E tangirai Tamara are i Karawa bwa N na mwakuri.

N na kanga ni buokiia ataei n taraa te mwakuri bwa te kakabwaia, ao tiaki te bwai ae riai n katuaaki?

Waaki ni Kakukurei aika a Kona ni Karaoaki

• Kaoiia ataei bwa a na ikaruoruo ni wareki kiibu man 2 I-Tetaronike 3:7–13 ao ni kakaei kangaanga ake a kaitara ma ngaai kaain te aro. Bukin tera Tamara are i Karawa e tangiriira bwa ti na mwakuri? Tera ae e na riki ngkana tiaki mwakuri korakora? Tuangiia ataei bwa a na ikaruoruo ni karaoi mwakuri aika uarereke ao ataei ake tabeman a na ketinna bwa tera ae karaoaki.

• Kaoiia ataei bwa a na taekina rongorongon aia mwakuri korakora, n karikirake, ke te kouru. Tera aia namakin imwiin tian raoi aia mwakuri? Tera nanaon “te aki bwaka ni karaoan ae raoiroi”? (2 I-Tetaronike 3:13). Tera ae e buokiira ni mwakuri korakora?

te aikaon ibukin te kamatebwai

Kaungaa te Kamatebwai n te Mweenga

Kaoiia ataei bwa a na tibwaia nakon temanna kaain aia utu ke raoraoia oin bukin ae a kakaitau ngkai iai te euangkerio ni boong aikai (iteranibaan te mwakuri ni kauring e kona n angania taian iango).

Kanakoraoan Ara Anga reirei

Boutokaia aia karo ataei. “A bon rangi ni kakawaki kaaro bwa taan reireia te euangkerio nakoia natiia—iai irouia te mwiokoaki ao te korakora ni kairoroia natiia (taraa Te Tua Kaua 6:6-7). Ngkae ko reireiniia ataei n te taromauri, tataromwaaka n ukori kawai ni boutokaia kaaro n tabeia ae kakaawaki (Reirei n ana Kawai te Tia Kamaiu, 25).

iteranibaa ibukin te waaki ni kakukurei:: e na roko te Bwaka imwain te Kauaoki