Okitobwa 16–22

1 ao 2 I-Tetaronike

”Kakororaoa ae Tuai ni Kororaoi n Am Onimaki”

Ngkana ti aki korei mwiin ara namakin are ti karekei mairoun te Tamnei, ti na bon mwaninga. Tera ae kairiko te Tamnei bwa ko na korei ngkana ko tia ni wareka 1 ao 2 I-Tetaronike?

Korei Am Namakin

I Atenai, Bauro ma Tira a bukinaki bwa “uaake a kakiriweia kain aonnaba (Mwakuri 17:6). Aia kabwarabwara a kaunii nanoia taan kairiiri ibuakoia Iutaia, ao taan kairiiri aikai a kakiriwei nanoia aomata nakon te takarua (taraa Mwakuri 17:1–10). N tokina, Bauro ao Tira a tuangaki bwa a na kitana Tetaronike. Bauro e raraomakiniia I-Tetaronike ake a tiba rairaki ao bainikirinaia are a kaitara, ma e bon aki reke okina ni kawariia. Ngke I aki konai ni kamaanai riki n taona nanou, e koreia, “I kanakoa ba I aonga n atai ami onimaki.” Ni kaekaana, ana tia ibuobuoki Bauro ae Timoteo, are e a kaman mwakuri i Tetaronike, “uotaki nakoira tamaroan taekan te onimaki ao ami tangira” (1 I-Tetaronike 3:5–6). Ni koauana, taian I-Tetaronike aika Itiaki ake a kinaaki bwa katooto “nakoia ni kabane ake a onimaki” (1 I-Tetaronike 1:7), ao taekan aia onimaki e a buta nakon taabo ake a raroa. Iangoa kimwareirein Bauro ao raunnanona n ongo are ana mwakuri ibuakoia e “bon aki matebuaka” (1 I-Tetaronike 2:1). Ma e ataia Bauro bwa te kakaonimaki n taai aika nako e aki tau ibukin kateimatooan maiun tamneia nakon taai ake imwaai, ao e raraomaakina aia katitiki taan reirei aika kewe ake ibuakoia ake a Itiaki (taraa 2 I-Tetaronike 2:2–3). Ana rongorongo nakoia, ao nakoira, bon te reitinako nakon “kakoroa are e tuai ni koro n [ara] onimaki” ao ni “karikirakea riki ao riki” inanon te tangira (taraa 1 I-Tetaronike 3:10; 4:10).

Iango ibukin te Kamatebwai i bon Iroum ni Koroboki aika Tabu

1 I-Tetaronike 1–2

Ana reirei Kristo a beku ibukiia tabeman ma te koaua ao te tangira.

N 1 I-Tetaronike, ana taeka Bauro e kaota te tabeianga ao te kimwareirei iroun temanna are e a tia ni kabanea nanona ni beku ibukiia natin te Atua. Riki inanon te moan mwakoro ake uoua man 1 I-Tetaronike, ko na kunei taeka ao kibu n taeka are e kabwarabwara anuaia ao aia mwakuriia ana reirei te Uea. Ibukin te katooto, tera ae ko reiakinna man 1 I-Tetaronike 1:5–8; 2:1–13 ibukin taekan te beku iroun te Uea?

Iangoa taekan oin am tai ni beku ibukin te Atua ao Natina. Tera ae ko kunei inanon mwakoro aikai ae kaungako bwa ko na karikirakea am beku? Iangoia n titirakiniko taian titiraki are a boboto iaon am kukune, n aron ae “Ngai te katooto man bwaai ae I atai?” (taraa 1 I-Tetaronike 1:7).

1 I-Tetaronike 3:7–13; 4:1–12

“Kamaiti ao reitaki n ami i-tangiItangiri.”

Bauro e kukurei n aia kakaonimaki I-Tetaronike aika Itiaki (taraa 1 I-Tetaronike 3:7–9). Ma e tangiriia naba n “nakonako man nakonanko” inanon te kakaonimaki anne (1 I-Tetaronike 4:1). Ngkana ko wareka 1 I-Tetaronike 3:7–13; 4:1–12, iangoi kawai ao riki “karikirakea riki ao riki” maiu n tamnei (1 I-Tetaronike 4:10). Ibukin te katooto, taraia bwa Bauro e kabonganai taeka n aron “mimitong” ao “katabuaki.” Tera ae ko reiakinna man ana koroboki Bauro iaon nanon taeka aikai? E na kanga te Tia Kamaiu ni buokiko n riki rake n mimitong ao tabu?

Taraa naba te Kairi nakon Koroboki aika Tabu, “Mimitong,” “Katabuaki,” scriptures.ChurchofJesusChrist.org.

1 I-Tetaronike 4:16–18; 5:1–10; 2 I-Tetaronike 1:4–10

Ngkana I kakaonimaki ao taratararaoi, N na bon riki n tauraoi ibukin Kauaokin te Tia Kamaiu.

Inanon 1 I-Tetaronike 5:1–10, Bauro e kabonganai tabeua taeka ni karariki n reirei iaon te tai are Iesu e na oki nakon te aonaaba. Ngkana ko kamatebwaia taeka ni karariki aikai, iangoi ni korei namakin are e roko nakoim iaon Kauaokin te Tia Kamaiu Iesu Kristo:

• “Te tia ira n te bong”:

• “Maraki n ariiri iroun te aine”:

• Tabeua taeka ni karariki ae ko kunei:

Tera riki koaua aika ko reiakin man 1 I-Tetaronike 4:16–18; 5:1–10; 2 I-Tetaronike 1:4–10? Tera ae ko kairaki bwa ko na karaoia n taratara ao ni katauraoi ibukin rokon te Tia Kamaiu?

Taraa naba D. Todd Christofferson, “Katauraoi Ibukin Okin te Uea,” Riaona, Meei 2019, 81–84.

2 I-Tetaronike 2

Kitanan te koaua, ke te bwaka man te koaua, e bon taetae ni burabetiaki bwa e na roko imwain te Kauaoki.

Ibuakoin rikiraken te bainikirinaki, a mwaiti I-Tetaronike aika Itiaki ae a kakoaua Kauaokin te Tia Kamaiu bwa e a bon kaan. Ma e ataia Bauro bwa imwain okin Iesu nakon aonaaba e na iai te bwaka man te koaua—te kaitara ke kitanan te koaua (taraa 2 I-Tetaronike 2:1–4). Ko kona ni kananoa otam man Kitanan te koaua ae Korakora—ao am kakaitau ibukin manga Kaokan Bwaai—man iangoakin tabeua man aika imwina:

• Koroboki aika tabu are e taekina Kitanan te Koaua: Itaia 24:5; Amota 8:11–12; Mataio 24:4–14; 2 Timoteo 4:3–4

• Koroboki aika tabu are e kaota kitanakin te koaua e bon kaman moanaki inanon ana tai Bauro: Mwakuri 20:28–30; I-Karatia 1:6–7; 1 Timoteo 1:5–7

• Taratarakin mwiin Kitanan te Koaua ae Korakora mairouia taan iango ao taan kairiiri ni kataia ni uota katean aaro ni Kiritian:

  Martin Luther: “Akea ae I tia ni ukoria n riaon manga katean te Ekaretia ni kaineti nakon koauan kainibaire ake a kariaiakaki man Boki aika Tabu. … I bon ti taekinna bwa taekan te aro ni Kiritian e a kaman toki n otinako ibuakoia koraki ake a riai tia ni kawakinna” (inanon E. G. Schweibert, Luther and His Times: The Reformation from a New Perspective [1950], 590).

  Roger Williams: “Kitanan te koaua … e a kaman uruanaki ni kabane are ana kona ni kuneaki man imwin kitanan te koaua ni karakoa Kristo e na kanakoia abotoro aika boou ni uniki ekaretia aika boou” (inanon Philip Schaff, The Creeds of Christendom [1877], 851).

Taraa naba 2 Nibwaai 28; Atuun Rongorongon te Euangkerio, “Kitanan te Koaua,” topics.ChurchofJesusChrist.org.

Iango ibukin Kamatebwai ni Koroboki aika Tabu n te Utu ao te Bootaki n te Tairiki

1 I-Tetaronike 3:9–13.Tera am namakin iaon ana namakin Bauro are e karekea ibukiia raoraona? Ti na kanga ni “karikirakea ao ni kaonaki n tangiran temanna nakon temanna”? (kibu 12).

1 I-Tetaronike 4:13–18.Tera kibuntaeka inanon kiibu aikai aika a taekina te Mangauti aika a anganiko te raunnano?

1 Tetaronike 5:14–25.Ngkana ko rinanon ana reirei Bauro inanon 1 Tetaronike 5:14–25, kaoiia kaain te utu n tatabeman ni kakaea te kibu n taeka are te utu e kona katuruturu iaona. Karioi kawai ni katekei am kibu n taeka akanne ni mweengam bwa te kauring. Ibukin te katooto, aomata n tatabeman a na kona ni kakaea ke koroi tamnei are e kamataata ma te katooto ke kamatoatoa te kibu n taeka are e rineia teuanne ke neienne.

2 Tetaronike 3:13.Ti na namakina te “kua ni karaoan ae tamaroa”—kaonaki ma te namakin, tao, ma kainanoaia ana reirei? Tera ae e na buokiira ngkana ti namakina te aekaki aei? (Taraa I-Karatia 6:9; Reirei ao Berita aika Tabu 64:33.) Ti na kanga ni boutoka temanna ma temanna ngkana e riki aei?

Ibukin iango riki ibukin reireinakiia ataei, taraa kamataata n te wiiki aei n Nakomai, Iriirai—Ibukin te Moanrinan.

Te kuna ae e rineaki: “I’m Trying to Be like Jesus,” Aia Boki n Anene Ataei,, 78–79.

Kanakoraoan Am Kamatebwai

Ukoukora te kaotioti ni katoabong. “Te kaotioti e aki toki n roko ‘teutana imwiin teutana’ (2 Nibwaai 28:30), tiaki ni kabane n teuana te tai. … Tai iangoa te [kamatebwai n te euangkerio] bwa kaanga te bwai ae ko na “karekea te tai ibukina” ma kanga te bwai ae ko kakaraoia n tainako” (Reirei n Ana Kawai te Tia Kamaiu,, 12).

Kristo ae Mangauti, iroun Robert T. Barrett