“Okitobwa 30–Nobembwa 5. Ebera 1–6: ‘Jesus Christ, “te Tia Karekea te Maiu ae Akea Tokina,”’” Nakomai, Iriirai—Ibukin te Moanrinan: Nu Tetemanti 2023 (2021)
“Okitobwa 30–Nobembwa 5. Ebera 1–6,” Nakomai, Iriirai—Ibukin te Moanrinan: 2023
Toanibanni i Kireeta, iroun Annie Henrie
Okitobwa 30–Nobembwa 5
Ebera 1–6
Iesu Kristo, “te Tia Karekea te Maiu ae Akea Tokina”
Tera koaua aika ko kunei n Ebera 1–6 ae na buokiko ni reiakinia am ataei? Kamwataui wirikiriki mairoun te Tamnei are a roko n am katauraoi, ao tai mwaninga ni korei.
Kaunga te Tibwatibwa
A butimwaea te kakao ataei ni banen te reirei bwa a na kareka te kibu are a kona n tibwaia? Ngkana eng, anganiia aia tai bwa a na tibwatibwa. Ngkana tiaki, iango te bwai ae a reikinna man kiibu n te wiki ae nako are a kona n tibwaia.
Reirei te Reirei: Ataei aika a Uarereke Riki
I kakoaua Iesu Kristo.
Kiibu aikai a kona ni buokii ataei n reiakina taekan Iesu Kristo ao ni kamatoaa aia reitaki ma Ngaia.
Waaki ni Kakukurei aika a Kona ni Karaoaki
-
Karekei koaua ibukin Iesu Kristo man Ebera 1:1–10; 2:8–10, 17–18, ao korei iaon beeba. Karabai beeba n te umwanreirei, ao kaoiia ataei bwa a na kakaei. Buokiia ataei ni wareki koaua ake a koreaki iaon beeba akanne, ao maroro bwa tera nanon koaua akanne. Ngkana e riai, kabwarabwara bwa Iesu e aranaki bwa Natin te Atua ibukina bwa Tamara are i Karawa bon taman Tamneina ao Rabwatana naba.
-
Katea tamnein te Tia Kamaiu, ao tibwaia bwa bukin tera ko kaitau ibukina. Tuangiia ataei bwa a na ikaruoruo n taua te tamnei ao ni tibwaia bwa bukin tera e kaitau ibukin Iesu Kristo.
Tamara are i Karawa e tangirai bwa ti na “aki kamatoa nano[ra].”
Ebera 3 e kabwarabwaraia tibun Iteraera ake a matoa nanoia ao a totokoi ana kakabwaia te Uea. Aio bon te kauring nakoia ni kabane bwa ti na aki kamatoai nanora.
Waaki ni Kakukurei aika a Kona ni Karaoaki
-
Uota te bwai ae e kona n tooma te ran (n aron te bwaubwau ke te kunnikai) ao te bwai ae matoatoa (n aron te atibu). Kaoiia ataei bwa a na riing bwaai aikai ao ni kabwarabwarai. Kabwaroa teutana te ran ni bwaai aikai, ao katerea bwa te ran e aki toomaki n te bwai are matoa are te atibu. Kabwarabwara bwa nanora a riai ni marau ao n aki matoa bwa ti aonga ni butimwaea ana koaua ma ana tangira Tamara are i Karawa.
-
Korea te aati man te bwai ae maraurau, n aron te kunnikai, ke te bwai matoa riki, n aron te kaatibooti. Maroro ma ataei bwa kaokoron te nano ae marau ao te nano ae matoa. Tibwai katoto man koroboki aika tabu irouia aomata aika marau nanoi ke aika matoa nanoia, n aron Nibwaai, Reimwan, ma Remuera (1 Nibwaai 2:16–19); Bauro(Mwakuri 9:1–22); ke Iotebwa Timiti (Iotebwa Timiti—Rongorongo 1:11–20). Ngkai ko tibwai katooto, kaoiia ataei bwa a na kotea te nano ae marau ke te nano ae matoa.
E weteaki Aaron “iroun te Uea” (Ebera 5:4). E Weteaki Aaron nakon te Mwakuri, iroun Harry Anderson
Taan taua te nakoanibonga a weteaki iroun te Atua.
Ebera 5:4 bon te kibu ae kakawaki bwa e kabwarabwara taan taua te nakoanibonga a riai ni weteaki iroun te Atua. Aio naba e riai iroun te aomata ae weteaki bwa e na beku n ana Ekaretia te Atua.
Waaki ni Kakukurei aika a Kona ni Karaoaki
-
Wareka Ebera 5:4 nakoia ataei. Tuanga te aomata ae iai irouna te Nakoanibonga bwa e na kabwarabwara te nakoanibonga. E kona naba n tibwaa arona ni beku ibukiia tabemwaang ni karaon tabena. Tuanga te aine n te uoote bwa e na tibwaa arona ngke e kamataoaaki nakon nakoana n te Ekaretia. Kaungaia bwa e na tibwaa ana kakabwaia are e karekei mairoun te Uea n te mwaaka n ibuobuoki.
-
Buokiia ataei ni kamatei taeka man te kanimaua n Taekan te Onimaki. Kaota am koaua bwa aomata aika a weteaki bwa a na karao ana mwakuri te Uea a weteaki rinanon te kaotioti.
Reirei te Reirei: Ataei aika a Ikawai Riki
I kakoaua Iesu Kristo.
Te Reta nakoia Ebera e koreaki ni kakorakoraia kaain te aro i Ebera n aia onimaki iroun Iesu Kristo. E kona naba ni kakorakoraia am ataei.
Waaki ni Kakukurei aika a Kona ni Karaoaki
-
Katabeia ataei ni kiibu man Ebera 1:1–10; 2:8–10, 17–18, ao kaoiia ataei bwa a na wareki kiibu akanne ni tarai koaua ibukin Iesu Kristo. Tuangiia bwa a na tibwai ke ni korei aia kukune iaon te burakibooti. Tera riki ae ti ataia iroun Iesu Kristo? A kona ataei ni kunei iango man te kuna ae “I Know That My Redeemer Lives” (Anene n Taromauri, nambwa. 136) ke “He Sent His Son” (Aia Boki n Anene Ataei, 34–35).
-
Kaoiia ataei bwa a na korei tamnei ma aia karo. Tuangiia bwa a na tibwa te bwai ae tii te arona ma aia karo. Kabwarabwara bwa ngke Ebera 1:3 e taku bwa Iesu Kristo bon “katotongan te [Atua] ,” nanona bwa Iesu ao Tamara are i Karawa bon ti arona aroia ma kateia. Maroro ma ataei bwa iriiran Iesu Kristo e kaaniira nakon Tamara are i Karawa.
Karekean ana kairi ma ana kakabwaia Tamara are i Karawa, ti riai n “aki kamatoai nano[ra].”
N Ebera 3, rongorongoia tibun Iteraera n te rereua e kabonganaaki ni reirei kakawakin kamaraun nanora. Ti na kanga ni kabongana te karaki aei n reireia ataei n ara kiraati te reirei aei?
Waaki ni Kakukurei aika a Kona ni Karaoaki
-
Tuangiia ataei bwa a na iangoi bwaai aika matoa ao aika marau. (Ngkana e riai, uoti bwaai ake a kona n noori.) Bootaki wareka Ebera 3:8. Tera nanon ae ko kamatoaa nanom? Bukin tera te Atua e tangira te nano ae marau?
-
N oin am taeka, tibwa karakinaia Iteraera ngke a kamatoai nanoia nakon te Uea n te rereua, (taraa Warekaia Iteraera 14:1–12; Ebera 3:7–19). Tuangiia ataei bwa a na katei kain te karaki aei. Tera ae e na riki ngkana ti kamatoaa nanora nakon te Uea ma Ana euangkerio?
-
Kaoiia ataei bwa a na wareka Mataio 13:15; Ebera 3:15; Motiaea 11:29; ao Mote 6:27. Tuangiia bwa a koreia iaon te burakibooti bwain te rabwata ake a taekinaki ni kiibu aikai. Tera ae nanonaki n te taninga ae bono taninga, te mata ae aki noraba, ao te nano ae matoa? Ti na kanga n taraia bwa taningara, matara, ao nanora a tauraoi ni butimwaea bwanaan te Tamnei?
Taan taua te nakoanibonga a weteaki iroun te Atua.
Ebera 5 bon te tai ae tamaroa ni maroro bwa tera te nakoanibonga—mwaakan ao ana kariaia ni mwakuri n aran te Atua—ao aron karekeana.
Waaki ni Kakukurei aika a Kona ni Karaoaki
-
Kaota te tamnei Mote E angan Aaron te Nakoanibonga (Boki n Tamnei n te Euangkerio, nambwa. 15) ngkana te ataei e wareka Ebera 5:4. Kabwarabwara bwa te Nakoanibonga ae te Aaron e ingoanaki iroun Aaron. Buokiia ataei n iango taben aomata aika iai irouia te Nakoanibonga ae te Aaron, (n aron te bwabetito, kakabwaia, kabutan te toa, ao kaoaia aomata bwa a na kaaniia Kristo; taraa Reirei ao Berita aika Tabu 20:46–48, 59).
-
Buokiia ataei bwa a na iangoi kawai ake a karekei iai kariaiakaki aomata. Te katooto, e kanga te tia reirei, taokita, ke te tia tei ni karekea te kariaiakaki? E kanga n anga ana kariaia te Atua? Kaoiia ataei bwa a na iangoa te titiraki aei ngkai a wareka Ebera 5:4 ao te kanimaua n taekan te onimaki. Buokiia ataei bwa a na iangoia aomta n te uoote ake iai irouia te kariaiakaki mairoun te Atua—n aroia taan taua te nakoanibonga, ao mmwaane ma aiine ake a tia ni kaokoroaki nakon nakoa aika kakaokoro.
Kaungaa te Kamatebwai n te Mweenga
Kaoiia ataei bwa a na tibwaa te kibu, anene, ke te mwakuri ni kauring are a reiakinna n te kiraati ma aia utu n tain te kainutu.
Kanakoraoan Ara Anga reirei
Ataei a kona ni kinaa ana wirikiriki te Tamnei. Reireiniia ataei bwa namakinan te rau, te tangira, ao te kimwareirei are a karekea ngkana a taetae ke n anenea taekan Iesu Kristo ao Ana euangkerio e roko mai iroun te Tamnei ae Raoiroi.