“Okitobwa 23–29. 1 ao 2 Timoteo; Tito; Biremon: ‘Ko Na Riki Bwa te Katotoo ibukiia aika Onimaki,’” Nakomai, Iriirai—Ibukiia Aomata n Tatabemaniia ao Utu: Nu Tetemanti 2023 (2022)
“Okitobwa 23–29. 1 ao 2 Timoteo; Tito; Biremon,” Nakomai, Iriirai—Ibukiia Aomata n Tatabemaniia ao Utu: 2023
Okitobwa 23–29
1 ao 2 Timoteo; Tito; Biremon
“Ko Na Riki Bwa te Katotoo ibukiia aika Onimaki”
N tabetai e ibuobuoki karokoan titiraki teuana ke raka n am iango inanon am kamatebwai ni koroboki aika tabu. Kaoa te Tamnei bwa e na kairiko ni kaekaeka ngkai ko kamatebwai ao korei kairi mai ieta ake ko karekei.
Korei Am Namakin
Inanon ana reta Bauro e koreaki nakon Timoteo, Tito ao Biremon, ti karekea teutana te ota inanora iroun ana toro te Uea. Tiaki aron ana reta Bauro ake tabeua nakoia te bootaki ae bwanin, aika a koreaki nakoia n tatabeman—raoraon Bauro ni kaan ao raona ni mwakuri n ana mwakuri te Atua—ao aron warekaia kanga ai aron ongoraeakinan te marooro. Ti noora Bauro ni kaungaiia Timoteo ao Tito, taan kairiiri aika uoman n aia bootaki, inanon aia taromauri n aia Ekaretia. Ti nooria n kaumakia raoraona ae Biremon n raoiakinna ma raona aika Itiaki ao n akoia kanga tarina inanon te euangkerio. Ana taeka Bauro a bon taekinaki ni kaineti nakoira, ao e na bon aki kantaninga anne are aomata aika mwaiti n teuana te bong a na bon warekia. Ma ti na kunei inanon reeta aikai reirei ao kaungaunga ibukira, bwa tera ara kamwakuri i bon iroura n ana mwakuri Kristo are e na reke.
Iango ibukin te Kamatebwai i bon Iroum ni Koroboki aika Tabu
Antai Timoteo ao Tito?
Timoteo ao Tito a tia ni beku ma Bauro iaon tabeua mwanangana ni mitinare. Inanon aia mwakuri, a karekea karinean Bauro ao onimakinana. Timoteo e weteaki imwina n aron te tia kairiiri n te Ekaretia i Ebeto, ao Tito e weteaki n aron te tia kairiiri i Kirete. Inanon reeta aikai, Bauro e angan Timoteo ao Tito te kaetieti ao te kaungaunga ni kaineti nakon katabeaia, are n ikotaki ma kabwarabwaraan te euangkerio ao weteaia mwaane ni beku bwa bitiobi.
Taraa naba Bible Dictionary, “Pauline Epistles,” “Timothy,” “Titus.”
“E na tai taku temanna ba akea bongam, ma ko na riki ba aia tia kakairi aomata aika onimaki” (1 Timoteo 4:12).
“Ko Na Riki Bwa Aia Tia Kakairi Aomata aika Onimaki.”
Timoteo e bon taraa ni kairake, ma Bauro e ataia bwa e kona n riki bwa te tia kairiiri ae korakora n te Ekaretia n aki taraaki kairakena. Tera reirei are e anga Bauro nakon Timoteo n 1 Timoteo 4:10–16? E na kanga te reirei aei ni buokiko ni kairiia tabeman nakon Ana euangkerio te Tia Kamaiu?
Taraa naba Aramwa 17:11.
“Ba e aki anganiira te Atua te nano ae mamaku; ma E anganiira te nano ae korakora, ae tatangira te aba, ae kawanawana te aba.”
2 Timoteo e kakoauaki e riki bwa kabanean ana koroboki Bauro are e koroia, ao e taraa n ae e bon ata ana tai iaon te aba e a uarereke (taraa 2 Timoteo 4:6–8). E kanga ana namakin Timoteo, n ataakina ni waekoa ana bon akea ana taan reirei aika onimakinaki ao taan kairiiri? Tera ae taekinna Bauro ni kaunga? Ko kona naba ni wareware ma oin am kakaewenako ao mwaakum n ami iango. Tera rongorongon te kantaninga ao kaungaunga are iai iroun te Uea ibukim n 2 Timoteo?
Taraa naba Kelly R. Johnson, “Enduring Power,” Riaona, Nov. 2020, 112–14.
Maiuakinan te euangkerio e katauraoa te kamanomano man kangaangan tamnei n te kabanea ni bong.
Ti bane ni maiu n “te kabanea ni bong” are Bauro e taekinna, ao “taai ni kamamate” ana roko (2 Timoteo 3:1). Ngkana ko wareka 2 Timoteo 3, korei tai ni kamamate n te kabane ni bong are a taekinaki (taraa naba 1 Timoteo 4:1–3):
Ko kona n iangoi katooto man kamamate aikai n te aonaaba ni katobibiko—ke inanon oin maium? A na kanga kamamate aikai, n aroia aomata aika kabwarabwaraki n kibu 6, “kawakawa nakon [am auti], ao ni kairi [ko] kabaeko”? Tera reirei ae ko kunei inanon 2 Timoteo 3, ao inanon koroboki aikai, are e na konaa ni kawakiniko ao am utu ni mano man kangaanga n tamnei aikia? (taraa, ibukin te katooto, 1 Timoteo 1:3–11; 2 Timoteo 2:15–16; Tito 2:1–8).
Antai Biremon?
Biremon bon te Kiritian are e a tia n rairaki nakon te euangkerio iroun Bauro. Biremon iai ana toro ae arana Onetimo, are imwina e rabanako nako Rom. Onetimo e kaitibo ma Bauro ao e rairaki nakon te euangkerio. Bauro e kaoka Onetimo nakon Biremon ma te reta ni kaunga Biremon ni butimwaea Onetimo “tiaaki bwa te toro, ma iaon te toro, te tari ae tangiraki” (Biremon 1:16).
Ana reirei Iesu Kristo a akoiia imarenaia n aroia taari ma mwaneia.
Ngkana ko wareka ana reta Bauro nakon Biremon, iangoia bwa ko kanga n maiuakina ana reirei nakon irekerekem ma tabeman. Aikai inano tabeua titiraki are ko kona n iangoia:
-
Kiibu 1–7: Tera taeka n aron “raora ni mwakuri” ao “raora ni buaka” n taekinaki nakoim iaon te iraorao ibuakoia aika Itiaki? Nningai ae ko a tia iai n namakina “kaitiakaki iroun” tarira ke mwanera inanon Kristo?
-
Kiibu 8–16: Tera ae nanonaki n “kabaeaki” ao “ononiia”? Bukin tera Bauro e rineia ni ononiia Biremon n oneamwin are kabaea teuanne? Tera ae kantaningaia Bauro bwa e na tia man kaokan Onetimo n oki nakon Biremon?
-
Kibu 16: Tera ae nanonaki n riki bwa “tariu [ke mwaneu] ae tangiraki … inanon te Uea”? Iai temanna ae ko kina are e kainanoa karekeana n te kawai aei?
Iango ibukin Kamatebwai ni Koroboki aika Tabu n te Utu ao te Bootaki n te Tairiki
-
1 Timoteo 2:9–10.Tera ae nanonaki ni “kunnikai [niia] … n ae tamaroa”? Baikara mwakuri aika tamaroa are a kona ara utu ni karaoia n te wiiki aei? Ko riai n ikotaki n anenea n te anene iaon karaoan ae tamaroa n aron “Have I Done Any Good?” (Anene n taromauri, no. 223).
-
1 Timoteo 4:12.Ni buokiia kaain am utu n tangiria n riki bwa “te katooto irouia taan onimaki,” iangoia ni kaoiia ni korea tamneiia aomata ake a tia n riki bwa katooto aika tamaroa nakoia. A kanga aomata aikai ni kaungaira bwa tina iriira Iesu Kristo? Ana rongorongo Beretitenti Thomas S. Monson’ “Be an Example and a Light” (Riaona, Nob. 2015, 86–88) konaa n anga tabeua iango iaona e kanga te riki bwa katooto nakoia tabeman.
-
1 Timoteo 6:7–12.Bukin tera ko iangoia “tangiran te mwane bon waakan baika a bubuaka ni kabane”? Tera kabuanibwai man katuruturuan maiura iaon te mwane ke ara bwai? Ti na kanga n riki n rauaki ma kakabwaia ake iroura?
-
2 Timoteo 3:14–17.Ni kaineti ma kibu aikai, tera kakabwaia ake a roko nakoia ake a ataia ao kamatebwaia koroboki aika tabu? Tao a kona kaain te utu n tibwauai koroboki aika tabu ake a tia ni kunea ao n riki n onoti “manenana.”
-
Biremon 1:17–21.Tera ae e tangiria Bauro ni karaoia ibukin Onetimo? E kang aei n ti te arona nakon ae tangiria te Tia Kamaiu ni karaoia ibukira (tara naba 1 Timoteo 2:5–6; Reirei aoBerita aika Tabu 45:3–5). Ti na kanga n ira aia katooto Bauro ao te Tia Kamaiu?
Ibukin iango aika a mwaiti n reireinaia ataei, taraa te kamataata n te wiiki aei n Nakomai, Iriirai—Ibukin te Moanrinan.
Anene aika rineaki: “Shine On,” Aia Boki n Anene Ataei, 144.
Kanakoraoan Ara Anga reirei
Reirei reirei aika itiaki man bebete. Te euangkerio e tikiraoi n aron bebetena (taraa Reirei ao Berita aika Tabu 133:57). N onea mwiin kataan te kakukureiakia am utu ma reirei e kainnanoate katauraoi ae mwaiti, kataia n reirei n ae itiaki ao man bebete. (taraa 1 Timoteo 1:3–7).
“Mairoun te ataei a e atatai n koroboki aika tabu, are e kaotai nakoira ibukin kamaiuara rinanon ara onimaki iroun Kristo Iesu” (2 Timoteo 3:15).