“Okitobwa 2–8. I-Ebeto: ‘Ibukin Kakororaoaia aika Itiaki,’” Nakomai, Iriirai—Ibukin te Moanrinan: Te Nu Tetamenti 2023 (2022)
“Okitobwa 2–8. I-Ebeto,” Nakomai, Iriirai—Ibukin te Moanrinan: 2023
Okitobwa 2–8
I-Ebeto
“Ibukin Kakororaoaia aika Itiaki”
Ngkai ko kamatebwaia te Reta nakoia I-Ebeto, iangoia bwa tera taian reirei ae ko kona ni katuruturua ni kakabwaia ataei ake ko reireiniia. Korei am namakin ake a roko nakoim ngkai ko wareware.
Kaunga te Tibwatibwa
Kaoiia ataei bwa a na tei n te raain. Moanna mai imoan te raain, n anganiia ataei n tatabemaniia aia tai bwa a na tibwa te bwai ae ea tibwa reiakinna teuanne ke neienne iaon te euangkerio n tain aia kamatebwai ni koroboki aika a tabu n aia utu, n te Moanrinan, ke n tabo tabeua.
Reirei te Reirei: Ataei aika a Uarereke Riki
Membwa n te Ekaretia bon rao ao aomata aika a “buokan-aba ma ake a itiaki.”
Ataei ake n am kiraati a riki bwa kanga “iruwa” ke “a buokan-aba ma ake a itiaki” imarenaia ao ma membwa n te uoote ake tabeman? Buokiia ni mataata bwa e ngae ngke iai kakaokorora, te Tia Kamaiu e buokiira ni katiteuanaira ao n tangira imarenara.
Waaki ni Kakukurei aika a Kona ni Karaoaki
-
Katuka tamnein te Tia Kamaiu i nukan te ruu. Kaoiia ataei bwa a na tei n taabo aika a kakaokoro n te ruu bwa kanga aomata aika “iruwa” ke “kaain te aba teuana.” Buokiia n ata nanon taeka aikai bwa nanona bon aomata aika ti tuai kinaia. Ngkai ko wareka I-Ebeto 2:19, kaoiia bwa a na mwaing nakon tamnein Kristo ni karokoa a bane n tei n uakaan imarenaia. Tuangiia bwa ngakai ti a bane n roko ni kaan nakon te Tia Kamaiu, ti kona ni katiteuanaaki ma tabeman bwa “aomata aika a buokan-aba ma ake a itiaki,” ke raoraora.
-
Kakaei tamneia ataei man aba aika a kakaokoro, ao karabai inanon te ruu. Katuka tamnein te Tia Kamaiu mai moa inanon te ruu. Kaoiia kaain te kiraati bwa a na kaitoatoa ni kaka uoman n aroia mitinare ao anganiia aia tai bwa a na kakaei tamneia aomata aika “iruwa” ao ni katikua irarikin tamnein te Tia Kamaiu. Buokiia bwa a na ataia ae ngkana e bwabetitoaki te aomata, a riki bwa kaain ara utu n te Ekaretia, ke “kaain ana utu te Atua.” Ti na kangaa ni buoka temanna ae e boou n namakina te butimwaeaki?
Tamara are i Karawa e tangirai bwa N na ongeaaba nakoia au karo.
Ngkai ko wareka I-Ebeto 6:1–3, iangoi kawai ae ko kona iai ni buokiia ataei ni mataata bwa bukin tera e kakawaki te ongeaaba nakoia aia karo.
Waaki ni Kakukurei aika a Kona ni Karaoaki
-
Wareka I-Ebeto 6:1 nakoia kaain te kiraati, ke buoka temanna te ataei ni warekia. Buokiia n iangoa te tai teuana ngke a ongeaaba nakoia aia karo. Tuangiia bwa a na tibwaia bwa a kanga ni kakabwaiaaki ngkai a ongeaaba ao tera aia namakin ngkana a ongeaaba. Bukin tera e kakawaki bwa ti na ongeaaba nakoia ara karo?
-
Bootaki anenea te kuna n taekan te ongeaaba, n aron “Quickly I’ll Obey” (Aia Boki n Anene Ataei, 197). Kaoiia ataei bwa a na ikaruoruo n taekin baike a tuangaki irouia aia karo bwa a na karaoia, ao kaoiia bwa aongkoa a karaoa te bwai anne.
-
Kaota tamnein Iesu Kristo ae bwabetitoaki (taraa Gospel Art Book, nambwa 35), ke tibwaia bwa e kanga te Tia Kamaiu n ongotaeka nakon Tamara are i Karawa ngke e bwabetitoaki (taraa 2 Nibwaai 31:6–7). Tibwa am taneiai ngke ko ongeaaba nakoia am karo ao ko kakabwaiaaki. Bukin tera Tamara are i Karawa e tangiriira bwa ti na ongeaaba nakoia ara karo?
Ana otanga te Atua e kona ni kamanoai man te buakaka.
Ko na kanga ni buokiia ataei n ataia bwa karaoan baika a raraoi bon aekakin katokaan te otanga?
Waaki ni Kakukurei aika a Kona ni Karaoaki
-
Kaota tamnein te aomata ae e kabongana te otanga, n aron are n te iteraniba n te wiiki aei iaon waaki ni kakukurei ke n te kabwarabwara n te wiiki aei n Nakomai, Iriirai—Ibukiia Aomata n Tatabemaniia ao Utu. Ngkai ko kabwaranakoa ni kauarerekea I-Ebeto 6:10–18, kaotia nakoia ataei bwa a kanga bwain nako te otanga aika a kakaokoro ni kamanoa mwakoron nako te rabwata. (Taraa “The Whole Armor of God,” Rao, Tuun 2016, 24–25.)
-
Uotii bwaai aika a tei ibukin te otanga nakon te kiraati n aron are e taekinaki ni I-Ebeto 6:14–17 (te katooto, te bwara ke te eibron), ke karaoi mwakoron nako te otanga man te beeba. Anganiia ataei te tai bwa a na ikaruoruo n katoka te “otanga” iaoia.” Buokiia ataei bwa a na ataia bwa ti kanga ni katoka ana otanga te Atua iaora (te katooto, man kamatebwaian koroboki aika tabu, bukaia aomata tabeman, tataro, ongotaeka, ao a mwaiti riki). Maroroakinna bwa e kanga karaoan bwaai aikai ni kamanoira man te buakaka.
Reirei te Reirei: Ataei aika a Ikawai Riki
Bon ngaira aomata aika ti “buokan-aba ma aika itiaki” n ana utu te Atua.
A kakorakoraaki ataei ngkana iai raraoia ae tamaroa n te euangkerio. Ko na kanga ni buokia bwa a na karikirakea te iraorao ae tamaroa imarenaia?
Bon ngaira aomata aika ti “buokan-aba ma aika itiaki” ae ana aomata te Atua.
Waaki ni Kakukurei aika a Kona ni Karaoaki
-
Bootaki wareka I-Ebeto 2:19, ao maroroakinna bwa tera ae nanonaki bwa te iruwa ke te ianena. Tibwaua am taneia ngke ko namakinna ae kanga te iruwa ke te ianena ngkoe ao iai temanna ae e buokiko n namakina ae ko butimwaeaki ao ni mwananoaki. Kaoia ataei bwa ana tibwai naba aia taneiai ae aekan anne. Tera ae ti kona ni karaoia bwa aomata ngaira aika ti “buokan-aba ma aika itiaki” ao tiaki ianena? Iai ataei n am kiraati aika a aki bati n roroko, tao ibukina bwa a namakinna ae ianena ngaiia? Buokiia ataei ni karaoa aia baire bwa a na buokiia membwa akanne n namakina ae a butimwaeaki ao n tangiraki.
-
Ni buokiia ataei ni kakorakora aia reitaki ibon imarenaia, korei tabeua titiraki iaon te burakibooti are e na anganiia te nano ni kan tibwai aroia tabeua, n aron Ningai ae e kaekaaki iai am tataro? ke Tera te bwai ae mamaten nanom ae ko kan karaoia ma am utu? Kamaenakoia ataei ni kaka uoman, ao kaoiia n tatabemaniia bwa a na titirakiniia titiraki aikai ibon imarenaia. Tera arora ae ti reiakinna ibon imarenara?
Tamara are i Karawa e tangirai bwa N na ongeaaba ao ni karineia au kareo.
Iangoi kawai tabeua ake ko kona ni buokiia ataei iai ni mataata bwa bukin tera e kakawaki te ongeaaba nakoia kaaro.
Waaki ni Kakukurei aika a Kona ni Karaoaki
-
Kaoia ataei bwa ana wareka I-Ebeto 6:1–3 ni kaka temanna ao katebenakoi kibu n taeka aika a nano iai. Kaoia bwa ana tibwauai aia kibu n taeka ao bukin tera a namakinna bwa a kakawaki kibu n taeka akanne.
-
Buokiia ataei bwa a na kakaei marooro ni katooto iaoia aomata ni koroboki aika a tabu ake a ongeaaba ao ni karineia aia karo, n aron te Tia Kamaiu (taraa Ruka 2:42–52), Ruta (taraa Ruta 1), ke Nibwaai (taraa 1 Nibwaai 3:1–8). Bukin tera e kakawaki bwa ti na ongeaaba ao ni karineia ara karo?
-
Anga te mwakoro ni beba nakoia ataei n tatabeman ma te taeka iaona karinerine mai ieta. Maroroakinna bwa tera nanona. Kaoiia ataei bwa a na koroboki ke ni korotamnei iaon aia beeba n te bwai are a kona ni karaoia ni kaota ae a karineia aia karo.
Ana otanga te Atua e kona ni kamanoai man te buakaka.
Ngkai ko wareka I-Ebeto 6:10–18, iangoi tabeua kabuanibwai ni maiun tamneia ataei ake a kaitarai ao ko na kanga ni buokiia ni kakorakoraiia ni kaitarai.
Waaki ni Kakukurei aika a Kona ni Karaoaki
-
Ngkai e wareware temanna te ataei n I-Ebeto 6:10-–18, tuanga temanna te ataei bwa e na karinanii ke ni koreia iaon te burakibooti mwakoron nako te otanga ake a taekinaki. Bukin tera e kakaawaki te otanga n te buaka? Ti na kanga ni katokaa otanga ni bwai n tamnei iaora ni katoa bong?
-
Anganiia ataei n tatabemaniia bwa a na korotamnei ao ni korea aran mwakoron nako te otanga are e taekinaki inanon I-Ebeto 6:14–17. A na kanga taian mwakoro n otanga aikai ni kamanoira man te buakaka? Tera ae e berita iai te Uea nakoia naake a katokai ana otanga te Atua iaoia? (taraa I-Ebeto 6:13). Tera ae nanonaki n “tei n ekia nako n te bong ae buakaka”?
Kaungaa te Kamatebwai n te Mweenga
Kaoiia ataei bwa a na tarataraa temanna n te wiiki aei ae e namakinna bwa kanga te ianena. Kaewenakoia bwa a na karaoa te bwai teuana ni karekea buokan te aomata anne.
Kanakoraoan Ara Anga reirei
Buokiia ataei aika a uarereke bwa a na reirei man koroboki aika tabu. A kona ataei aika uarereke n reiakinaki man koroboki aika a tabu, ma a riai kabotoa aia iango iaon te kibu ae ti teuana ke ti te mwakoro n taeka ae kakawaki. Ko kona ni kaoiia ataei bwa a na teirake ngkana a ongo te taeka ke te mwakoro n taeka ae onoti. (Taraa Reirei n Ana Kawai te Tia Kamaiu, 25–26.)