Okitobwa 2–8

I-Ebeto

“Ibukin Karaoiroaia Ake a Itiaki”

Iai reitaki ae ko noori imarenan taian rongorongo n te maungatabu ni kabuta ao ana reta Bauro nakoia I-Ebeto?

Korei Am Namakin

Ngke e moanna ni butanako te eungkerio i Ebeto, e riki “te kiriwe ae moan te korakora” (Makuri 19:23) ibuakoia i Ebeto. Aomata aika kaain te aba ake a rabakau ni karaoi bwaai man baia are a karaoi nne taromaurian nakon te anti n aine ae te beekan a taraa te aro ni Kiritian bwa te bwai ae kakamaaku nakon maiuraoia, ao n te tai ae waekoa “a on n te un, … ao e buta te kawa arei n te kiriwe” (taraa Makuri 19:27–29). Iangoa te aomata ae e a tibwa rairaki nakon te euangkerio n te aro aei. A mwaiti i Ebeto ake a butimwaea ao ni maiuakina te euangkerio ribuakon te “kiriwe” aei (Makuri 19:40), ao e kakoaua Bauro nakoia bwa “Kristo … ara raoi” (I-Ebeto 2:13–14). Taeka aikai, n raonaki ma te kakao aio n “kakiaki mai roumi te taetae ni kananomaraki, ma te nanobuaka, ma te un, ma te takarua, ma te taetaebuaka” (I-Ebeto 4:31), a taraa ni karaunano n taina ae ngkai nakon are mai imwaaina. Ibukiia i Ebeto, n aron ae ibukira n tatabemaniira, e roko te korakora ni kaitara te buakaka “iroun te Uea, ao ni korakoran mwaakana” (taraa I-Ebeto 6:10–13).

Iango ibukin te Kamatebwai i bon Iroum ni Koroboki aika Tabu

I-Ebeto 1:4–11, 17–19

Te Atua e rinea, ke kaman katabuai, ni kakoroi nanon katabeau i aon te aba.

E taetae Bauro ibukiia Aika Itiaki bwa a “kaman katabuaki” iroun te Atua ao n “rineaki … man moan katean te aonaba. E ngae n anne, n aron ae ataia Beretitenti Henry B. Eyring,e aki nanonaki aei “bwa e riai te Atua ni moantai ni baireia bwa antai mai buaoia natina ae E na kamaiuia ao ni katauraoa te euangkerio nakoia, ao tekoraki ake a bon tuai man ongo taekan te euangkerio tao a bon aki ‘rineaki.’ … Ana babaire te Atua e bon rangi n tatangira riki nakon anne. Tamara are i Karawa e ingainga nanona ni kan bootia ao ni kakabwaiaia Ana utu ni kabane” (“Gathering the Family of God,” Riaona, Meei 2017, 20–21). Natin te Atua ni kabane a kona ni butimwaea te euangkerio ao ana otenanti ibukin te mwakuri are e karaoaki ibukiia maate inanon tembora aika tabu.

E ngae ngke akea temanna ae e a kaman baireaki bwa e na kamaiuaki ke e na aki, kaotioti ni boong aikai a taekinna bwa tabeman mai buakoia natin te Atua a bon rineak ke “ni kaman katabuaki,” n te aonaaba n tamnei bwa a na kakoroi nanon katabeaia ni kakoroa bukin ana kantaninga te Atua i aon te aba. Ngkai ko wareka I-Ebeto 1 ao Gospel Topics, “Foreordination” (topics.ChurchofJesusChrist.org), iangoia e kanga te koaua aei ni kaineti nakoim.

I-Ebeto 1:10

Te Atua e na “booti bwaai ni kabane inanon Kristo.”

Bukin tera ngkai ko taku n am iango bwa ara bong e aranaki bwa “a koro raoi bongina”? Tera ae e nanonaki ni “booti Bwaai ni Kabane Inanon Kristo”? Ngkai ko iangoi kibuntaeka aikai, wareki koroboki aika tabu akana imwiina I-Ebeto 4:13; 2 Nibwaai 30:7–8; Reirei ao Berita aika Tabu 110:11–16; 112:30–32; 128:18–21. Ko na bae n namakina kairam iroun te tamnei ni korea oin am kamatata ibukin kibuntaeka aikai.

Taraa naba David A. Bednar, “Booti Bwaai ni Kabane Inanon Kristo,” Riaona,Nob. 2018, 21–24.

I-Ebeto 2:19–22; 3:1–7; 4:11–16

E kateaki te Ekaretia i aoia abotoro ao burabeti, ao Iesu Kristo are bon ngaia atibun te mwaninganinga.

Ni kaineti nakon I-Ebeto 2:19–22; 3:1–7; 4:11–16, bukin tera ngkai iai ara burabeti ao ara abotoro? Iangoi aia rongorongo burabeti ao abotoro ake ko ongo n taian te maungatabu ni kabuta. A kanga aia reirei ni kakoroi nanon botoniango ake e kabwarabwara Bauro? N aron te katoto, a kanga reirei aikai ni buokiko n aki “kakamwaieieaki nako n te angi nako ae te reirei nako”?

E kanga Iesu Kristo n riki bwa atiibun te maninganinga ibukin te Ekaretia? E kanga n riki bwa atiibun te maninganinga ibukin maium?

Taraa naba Mwakuri 4:10–12.

Iesu Kristo bon atibun te maninganinga ibukin te Ekaretia.

I-Ebeto 5:21–6:4

Iriiran ana banna ni katoto te Tia Kamaiu e kona ni kakorakora au reitaki ma au utu.

Ngkai ko wareka I-Ebeto 5:21–6:4, iangoia bwa a kanga reirei aika inanon kiibu aikai ni kona ni kakorakora am reitaki ma am utu.

E kakawaki bwa ko na ataia bwa ana taeka Bauro n I-Ebeto 5:22–24 a koreaki inanon te rongorongo ibukin katei ni boibuako n ana tai. Burabeti ao abotoro ni boong aikai a reirei bwa mwaane aki rine riki nakoia aine ao buumwaane ao buuaine nanona a na riki bwa “rao aika ti te arona ngaia” (taraa “Te Utu: Te Katanoata nakon te Aonaaba,” ChurchofJesusChrist.org). Ma ngaia are, ko teimatoa ni kona ni kakaea te reirei ae bongana n I-Ebeto 5:25–33. N aron te katoto, e kanga Kristo ni kaota Ana tangira ibukiia Aika Itiaki? Tera ae kabwarabwaraki ibukin aio bwa a kanga buumwane ao buuaine, n riki bwa rao aika ti te arona ngaia, ni karineia i bon imarenaia? Tera taian rongorongo ake ko kunei i bon ibukim inanon kiibu aikai?

I-Ebeto 6:10–18

Ana bwai ni buaka te Atua e na buokai ni kamanoai man te buakaka.

Ngkai ko wareka I-Ebeto 6:10–18, iangoia bukin tera ngkai Bauro e aran mwakoron bwai ni buaka n te aro are karaoia. Tera ae kamanoko mai iai ana “bwai ni buaka te Atua”? Tera ae ko na karaoia bwa ko aonga ni karin iaom mwakoron nako bwai ni buaka n ae bwanin riki ni katoa bong?

Taara naba 2 Nibwaai 1:23; Reirei ao Berita aika Tabu 27:15–18.

Iango ibukin Kamatebwai ni Koroboki aika Tabu n te Utu ao te Bootaki n te Tairiki

I-Ebeto 1:10.N reirei taekan te kibu aei, Unimwaane David A. Bednar e kabongana te katoto ibukin te roobu (taraa “Booti Bwaai ni Kabane inanon Kristo”). Iangoia kaota nakoia am utu te roobu ao anganiia bwa a na taua ao n tuoia ngkai ko tibwaua mwakoron ana rongorongon Unimwaane Bednar. E kanga te Atua ni booti bwaai ni kabane inanon Kristo? Ti kanga ni kakabwaiaki man te bobootaki aio?

I-Ebeto 2:4–10; 3:14–21.Kaoia kaain te utu bwa a na tibwauai aia taneiai ike a namakina ana tangiria ao ana nanoanga te Atua ao Iesu Kristo are a kabwarabwaraaki inanon kiibu aikai.

I-Ebeto 2:12–19.A kona ni kaungaia am utu ni katei taian oo man te uninga ke bwaai tabeua ake iai inanon mweengam ao ngkanne kabwakai i aontano. Ngkai Bauro e kananona te “oo” imarenaia Tientaire ao Iutaia, aekakira tenaan oo aika a na kona ni kaokoroia aomata ni boong aikai? E kanga Iesu Kristo n “urui” o aikai? E kanga n “raoiakini [ra] nakon te Atua”? (te kibu 16).

I-Ebeto 6:10–18.A kona am utu ni karaoi oin aia “bwai ni buaka ake mairoun te Atua” ni kabonganai bwain bataia. Te witeo “The Armour of God” (ChurchofJesusChrist.org) e kona ni buokiia kaain te utu ni katamneia te bwai ni buaka aio, ao a kona n kakaei kabwarabwara aika bebete inanon “The Whole Armor of God” (Friend, Tuun 2016, 24–25). A kanga mwakoron bwai ni buaka n tatabeua ni kamanoira n te maiu n tamnei? Tera ae ti kona ni karaoia ni ibuobuoki imarenara n “karin bwaai ni buaka ake mairoun te Atua” (I-Ebeto 6:11) ni katoa bong?

Ibukin iango aika a mwaiti riki ibukiia ataei, taraa te kamataata n te wiiki aei n Nakomai, Iriirai—Ibukin te Moanrinan.

Te anene ae rineaki: “Hope of Israel,” Anene n Taromaurinambwa 259.

Kanakoraoan Am Kamatebwai

Kariaia te Tamnei bwa e na kairiko n am kamatebwai. Ko na rang kanamakin nakon te Tamnei ngkai E kairiko nakon bwaai ake ko riai n reiakin ni katoa bong, e ngae ngke aio e na kairiko nakon kamatebwaian atuun te rongorongo are ko bon tuai baireia mai moana.

Ni kaaki i aora ana bwai ni buaka te Atua e kona ni kamanoira n te maiu n tamnei.