Okitobwa 9–15

I-Biribi; I-Korote

“I Boni Konai Bwaai ni Kabane ni Karaoi iroun Teuare Kakorakoraai.”

Nningai te kabanea n tai are ko wareki namakin tamnei ake ko korei inanon am tai ni kamatebwaia te Nu Tetemanti? E na kona n ibuobuoki rinanoan taian wirikiriki ake a tia n reke iroum.

Korei Am Namakin

E koroi ana reta Bauro nakoia I Biribi ao I Korote ngke e mena n te umwa ni kaikain i Rom. Ma reeta aikai akea iai tangin te bwana ae ko na kantaningaia bwa mairoun temanna ae mena n te karabuuti. E taekina riki taekan te kimwareirei, te kakatonga ao te katituaraoi Bauro ibukin karawawataki ao kakatai: “E bon tataekinaki Kristo,” e taku, “ao I kakatonga iai, eng, ao N na boni kakatonga” (I-Biribi 1:18). Ao “ba I boni ngae n aki mena i roumi n rabatau, ma I boni mena naba i roumi n tamneiu, ao I kimareirei ma n taratarai … teimatoan onimakinani Kristo i roumi” (I- Korote 2:5). N te koaua, “te rau are mairoun te Atua” are e rinanona Bauro inanon ana tai n rawawata “are e aki konaki n ataki teutana” (I-Biribi 4:7), ma n aki ongei baikara e bon koaua. N oin kataakira, ti kona n namakina te aekaki n rau aei ao ” n kimareirei iroun te Uea n aki toki” (I-Biribi 4:4). Ti kona, n aron ae e karaoia Bauro, ni kabwanina onimakinan Iesu Kristo, “are e reke mai Rouna kamaiura” (I-Korote 1:14). Ti kona ni kangai, n aron are e karaoia Bauro, “I boni konai bwaai ni kabane ni karaoi iroun Teuare kakorakoraai” (I-Biribi 4:13; taraa naba I-Korote 1:11).

Iango ibukin te Kamatebwai i bon Iroum ni Koroboki aika Tabu

I-Biribi 2:5–11; I-Korote 1:12–23

E kateaki au onimaki iaon Iesu Kristo.

E taku Beretitenti Russell M. Nelson bwa ngkana e kabotoa ana kamatebwai n koroboko aika tabu iaon kiibu ibukin taekn Iesu Kristo, e korakora mwiina nakoina are e namakinna bwa titebo ma “te aomata ae kaokoro!” (“Karekean Mwaakan Iesu Kristo nakon Maiura,” Riaona, Meei 2017, 39). Iangoia n iira ana katoto ngkai ko wareka I-Biribi ao I-Korote (taraa ai moarara riki I-Biribi 2:5–11; I-Korote 1:12–23). Tera ae ko reiakinna ibukin te Tia Kamaiu? A na kanga koaua aikai ni buokiko bwa ko na riki bwa “te mwaane ae e kaokoro ” ke te aine?

I-Biribi 2:12–13

Ti bon “mamakuria oin kamaiu[ara]”?

Tabeman aomata a kabongana te kibuntaeka “mamakuri oin kamaiuara” (I-Biribi 2:12) ni boutoka te iango are ti bon tii kamaiuaki bon man oin ara kekeiaki. Tabeman a kabongana ana reirei Bauro “ba kama kamaiuaki n te akoi ibukin te onimaki” (I-Ebeto 2:8) n taekinna bwa akea mwakuri aika a kantaningaki ibukin te kamaiuaki. E ngae n anne, koroboki aika tabu, n reitaki ma a na koroboki Bauro, e katerea raoi te reirei ni kainnanoan ni kauoua ana akoi Iesu Kristo ao ana kekeiaki temanna ibukin reken te kamaiuaki. Ao e ngae inanon ara kabanea ni kona ni mamakuri oin kamaiuara, “bon te Atua ae karika i nanomi te mamakuri” (I-Biribi 2:13; taraa naba I-Biribi 1:6; 2 Nibwaai 25:23; Bible Dictionary, “Grace”).

I-Biribi 3:4–14

N ana euangkerio Iesu Kristo a kakawaki anganano ni kabane.

E mwaiti ae e anganako Bauro ngke e rairaki nakon ana euangkerio Iesu Kristo, n reitaki ma nnena are karekea n ana bootaki Iutaia n riki bwa te Bwaritaio. N I-Biribi 3:4–14, taraia bwa tera ae a reke iroun Bauro ibukina ngkai e tauraoi ni karaoi anganano ibukin te euangkerio. Tera ana namakin ibukin ana anganano?

Ngkanne iangoa arom n riki bwa ana reirei. Tera ae ko a tia n anaganano ibukin ana euangkerio Iesu Kristo? Tera baika ko a tia ni karekei? Iai riki rakan anganano ae ko namakinna bwa ko kan karaoi n riki bwa ana reirei te Tia Kamaiu ae babane nanona?

Taraa naba 3 Nibwaai 9:19–20; Reirei ao Berita aika Tabu 58:2–5; Taylor G. Godoy, “Teuana Riki te Bong,” Riaona, Meei 2018, 34–36.

I-Biribi 4:1–13

I kona ni karekea te kantaninga iroun Kristo, n aki tabe ma au kaangaanga.

Maiun Bauro bon te kamataata ae itiaki n te koaua are e kabwarabwaraki iroun Beretitenti Russell M. Nelson: “Ngkana ti kabotoi maiura iaon … Iesu Kristo ao Ana euangkerio, ti kona n namakina te kimwareirei n aki tabe bwa tera ae riki—ke akea te bwai ae riki—inanon maiura. E roko te kimwareirei mai irouna ao Ibukina” (“Joy and Spiritual Survival,” Riaona,, Nob. 2016, 82).

Ngkai ko wareka I-Biribi—riki te mwakoro 4—kakaei rongorongo ake a na kona ni buokiko ni kunea te kimwareirei n aron nako maium. Nningai te tai ae ko a tia n rinanon “te rau are mairoun te Atua” inanon te tai ni kanganga? (te kibu 7). Nningai te tai ae ko karekea iai te korakora “rinanon Kristo” ni karaoi bwaai aika a kanganga? (te kibu 13). Bukin tera ngkai ko taku n am iango bwa e kakawaki “te kataua te aro” inanon bwaai nako? (te kibu 11). E kanga maiuakinan anua inanon te kibu 8 ni buokiko ni kunea te kimwareirei n arom nako?

Taraa Aramwa 33:23; Dieter F. Uchtdorf, “Grateful in Any Circumstances,” Riaona, Meei 2014, 70–77.

I-Korote 3:1–17

Ana reirei Iesu Kristo a riki n “boou” ngkai a maiuakina Ana euangkerio.

Ko na kanga n ataia bwa Iesu Kristo e buokiko n riki bwa te “mwaane ae boou [ke te aine]”? Teuana te kawai n iango raoi aei bon ukeukeran I-Korote 3:1–17 ao karaoi rinanin katei, anua ni maiu, ao ana mwakuri “te aomata ni kawai” ao tabeua rinan ibukin katei, anua ni maiu, ao ana mwakuri te “aomata nabangkai.”

Korei am iango bwa e kanga te Tia Kamaiu ni bitiko, bwa ko aonga ni kona n rinanoi n taai aika a na roko ao iangoia raoi bwa ko kanga n karikirakea arom.

Iango ibukin Kamatebwai ni Koroboki aika Tabu n te Utu ao te Bootaki n te Tairiki

I-Biribi.A na bae am utu ni kinai taeka kimwareirei ke kakatonga ae a kaokiokaki n angin te tai n I-Biribi. Ni katoaa te tai are ko kaitibo iai ma teuana mai buakon taeka aikai, ko konaa n toki moa ao maroroakina te bwai are e reiakinna Bauro bwa e kanga aron karekean te kimwareirei.

I-Biribi 2:14–16.Ti na kanga n “ota kanga itoi i aon te aba”?

I-Biribi 4:8.A kona kaain am utu ni kinai bwaai “n iangoi” ake a bootau ma te kabwarabwara inanon te kibu aei (taraa naba Taekan te Onimaki 1:13). A kanga ni kakabwaiaki am utu man iriiran ana reirei Bauro?

I-Korote 1:23; 2:7.Tao a kona am utu ni wareki kiibu aikai inanon tekatekaia ni katotobibia aan te aroka ke n taraa tamnein te aroka (n aron teuana are e airi ma te kamatata aei). Tera ae nanonaki n “kateimatoaki” ma ni “kaneneaki” i nanoni Kristo? Ti na kanga ibuobuoki imarenara ni kakorakorai wakaara n tamnei?

I-Korote 2:2–3.A na kona ni kakukureiia am utu man kanoaakin te “bwaoki ni kaubwai” ni bwaai ake a tei ibukin te “kaubwai” ao “te kaubwai ibukin te wanawana ao te ataibwai” are ko kunei n te euangkerio.

Ibukin iango aika a mwaiti riki ibukiia ataei, taraa te kamataata n te wiiki aei n Nakomai, Iriirai—Ibukin te Moanrinan.

Te anene ae rineaki: “Rejoice, the Lord Is King!,” Anene n Taromauri, nambwa 66.

Kanakoraoan Ara Anga reirei

Maiuakina am koaua. “Ko reirei bwa antai ngkoe,” E reirei Unimwaane Neal A. Maxwell. “Ana ururingaki riki am mwakuri … nakon te koaua ae onoti n te reirei ae onoti” (inanon Reirei n ana Kawai te Tia Kamaiu, 13).

E reirei Bauro bwa a riai ni “kaneneaki waakan” ara onimaki i nanon Iesu Kristo (I-Korote 2:7).