“Nobembwa 13–19. Iakobo: ‘Ao Kam na Riki ba Taan Toua Mwin ana Taeka te Atua, ao Tiaki ti Taan Ongo,’” Nakomai, Iriirai—Ibukin te Moanrinan: Te Nu Tetamenti 2023 (2021)
“Nobembwa 13–19. Iakobo,” Nakomai, Iriirai—Ibukin te Moanrinan: 2023
Nobembwa 13–19
Iakobo
“Ao Kam na Riki ba Taan Toua Mwin ana Taeka te Atua, ao Tiaki ti Taan Ongo”
Ana Reta Iakobo iai inanona koaua aika mwaiti ake a kona ni kakabwaiaia ataei ake ko reireiniia. Ira ana kairi te Tamnei n ataia bwa tera koaua ae ko na tibwai ma ngaiia. Iango ake a koreaki n tekamataata aei e kona n ibuobuoki.
Kaungaa te Tibwatibwa
Kaoiia ataei bwa a na tibwaua reirein te euangkerio are a uringnga are a reiakinna ma aia utu n te wiiki ae nako ke man aia kiraati n te Moanrinan n te Tabati ae nako. Imwiin aia tibwatibwa ataei n tatabemaniia, tuanga temanna te ataei n te kiraati bwa e na kakimototoa n taekina te bwai are e a tia n tibwaaki.
Reirei te Reirei: Ataei aika a Uarereke Riki
I kona n butia Tamara arei i Karawa bwa e na buokai n reiakina te bwai ae koaua.
Buokiia ataei ake ko reireiniia n ataia bwa a kona n nakon Tamara are i Karawa ibuin karekean te wanawana. Ni karaoan aei e na kakabwaiaia n ae korakora ngkana a kaitaraaki ma titiraki aika matoatoa.
Waaki ni Kakukurei aika a Kona ni Karaoaki
-
Buokiia ataei bwa a na kaokioka atongan te kibu n taeka “Ngkana akea ana rabakau temanna i buakomi, ao e na butia te Atua” (Iakobo 1:5). Ti kangaa ni butiia te Atua taian titiraki? E kanga aron kaekaara Irouna?
-
Kaota tamnein te Moan Kaotioti (Gospel Art Booknambwa 90), ke kaota te witeo “Joseph Smith’s First Vision” (ChurchofJesusChrist.org). Kabwarabwaraa bwa e kanga warekan Iakobo 1:5 ni kaungaa nanon Iotebwa Timiti bwa e na tuanga Tamara are i Karawa ni buokia n ana titiraki (taraa Iotebwa Timiti—Rongorongo 1:1–20). Kaota am koaua ae te Atua e kaekai tataro, ao taekinna bwa ataei a kona n tataro Nakoina ngkana iai aia titiraki. Tuangiia ataei bwa ana korei oin aia tamnei iaon Iotebwa Timiti ngke e wareka Iakobo 1:5 ao n tataro nakon Tamara are i Karawa.
I kona n taetae ma te akoi.
N aron are e taekinna Iakobo, reiakinan ae ko na taekin bwaai aika a raraoi nakoia aomata e na buokiira n riki n aiaron Iesu Kristo (taraa Kakobo 3:2).
Waaki ni Kakukurei aika a Kona ni Karaoaki
-
Kaota tamnein te bwai ae karewe ao te bwai ae mao. Buokiia ataei n ataia bwa Tamara are i Karawa e tuangiira bwa ti na kabongana newera n taekin bwaai aika karewe (ke tamaroa) ao tiaki aika mao (ke aki raraoi) (taraa Iakobo 3:10). Buokiia n iangoi katotoon bwaai aika tamaroa ake ti kona n taekin nakoia aomata.
-
Anganiia ataei n tatabemaniia tamnein te aomata ae taetae. Kaoiia ataei bwa a na taua ieta ngkana ko taekina te bwai ae tamaroa are ti kona ni karaoia n ara taetae (n aron tataekinan te koaua, kamoamoaan temanna, ao anga te buoka nakon temanna) ao ni katikua inano ngkana ko taekina te bwai ae ti aki riai n taekin ma newera (n aron taekinan te kewe, tataboraean temanna, ao n aki tangiria n ongo irouia kaaro).
-
Kamatoa te rongorongo are n Iakobo 3:1–13 n uaia n anenea te kuna iaon te riki n akoi, n aron “Kindness Begins with Me” (Aia Boki n Anene Ataei, 145).
Karekean ana kakabwaia te Atua e kainnanoa te taotaonakinnano.
Te taotaonakinnano e aki n ae e a bon reke naba, riki irouia ataei. Iangoia bwa ko na kanga n kabongana ana reirei Iakobo ni buokiia ataei ake ko reireiniia n reiakina te taotaonakinnano.
Waaki ni Kakukurei aika a Kona ni Karaoaki
-
Buokiia ataei bwa a na tibwaua te tai ngke a riai n tataninga ni karekea te bwai are a tangiria. Tibwa am taneiai ngke ko riai n tataninga. Kabwarabwaraa bwa tataningaan te bwai are ti tangiria n akea te ngurengure e aranaki bwa te tiku n taotaonakinnano.
-
Kabwarabwaraa Iakobo 5:7 n oin am taeka, ao kaota tamnein te koraa ke te kabwebwe. Bukin tera ti kainnanoa te taotaonakinnano ngkana ti kabwebwea te aroka? Tera te bwai ae na riki ngkana ti kataia ni katika te aroka ae kabwebweaki bwa e aonga ni waekoa rikirakena? Ko na tangiria naba n taetae ma te ataei bwa tera ae nanonaki n rangi n taotaonakinnano ma aomata tabeman ao bon ngaira. Taekina koauana bwa te Atua e kona ni buokiira n reiakina te taotaonakinnano.
-
Tibwa rongorongon Iobi, are e taekinaki n Iakobo 5:11 bwa te katooto iaon te taotaonakinnano (taraa “Iobi,” ni Karakin Te O-Tetemanti, ke te witeo n ChurchofJesusChrist.org). E kanga ni kakabwaiaaki Iobi ibukin ana taotaonakinnano?
Reirei te Reirei: Ataei aika a Ikawai Riki
Tamara are i Karawa e na buokai n reiakina te koaua ngkana I ukora Ana ibuobuoki.
Ataei ake ko reireiniia a bon uarereke teutana iaan Iotebwa Timiti ngke e wareka Iakobo 1:5 ao e namakina te tamnei bwa e na kawara Tamara are i Karawa n te tataro. Iangoia bwa ko na kanga ni buokiia ataei ni kakorakoraa aia onimaki bwa te Atua e na buokiia ngkana akea wanawanaia.
Waaki ni Kakukurei aika a Kona ni Karaoaki
-
Tuangiia ataei bwa a na tuangko karakinan ana Moan Kaotioti Iotebwa Timiti n oin aia taeka (taraa Iotebwa Timiti—Rongorongo 1:5–20; taraa naba te witeo “Ana Moan Kaotioti Iotebwa Timiti” iaon ChurchofJesusChrist.org). E kanga warekan Iakobo 1:5 ni buoka Iotebwa? Buokiia ataei bwa a na iangoi katooto tabeua iaoia aomata inanon koroboki aika a tabu ake a karekei kaeka nakon aia tataro, n aron Nibwaai (taraa 1 Nephi 11:1–6) ao tarin Iareta (taraa Ita 2:18–3:9). Tera bwaai tabeua aika ti kona ni butiia iai Tamara are i Karawa n te tataro?
-
Wareware ma ataei n Iotebwa Timiti—Rongorongo 1:10–14. Kaoiia ataei bwa a na kakaei bwaai ake e karaoi Iotebwa Timiti ni karekea kaekaan ana titiraki. Ti na kanga n ira ana katooto Iotebwa ngkana iai ara titiraki?
“Te onimaki n akea te mwakuri e bon mate.”
Ko na kanga ni buoka te ataei n nora te irekereke imarenan te bwai are a kakoauaa ao te bwai are a karaoia?
Waaki ni Kakukurei aika a Kona ni Karaoaki
-
Kaota te tooti ae akea baeterena nakoia ataei, te bentira ae akea wiina, ke te bwai riki teuana ae e aaki bongana ke ni “mate.” Kaoiia ataei bwa a na wareka Iakobo 2:14–17. A kanga bwaai aikai ni kaota te koaua are inanon kiibu aikai?
-
Kaoiia tabeman ataei bwa a na karaurau ni wareka Iakobo 1:22–27 ao tabeman a wareka 2:14–18. Ngkanne kaoiia bwa a na tibwaia bwa tera ae a kona ni karaoia ni kaotia bwa bon ngaiia taan karaoa nanon te taeka. N aron teuana, a kanga ni kawakin aia berita ake n te bwabetito? A ataa temanna ae e aoraki ke n tiku n ti ngaia ae a kona ni kawaria? A na kanga ni buokiia riki aia utu? Ko kona naba ni kauringiia n taeka ake a tia n ongo n tain botakin te toa n te bong aei. Ti na kanga n riki bwa taan karaoa nanon te taeka?
“Aberaam e kakoauaa te Atua” (Iakobo 2:23). Aberaam irarikin ana Oke Mamre, iroun Grant Romney Clawson
I kona n rineia bwa n na taetae ma te akoi.
Te taeka are ti taekinna nakoira n tatabemaniira e na taraa n aki kakawaki, ma n aron are e taekinna Iakobo, a kona ni korakora mwiia nakoira, ibukin ae raoiroi ke ae buakaka.
Waaki ni Kakukurei aika a Kona ni Karaoaki
-
Iai temanna n te uoote, ae tao te ataei ae ko reireinna, ae e a tia ni mwamwakuri ma aoti ke n ataa rongorongon taian booti? Ko kona ni kaoa teuanne ke neienne bwa a na katauraoi nonori iaon ana reirei Iakobo n Iakobo 3:3–4 iaon kabonganaan taeka n akoi. Ke katauraoi ae bon oin am nonori. Tera ae ti reiakinna iaon tararuaan newera man taian katooto aikai?
-
Kaoiia ataei bwa a na wareka Iakobo 3:1–13 ao ni korea tamnein te bwai teuana ae a kunea ae e reirei iaon tararuaan newera. Kaoiia bwa a na tibwa aia tamnei ao tera ae a reiakinna. Botaki n anenea te kuna iaon kabonganaan taeka aika akoi, n aron “Let Us Oft Speak Kind Words” (Anene n Taromauri, nambwa 232).
-
Imwiin rinanoan Iakobo 3:1–13, ni bootaki, manga rinanon tein taian taetae inanon Kakorakoraia Kairake ([te boki ae uarereke, 2022], 12). Buokiia ataei ni katea aia kouru ni katamaroa aron aia taetae nakoia tabeman, ao ni kaungaia bwa a na butiia Tamara are i Karawa bwa e na buokiia iaon te kouru aei.
Kaungaa te Kamatebwai n te Mweenga
Kaoiia ataei bwa a na karaoi bwaai n te wiiki aei ae e kaineti ma are a reiakinna n te kiraati, n aron te tataro nakon Tamara are i Karawa ma aia titiraki ke ni kataia riki n rangi n taotaonakinnano. Tuangiia bwa a na tibwa aia taneiai n te kiraati n tain te kiraati ae e na roko.
Kanakoraoan Ara Angareirei
Buokiia ataei bwa ana rangi ni kakamwakuri. “Ngkai ko reireiniia ataei, anganiia bwa a na katei, korei, karan, ao ni karaoi bwaai. Bwaai aika a nano riki nakon waaki ni kakukurei—bwaai aika a kakawaki n reiakinaki” (Reirei n ana Kawai te Tia Kamaiu, 25).