“Okitobwa 23–29. 1 ao 2 Timoteo; Tito; Biremon: ‘Ko na Riki bwa aia tia Kakairi Aomata aika Onimaki,’” Nakomai, Iriirai—Ibukin te Moanrinan: Nu Tetemanti 2023 (2021)
“Okitobwa 23–29. 1 ao 2 Timoteo; Tito; Biremon,” Nakomai, Iriirai—Ibukin te Moanrinan: 2023
Okitobwa 23–29
1 ao 2 Timoteo; Tito; Biremon
“Ko na Riki bwa aia tia Kakairi Aomata aika Onimaki”
Bauro e reirei bwa “e anganaki te aba te Baibara … ao nakoni kawanawana n te raoiroi” (2 Timoteo 3:16). N am tai ni kamatebwai mwakoro aikai, iangoia bwa a na kanga mwakoro aikai ni kaoa ana kairi te tamnei bwa ataei a na maiuakina te kokoaua.
Kaunga te Tibwatibwa
Tuangiia ataei bwa a na marooro iaon temanna ae e riki bwa te banna ae tamaroa “bwa aia tia kakairi aomata aika onimaki” nakoia. Tera ae a karaoia n riki bwa te banna ae raoiroi nakoia tabeman?
Reirei te Reirei: Ataei aika a Uarereke Riki
Bitiobi a kaira te uoote bwa ana toro te Atua.
Bauro e reireina Timoteo ao Tito iaon kakawakiia bitiobi. Ko na kanga n reireiniia ataei bwa tera ae e kakaraoia te bitiobi? (Te beretitenti n te mwaanga bon titebo ma te bitiobi.)
Waaki ni Kakukurei aika a Kona ni Karaoaki
-
Korea tamnein am bitiobi iaon te burakibooti. Kaoiia ataei bwa a na tibwai bwaai aika a atai iaoia bitiobi. Aekakira arona? Tera ae e kakaraoia? E kanga ni kakabwaiaa te uoote? (Ko kona ni kunei tabeua anuan te bitiobi inanon 1 Timoteo 3:1–2 ao Tito 1:7–9.) Ngkai a tibwai aia iango ataei, korei iaon te moti ni beeba ao kariaia ataei bwa a na katikui iaon te burakibooti irarikin te tamnei.
-
Korei taben te bitiobi iaon te moti ni beeba—n aron buokaia ataei ao kairake n te uoote, butimwaean angabwai n aki mamatam ao anganano, kanakoan taian wewete, intawiunakiia membwa, ao buokaia ake a kainano. Katikui moti ni beeba aikai inanon te boora, ao kaoiia ataei bwa a na anai kaka teuana mai iai. Imwiina kaoa te ataei anne bwa e na karaoi beeku akanne n te takakaro ma ngkoe. Tibwa am koaua bwa te bitiobi e bon weteaki mai iroun te Atua.
-
Kaoiia ataei bwa a na korea tamnein te bitiobi ae buokiia membwa n te uoote. Tuangiia bwa a na anga aia tamnei nakon te bitiobi ni karabwa. Tera ae ti kona ni karaoia ni buokia?
“E na tai taku temanna ba akea bongam ngkai te rorobuaka ngkoe; ma ko na riki ba aia tia kakairi aomata aika onimaki” (1 Timoteo 4:12).
I kona n riki bwa “aia tia kakairi aomata aika onimaki.”
Tera ae ko kona ni karaoia ni buokiia ataei n riki bwa “taan kakairi [nakoia] aomata aika onimaki”?
Waaki ni Kakukurei aika a Kona ni Karaoaki
-
Aneneia ma ataei “Do as I’m Doing” (Aia Boki n Anene Ataei, 276). Tuangiia ataei bwa a na katotongko n te bwai are ko karaoia. Kariaia ataei bwa a na ikaruoruo ni kairiia kaain te kiraati ni katootonga te bwai are a karaoia. Wareka 1 Timoteo 4:12, ao tuangiia ataei bwa tera ae a kona ni karaoia bwa banna ni katooto iaon te raoiroi nakoia tabeman.
-
Tibwa te bwai are ko rinanona ngke ko kataia n riki bwa te banna ni katooto ae tamaroa nakon temanna ke temanna ae e riki bwa te banna ni katooto ae tamaroa nakoim (kairekerekeia ataei iai ake n am kiraati). Kaoia ataei bwa a na riki bwa banna ni katooto aika tamaroa nakoia kaain aia utu ao raoraoia.
Booki aika tabu a na buokai n reiakina te koaua.
Ngkana ko kona ni buokiia ataei bwa a na reiakinna n tangirii koroboki aika a tabu, reirei ake inanon koroboki aika a tabu a na kakabwaiai maiuia inanon ririki aika a na roko.
Waaki ni Kakukurei aika a Kona ni Karaoaki
-
Kaotii booki aika tabu, ao buokiia ataei ni kinai booki aika a tabu man kaotan atuun taian boki iaon moan baan te Baibwara, Ana Boki Moomon, Reirei ao Berita aika Tabu, ao te Bwaeao ae Bati Bona. Kaoiia ataei bwa a na tauwi booki aikai ngkai ko wareka 2 Timoteo 3:15–17. Tuangiia ataei bwa bukin tera ko tangiri booki aika tabu, ao kariaia ataei bwa a na kaotii aia namakin.
-
Tuangiia ataei bwa a na marooro iaon aia bwai ae moan te kakawaki irouia. Tera ae a kakaraoia ma ngaia? A kanga n tararuaia? Karaoia bwa temanna imwiin temanna a na taui booki aika tabu ao ni karaua n raibaia. Ti kabonganai booki aika tabu ibukin tera? E aera ngkai ti karau raoi ni kawakin? Taekina koauana bwa booki aika tabu iai inanona koaua ae Tamara are i Karawa e tangiriira bwa ti na atai.
-
Buokiia ataei bwa a na karaoa kaina ni baia ke rabwataia ni iriira te anene iaon koroboki aika a tabu n aron “Search, Ponder, ao Pray” (Aia Boki n Anene Ataei, 109).
Reirei te Reirei: Ataei aika a Ikawai Riki
I kona n riki bwa “aia tia kakairi aomata aika onimaki.”
Timoteo e bon rangi ni uarereke n riki bwa te tia kairiiri n te Ekaretia, ma Bauro e tangiria bwa e na ataia ae e kona n riki bwa te banna ni katooto. Ko kona ni kaungaia ataei bwa a na katea te banna ni katooto ae tamaroa nakoia ake irarikiia.
Waaki ni Kakukurei aika a Kona ni Karaoaki
-
Botaki ni wareka 1 Timoteo 4:12, ao tuangiia ataei bwa a na kakaea onoua kawai are e taku Bauro bwa ti kona n riki iai bwa “aia tia kakairi aomata aika onimaki.” Kamaenakoia ataei ni kaka uoman, ao kaoiia n tatabemaniia bwa a na iangoa aroia are a na kona n riki iai bwa taan kakairi nakoia aomata aika onimaki. Tuangiia bwa a na katea kain te bwai are a rinanona inanon tain aia kiraati.
-
Tuangiia ataei ngkana a tangiria ni kan tibwa te bwai are a tia n rinanona ngke a kataia n riki bwa taan kakairi aika tamaroa nakoia aomata tabeman. Tuangiia bwa a kanga n tia ni riki bwa banna ni katooto bwa taan kakairi aika tamaroa nakoim ao n tia n noriia bwa a kaota te banna ni katooto ae tamaroa nakoia tabeman.
Bwaai aika akea tokiia a moa ni kakawaki riki nakon te mwane.
Te aonaaba e a karimoaa riki moanibwaian te mwane ao bwaai ake a kona ni kabooaki n te mwane. Ko kanga ni buokiia ataei ni katurua ao ni kabotoa aia taratara ao aia tangira iaon Tamara are i Karawa ao Iesu Kristo?
Waaki ni Kakukurei aika a Kona ni Karaoaki
-
Kaoiia ataei bwa a na maroroakinna bwa tera ae a tangiria ni kabooa ngke arona bwa e korakora aia mwane n te aonaaba. Wareka 1 Timoteo 6:7–12 ma ataei, ao kaoia bwa a na kakimototoa n taekina are e reirei iai Bauro nakon Timoteo iaon te mwane. Ngkanne kaoiia ataei bwa a na manga wareka kiibu 11–12, ni kakaei bwaai ake e taekin Bauro bwa a moa ni kakawaki riki nakon te mwane.
-
Karinanii iaontano tamnein bwain te aonaaba (n aron te mwane, bwai n takakaro, ke bwaai ni kakukurei) ao bwaai aika akea tokiia (n aron te utu ke te tembora). Kaoiia ataei bwa a na barongai tamnei nakon uoua te bwariko—bwaai ake a na uotiira ni kaniira nakon Kristo ao bwaai ake a na kairiira nako mai iroun Kristo ngkana ti tangirii riki nakon ae ti tangira Kristo. Bukin tera “tangiran te mwane … wakaan baika bubuaka ni kabane”? E kanga kabotoan ara taratara iaon Iesu Kristo e karikiira bwa ti na kukurei?
Tamara are i Karawa e anganiira booki aika tabu ni buokiira bwa ti na ataa te koaua man te kairua.
Ngkai ko reireiniia ataei iaon koroboki aika a tabu, kakaei kawai are ko na kaungaia bwa a na karekea ae bon oin aia namakin ae korakora ma ana taeka te Atua.
Waaki ni Kakukurei aika a Kona ni Karaoaki
-
Kaoiia ataei bwa a na wareka 2 Timoteo 3:15–17. Katei tamnei aika a kaotii karaki man aua booki aika a kariaiakaki, ao kaoiia ataei bwa a na rinea te tamnei ao ni karakina te karaki. (Ko kona n kunei tamnei inanon te Gospel Art Book ke iaon te boki n reirei ae Nakomai, Iriirai .) Tuangiia ataei bwa a na tibwai baike a atai riki iaon te boki ae tabu anne. A kanga booki aika tabu ni “karikii[ra] bwa taan wanawana ibukin te kamaiuaki”?
-
Tibwa te kibu ni koroboki aika a tabu ae mamaten nanom ke am taneiai ngke koroboki aika a tabu a buokiko ni katea am onimaki iaon Tamara are i Karawa ao Iesu Kristo. Kaoiia ataei bwa a na tibwa te kibu ae mamaten nanoia ke aia taneiai ae a rinanona.
-
Tuanga te ataei bwa e na wareka Moronaai 10:4–5. Tera ae e berita iai Moronaai inanon kiibu aikai? Tuangiia ataei bwa a kanga ni karekea aia koaua bwa koroboki aika a tabu a bon koaua. Kaoiia bwa a na wareka ke n ongora nakon koroboki aika a tabu ni katoa tai ao ni butiia te Atua ngkana a bon koaua.
Kaungaa te Kamatebwai n te Mweenga
Kaoiia ataei bwa a na tibwaia ma aia utu te bwai are a reiakinna iaon koroboki aika a tabu ao ni kakaea teuana te kibu man koroboki aika a tabu are a kona n tibwaia ma kaain te kiraati n te wiiki ae e na roko (ma aia ibuobuoki aia karo, ngkana e kainanoaki).
Kanakoraoan Ara Anga reirei
Karaoi waaki ni kakukurei ake a na katoki kainnano. Irarikin ae ko na tarai kairan iango aikai bwa kawai n anga reirei ae ko na irii, kabonganai bwa bwaai ni kairan te iango are e na kawaekoa reken am kaotioti inanon am tai ni iangoi kainnanoia ataei ake ko na reireiniia. Ko kona ni bitii aron waaki ni kakukurei n reireiniia ataei ni kaineti nakon aia roro nako.